Tupinnartuliat Biibilimi eqqaaneqartut upperisinnaavigit?

TUPINNARTUMIK oqaluttuarfigitikkuit, oqaluttuaa upperissanerlugu upperissannginnerluguluunniit oqaluttuartup tutsuiginassusia pingaartissimassanngikkaluarnerpiuk? Oqaluttuartup uppernassusia oqaluttuaq qanoq oqaluttuarineraa aamma eqqortunik oqaluttarnersoq apeqqutaavoq. Ukiorpassuarni eqqortumik oqaluttarsimappat salluliorfigisimanallu oqaluttuaa upperissallugu pissutissaqassaatit.

Biibilimi tupinnartulianik oqaluttuat aamma taamaapput. Pisimasut pimmata arlaannarpulluunniit inuusimanngilaq. Paasisinnaavarpulli Biibilimi oqaluttuat tutsuiginartuusut avatangiisit eqqortuuppata. Qanoq? Biibilimi tupinnartulianik oqaluttuat tutsuiginartuunerannut takussutissat ukuusut.

Tupinnartuliat amerlasuut inuit akornanni pisimapput. Ilaanni tusintilinnit allaat millionilinnit takuneqarsimapput. (2 Mosesi 14:21-31; 19:16-19) Inunnut isertortumik suliarineqanngillat.

Tupinnartuliat ajornakusoortuunngillat. Atortorissaarutit atorneqanngillat imaluunniit alutornartuliortoqanngilaq qullilersuisoqaraniluunniit. Amerlanertigut tupinnartuliat Biibilimi eqqaaneqartut piareersagaanngillat inunnilli kissaataasarlutik. (Markusi 5:25-29; Lukasi 7:11-16) Pisimasut tamakku tupinnartuliortumit piareersagaasimanavianngillat.

Tupinnartuliortut tusaamasanngorniarlutik, ataqqineqarniarlutik pisuunngorniarlutilluunniit tupinnartuliortanngillat. Guutili unnersiutiginiarlugu tupinnartuliortoqartarpoq. (Johannesi 11: 1-4, 15, 40) Tupinnartuliornikkut iluanaaruteqarniartut akuersaarneqanngilluinnarsimapput. — 2 Kunngit 5:15, 16, 20, 25-27; Apustilit Suliaat 8:18-23.

Tupinnartuliat assigiinngitsut Biibilimi eqqaaneqartut inunnit tupinnartuliarineqaannanngillat. Assersuutigalugu tasersuup anorersuullu qatsortinneqarneri, erngup viinninngortinneqarnera, siallertarunnaarnera sialleqqittalerneralu, inuit napparsimasut katsorsarneqarneri aamma tapiitsut isigisaqalernerat. Tupinnartuliat tamakku  allarpassuillu ersersippaat taama ittut pissaanermik nalinginnaanngitsumik aqunneqartartut. — 1 Kunngit 17:1-7; 18:41-45; Matthæusi 8:24-27; Lukasi 17:11-19; Johannesi 2:1-11; 9:1-7.

Akerlilersuisut tupinnartulianik takunnittut qularutiginngilaat tamakku pisimasuusut. Jiisusip ikinngunni Lazarusi makitimmagu Jiisusip akerlilersortaasa qularutiginngilaat Lazarusi toqungasimasoq. Qanormi assortorsinnaavaat? Lazarusimi ulluni sisamani ilivermiippoq. (Johannesi 11:45-48; 12:9-11) Allaat Jiisusip toqunerata kingorna ukiut hundredellit qaangiutereeraluartut juutit Talmudimik allattut suli miserratiginngilaat Jiisusi tupinnartuliorsinnaasimasoq. Apeqquserpaat kina tamakkununnga tunuliaqutaanersoq. Taamatuttaaq Jiisusip ajoqersugai juutinut eqqartuussisunut sassartinneqarmata ima aperinngillat: “Tupinnartuliorassi?” Aperippulli: “Pissaaneq suna atorlugu kiallu aqqani taamaaliorpisi?” — Apustilit Suliaat 4:1-13.

Tupinnartuliat Biibilimi oqaluttuarineqartut illit upperisinnaavigit? Sammeriikkatsinnit erserpoq, tupinnartuliat Biibilimi oqaluttuarineqartut tutsuiginartuusut. Tutsuiginartuunerannut aamma allanik tunngavissaqarpoq. Assersuutigalugu pisimasoqartillugu qanga, sumi inuillu pineqartut aqqi Biibilimi eqqaaneqartarput. Allaat Biibilimik isornartorsiuisartut tupigusuutigisarpaat oqaluttuarisaanermi annikitsualuttortai ilanngullugit eqqaaneqartarmata. Biibilimi siulittuutit hundredelikkuutaat annikitsualuttortaat allaat eqquussimapput. Tamatuma saniatigut qanoq pilluarluni attaveqatigiittoqarsinnaasoq siunnersuuterpassuaqarpoq — siunnersuutit qassinilluunniit ukioqaraluaraanni inunnut tamanut iluaqutaasinnaasut. Inuit attaveqatigiinnerannut tunngatillugu Biibilimi siunnersuutit nalissaqanngitsuusut uppernarsineqarsimavoq.

Biibilip tutsuiginartuunera suli qularigukku, soormi sukumiinerusumik misissuinissannik periarfissarsioruit? Ilisimasaqarnerujartortillutit upperinerulissavat. (Johannesi 17:17) Tupinnartuliat qangarsuaq pisimasut oqaluttuarineqartut tutsuiginartuusut paasilissavat. Tamakku upperilerukkit qanittumi qanoq pisoqarumaarnera pillugu Biibilimi allaatigineqarsimasut upperissallugit tunngavissaqarnerulissaatit.

[Qupp. 5-mi assiliartaq]

Jiisusip akerlilersortaasa qularutiginngilaat Lazarusi toqungasimasoq