Tupinnartuliat qanittukkut pisussat

ANNERTUUMIK pilatsitussanngorlutit pilattaasartoq siornatigut taamatut suliaqarsimanngitsoq paasigukku qanoq qisuariassagaluarpit? Ernumatsassagunarputit. Nakorsammi ilinnut suliarinnittussaq suliaminut pikkorissorsuulluni ilittulli pilatsissimasut hundredelillit iluatsilluartumik suliarisimappagit? Taassuma ikiorsinnaagaatit qularutiginnginnerussagaluarpiuk?

Ullumikkut silarsuaq avatangiiserisarput napparsimasutut ittoq “katsorsarneqarnissaminut” pisariaqartitsingaarpoq. Oqaatsini Biibili aqqutigalugu Guuti neriorsuivoq, paratiisi nunarsuarmi pilerseqqikkumaarlugu. (2 Petrusi 3:13) Tamannali pitinnagu ajussutsip peerluinnarneqarnissaa pisariaqarpoq. (Tussiaat 37:9-11; Ussatit 2:21, 22) Paratiisi pilersinneqaqqissappat pissutsit ajorluinnartut avatangiisitsinniittut nungutinneqaqqaartariaqarput. Taamaattoqassappallu tupinnartuliortoqartariaqarpoq! — Saqqummersitat 21:4, 5.

Jehovap Nalunaajaasuisa upperaat allanngornersuit tamakku ungasinngitsukkut piumaartut. Sooq? Tupinnartuliat Jehova Guutip piliareriigaasa ersersimmagu neriorsuutimi piviusunngortinnissaanut pissaaneqarluni. Tupinnartuliat arfinillit Biibilimi allaaserineqartut siunissami neriorsuutinut sanilliuteriakkit.

 Qanortoq siunissaq pillugu Biibilip neriorsuutaanik ilinniartuarnerit ingerlattuaruk. Uppernerit alliartortillugu neriuutit alliartussaaq — tassa nammineerlutit Jehovap tupinnartuliaanik iluaquteqarnissannik neriuuteqarneq.

[Qupp. 6, 7-mi ungalusaq]

TUPINNARTULIAQ:

JIISUSIP INUIT TUSINTILLIT TIMIUSANIK IKITTUINNARNIK AALISAKKANILLU NERISIPPAI. — MATTHÆUSI 14:13-21; MARKUSI 8:1-9; JOHANNESI 6:1-14.

NERIORSUUT:

“Nunap naatitassani naatippai; Guutip, Guutitta pilluaqqulisigut.” — TUSSIAAT 67:7.

ISUMAQARPOQ:

KAATTOQAQQINNGISAANNASSAAQ.

TUPINNARTULIAQ:

JIISUSIP TAPPIITSUT ISIGISAQALERSIPPAI. — MATTHÆUSI 9:27-31; MARKUSI 8:22-26.

NERIORSUUT:

“Taava tappiitsut isaat uisitaassapput, tusilartut siutaat ammarneqassapput.” — ESAJA 35:5.

ISUMAQARPOQ:

TAPPIITSUT TAMARMIK ISIGISAQALISSAPPUT.

TUPINNARTULIAQ:

JIISUSIP INNARLUUTILLIT AJORUNNAARSIPPAI. — MATTHÆUSI 11:5, 6; JOHANNESI 5:3-9.

NERIORSUUT:

“Tusiattoq tuttorsuartut pissigarumaarpoq.” — ESAJA 35:6.

ISUMAQARPOQ:

INNARLUUTILLIT TAMARMIK AJORUNNAASSAPPUT.

TUPINNARTULIAQ:

JIISUSIP ASSIGIINNGITSUNIK NAPPAATILLIT AJORUNNAARSIPPAI. — MARKUSI 1:32-34; LUKASI 4:40.

NERIORSUUT:

“Innuttaasoq kinaluunniit oqassanngilaq: ‘Napparsimavunga!’” — ESAJA 33:24.

ISUMAQARPOQ:

NAPPAATIT TAMARMIK PEERNEQASSAPPUT. PEQQILLUINNARNERPUT NUANNAARUTIGISSAVARPUT.

TUPINNARTULIAQ:

JIISUSI PINNGORTITAP NUKINGANUT NAALAGAAVOQ. — MATTHÆUSI 8:23-27; LUKASI 8:22-25.

NERIORSUUT:

“Illuliorumaarput namminneq inigisassaminnik viinnequtinillu ikkussuillutik inerititaat nerisassaminnik. . . . Sulilussinnassanngillat.” — ESAJA 65:21, 23.

“Qunutitaaneq ilinnit ungaseqisumiissaaq, aarleqqutissaqanngilatit, annilaarnartup tungaalissanngilaatit.” — ESAJA 54:14.

ISUMAQARPOQ:

PINNGORTITAMI AJUNAARNERSUIT PEQQINNGISAANNASSAPPUT.

TUPINNARTULIAQ:

JIISUSI TOQUSUNIK MAKITITSIVOQ. — MATTHÆUSI 9:18-26; LUKASI 7:11-17.

NERIORSUUT:

‘Ilivermiittut tamarmik ilivernit aniumaarput.’ — JOHANNESI 5:28, 29.

“Immallu toqusimasut imminiittut utertippai, taamatuttaaq toqup toqusullu inaata toqusimasortatik.” — SAQQUMMERSITAT 20:13.

ISUMAQARPOQ:

ASASAVUT TOQUSIMASUT MAKISSAPPUT.