Tupinnartuliat uppernarpat? — Akerliliissutigineqartartut nalinginnaasut pingasut

1: Tupinnartuliat pinngortitap inatsisaanut akerliugamik pisinnaanngillat. Pinngortitap inatsisaanik paasisimasavut misissueqqissaartartut avatangiisitsinnik paasisimasaannit tunngaveqarput. Inatsisilli taakku grammatikkimut najoqqutassanut assersuunneqarsinnaapput — najoqqutassat tamatiguunngitsoq naatsorsuutigineqarsinnaapput. Inatsisinilli paasisimasaqarnerput killilerujussuusinnaavoq. (Jobi 38:4) Misissueqqissaartartup tunniusimalluinnartup pinngortitap inatsisaasa ilaannik misissuinerminut inuunini tamaat atorsinnaavaa. Inatsilli ataasiaannarluunniit nikingappat paasisimasaminik allanngortitsisariaqassaaq. Tuluttut ussateqarpoq: “Qussuit tamarmik qaqortuuneranik isumaqarneq qussuup qernertup ataasiinnaap isuma aserorsinnaavaa.”

Naak tamakkiisumik paasisimasaqanngikkaluarluni isummertarnerup qanoq ajornanngitsiginera oqaluttuap quianartup uuma ersersippaa. John Locke-p (1632-1704) Hollandimiut aallartitaat aamma Siamip kunngiat pillugit oqaluttuaq oqaluttuaraa: Aallartitap nunani pillugu kunngimut oqaluttuarigamiuk oqaatigaa immap qaavatigut pisunneq ilaannikkut nagguaatsumut ajornarneq ajortoq. Kunngip tamanna upperinagu isumaqarpoq aallartitap salluliuukkaani. Kunngilli takusimanngisaannagaa aallartitap oqaluttuariinnarpaa. Kunngip ilisimanngilaa imaq qeriguni siku ima issutigilersinnaasoq allaat nagguaatsoq sikukkut pisussinnaalluni. Tamanna kunngimut uppernaalluinnarpoq piviusut tamakkerlugit ilisimanngimmagit.

Ullutsinni angusimasat ukiut qulikkuutaat siornatigut takorloorneqarsinnaanngitsut sammeriartigit:

● Timmisartorsuaq ilaasartaat 800-nik ilaasoqarsinnaasoq New Yorkimiit Singaporemut nalunaaquttap akunneranut 900 kilometerisut sukkatigaluni ingerlaarsinnaavoq.

● Videokkut attaveqaatit atorlugit inuit nunani allaneersut imminnut isigalutik ataatsimiissinnaapput.

● Erinarsuutit tusintilipassuit ikitsisit puuanit mikinerusumut immiunneqarsinnaapput.

● Pilattaasartut uummatinik timillu pisataasa ilaannik nuussisinnaapput.

Piviusut tamakku tunngavigalugit qanoq isummersinnaavugut? Ukiualuit matuma siornatigut ajornarpasittunik inuit sanasinnaappata taava Guuti silarsuarmik tassaniittunillu tamanik pinngortitsisoq paasisinnaarpianngisatsinnik ilaarsinnaanngisatsinnillu tupinnarnerungaartunik pinngortitsisinnaavoq. * — 1 Mosesi 18:14; Matthæusi 19:26.

2: Inuit uppilersinniarlugit tupinnartuliat Biibilimi eqqaaneqarsimapput. Biibilimi allassimanngilaq tupinnartuliat tamaasa upperissagivut. Akerlianilli Biibilimi tupinnartuliat aamma nalunaaqutit sakkortuut pillugit mianersoqquneqarpugut. Mianersoqqussut ersarissoq una maluginiaruk: “Inatsisaatsup tikiunnissaa Saatanip suliaraa, piumaarporlu pissaanersuaqarluni salluliuutaasunik nalunaaqutiliaqarluni tupinnartuliaqarlunilu.” — 2 Thessalonikamiut 2:9, 10.

Jiisusip Kristusip aamma mianersoqqussutigaa amerlasuut oqarumaartut imminut ajoqersugaallutik, ilumoortuunatilli. Ilaat allaat Jiisusimut oqarumassapput: “Naalagaq, Naalagaq, illit atikkut siulittuisarsimannginnerpugut, atikkullu anersaapilunnik anisitsisarlutalu amerlaqisunik tupinnartuliortarsimannginnerpugut?” (Matthæusi 7:22, New International Version) Jiisusili oqarpoq inuit taakku ajoqersukkamisut akueriumanagit. (Matthæusi 7:23) Taamaammat ersarippoq tupinnartuliat tamaasa Guutimeersuunerarlugit Jiisusip ajoqersuutiginngikkaa.

Guuti pallorfiginnitsiminut oqanngilaq upperisartik taamaallaat tupinnartulianik tunngavilersussagaat, piviusunilli toqqammaveqarluartunik tunngavilersorneqassasoq. — Hebræerit 11:1.

 Assersuutigalugu Biibilimi tupinnartuliat ilaat nalunnginneqarluartoq, Jiisusip Kristusip makititaanera, sammeriartigu. Ukiut arlallit qaangiuttut kristumiut Korinthimiittut apeqqusertalerpaat ilumut Jiisusi Kristusi makititaasimanersoq. Apustili Paulusip kristumiut taakku qanoq ikiorpai? Oqaannarpa: “Uppernerit alliartortiguk”? Naagga. Maluginiaruk qanorpiaq pisoqarsimaneranik eqqaasikkai. Allappoq Jiisusi ‘ilisaasoq ullullu pingajuanni makissimasoq Allakkat malillugit, takuneqartorlu Kefasimit kingornalu taakkunannga aqqaneq-marluusunit. Kiisalu qatanngutit 500-t sinnerlugit amerlassuseqartut ataatsikkut takuaat; taakkua amerlanersaat suli inuupput’. — 1 Korinthimiut 15:4-8.

Kristumiut taakku tupinnartuliaq taanna upperineraat apeqqutaava? Paulusi nangilluni oqarpoq: “Kristusili makissimanngippat taava oqaluussinerput asuliinnaassaaq, uppernersilu aamma asuliinnaassaaq.” (1 Korinthimiut 15:14) Paulusip tamanna nalinginnaatinngilaa. Jiisusi makititaasimassaaq imaluunniit makititaasimassanngilaq! Isiginnittut hundredellit taamanikkut suli inuusut oqaluttuaat pissutigalugit Paulusip tamanna qularutiginngilaa. Isiginnittut taakkua takusaminnik miserratiginninnerminngarnit toqorusunnerupput. — 1 Korinthimiut 15:17-19.

3: Tupinnartuliat pinngortitap nukinganik pilersitaannaapput ilinniagaqarsimanngitsunit paatsoorneqarsimasut. Misissueqqissaartartut ilaasa tupinnartuliat Biibilimi eqqaaneqartut nassuiarniartarpaat Guutimit piliarineqaratik pinngortitamit piliaasut. Isumaqarput, taama oqarnermigut Biibilimi oqaluttuat upperiuminarnerussasut. Naak pinngortitap nukinga tupinnartuliat ilaannut — soorlu nunap sajuttarneranut, perlunnut nunallu sisoortarneranut — pissutaasinnaasaraluartoq, nassuiaatit taakku ataatsimik assigiissuteqarput. Tassa, Biibilimi tupinnartuliat piffissaq eqqorlugu pisarneri isiginianngimmatigit.

Assersuutigalugu ilaata oqaatigaa Egyptenimi pisimasumi perluit qulit siullersaanni kuussuaq Nileni aanngortinneqarmat, issoq aappaluttoq aamma tappiorannartut aappalorujuttut flagellatinik taaneqartartut Nilenikkut supineqarsimasut. Biibilimili oqaluttuarineqarpoq kuussuaq marranngorani aappaluttoq, aanngortinneqartoq. 2 Mosesi 7:14-21 atuaqqissaarneratigut erseqqippoq Mosesip aqutsineratigut Aronip ajaappissani kuussuarmut Nilenimut anaammagu tupinnartuliaq pisoq. Kuussuaq pinngortitap nukingatigut allanngortinneqaraluarpalluunniit Aronip ajaappissani kuussuarmut piffissaq eqqorlugu anaammagu immini tupinnartuliaavoq!

Tupinnartuliat piffissaq eqqorlugu pinissaata pingaaruteqassusianut Israelikkut nunamut neriorsuutigisamut isingajalernerat aamma assersuutaavoq. Ingerlaarnerat kuussuarmit Jordanimit qarsutsisimasumit akornuserneqarpoq. Taava qanoq pisoqarnera Biibilimi oqaluttuarineqarpoq: “Palasilli Jordanip ernga isikkaminnik attorniariarmassuk imeq qulaanit kuuttoq unerarpoq pavanersuaq illoqarfiup Adamip . . . eqqaani ippiliukkatut isikkoqarluni.” (Josva 3:15, 16) Tamanna nunap sajunneranit imaluunniit nunap sisoorneranit pissuteqarpa? Oqaatigineqanngilaq. Piffissarli eqqorlugu pimmat tupinnartuliaavoq. Jehovap oqarneratut piffissaq eqqorlugu taama pisoqarpoq. — Josva 3:7, 8, 13.

Taava tupinnartuliat piusimallutillu pisinnaappat? Biibili naapertorlugu piusimapput pisinnaallutillu. Atuarneqarsinnaasut tunngavigalugit pinngortitap nukinganit pissuteqaannanngillat. Ullut tamaasa taamaattoqartanngimmat, tamanna isumaqarpa taamatut pisoqarsinnaanngilluinnartoq?

[Quppernerup ataani ilanngussaq]