1, 2. Petrusip kik­kut ‘qinik­kanik’ taavai, aam­ma sooq al­lap­pa “al­lamiuusutut” inuusut?

JIISUSIP qilam­mut uter­nerata kingor­na ukiut 30-t mis­saat qaangiut­tut apustili Petrusi al­lap­poq “takor­nar­taal­lutik najugaqar­tunut Pontusimi, Galatiami, Kap­padokiami, nunap im­mik­koor­tuani Asiami Bityniamilu”. Taak­ku aam­ma ‘qinik­kanik’ taavai. (1 Petrusi 1:1) Petrusip al­laf­figisai tas­saap­put tanitat Kristusip qilam­mi kun­ngioqatiginis­saanut ‘neriugisamut uumasumut er­nioq­qis­sitat’. (Atuakkit 1 Petrusi 1:3, 4). Soormiuna ‘qinik­kat’ taak­ku kingusin­nerusuk­kut ‘al­lamiuusutut [najugaqaral­lar­tutut, NW] takor­nar­taasutul­lu inuunerarai’? (1 Petrusi 2:11) Aam­ma sooq tamat­ta taman­na soqutigis­savar­put uf­fa silarsuarmi Jehovap Nalunaajaasui ikit­tuin­naat tanitatut, imaluun­niit toq­qak­katut, im­minut naatsorsuut­tut?

² Tanitat ukiuni hundredelin­ni siul­ler­ni inuusut ‘al­lamiuunerar­neqar­nerat’ naleq­qup­poq. Tanitat nunarsuarmiigin­nar­navian­ngil­lat. Apustili Paulusi ‘savar­pan­nguanut’ ilaasoq ima nas­suiaavoq: “Uagum­mi nunavigisar­put qilan­niip­poq, Naalak­kal­lu Jiisusi-Kristusip an­naas­sisutut tas­san­nga tikiun­nis­saa ilimagaar­put.” (Lukasi 12:32; Filip­pimiut 3:20) Taman­na isumaqar­poq tanitat toqunermik kingor­na nunarsuaq, Saatanimit aqun­neqar­toq, qimal­lugu qilam­mi toqujuitsuus­sasut. (Atuakkit Filippimiut 1:21-23). Tas­sa nunarsuarmi ‘al­lamiuusutut’ imaluun­niit najugaqaral­lar­tutut inuup­put.

3. ‘Savanut al­lanut’ tun­ngatil­lugu suna apeq­qutaaler­pa?

³ Taavami ‘savat al­lat’? (Johan­nesi 10:16) Biibilimi ajoqersuutigineqar­poq nunarsuup nunavigilernissaa neriuutigigaat. Tas­sani naas­saan­ngitsumik inuus­sap­put. Soormiuna oqarsin­naasugut aam­ma taak­ku najugaqaral­lar­tuusut?

4. Inuit politik­ki, ilisimatuus­suseq aningaasal­luun­niit atorlugit suna iluatsis­sin­naan­ngilaat?

⁴ Saatanip pis­sutsinik aaq­qis­suus­sinerata ajor­tup piunera Jehovamit akuerineqaral­lar­til­lugu kik­kut tamarmik, aam­ma kristumiut, Saatanip Jehovamut pikitsitsinera pis­sutaal­luni naal­liut­tuas­sap­put. Romamiut 8:22-mi ima al­las­simavoq: “Nalun­ngilar­pum­mi pin­ngor­titat tamarmik suli peqatigiil­lutik anersaarulul­lutil­lu nimaar­tut.” Inoqar­poq politik­ki, ilisimatuus­suseq aningaasal­luun­niit atorlugit inuit atugaan­nik pitsan­ngorsaaniar­tunik, iluatsitsisin­naan­ngil­lal­li.

5. 1914-imiil­li inuit mil­lionilik­kuutaat qanoq aalajangersimap­pat, aam­ma sooq?

⁵ 1914-imiil­li inuit mil­lionilik­kuutaat Jiisusimut Kristusimut, Guutip kun­ngin­ngor­titaanut, in­nut­taaniarlutik aalajangersimap­put. Taak­ku Saatanip aaq­qis­suus­sineranut ilaarusun­ngil­luin­nar­put. Saatanip silarsuaanik tapersersuerusun­ngil­lat. Guutil­li naalagaaf­fianik tapersersuinermut inuuner­tik pigisatil­lu ator­paat. — Romamiut 14:7, 8.

6. Sooq Jehovap Nalunaajaasui tamarmik najugaqaral­lar­tutut oqaatigineqarsin­naap­pat?

⁶ Jehovap Nalunaajaasui nunani 200-nit amerlanerusuni in­nut­taal­luar­tuup­put. Sumiluun­niit najugaqaraluarunik al­lamiuup­put imaluun­niit najugaqaral­lar­tuup­put. Politik­kik­kut in­nut­taaqatigiin­niluun­niit ajor­nar­torsiutit akuliuf­figin­ngisaan­nar­paat. Al­laat maan­nak­kut silarsuas­sami nutaami Guutip neriorsuutigisaani in­nut­taasutut im­minut isigip­put. Nuan­naarutigaat silarsuarmi ajor­tumi najugaqarallarnertik naggaser­neqangajalermat.

7. Guutip kif­fai qanoq ilil­lutik nunavis­sar­tik pis­savaat, sumilu?

⁷ Qanit­tuk­kut Jiisusi Kristusi Saatanip pis­sutsinik aaq­qis­suus­sineranik ajor­tumik suujun­naarsitsis­saaq. Kristusip naalak­kersuinerata naam­mal­luin­nar­tup ajor­ti naal­liuutil­lu atorun­naarsis­savai. Aam­ma Jehovap kisimi oqar­tus­saaneranut pikitsitsisut tamaasa peersis­savai. Guutip piumasaanut ilumoorfigin­nit­tut nunarsuup paratiisis­sap nunavigilernissaanut periarfis­sin­neqas­sap­put. (Atuakkit Saqqummersitat 21:1-5). Taamanik­kus­samut kik­kut tamarmik “kif­faan­ngis­suseq Guutip qitor­naasa  naalan­narsif­fis­sami pisas­saat pigilerlugu” pin­ngor­titat naal­liun­nar­toqar­neranut pis­sutaasunit tamanit aniguisin­neqarluin­narsimas­sap­put. — Romamiut 8:21.

8, 9. Petrusi al­lak­kami ‘uin­ngup pilerigisai ileq­qoris­san­ngik­kigut’ suna pivaa?

⁸ Petrusip kristumiut qanoq pis­suseqar­tariaqar­tut ima al­laatigaa: “Asasak­ka! Oqaaq­qis­saar­pas­si al­lamiuusutut takor­nar­taasutul­lu inuutil­lusi uin­ngup pilerigisai tar­nimut sorsut­tut ileq­qoreq­qunagit.” (1 Petrusi 2:11) Kristumiut tanitat taama al­laf­figai, siun­nersuul­li taman­na Jiisusip savaataasa al­lat aam­ma maleruar­tariaqar­paat.

⁹ Pilerigisat ilaat im­mini ajor­tuusariaqan­ngil­lat Pin­ngor­titsisup piumasaanut naaper­tuut­tumik pineqarunik. Taamaalior­neq inuunermik nuan­ner­nerulersitsisar­poq. As­sersuutigalugu nerisas­sanik imigas­sanil­lu mamar­tutorusun­neq ajor­tuun­ngilaq. Qanimut ikin­ngutinik peqateqar­neq sukisaarsaaqateqar­nerlu nuan­naarutigisar­pavut. Aam­ma aap­parisamik atoqateqarusun­neq pis­susis­samisoor­poq. (1 Korinthimiut 7:3-5) “Uin­ngup pilerigisai” Petrusip al­laatigisai tas­saap­put “tar­nimut sorsut­tut”. Tas­sa uin­ngup pilerigisai ajor­tut pineqar­put. Oqaatsit taak­ku Biibilimik nutsik­kani al­lani ‘piumatuujunermik’ aam­ma ‘ajor­tunik kis­saateqar­nermik’ nutser­neqarsimap­put. Erseq­qip­poq inut­tut kis­saat sunaluun­niit Jehovap piumasaanut akerliusoq Guutimul­lu at­taveqarluar­nitsin­nut ajoqutaasoq aqus­sin­naasariaqarip­put. Taamaan­ngip­pat kristumiutut inuugin­nar­nis­samik neriuuter­put navianar­torsior­tin­neqarsin­naavoq.

10. Saatanip kristumiunik silarsuarminut ilan­ngutsitsiniaanermini ilaatigut suut periaaserisar­pai?

¹⁰ Saatanip kis­saatigaa pis­sutsit aaq­qis­suus­saaneran­ni matumani “al­lamiuusutut” inuuner­put puius­sagip­put. Kis­saatigaa pigisalerituujus­sasugut, kinguaas­siuutitigut inuunerlun­neq kajungeris­sagip­put, inut­tut pingaaruteqar­toorusus­sasugut, im­minuin­naq eq­qarsaatigis­sasugut inuiaas­suser­pul­lu pingaar­tis­sagip­put. Paasisariaqar­par­pul­li tamak­ku tamarmik Saatanip nakutitsiniutigigai. Kis­saatipiluit tamak­ku itigar­tin­nis­saat aalajangiusimagutsigu erseq­qis­sumik takutis­savar­put Saatanip silarsuaanut ajor­tumut ilaarusun­nata. Ersersis­savar­put silarsuarmi matumani “al­lamiuusutut” inuul­luta. Kis­saatigil­luin­nagar­put anguniarlugulu ilungersuutigisar­put tas­saavoq Guutip silarsuaata naaper­tuil­luas­suseqarfiusup nutaap nunavigiler­nis­saa.

11, 12. Inuit takor­nar­tat ilaatigut qanoq isigineqar­tar­pat, inuil­lu ilaan­nit Jehovap Nalunaajaasui qanoq oqaatigineqar­tar­pat?

¹¹ Petrusip versi 12-imi nangil­luni nas­suiar­paa “al­lamiuusutut” inuuneq kristumiunut qanoq isumaqar­nersoq. Ima al­lap­poq: “Guutimik nalusut akor­nan­ni ajun­ngitsumik inuugitsi, tamatumuunar­piaq taak­kua ilis­sin­nik pinerlut­tuuneraal­lutik mamarliisar­tut takusin­naanias­sam­matigit suliasi ajun­ngitsut taak­kunuunatigul­lu Guuti un­nersiutigisin­naanias­sam­mas­suk ul­lormi takusar­neqarfis­sami.” “Al­lamiuusutut” inuusut tas­saap­put takor­nar­tat imaluun­niit inuit nam­min­neq nunagin­ngisamin­ni inuusut. Takor­nar­tat al­laaneruner­tik pis­sutigalugu ilaan­nik­kut isor­nar­torsior­neqar­tar­put al­laal­lu pinerlut­tutut isigineqar­tarlutik. Oqaloriaatsimik­kut, pis­susilersor­nermik­kut, atisalersoriaatsimik­kut al­laal­lumi isik­kumik­kut al­laanerusin­naap­put. Pis­suserin­nerisigul­li paasineqarsin­naavoq isiginerlun­neqar­nerat pis­sutis­saqan­ngitsoq.

 ¹² Taamatul­li kristumiut ilumoor­tut eq­qaamiumin­nit al­laanerusin­naap­put, as­sersuutigalugu eq­qar­tor­tak­kamik­kut aliik­kutarisar­tak­kamik­kul­lu. Atisalersoriaatsimik­kut kinaas­susersineqarajup­put. Taman­na pis­sutigalugu inun­nit paasinerluisimasunit ‘mamarler­neqar­tar­put’. Nalunaajaasul­li pis­suserin­nerat pis­sutigalugu inun­nit al­lanit ajun­ngitsumik eq­qar­tor­neqar­tar­put.

13, 14. Qanoq paasisariaqar­pa: “Ilisimas­suseq eq­qor­tuutitaavoq suliamigut”? As­sersuuteqarit.

¹³ Pis­suserin­ner­put pis­sutigalugu al­lat takusin­naas­savaat ‘mamarler­neqar­ner­put’ pis­sutis­saqan­ngitsoq. Jiisusi inun­nit kisimi Guutimut naalal­luin­nar­poq. Inun­nil­li ajor­tulior­nerar­neqar­poq. Oqar­toqar­poq nerrersual­laar­toq, viin­nimik atuival­laar­toq ajor­tulior­tunil­lu qanimut ikin­nguteqar­toq. Pis­suserin­nermigul­li ersersip­paa taamaat­tuunani. Jiisusi ima oqar­poq: “Ilisimas­suseq eq­qor­tuutitaavoq suliamigut.” (Mat­thæusi 11:19) Ul­lumik­kut­taaq taamaap­poq. As­sersuutigalugu Tysklandimi, Seltersimi Betelip eq­qaani najugal­lit isumaqar­put Betelik­kormiut inooriaasiat eq­qumiitsuusoq. Seltersil­li borgmesteriata Betelik­kormiut il­lersorlugit ima oqar­poq: “Nalunaajaasut tas­sani kif­far­tor­tut im­mik­kut inooriaaseqar­put, in­nut­taaqatigiin­nili kimul­luun­niit ajoqutaan­ngil­luin­nar­tumik.”

¹⁴ Al­lamik as­sersuuteqariar­ta: Jehovap Nalunaajaasui Ruslandimi Moskvami najugal­lit arlalin­nik ingasat­tunik ajor­tulior­nerar­neqar­put. Oqar­toqarsimavoq Nalunaajaasut ilaqutariin­nik avis­saar­tuutsitsisut, im­minor­nis­samut kajumis­saarisut nakorsar­tik­kumasan­ngitsul­lu. 2010-mili juunimi Europami Inuit Pisin­naatitaaf­fii pil­lugit Eq­qar­tuus­sisut Strasbourgimiit­tut aalajangiip­put Moskva eq­qun­ngitsulior­toq Jehovap Nalunaajaasuisa pal­lorfigin­nin­neran­nut akuliul­lutik ataatsimiit­tarun­naaq­qugamik­kit. Eq­qar­tuus­sisut taak­ku oqar­put Ruslandimi eq­qar­tuus­sisut Nalunaajaasut un­nerluutigineqar­nerat up­per­narsaatis­saqan­ngitsoq. Oqar­put eq­qar­tuus­sisut taak­kua Moskvap inatsisai sak­kor­tuut Jehovap Nalunaajaasuinut naaper­tuil­luan­ngitsumik atoraat.

15. Najoq­qutas­siaq Biibilimeersoq suna kristumiut ilumoor­tut tamarmik maleruar­paat?

¹⁵ Silarsuarmi tamarmi Jehovap Nalunaajaasuisa kristumiunut piumasaqaataasoq al­la Petrusip eq­qaasaa eq­qor­tip­paat. Ima al­lap­poq: “Naalagaq pil­lugu naalatsigitigitsi inuit aaq­qis­suus­saan­nut sunul­luun­niit, naalagaasoq kun­ngiup­pat naalagaatitaap­pataluun­niit.” (1 Petrusi 2:13, 14) Paulusip siun­nersuutaa malil­lugu silarsuarmut ilaan­ngik­kaluarluta naalak­kersuisut oqar­tus­saatitaan­nut, an­nerusumik min­nerusumil­luun­niit oqar­tus­saasunut, naalatsigitik­kusup­pugut. — Atuakkit Romamiut 13:1, 5-7.

16, 17. (a) Naalak­kersuisunut akerliun­ngin­nitsin­nut suna up­per­narsaataava? (b) Naalak­kersuinik­kut siut­tut ilaat qanoq oqarsimap­pat?

 ¹⁶ Jehovap Nalunaajaasuisa pis­sutsit aaq­qis­suus­saaneran­ni matumani ‘najugaqaral­lar­tutut’ pis­suseqar­neran­nut naalak­kersuisunut akerliorusun­neq inun­nul­luun­niit al­lanut isor­nar­torsiuerusun­neq pis­sutigin­ngilaat. Nalun­ngilaat inuit al­lat kik­kut naalak­kersuisuus­sanersut inuiaal­lu ajor­nar­torsiutaat qanoq aaq­qin­neqas­sanersut pil­lugit al­latut isumaqar­tut. Up­perisarsioqatigeeqar­poq politik­kimut akuliut­tar­tunik kisian­ni Jehovap Nalunaajaasui taamaalior­neq ajor­put politik­keril­lu aqutsinerat al­lan­ngor­tin­nian­ngisaan­narlugu. Jehovap Nalunaajaasuisa naalak­kersuisunut pikitsitsinis­saan­nik inun­nil­lu al­lanik taamaalior­titsinis­saan­nik isuma tun­ngavis­saqan­ngil­luin­nar­poq.

¹⁷ Petrusi aam­ma al­lap­poq ‘kun­ngi ataq­qis­sagip­put’. Taamaat­tumik kristumiut naalak­kersuisunut naalat­tar­put taak­kunan­nga ataq­qin­nin­ner­tik ersersin­niarlugu. (1 Petrusi 2:17) Ilaan­nik­kut naalak­kersuinik­kut siut­tut oqaatigisar­paat Jehovap Nalunaajaasuisa ulorianar­tuusorinis­saan­nut pis­sutis­saqan­ngitsoq. As­sersuutigalugu Stef­fen Reiche, Tysklandimi nunap im­mik­koor­tuani Brandenburgimi naalak­kersuisunut ilaasor­taasoq kingusin­nerusuk­kul­lu Tysklandimi inatsisar­tunut ilaasor­taalersoq, ima oqarsimavoq: “Jehovap Nalunaajaasui tigusanut inis­siarsuar­niit­tut par­naarus­sivin­niit­tul­lu pis­suseris­suup­put, taamatut pis­suseris­suuneq naalagaaf­fiup inatsisit tun­ngavigalugit naalak­kersugaasup demokratiskiusup piujuaan­nar­nisaanut taamanik­kutul­li ul­lumik­kut pingaaruteqar­tigaaq. Ingam­mik S­S-ik­kut nak­kaan­narfigin­ngisaan­nar­paat par­naarus­saaqatimin­nul­lu misigin­neqataasuul­lutik. Al­lamiunut aam­ma politik­kik­kut up­perisarsior­nik­kul­lu al­laanerusunut peq­qar­niil­liar­tor­toqar­nera eq­qarsaatigalugu taamatut pis­suseris­suunis­sap nunatsin­ni in­nut­taasunut tamanut pingaaruteqarluin­nar­put.”

18. (a) Sooq qatan­ngutinik tamanik asan­nin­nis­saq pis­susis­samisoor­pa? (b) Jehovap Nalunaajaasui qanoq oqaatigineqarsimap­pat?

¹⁸ Apustili Petrusi ima al­lap­poq: “Qatan­ngutit asasigit, Guuti mianerisiuk.” (1 Petrusi 2:17) Jehovap Nalunaajaasui Guutimik mianerin­nit­tuup­put, tas­sa taas­suma iluarin­ngisaanik iliuuseqarusun­ngil­lat. Taman­nalu Guutip piumasaatut ilior­nis­samin­nut kajumis­sis­sutigaat. Silarsuaq tamak­kerlugu Jehovamik kif­far­toqatigiil­lutik qatan­ngutigiis­suar­nut kis­saatigisaqaqatigiit­tunut ilaaner­tik nuan­naarutigaat. Taamaat­tumik taak­kunun­nga pis­susis­samisuugin­nar­poq ‘qatan­ngutigiis­suar­nik asan­nin­nis­saat’. Ul­lumik­kut silarsuarmi inun­nik al­lanik asan­nin­neq qaqutigoor­poq. Taman­na pis­sutigalugu nalunaajaasuun­ngitsut tupigusut­tar­put asaqatigiin­ner­put takugaangamik­ku. As­sersuutigalugu takor­narianik angal­las­sisar­tup Amerikami angal­las­sisar­tuni sulisup tupigusuutigaa 2009-mi Tysklandimi ataatsimeersuar­nermi nunanit tamalaanit peqataaf­figineqar­tumi nunanit al­laneersut asan­nit­tuliorfigineqarlutil­lu ikior­neqar­nerat. Tysklandimi Nalunaajaasut qatan­ngutitik al­lamiut asavaat tikeraar­neran­nilu ikiorlugit. Angal­las­sisar­tup nuan­naarutigalugu oqalut­tuaraa Jehovap Nalunaajaasuisut it­tunik naam­mat­tuuin­ngisaan­narluni. Jehovap Nalunaajaasuinik ataatsimeersuar­tunik najuuf­figin­nereerluni taama oqar­tumik tusar­nikuuit?

19. Suna aalajangiusimasariaqar­par­put aam­ma sooq?

¹⁹ Soorlu paasigip­put Jehovap Nalunaajaasuisa Saatanip pis­sutsinik aaq­qis­suus­sinerani “al­lamiuusutut” inuuner­tik as­sigiin­ngitsor­pas­suar­tigut ersersit­tar­paat, taamaalior­tuar­nis­sar­til­lu aalajangiusimal­luin­nar­paat. Guutip silarsuas­saata naaper­tuil­luas­suseqarfiusup nutaap qanit­tuk­kut nunavigilernissaanik neriuutaat tun­ngavis­saqarluar­poq. Aam­ma il­lit qilanaar­pit?