USA-mi West Virginiap avannarpasissuani illoqarfimmi anginngitsumi Moundsvillemi Ohiop kuussuata killinganiittumi inunngorpunga. Uanga qatanngutigiit sisamaasuni pilukkarissuni ataasiinnarmik niviarsiarartalimmi angajulliup tulliuvunga. Angajoqqaakka ilungersorlutik sulisarput unneqqarissuullutillu allanut asannittuupput. Aningaasaaterpassuaqanngikkaluarluta amigaateqanngisaannarsimavugut. Angajoqqaatta Jehovap Nalunaajaasuisut meeraanitsinniilli Biibilimi najoqqutassianik sapinngisaminnik puiukkiutitinniartarpaatigut.

Uannut ilinniartitsissutigineqarsimasut inuusuttuaraaninniilli uummatikkut malikkiartorunnaarsimavakka. Najoqqutassiat Biibilimiittut malillugit inuuneq siunertaqarlunilu nalerisimaarnassanersoq apeqqusertalerpara. Isummerpunga ilumoortumik pillualissaguma kiffaanngissuseqarluinnartariaqarlunga. Sivitsunngitsoq kristumiut ataatsimiinneri najuuffigisarunnaarpakka. Aamma angajuma najammalu sallusuissummik tunusseqatigaannga. Angajoqqaatta sapinngisartik tamaat ikiorniaraluarpaatigut, ikiuiniarneralli suusupagaarput.

Naatsorsuutigisimanngikkaluarpara kiffaanngissuseqarluni inuuneq kajungeralugu takorloortarsimasara ikiaroornartunik pinngitsuuisinnaajunnaassutigissallugu. Ullut ilaanni atuarfimmiit angerlartillunga ikinngutima sikaritsimik neqeroorfigimmanga akuersivunga. Taamanimiilli inuunerlunnartunut amerlasuunut maleruutiinnartalerpunga. Piffissap ingerlanerani ikiaroornartunik imigassamillu atornerluisunngorpunga kinguaassiuutitigullu inuunerlulerlunga. Ukiorpassuit ingerlaneranni aanngajaarniutit sakkortunerusut misilittartalerpakka ilaallu pinngitsoorsinnaajunnaarlugit. Pinngitsuuisinnaajunnaarnerujartortillunga inooriaasera attatiinnarumallugu ikiaroornartunik tuniniaasalerpunga.

Sapinngisara tamaat nalunngeqatigiinnissutiga malinnaveersaartuaraluarlugu eqqunngitsumik inuuseqarnera ilerasuutigisarpara. Taamaakkaluartorli inooriaatsinnik allanngortitseqqissinnaanngitsutut misigisarpunga. Festeqateqartaraluarlunga nipilersortunillu tusarnaariaqateqartaraluarlunga kiserliortutut nikallungarujussuartutullu misigikkajuppunga. Angajoqqaakka unneqqarissut inutsialaasullu qanoq innersut qanorlu ilillunga taama nakkaatsigisimanera ilaannikkut eqqarsaatigisarpara.

Ajunngitsumik inuuneqaleqqissinnaaninnut neriuutaarunnikuugaluartunga allat upperiuarpaannga. Ukiumi 2000-imi angajoqqaama ataatsimeersuariaqatiserimmannga nangaasunnguamik akuersivunga. Sunaaffa aamma qatanngutikka marluk sallusuissummik tunusseqatigisakka nangaasunnguamik ataatsimeersuariaqataaginnarsimasut.

Ataatsimeersuartilluta eqqaalerpara ukioq ataaseq tamatuma siorna ataatsimeersuarfitsinni rockimik tusarnaartitsineq najuuffiginikuullugu. Najuuffimmalu avatangiisitigut assigiinngissutaat takulerakku qamuuna killinneqaangaarpunga. Rockimik tusarnaartitsisoqarnerani tusarnaartitsivik eqqakkanik sikaritsillu pujuannik ulikkaarpoq. Tusarnaariat amerlanersaat inussiarniitsuupput taalliallu oqariartuutaat nuanniitsuullutik. Ataatsimeersuarnermili inunnik inussiarnersunik qiimasunillu ukiorpassuarni takunikuunngisannik uannik qamannga tikilluaqqusisunik avatangersimaneqarpunga. Ataatsimeersuarfipput eqqiluippoq oqariartuutigineqartullu neriuuteqalersitsillutik. Paasilerakku Biibilimi sallusuissut inunnut ajunngitsumik sunniuteqartartoq sallusuissummik tunussisimanera peqqissimissutigilerpara. — Esaja 48:17, 18.

Ataatsimeersuariaqataareernerma kinguninngua aalajangerpunga Kristumiut ilagiivinut uteqqinniarlunga. Qatanngutikka aamma ataatsimeersuarnermi misigisatik killinneqaatigisimagamikkit aalajangerput sallusuissummut uterniarlutik. Pingasuulluta Biibilimik atuaqqissaaqatigineqartalernissarput akueraarput.

Allassimaffik Biibilimeersoq Jaaku 4:8 ingammik killinneqaatigaara, tassanimi ima allassimasoqarami: “Guuti qaninniarsiuk, taava taanna ilissinnut qanillissaaq.” Paasilerpara Guutimut qanillissaguma inooriaasera allanngortittariaqarlugu tamatumalu saniatigut pujortartarunnaartariaqarlungalu aanngajaarniutinik imigassamillu atornerluiunnaartariaqarsimallunga. — 2 Korinthimiut 7:1.

Silamiunik ikinnguteqarunnaarlunga nutaanik — Jehovamut kiffartortunik — ikinngutitaarpunga. Kristumiup utoqqaanertap Biibilimik atuaqqissaaqatigisartakkama tapersersorluarpaanga. Qanoq innersunga paasiniarlugu alakkartarlungalu sianerfigikulasarpaanga. Ulloq manna tikillugu ikinngutigilluarpara.

2001-imi upernaakkut qatanngutikkalu marluk Guutimut tunniulluinnarsimanerput imermi kuisinnikkut ersersipparput. Takorloorsinnaassavat angajoqqaatta nukarlersattalu aalajaatsup Jehovamut kiffartornitsinni kiisami ataasiussuseqalernerput qanoq nuannaarutigitigisimassagaat.

Najoqqutassiat Biibilimiittut siornatigut sukangavallaarsorinikuuakka, massakkulli inunnut illersuutitut isigaakka. Biibili iluaqutigalugu ikiaroornartunik atuisarunnaarlungalu tuniniaasarunnaarpunga inuttullu pitsaanerulerlunga.

Maanna nunarsuaq tamakkerlugu Jehovamut kiffartortut qatanngutigiissuinut ilaasinnaanera immikkut pisinnaatitaaffigaara. Jehovamut kiffartortut imminnut ilumoortumik asapput Guutimullu kiffartornerminni ataasioqatigiillutik. (Johannesi 13:34, 35) Qatanngutigiissuarnut ilaanera aamma immikkut pilluaqquneqaatigaara — tassa asangaakkannut Adriannemut katikkama. Pinngortitsisutsinnik kiffartorfiginneqatigiinnerput qiimmattaatigaarput.

Maanna imminuinnaq eqqarsaatigiunnaarlunga uattut inuit Guutip oqaasianik iluaqutiginnissinnaanerannik ajoqersorniarlugit nammineq kajumissutsinnik piffissaq tamaat kiffartortuuvunga. Taamatut kiffartornera pilluarnermik annerpaamik uannik tunisivoq. Ilumut qulanngilluinnarlunga oqarsinnaavunga Biibili inuuninnik allannguinissannut iluaqutigilluinnarlugu. Kiisami kiffaanngissuseq ilumoortoq nassaaraara.