Guuti pillugu ilumoortoq paaserusuppiuk — tassa kinaanersoq, sunik nuannarisaqarlunilu uumigisaqarnersoq sumillu piumasaqarnersoq paaserusuppiuk? Guutip oqaatsimini, Biibilimi, imminut pilluni ilumoortut tamaasa saqqummersippai. Taamaakkaluartorli Biibilimik atuartut ilaasa ilumoortut taakku paasisinnaassanngilaat. Sooq? Anersaakkut ittut ilumoortut immikkut pisinnaatitaaffeqarnikkuinnaq paasineqarsinnaammata. Tamanna pillugu Jiisusip oqaasii sammeriartigit. — Atuaruk Matthæusi 11:25.

Allassimaffinni tamatuma siuliini Jiisusip Galilæami illoqarfinni pingasuni malunnangaartuliorfigisamini innuttaasut ajoqersuganngorusunngitsut avoqqaareqqammerpai. (Matthæusi 11:20-24) Immaqa ima eqqarsarputit: ‘Sooq inuit Jiisusip tupinnartuliornermigut malunnangaartuliorneri takoreerlugit taassuma ilumoortut ilinniartitsissutai malinngilaat?’ Inuit uummataasa ajortut killinneqarsinnaannginnerat ajoqersuganngorusunnginnerannut pissutaavoq. — Matthæusi 13:10-15.

Jiisusip nalunngilaa anersaakkut ittut ilumoortut Biibilimiittut paasisinnaajumallugit uku marluk pisariaqartikkivut: Guutip ikiuinera aamma eqqortunik uummammioqarneq. Jiisusi ima nassuiaavoq: “Unnersiutigaakkit Ataataq, qilaap nunallu Naalagaat, ilisimasunut sianisuunullu tamanna isertorakku saqqummersilluguli meerannguanut.” Maanna paasisinnaaviuk anersaakkut ittunik ilumoortunik paasinninneq sooq immikkut pisinnaatitaaffiusoq? Jehovap, ‘qilaap nunallu Naalagaata’, kisimi oqartussaagami inunnut ilumoortut isertorsinnaallugillu saqqummersissinnaavai. Guutili saqqummersitsisarnermini kinaassusersiorneq ajorpoq. Ilumoortunik Biibilimiittunik inuit ilaannut saqqummersitsiniarluni saqqummersitsiniarnanilu aalajangeraangami suna tunngavigisarpaa?

Jehovap inuit maniguuttut, makitasuujunngitsut, iluarai. (Jaaku 4:6) Ilumoortoq isertortarpaa “ilisimasunut sianisuunullu” — tassa silarsuarmiorpaluttumik ilisimassusilinnut qaffasissumillu ilinniagaqarsimasunut tulluusimaartuunertik imminullu tatiginertik pissutigalugu taassumannga ikiorneqarusunngitsunut. (1 Korinthimiut 1:19-21) Ilumoortorli saqqummersittarpaa “meerannguanut” — tassa uummatimikkut ilumoortunut meeqqatullu maniguuttuusunut. (Matthæusi 18:1-4; 1 Korinthimiut 1:26-28) Guutip Ernerata, Jiisusip, inuit eqqaaneqareersutut pissusillit ilisimalluarpai. Upperisarsiornikkut siuttut tulluusimaartut qaffasissumillu ilinniagaqarsimasut amerlasuut Jiisusip tusarliussaa paasinngilaat, aalisartulli maniguuttut paasilluarpaat. (Matthæusi 4:18-22; 23:1-5; Apustilit Suliaat 4:13) Taamaakkaluartorli pigissaartut qaffasissumillu ilinniagaqarsimasut ilumoortumik maniguunnermik ersersitsisut aamma Jiisusimik malinnittunngorput. — Lukasi 19:1, 2, 8; Apustilit Suliaat 22:1-3.

Apeqqut aallaqqaataaniittoq uterfigeqqeriartigu: Guuti pillugu ilumoortoq paaserusuppiuk? Taamaappat immaqa tuppallersaatigissavat paasillugu silarsuarmiorpaluttumik ilisimassuseqartuunerartut Guutip iluarinngikkai. Silarsuarmiorpaluttumilli ilisimassusillit nikanartutut isigisaat iluarigai. Isumakkut uummatikkullu eqqortumik isiginnittaaseqarlutit Guutip oqaasia atuaqqissaarukku Jehovamit immikkut pisinnaatitaaffilerneqarsinnaavutit — taanna pillugu ilumoortoq paasisinnaalissavat. Ilumoortoq taanna paasilluarukku maannangaaq inuunerit siunertaqalersinnaavoq ‘inuunivillu’ pigilersinnaalissavat — tassa Guutip nunami nutaami naapertuilluassuseqarfiusumi neriorsuutigisimasaani qanittukkut naassaanngitsumik inuulersinnaavutit. * — 1 Timotheusi 6:12, 19; 2 Petrusi 3:13.