“Judasip iivangkiiliua” suua?
APRIILIMI 2006-imi aviisini nunarsuaq tamakkerlugu pissanganartumik nutaarsiassaqarpoq: Allagatoqaq “Judasip iivangkiiliua”-nik qulequtalik nassaarineqaqqammersoq ilisimatuut tamanut saqqummiutissavaat. Aviisit naapertorlugit ilisimatuut allagaq tamanna pissutigalugu inuit Judasimut, ajoqersukkamut Jiisusimik killuussisumut, isiginnittaasiannik allannguissanerarpaat. Ilisimatuut taakku naapertorlugit Judasi iluarisaasuullunilu Jiisusimik paasinnilluartuuneruvoq, taassumalu Jiisusi isumaqatigereerlugu akeraanut toqunneqaqqullugu tunniuppaa.
“Judasip iivangkiiliua” allagaava tutsuiginartoq? Taamaappat Judasi Iskarioti, Jiisusi Kristusi kristumiullu siulliit pillugit siornatigut ilisimaneqanngitsunik paasissutissaqarpa? Kristusimik taassumalu ilinniartitsineranik paasinninnissatsinnut sunniuteqassava?
‘JUDASIP IIVANGKIILIUATA’ NASSAARINEQARNERA
“Judasip iivangkiiliua” qanoq nassaarineqarsimanersoq ilisimaneqarpianngilaq. Allagaq tamanna itsarnisarsiuunit nassaarineqaranilu uppernarsarneqanngilaq, 1970-ikkulli naalerneranni 1980-ikkulluunniit aallartinneranni pisoqaarniarfimmi saqqummeriataarpoq. Imaassinnaavoq Egyptenimi 1978-imi ilivermi, immaqa qaarusummi, nassaarineqartoq. Atuagatoqqami allakkanik sisamanik immikkoortortalimmi allagaavoq, kopterisullu allanneqarpoq (itsaq Egyptenimiutut nagguigalugit oqaatsit).
Egyptenimi silaannarmi isugutanngitsumi atuagatoqaq amermik qalilik ukiuni hundredelikkuutaani asiusimanngilaq, maannakkulli asiujartupallappoq. 1983-imi atuagatoqaq tamanna misissueqqissaartartunut ikittuinnarnut takutinneqarpoq, pisiarinissaanulli aki ingasappallaarmat pisiarinngilaat. Taamanimiilli ukiuni arlalinni toqqorluagaannginnami suli asiuneruvoq. 2000-imi Schweizimi pisoqaarniartartup pisiaraa kingusinnerusukkullu ilisimatuunut aalajangersimasunut nunanit tamalaaneersunut tunniullugu. Ilisimatuut taakkua Maecenas Foundation for Ancient Art-imit aamma National Geographic Society-mit tapersersorneqarlutik atuagatoqqamik, ilaanik ilaannakuugaluartunik, iluarsaassinissamik suliarujussuaq aallartippaat. Aamma qanoq pisoqaatiginersoq paasiniartussaavaat atuagatoqarlu nutsertussaallugu imaalu nassuiarlugit.
Kulstof-14 atorlugu qanoq pisoqaatiginera nalilerneqarpoq, tamatumanngalu erserpoq immaqa
200-kkunni 300-kkunniluunniit allanneqarsimasoq. Ilisimatuulli “Judasip iivangkiiliua” kopterisooq allagaasumit grækerisuumit pisoqaanerusumit nutserneqarsimasoq ilimagaat. “Judasip iivangkiiliua” qanga allanneqaqqaarpa, aamma sooq allanneqarpa?“JUDASIP IIVANGKIILIUA” — IIVANGKIILIU GNOSTIKERIT NALAANNEERSOQ
Allagaq “Judasip iivangkiiliua”-nik qulequtalik Irenæusip, Lyonip biskoppiata 100-kkunni inuusimasup, allagaani eqqartorneqaqqaarpoq. Taanna atuakkiamini eqimattat assigiinngitsut ajoqersuutaannik akiorniakkami ilaat pillugit ima allappoq: “Isumaqarput Judasip killuussisup . . . allat assiginagit sallusuissut ilisimagamiuk killuussinerup nalorninartua kisimi naammassigaa. Taanna pissutaalluni suut tamarmik, nunarsuarmiittut qilammiittullu, paatsiveerutitinneqarput. Taama ittumik oqaluttualiorput taasarlugulu ‘Judasip iivangkiiliua’-nik.” — Adversus Haereses (Ajoqersuinerluttunut akiuineq).
“Iivangkiiliuunngilaq Judasip nalaani allataq, Judasimillu ilisarisimannittumit allanneqanngilaq”
Irenæusip ingammik ajoqersuutit gnostikerit kristumiuunerartut immikkut ittumik ilisimasaqarnerartut illersugaat naqqissorusuppai. Gnostikerit tassaapput upperisarsiornikkut eqimattat assigiinngitsut kristumiussutsip ‘sallusuissutaanik’ tamarmik immikkut paasinnittaaseqarlutillu nassuiaasartut. Gnostikerit allakkat 100-kkunni siammarsimasut aqqutigalugit ajoqersuutitik siuarsarpaat.
Gnostikerit iivangkiiliuanni allassimasoqakulasarpoq Jiisusip apustiliisa nuimasut taassuma tusarliussaa paasinerluttaraat Jiisusillu ajoqersuut isertugaq ingerlateqqikkaa taamaallaallu ikittunnguit paasisinnaagaat. * Gnostikerit ilaat isumaqarput nunarsuaq inuit tarniinut paarnaarussiviusoq taamaattumillu ‘guuti pinngortitsisoq’ Allakkani Hebræerisuuni allaatigineqartoq guutinit allanit naammalluinnartunit pissaaneqannginnerusoq. Isumaqarpullu taamaallaat “eqqortumik” ilisimasaqartuusup “isertugaq” tamanna paasisinnaagaa taamaattumillu timikkut piunerminit aniguisinneqarnissani noqqaassutigissagaa.
“Judasip iivangkiiliua” taakkua isumaat najoqqutaralugu allagaavoq. Ima aallarnerneqarpoq: “Saqqummersitamik oqaluttuaq isertugaq Jiisusip ullut arfineq-pingasut ingerlaneranni poorskisiornissap ullut pingasut siornagut Judasi Iskariotimik oqaloqateqarluni ingerlateqqitaa.”
Atuagatoqaq tamanna allakkap Irenæusip eqqartugaata ukiorpassuarni piujunnaarsorineqartup assigaa? Marvin Meyer ilisimatuunut atuagatoqqamik misissueqqissaaqqaarlutillu nutserisunut ilaasoq allappoq Irenæusip “naatsumik allaatigisaa allakkamut kopterisuumut Judasip iivangkiiliua-nik taaneqartumut naapertuuttoq”.
ILISIMATUUT JUDASIP QANOQ ITTUUNERA OQALLISSUTIGAAT
“Judasip iivangkiiliua” naapertorlugu ajoqersukkat ilisimasakinnertik ersersikkaangassuk Jiisusip taakku illaaruaatigisarpai. Aamma apustilit aqqaneq-marluusut ilaata ataasiinnaap, Judasip, paasivaa Jiisusip qanorpiaq ittuunera, taamaattumillu Jiisusip Judasimuinnaq ‘naalagaaffiup isertugai’ paasitippai.
Ilisimatuut atuagatoqqamik nutsigaat Irenæusip iivangkiiliumik allaatiginninneranit sunnerneqangaarpoq. Taakkua nutsigaat naapertorlugu Judasi Jiisusimit pingaartinneqarami taassuma kisimi isertukkanik paasinnissallunilu “naalagaaffik angussavaa”. Apustilit paasinnissinnaanngitsut Judasimik taarsiisussamik toqqaassapput, Judasili ‘anersaanngorumaarpoq 13-iat’, ajoqersukkanillu tamanit pitsaanerusumik akissarsisinneqartussaavoq Jiisusi timiminit aniguisinneqarnissamut ikioramiuk.
Atuakkiortut tusaamasat, assersuutigalugu Bart Ehrman aamma Elaine Pagels itsaq kristumiussusermik gnostikerillu isumaliutersuutaannik misissueqqissaartartut, ‘Judasip iivangkiiliuanik’ misissuinertik oqaaseqaatertillu saqqummiutipallappaat, taakkualu misissuinerat ilisimatuullu misissueqqissaaqqaarnerannut nutsigaannullu assigiipajaarput.
Tamatumali kinguninnguagut ilisimatuut allat, assersuutigalugu April DeConick aamma Birger Pearson, isornartorsiuipput. Taakku allapput National Geographic Society-p tusagassiuutitigut eqqartorneqarusuinnarluni atuagatoqaq saqqummiutipallassimagaa. Aamma ilisimatuut isumaqatigiissutaanni misissuinerat pillugu allanik oqaloqateqannginnissamik piumasaqaateqarmat ilisimatusarnitsigut ingerlatseriaaseq nalinginnaasoq atorneqanngilaq — ingerlatseriaatsimut tamatumunnga ilaavoq saqqummiutinnginnerani ilisimatuunit allanit misissorneqarnissaa nalilerneqarnissaalu.Iivangkiiliumik tamatuminnga misissueqqissaartut arlaannaalluunniit oqanngilaq oqaluttuarisaanermut naapertuuttunik paasissutissaqartoq
DeConick aamma Pearson suleqatigiinngikkaluarlutik tamarmik isummerput atuagatoqqap ilaannakortortallip immikkoortortai pingaarnerpaasa ilaat ilisimatuunit kukkusumik nutserneqarsimasut. DeConickip nutsigaa naapertorlugu Jiisusip Judasi ‘anersaapiluttut 13-iattut’ taavaa, ‘anersaatut 13-iattut’ taanagu. * Aamma Jiisusi paatsuugassaanngitsumik oqarpoq Judasi ‘naalagaaffimmut’ qilaliartussaanngitsoq. Aamma Judasi ajoqersukkanit allanit pitsaanerusumik akissarsisinneqarumaarani Jiisusimik toqutitsisuugami pillagaajumaarpoq. DeConickip isumaa naapertorlugu “Judasip iivangkiiliua” tassaavoq gnostikerit itsaq ilaarutilliinerat apustilinik tamanik asissuisoq. DeConickip aamma Pearsonip isummiuppaat Judasi ‘Judasip iivangkiiliuani’ allaatigineqartoq iluarisaasuunngitsoq.
“JUDASIP IIVANGKIILIUA” QANOQ ILINNIARFIGISINNAAVARPUT?
Iivangkiiliumik tamatuminnga misissueqqissaartut — Judasimik iluarisaasutut isiginnittut aamma anersaapiluttut isiginnittut — arlaannaalluunniit oqanngilaq iivangkiiliumi oqaluttuarisaanermut naapertuuttunik paasissutissaqartoq. Bart Ehrman ima nassuiaavoq: “Iivangkiiliu taanna Judasimit allanneqanngilaq, allaat Judasiunerartumit allanneqanngilaq. . . . Iivangkiiliuunngilaq Judasip nalaani allataq, Judasimillu ilisarisimannittumit allanneqanngilaq . . . Taamaattumik atuagaanngilaq Jiisusip nalaani qanorpiaq pisoqarneranik amerlanerusumik paasissutissiisoq.”
“Judasip iivangkiiliua” tassaavoq gnostikerit allataat immaqa ukiuni 100-kkunni grækerisoorlugu allanneqaqqaartoq. Atuagatoqaq nassaarineqaqqammersoq tamanna allakkap Irenæusip eqqartugaata assigineraa ilisimatuut suli oqallissutigaat. Taamaakkaluartorli “Judasip iivangkiiliua” aqqutigalugu kristumiussutsip immikkoorniaqatigiinnut unammilleqatigiinnut assigiinngitsorpassuarnut tamarmik immikkut ajoqersuutilinnut immikkoortiterneqarnerata nalaa pillugu paasissutissaqalerpugut. Biibilili akerlilernagu “Judasip iivangkiiliua” apustilit mianersoqqusinerannut uppernarsaavoq. Assersuutigalugu Apustilit Suliaanni 20:29, 30-mi Paulusi ima oqarpoq: “Nalunngilara peerukkuma . . . ilissi akornassinnit [saqqummersoqarumaartoq] angutinik ilumoortuunngitsumik oqaluttunik ajoqersukkat imminnut malinnaatikkumallugit.”
^ par. 11 Iivangkiiliut taakku Jiisusip ajoqersuutaanik eqqortumik paasinnittaaseqarnerunerarneqartumit taaneqakulasarput, assersuutigalugu “Tuumap iivangkiiliua” aamma “Maria Magdalenep iivangkiiliua”. Atuagatoqqat taamaattut katillugit 30-it missaat nassaarineqarsimapput.
^ par. 18 Ilisimatuut Judasip atuagatoqqami tamatumani anersaapiluuneranik Jiisusillu kinaassusivianik ajoqersukkanit allanit ilisimanninneruneranik isumallit maluginiarpaat tamatumunnga assingusumik anersaapiluit iivangkiiliuni Biibilimiittuni eqqaaneqartut Jiisusip kinaassusivia eqqortumik nalunaarutigigaat. — Markusi 3:11; 5:7.