“Takorluugaqar­punga.” Taama in­nut­taasut pisin­naatitaaf­fiinik pitsan­ngorsaanis­samik sulis­suteqar­toq Martin Luther King, jr., ukiut 50-it matuma sior­na, 1963-imi aggustip 28-an­ni, tusaamaneqaqisumik oqalugiaam­mini oqar­poq. Taama tiguar­tin­nar­tigisumik oqar­nermigut ul­lut ilaan­ni inuit al­lamiunik nagguilin­nik nikagin­nit­tarun­naarumaar­neran­nik takorluuinini, imaluun­niit neriuutini, oqaasin­ngor­tip­paa. USA-mi tusar­naar­tunut oqalugiaraluar­toq nunani al­lani inup­pas­suit takorluugaata imarisaa pingaar­neq tapersersulersimavaat.

1963-imi novembarip 20-an­ni, Martin Luther King-ip oqalugiareer­nerata qaam­matit pingasut kingor­na, nunat 100-nit amerlanerusut FN-ip al­lamiunik nagguilin­nik as­sigiin­ngisitsisar­ner­nik sunil­luun­niit atorun­naarsitsinis­samik nalunaarutaanut akuerseqataap­put. Tamatuma kingor­na ukiut qulik­kuutaat ingerlaneran­ni nunarsuaq tamak­kerlugu suliniutit al­lat aal­lar­tisar­neqaler­put. Iliuuserineqar­tut tamak­ku nersor­nar­tut apeq­qum­mik akineqar­tariaqar­tumik ima pilersitsip­put: Suut anguneqarsimap­pat?

2012-imi marsip 21-an­ni FN-ip generalsekretæria Ban Ki-moon ima oqar­poq: “Al­lamiunik nagguilin­nik nikagin­nin­nermik, as­sigiin­ngisitsinermik, uumis­suinermik al­latigul­luun­niit isorin­nin­niar­tar­nermik pinaveersaar­titsisus­sanik atorun­naarsitsisus­sanil­lu pingaaruteqangaar­tunik — aam­ma nunarsuaq tamak­kerlugu atuut­tunik — isumaqatigiis­suteqar­toqarlunilu suliniuteqar­toqar­poq. Taamaak­kaluar­torli al­lamiunik nagguilin­nik nikagin­nin­neq pis­sutigalugu nunarsuaq tamak­kerlugu inuit mil­lionil­lit naal­liut­tar­put.”

Al­lamiunik nagguilin­nik nikagin­nit­tar­nermik isum­mius­sereer­tar­nermil­lu pinaveersaar­titsinermut tun­ngatil­lugu nunani siuariarsimasuni apeq­qut una suli akineqan­ngilaq: Pitsan­ngorsaanerit inuit al­lamiunik nagguilin­nik nikagin­nik­kun­naas­sutigisimavaat, imaluun­niit al­lat pil­lugit isum­mius­sereer­tar­nermin­nik ersersitsin­ngin­nis­saan­nut iluaqutaagin­narsimap­pat? Inuit ilaat isumaqar­put taamatut pitsan­ngorsaanerit as­sigiin­ngisitsisar­ner­nik pinaveersaar­titsiner­nut iluaqutaagin­nar­tut al­lal­li pil­lugit isum­mius­sereer­tar­ner­nik atuuk­kun­naarsitsisiman­ngitsut. Sooq? Pis­sutigalugu as­sigiin­ngisitsisar­neq iliuusium­mat takuneqarsin­naasoq pineqaatis­siis­sutaasin­naasorlu, al­lal­li pil­lugit isum­mius­sereer­tar­neq inuit qamuuna eq­qarsaataan­nut misigis­susaan­nul­lu aquk­kuminaas­sin­naasunut tun­ngas­suteqarluni.

Isum­mius­sereer­tar­neq atuuk­kun­naarsik­kusuk­kaan­ni as­sigiin­ngisitsisar­nerit kil­lilersuun­nar­nagit aam­ma inuup inuiaqatigiit al­lat pil­lugit eq­qarsaatai misigis­susiilu al­lan­ngor­tin­neqar­tariaqar­put. Ilumut al­lan­ngor­tin­neqarsin­naap­pat? Taamaap­pat qanoq al­lan­ngor­tin­neqarsin­naagamik? Misigisalik­kersaarutit taamatut al­lan­nguisoqarsin­naaneranik ersersitsiin­naratik al­lan­nguinis­samut iluaqutaasoqar­neranik ersersitsisut sam­meriar­tigit.

Linda: Sydafrikami inun­ngor­punga. Inuit Sydafrikamiut qaqor­tumik ameqan­ngitsut nikanar­tutut, ilisimasaqan­ngitsutut, tatigisas­saan­ngitsutut al­laal­lu qaqor­tumik amilin­nut kif­fakuluusutut isiginikuuak­ka. Nalusan­nik taamatut isum­mius­sereer­tar­nera pigiliutiin­narsimavara. Biibilimik atuaq­qis­saar­talerama isigin­nit­taasera al­lan­ngor­tip­para. Ilik­kar­para “Guuti kinaas­susersior­tuun­ngitsoq” aam­ma uum­mater­put amit­ta qalipaataanit imaluun­niit oqaatsitsin­nit pingaaruteqar­nerusoq. (Apustilit Suliaat 10:34, 35; Us­satit 17:3) Filip­pimiut 2:3-mi al­las­simasut iluaqutigalugit paasivara inoqatik­ka uan­nit pingaar­nerutik­kuk­kit al­lat pil­lugit isum­mius­sereer­tarun­naarsin­naal­lunga. Najoq­qutas­siat taamaat­tut Biibilimeersut maleruar­nerisigut inoqatik­ka, amiisa qalipaataat apeq­qutaatin­nagit, soqutigin­nin­nermik ersersitsivigisin­naan­ngor­pak­ka. Maan­na isum­mius­sereer­tar­nermit aqun­neqarun­naar­tutut misigivunga.

 Michael: Sumiif­fim­mi Australiamiut qaqor­tumik amil­lit amerlanerus­suteqarlutik najugaqarfigisaan­ni peroriar­tor­punga. Asiamiul­lu, ingam­mik Kinamiut, pil­lugit ingasat­tumik isum­mius­sereer­talerlunga. Biilerlunga Asiamiumik siumugaqaraangama igalaaq am­mariarlugu akerar­torlugu ima nil­liaf­figisar­para: “Asiamiukasik angerlar­niarit!” Kingusin­nerusuk­kut Biibilimik atuaq­qis­saar­talerama paasiar­tuler­para Guuti inun­nut qanoq isigin­nit­taaseqar­toq. Sumiuunerat imaluun­niit qanoq isik­koqar­nerat apeq­qutaatin­nagit asavai. Taamatut asan­nin­nera kil­lin­neqaatigingaarak­ku uumis­suisarun­naarlunga asan­nit­tun­ngor­punga. Tupin­naqaaq taamatut al­lan­nguil­luni. Maan­na inuit nunanit as­sigiin­ngitsuneersut as­sigiin­ngitsunil­lu tunuliaqutal­lit peqatigis­sal­lugit nuan­narisar­para. Taman­na pis­sutigalugu inuuneq al­laanerusumik isigin­nit­taaseqarfigilerlugulu nuan­naar­neruler­punga.

Sandra: Anaanaga Delta Statemi, Nigeriamiit­tumi, Umunedemeersuuvoq. Ataatamalu ilaqutai Edo Statemeersuup­put esanimiusul­lu oqalut­tarlutik. Taamatut as­sigiin­ngis­suteqar­ner­tik pis­sutigalugu ataatama ilaqutaasa anaanaga asis­sor­tar­paat, taamaalior­pul­lu toqunis­saata tungaanut. Taamaat­tumik aalajanger­punga esanimiusut oqalut­tunik peqateqan­ngisaan­nar­niarlungalu Edo Statemeersumik uinin­ngisaan­nar­niarlunga. Biibilimil­li atuaq­qis­saar­talerama al­laanerusumik isigin­nit­taaseqaler­punga. Biibilimi Guuti kinaas­susersior­tuun­ngitsutut mianerin­nitsiminil­lu kimil­luun­niit ilas­sin­nit­tar­tutut al­laatigineqar­pat kinaagama inoqatik­ka al­lamiunik naggueqar­nerat al­lamiutul­luun­niit oqalut­tar­nerat pis­sutigalugu uumis­suisus­saq? Eq­qarsar­taasera al­lan­ngor­tip­para ataatamalu ilaqutai eq­qis­seqatigalugit. Najoq­qutas­siat Biibilimeersut maleruar­nerisigut pil­lualerlungalu qamuuna eq­qis­sivunga. Al­lat tunuliaqutaat, sumiunik naggueqar­nerat, oqaasii sumiuuneral­luun­niit apeq­qutaatin­nagit aam­ma at­taveqarfigil­luar­nerulersin­naan­ngor­pak­ka. Sunaaf­fa aam­ma Edo Statemeersumik esanimiusul­lu oqalut­tar­tumik uinin­nialerama!

Sooq taak­ku inup­pas­suil­lu al­lat Biibili iluaqutigalugu qaman­nga pisumik uumis­suisarun­naarsin­naal­lutil­lu isum­mius­sereer­tarun­naarsin­naap­pat? Guutip oqaaserim­magu inuul­lu inuit al­lat pil­lugit eq­qarsar­taasianik misigis­susiinil­lu al­lan­nguisin­naam­mat. Aam­mat­taaq isum­mius­sereer­tar­nerit tamarmik atuuk­kun­naarsin­neqas­sap­pata al­lamik iliuuseqar­toqar­tariaqar­nera Biibilimi ersersin­neqar­poq.

Biibilimik ilisimasaqar­neq iluaqutigalugu misigis­sutsit sak­kor­tuut aqun­neqarsin­naal­lutil­lu atuuk­kun­naarsin­neqarsin­naap­put, isum­mius­sereer­tar­nerli atuuk­kun­naarsin­neqarluin­nas­sap­pat marlutsigut iliuuseqar­toqaq­qaar­tariaqar­poq. Siul­leq tas­saavoq ajor­ti inuil­lu naam­mal­luin­nan­ngis­sutaat. Biibilimi ima toq­qaan­nar­tumik al­las­simasoqar­poq: ‘Inuit tamarmik ajor­tulior­tar­put.’ (1 Kun­ngit 8:46) Qanorluun­niit iliuuseqar­tigigaluarut­ta tamat­ta apustilitut Paulusitut inuutsik­kut ilorlik­kut akiugas­saqar­pugut, taan­na ima al­lap­poq: “Ajun­ngitsumik iliorumagaluarlunga ajor­tumik ilior­tar­tunga.” (Romamiut 7:21) Taamaat­tumik uum­mater­put naam­mal­luin­nan­ngitsoq ilaatigooriarluni isum­mius­sereer­taler­nermik kinguneqarsin­naasumik ‘eq­qarsaatipiloqaleq­qis­sin­naavoq’. — Markusi 7:21.

Aap­pas­saat­tut Saatani Diaavulu sun­niisar­poq. Biibilimi taan­na ‘toqutsisutut’ ‘silarsuarmil­lu tamarmik tam­mar­titsiniar­tutut’ al­laatigineqar­poq. (Johan­nesi 8:44; Saq­qum­mersitat 12:9) Tamatuman­nga ersersin­neqar­poq sooq isum­mius­sereer­tar­nerup taama atugaatiginera aam­ma inuit uungaan­naq isiginermik, as­sigiin­ngisitsisar­nermik, inuian­nik toqoraanermik al­latigul­lu naggueqatigiin­nik, up­perisarsioqatigiin­nik inuiaqatigiin­nil­lu iluarisaqan­ngin­nermik pinaveersaar­titsiniar­nermin­ni sooq tamatumin­nga atuuk­kun­naarsitsisin­naan­ngin­nerat.

Taamaat­tumik isum­mius­sereer­tar­neq atuuk­kun­naarsil­luin­nar­neqas­sap­pat inuit ajor­tiliunerat, naam­mal­luin­nan­ngis­sutaat Saatanil­lu Diaavulup sun­niisar­nera peer­neqaq­qaar­tariaqar­put. Biibilimi ersersin­neqar­poq Guutip naalagaaf­fia taamator­piaq iliuuseqas­sasoq.

Jiisusip Kristusip ajoqersuk­kani Guutimut qinusar­nis­saan­nik ima oqarluni ilin­niar­tip­pai: “Naalagaaf­fiit tikiul­li, piumasat qilam­misut nunamis­saaq pili.” (Mat­thæusi 6:10) Guutip naalagaaf­fiata naaper­tuil­luan­ngitsulior­nerit suul­luun­niit — al­lat pil­lugit isorin­nit­tar­nerit isum­mius­sereer­tar­neril­lu ilan­ngul­lugit — suujun­naarsis­savai.

Guutip naalagaaf­fia nunarsuarmik tamak­kiisumik aqutsiler­pat Saatani ‘qilersor­neqas­saaq’, tas­sa sun­niisin­naajun­naarsin­neqarlunilu ‘inuiaqatigiin­nik tam­mar­titsisin­naajun­naarsin­neqas­saaq’. (Saq­qum­mersitat 20:2, 3) Taamanik­kus­samut pilersin­neqarsimas­sap­put ‘nuna nutaaq’, imaluun­niit inuiaat “iluas­sutsip najugarisas­sai”. * — 2 Petrusi 3:13.

Nunami naaper­tuil­luas­suseqarfiusumi inuusus­sat naam­mal­luin­nar­tun­ngor­tin­neqas­sal­lutil­lu ajor­teqas­san­ngil­lat. (Romamiut 8:21) Guutip naalagaaf­fiani in­nut­taasutut ‘ajor­tumik ilior­natil­lu ajoqusiis­san­ngil­lat’. Sooq? Jehovamik “ilisimasaqar­nerup nuna tamak­kerumaarmagu”. (Esaja 11:9) Taamanik­kus­samut inuit tamarmik Jehovap Guutip iliuusii tamaasa ilisimalis­savaat taas­sumalu pis­susii asan­nit­tut ilaalerlugit. Taman­na pis­sutigalugu isum­mius­sereer­tar­neq atuuk­kun­naarsin­neqas­saaq, “Guutimi kinaas­susersior­tuun­ngilaq.” — Romamiut 2:11.