Inuppassuit isumaqarput Guuti silarsuarmut matumunnga naalakkersuisuusoq. Taamaappalli sooq nunarsuarmi taama naalliunnartoqartigaa? (5 Mosesi 32:4, 5) Biibili naapertorlugu Ajortoq silarsuarmik aqutsisuuvoq. — 1 Johannesi 5:19 atuaruk.

Ajortup inuit qanoq pissaaneqarfigilerpai? Inuit oqaluttuarisaanerata aallaqqaataani inngilip Guuti pikitsitsiffigaa inuillu siulliit aamma taamaaliortinniarsaralugit. (1 Mosesi 3:1-6) Aappariit taakku inngili pikitsitsisoq, Saatani, naalanniarlugu aalajangeramik naalakkersuisorilerpaat. Guuti ajugaqanngitsoq kisimi naalakkersuisussaatitaavoq. Guutilli kissaatigaa inuit imminik asanninnertik pissutigalugu naalakkersuisussamissut toqqassagaanni. (5 Mosesi 6:6; 30:16, 19) Ajoraluartumik inuit amerlanersaat tammartitaallutik inuit siulliit aalajangiinerattut ajortumik aalajangiipput. — Saqqummersitat 12:9 atuaruk.

Guutip akuerissavaa Saatanip ajortumik naalakkersuiuarnissaa? Naamik! Pissutsit ajortut Saatanip pilersitai Jiisusimut iluarsisissavai. — 1 Johannesi 3:8 atuaruk.

Jiisusip Guutimit pissaaneqartinneqarlunilu oqartussaassuseqartinneqartup Saatani suujunnaarsissavaa. (Romamiut 16:20) Tamatuma kingorna Guutip inuit naalakkersuiffigilissallugillu aallaqqaammut siunertamisut nuannersumik eqqissisimasumillu atugaqalersissavai. — Saqqummersitat 21:3-5 atuakkit.