MARIA aliasunnermik sapilerluni aqullaarpoq. Ernerata nalunaaquttap-akunnerpassuini anniartitaareerluni nillernera kingulleq siutaani akisuasutut ippoq. Ulloqeqqartoq sila taarsereersimavoq. Tassanngaannaq nuna sajorujussualerpoq. (Matthæusi 27:45, 51) Immaqa Maria eqqarsarpoq Jehovap ernermi Jiisusip toqunera allanit tamanit aliasuutiginerungaarlugu silarsuarmut taamatut takutikkaa.

Golgatami (qattunermi Niaqornami) taarsuup aanngariartortutut illuni ualikkut qaamanerata malunnarsiartornerani Mariap ernini aliasuutigaa. (Johannesi 19:17, 25) Eqqaajortugai imaaginnavipput. Ilaatigut eqqaasimassagunarpaa ukiut 33-t tamatuma siorna pisimasoq. Taamani Josefilu naalungiarsuutertik Jerusalemimi naalaffimmi Guutimut sassartereeritsik angut utoqqaq Simmiuummik atilik isumassarsisinneqarluni siulittuivoq. Taassuma siulittuutigaa Jiisusi malunnangaartuliorumaartoq, aammali oqarpoq Maria panamik kapineqartutullusooq misigiumaartoq. (Lukasi 2:25-35) Aatsaat maanna, aliasungaarnermini, oqaatsit taakku isumasivai.

Oqartoqarsimavoq inuit nalaatarisinnaasaat ajornerpaaq annernarnerpaarlu tassaasoq qitornamik toqukkut annaasaqarneq. Toqu akeraavoq naakkittaatsoq tamatsinnik arlaatigut panamik kapisisutut ikiliisartoq. (Romamiut 5:12; 1 Korinthimiut 15:26) Taamatut ikilerneqarneq anigorneqarsinnaava? Jiisusip kiffartornerata aallartinneraniit toqunissaata tungaanut tamatumalu kingorna Mariap inuunera misissoriartigu. Taassumami aliasunnermi panap kapisineratut ittup anigornissaanut uppernini qanoq iluaqutigisimagaa ilinniarfigingaarsinnaavarput.

Ukiut pingasut affarlu tamatuma siorna pisimasut uterfigeriartigit. Mariap allanngortoqarnissaa pasitsaappaa. Johannesi Kuisisoq taassumalu allamik isumataarneq pillugu tusarliussaa aalassaataasoq allaat illoqarfimmi Nazaretimi oqallisigineqarput. Mariap malugisinnaavaa ernermi angajulliup tamanna nalunaaqutitut isigigaa; kiffartornera aallartittussanngorpoq. (Matthæusi 3:1, 13) Mariamut ilaqutaanullu tamanna allannguutaarujussuassaaq. Qanoq?

Tamatuma nalaani Mariap uia, Josefi, toqoreersimagunarpoq. Taamaappat Mariap asasamik annaasaqarneq misigereerpaa. * Jiisusi ‘sanasup erneranik’ taaneqartartoq aamma ‘sanasumik’ taaneqartalersimavoq. Jiisusip angummi suliffia ingerlatarilersimagunarlugu ilaquttaminik — ilaatigut qatanngumminik nukarliusunik ikinnerpaamik arfiniliusunik — pilersuisunngorsimagunarpoq. (Matthæusi 13:55, 56; Markusi 6:3) Jiisusip Jaaku — nukappiaqqani angajulliup tullerigunagaa — suliffimmik ingerlatitsisussatut ilinniartissimagaluarpaguluunniit angajulliliap pilersuiunnaarnera ilaqutariinnut malunnaataassaaq. Maria akisussaafferujussuaqareerpoq. Inuunermi allanngornissaa siooragaa? Tamanna eqqoriaannarsinnaavarput. Apeqqulli una pingaaruteqarneruvoq: Jiisusi Nazaretimiu tassaalerpat Jiisusi Kristusi, Missiarsi qangaanilli neriorsuutigisaq, Maria qanoq qisuariassava? Oqaluttuap Biibilimeersup tamanna paasinarsisippaa. — Johannesi 2:1-12.

 Jiisusi Guutip tanitarilissammani, tassa Missiarsinngussagami, kuisikkumalluni Johannesimukarpoq. (Lukasi 3:21, 22) Tamatuma kingorna ajoqersugassaminik toqqaasalerpoq. Suliassani nukinginnaraluartoq ilaquttami ikinngutimilu nuannisaaqatiginissaat piffissaqarfigisarpaa. Assersuutigalugu anaanani, ajoqersukkani qatanngutinilu Kanami katittorsiornermut najuukkiartortut ilagai. Kana tassaagunarpoq illoqarfik qatsissumiittoq Nazaretimiit 13 kilometerisut ungasitsigisoq. Nalliuttorsiornerup nalaani Mariap ajornartorsiuteqartoq malugaa. Imaassinnaavoq katernaat ilaqutaat eqqissiveeruppasillutik imminnut qissimigaarlutillu isussukuluuttut malugigai. Viinnimik nunguutsipput! Taakkua kulturiat malillugu inoroorsaarneq pingaaruteqangaarmat viinniutaarunneq ilaqutariinnut nikanarsaataallunilu peqqusiileqititserujussuassaaq. Mariap nalligigamigit Jiisusi saaffigaa.

“Viinniutaarupput,” ernerminut oqarpoq. Arlaannik iliuuseqassasoq naatsorsuutigaa? Naluarput, Marialli ilisimavaa erni immikkut ittuusoq malunnangaartuliorumaartorlu. Immaqalu maannakkut taamaaliortalissasoq neriuutigaa. Ima oqarniarporlusooq: ‘Ernera, iliuuseqalaarit!’ Ernermi akissutaa tupaallaatigisimassavaa, imami oqarfigineqarpoq: “Arnaq, sussagamma?” Taamatut akinera ataqqinninngitsuliornerunngilaq, taama isumaqartoqaraluartoq. Jiisusilli taamatut oqarnermigut arni saamasumik naqqippaa. Taamaaliornermigut kiffartornermini qanoq iliortarnissani anaanami oqartussaaffiginngikkaa eqqaasippaa. Ataataami Jehova kisimi kiffartorneranut oqartussaavoq.

Mariap maniguuttuullunilu malussarissuugami ernermi naqqiutaa akueraa. Nalliuttorsiornermi sassaalliisunut ima oqaannarpoq: “Qanorluunniit oqarfigippasi naalakkisiuk.” Mariap paasivaa erni sulerissanersoq oqartussaaffigiunnaarlugu; namminerli allallu taassumannga ilitsersorneqartussanngorlutik. Jiisusilli anaanamisut katernaat misiginneqatigai. Siullerpaamik tupinnartuliorpoq imeq viinninngortikkamiuk pitsaasoq. Tamanna qanoq kinguneqarpa? Ajoqersugaasa upperfigilerpaat. Aamma Mariap upperfigilerlugulu ernermisut isigiinnarnagu maanna Naalakkamisut Annaassisimisullu isigilerpaa.

Ullumikkut angajoqqaajusut Mariap uppernera ilinniarfigingaarsinnaavaat. Angajoqqaaqanngikkaluarpoq meeqqamik Jiisusitut ittumik perorsaasimasunik. Angajoqqaalli tamarmik qitornamik inersimasunngulernerat unamminiarnartissinnaavaat. Angajoqqaat ilaasa ernertik panitsilluunniit meeqqatut nukangasutut piuartarpaat, aamma taamaaliorneq naleqqukkunnaaraluaraangalluunniit. (1 Korinthimiut 13:11) Angajoqqaat qitornartik inersimasoq qanoq tapersersorsinnaavaat? Ilaatigut Biibilimi ajoqersuutigineqartunik maleruaajuarumaarneranik tamatumalu kingunerisaanik Jehovamit pilluaqquneqarumaarneranik tatiginninnertik pillugu paasitinneratigut. Angajoqqaat taamatut maniguullutik tatiginninnerminnik oqaasertaliinerat qitornaannut inersimasunut qiimmassaataangaarsinnaavoq. Qularnanngilluinnarpoq Jiisusip ukiuni pisoqarfiungaartuni tulliuttuni Mariamit tapersersorneqarnini ikiorneqarninilu pingaartingaaraa.

Jiisusip kiffartornerata ukiunik pingasunik affarmillu sivisussusillip iivangkiiliuni oqaluttuarineqarnerani Maria eqqaaneqarpianngilaq. Eqqaamassavarpulli tamatuma nalaani uillarnerusimassagunartoq — anaanaq kisimiittoq, immaqa suli nukangasunik tigummisaminik qitornalik. Taamaattumik Jiisusi nunamini angalalluni oqaluussinerani malissinnaasimanngippagu paasinarpoq. (1 Timotheusi 5:8) Missiarsili pillugu paasisani eqqarsaatigeqqissaartuarpai ilaqutariillu pisarnerattut synagogimut illoqarfigisaminiittumut ataatsimiigiartuarluni. — Lukasi 2:19, 51; 4:16.

 Taamaattumik ilimanarpoq Jiisusi synagogimi Nazaretimiittumi oqalummat Maria tusarnaartut akornanniissimassasoq. Missiarsi pillugu ukiut hundredilikkuutaat tamatuma siorna siulittuutigineqartoq ernermi namminerminut eqquunnerarlugu nalunaarnera killitsissutigisimassaqaa! Aammali isumakuluutigisimassavaa Nazaretimioqataasa Missiarsiunera akueriumanngimmassuk. Allaammi ernera toqunniaraluarpaat! — Lukasi 4:17-30.

Aamma ernermi allat Jiisusimut isiginnittaasiat nikallungassutigaa. Johannesi 7:5 naapertorlugu Jiisusip nukai sisamat anaanamissut upperisaqanngillat. Ima allassimavoq: “Qatanngutaasaluunniimmi upperfiginngilaat.” Jiisusip najai pillugit Biibilimi taamaallaat allassimavoq ikinnerpaamik marluusut. * Pissutsit qanorluunniit ikkaluarpata ilaqutariinni upperisarsiornikkut assigiinngitsunik isumaqarfiusuni inuunerup tujorminartuunera Mariap misigaa. Sallusuissut aalajangiusimaatigalugu uteriinnani sukataarnanilu qitornami uummataat killikkumallugit iliuuseqarniarnermini oqimaaqatigiissaarisinnaasariaqarpoq.

Ilaanni Jiisusip eqqarliisa ilaasa, immaqa ilaatigut nukaasa, Jiisusi tigusariniarlugu ornippaat “paatsiveerutivissimasorigamikku”. (Markusi 3:21, 31) Soorunami Maria taamatut isumaqanngilaq, erninili ingiaqatigai immaqa arlaannik uppernerulissutigisaminnik paasisaqarnissaat neriuutigalugu. Paasisaqarpat? Naamik, Jiisusi tupinnartuliortuaraluartoq sallusuissutinillu nuanningaartunik ilinniartitsiuaraluartoq Mariap ernerisa allat suli upperfiginngilaat. Mariap taakkua uummataat qanoq killinneqarsinnaanersut ilaannikkut ilungersuummeqqalluni isumaliutigisarsimassavaa, ilaa?

Illit inoqutitillu assigiinngitsunik upperisaqarpisi? Taamaappat Mariap uppernera ilinniarfigingaarsinnaavat. Ilaquttani allamik upperisallit nikalluutinngisaannarpai. Aalajangiusimavaali upperisami qamuuna eqqissisitsillunilu nuannaartitsinera ersersittuarniarlugu. Taamaaliuutigaluni erni aalajaatsoq tapersersortuarpaa. Maqaasisarpaa? Ilaannikkut kissaatigisarpaa Jiisusimit suli najorneqarnertik? Taamaakkaluarpalluunniit eqqarsaatini aqussinnaajuaannarpai. Jiisusimik tapersersuineq kaammattuinerlu immikkut pisinnaatitaaffittut isigaa. Tamatumunnga assingusumik qitornatit inuunerminni Guutimik salliutitsisinnaaqqullugit ikiorsinnaavigit?

Mariap Jiisusimut uppernini akissarsissutigaa? Jehovap uppertini pilluaqqunngitsuunngisaannarmagit soorunami aamma Maria pilluaqquneqarpoq. (Hebræerit 11:6) Assersuutigalugu takorlooruk erni oqaluttoq tusarnaarlugu allalluunniit taassuma oqalugiaataasa ilaannik eqqartuisut tusarlugit qanoq tulluusimaartigisimassasoq.

Mariap ernermi assersuusiai tusaraangamigit taassuma Nazaretimi meeraanerani pisimasunik eqqaasaqartarpa? Assersuutigalugu Jiisusip arnaq aningaasaatini tammaasani ujarlugu illumini sanertoq, arnaq qajuusiassanik aserorterisoq arnarluunniit naneruaq ikeriarlugu qullilerfimmut ikkussisoq eqqartormagit Mariap ulluinnarsiutinik taamaattunik iliuuseqartilluni Jiisusi nukappiaraasoq najortigisimasani eqqarsaatigaa? (Lukasi 11:33; 15:8, 9; 17:35) Jiisusi oqarmat nammaatini iluartuusoq nammakkiussanilu oqitsuusoq taamani Josefip Jiisusi inuusuttuaraasoq uumasumut nammaasigassamut iluartumik peqqissaarluni nammaasiornermik ilinniartimmagu ualeq nuannersoq Mariap eqqaavaa? (Matthæusi 11:30) Jehovamit immikkut pisinnaatitaaffeqarnini — ernermik Missiarsinngortussamik perorsaallunilu ilinniartitsinini — eqqarsaatigigaangamiuk nalerisimaangaartarsimassaaq. Jiisusi, ilinniartitsisunit  tamanit ilinniartitsillaqqinnerpaaq, ulluinnarni atortakkanik pisartunillu atuilluni sallusuissutinik itisuunik nassuiaasoq tusarnaarlugu nuannarisarsimassaqaa!

Taamaakkaluartoq Maria maniguuttuujuarpoq. Ernerata ersersinngisaannarpaa Maria immikkut ataqqineqassasoq pallorfigineqassasorluunniit. Ilaanni Jiisusip kiffartornerani arnaq inuit akornanniittoq suaarpoq Jiisusimik ernisoq pilluangaarsimassasoq. Jiisusili akerliliilluni oqarpoq: “Pilluarput Guutip oqaasianik tusartut toqqorlugulu!” (Lukasi 11:27, 28) Inuppassuillu akornannit Jiisusimut oqartoqarmat arnaa qatanngutaalu eqqaannut pisut Jiisusi oqarpoq uppersuseqartut anaanagalugillu qatanngutigalugit. Taamatut oqaaseqarnera Mariap mamiatsaatiginagu Jiisusip pingaartitaa paasivaa, tassa anersaakkut qanitariinneq eqqarleriinnermit pingaaruteqarnerusoq. — Markusi 3:32-35.

Taamaakkaluartoq Mariap erni nappakkami anniartitaaffimmi naalliungaarluni toqusoq takullugu qamuuna anniangaarnera oqaasertalerneqarsinnaanngilaq. Takunnittut ilaat, apustili Johannesi, oqaluttuamini takorlooruminarsisitsisumik ilanngussaqarpoq: Piffissami artornangaartumi tamatumani Maria nappakkap Jiisusip anniartitaaffiata killinnguaniippoq. Qanorluunniit pisoqaraluarpat anaanaasup ilumoorfiginnillunilu asannittup ernini toqulersoq qimannavianngilaa. Jiisusip arni isigaa anersaartorninilu naalliunnangaaraluartoq oqalunniarninilu ilungersunangaaraluartoq oqalulluni. Apustilimut Johannesimut asasaminut arni isumageqquaa. Jiisusip qatanngutimi suli upperfigilinngimmanni taakkununnga Maria isumagisassanngortinnagu ajoqersukkaminut aalajaatsumut Johannesimut isumageqquaa. Taamaalilluni Jiisusip erseqqissarpaa angutit kristumiut inoqutiminnik, ingammik anersaakkut pisariaqartitaannik, isumassuinissaat pingaaruteqangaartoq. — Johannesi 19:25-27.

Jiisusi anerningermat Maria siulittuutigineqarsimasutut panap kapisineratut ittumik anniangaarpoq. Qanoq aliasutsiginera paasiuminaatsikkutsigu ullut pingasut tamatuma kingorna qanoq nuannaartiginera takorlooruminaatsinnerungaassavarput! Ullummi pingasut qaangiuttut Mariap tupinnartuliat annerpaartaat — Jiisusip toqusunit makititaasimanera — tusarpaa! Jiisusilu affarmik qatanngutiminit Jaakumit takuneqarmat nuannaarnerulerpoq. (1 Korinthimiut 15:7) Taamatut naapinnertik Jaakup killitsissutigingaarpaa, aammali Jiisusip affarmik qatanngutaasa allat killitsissutigaat. Kingusinnerusukkut allaatigineqarpoq taakkua Jiisusip Missiarsiunera upperileraat. Anaanartik kristumiut ataatsimiinnerinut ataatsimiigiaqatigisalerlugulu “qinusarnertik aalajangiuppaat”. (Apustilit Suliaat 1:14) Taakkua ilaat marluk, tassa Jaaku Judasilu, Biibilip atuagartaanik allattuupput.

Maria kingullermik eqqaaneqarami ernini ataatsimeeqatigalugit qinuvoq. Taassuma oqaluttuarineqarnerata naggaserneqarluassusia! Maligassiuilluassusialu! Uppernini pissutigalugu aliasunnini panap kapisineratut ittoq anigorpaa naggataatigullu nuanningaartumik akissarsisinneqarluni. Uppernera ilaarutsigu silarsuarmi naakkittaaffiusumi matumani ikilerneqarnivut qanorluunniit ittut anigorsinnaavavut, takorloorsinnaasavullu akimungaarlugit akissarsisinneqarluta.