EQQAAMIUMIK OQALOQATEQARNEQ
Guutip naalagaaffia qanga naalakkersuilerpa? (Immikkoortoq 1)
Jehovap Nalunaajaasui eqqaamiuminnik oqaloqateqaraangamik ataani allassimasutut oqaloqatiginnikkajupput. Takorlooriartigu Nalunaajaasut ilaata Kristianimik atillip Jonamik atilik pulaaraa.
PAASISIMASAQASSUSEQ ‘ILUNGERSORLUTIT UJARUK’
Kristian: Jona, Biibili pillugu oqaloqatigiittarnerput nuannareqaara. * Kingullermik oqaloqatigiikkatta Guutip naalagaaffianut tunngasumik apeqquteqarputit. Aperivutit sooq Jehovap Nalunaajaasuisa Guutip naalagaaffiata 1914-imi naalakkersuilernera upperineraat.
Jona: Aap, atuagassiaatissi ilaanni atuarakku Guutip naalagaaffia 1914-imi naalakkersuilersoq alapernaalerpunga. Oqarnikuuvutimmi upperisasi tamaasa Biibilimik tunngaveqartittuaannarisi.
Kristian: Aap, taamaappoq.
Jona: Biibili naallugu atuarnikuuara. Eqqaamannginnakkuli ukiumik 1914-imik allassimasoqarnersoq internetimi Biibili ujarlerfigaara, ujarliummilli ukioq 1914 ujaraluarakku ima allassimasoq nuivoq: ‘0 nassaat.’
Kristian: Marlutsigut nersualaagassaavutit. Siullermik, Biibili naallugu atuarsimagakku. Guutip oqaasia nuannaringaarsimassavat.
Jona: Aap, nuannarivara. Asseqanngitsuuvoq.
Kristian: Isumaqatigaakkit. Aappassaanik, nersualaarusuppakkit apeqqutit Biibilimi akissutissarsiorakku. Biibilimi ima kajumissaarneqarnitsitorluinnaq iliorputit: Paasisimasaqassuseq ‘ilungersorlutit ujaruk’. * Ajunngeqaaq taamaalioravit.
Jona: Qujanaq. Ilikkagaqarusuppungami. Ujarlernerulaariarama 1914 pillugu atuakkami atuaqqissaaqatigiissutigisatsinni nassaarpunga. Tassani eqqaaneqarpoq kunngip sinnattua — orperujussuaq kipillugu uppitinneqartoq alliartoqqilersorlu. Taamatupajaagunarpoq.
Kristian: Aappi. Tassa siulittuut Danielimik allakkani kapitali 4-mi allassimasoq. Babylonip kunngiata Nebukadnesarip sinnattuanut tunngavoq.
Jona: Aap, tassa taanna. Siulittuut atuaqattaaraluarakku Guutip naalagaaffianut ukiumulluunniit 1914-imut tunngassuteqarnera paasinngilara.
Kristian: Pruffiitilluunniimmi Danielip isumassarsisinneqarluni allattami isumaa paasilluanngilaa!
Jona: Ilumut?
Kristian: Aap. Uani Danielimik allakkat 12:8-mi ima allassimavoq: “Tamanna tusaraluarlugu paasinnginnakku aperivunga.”
Jona: Qujanarmi kisima paatsuunganngitsunga.
Kristian: Danielimik allakkani siulittuutit isumaannik inuit paasinnilluinnarnissaannut Guutip piffissarititaa suli nalliutinngimmat Danieli paasisaqanngilaq. Maannakkulli nalitsinni paasilluarnerusinnaavavut.
Jona: Sooruna?
Kristian: Malugiuk versip tulliani qanoq allassimasoqarnersoq. Danielimik allakkat 12:9 imaappoq: ‘Oqaatsit tamakku isertuussatut naqissuserneqarput naggatissaq nalliutserlugu.’ Tassa Danielip kingunerujussuatigut aatsaat, naggatissap nalaani, siulittuutit tamakku paasineqartussaapput. Naggatissap nalaani maanna inuusugut uppernarsaatit tamarmik tikkuussisut Biibilimik atuaqqissaarnitsinni qanittukkut atuarumaarpavut. *
Jona: Taavami Danielip siulittuutaanik nassuiaassinnaavinga?
Kristian: Misilissavara.
NEBUKADNESARIP SINNATTUA
Kristian: Kunngip Nebukadnesarip sinnattumini takusaa naatsumik oqaluttuareqqaalaarlara. Taava isumaa eqqartorumaarparput.
Jona: Ajunngilaq.
Kristian: Nebukadnesarip sinnattumini orperujussuaq qilammut apissittoq takuaa. Tusarpaalu Guutip inngilia peqqusisoq orpik taanna kipillugu uppitinneqassasoq orpiulli kippakua nunami ataannassasoq. ‘Piffissarititat arfineq-marluk’ naappata orpik naaqqissaaq. * Siulittuut tamanna siullermik kunngimut Nebukadnesarimut eqquuppoq. Orpittut qilammut apissittutut kunngiugaluarluni nuimasooq “piffissarititani arfineq-marlunni” uppeqqavoq. Susoqarnersoq eqqaamaviuk?
Jona: Naamik, eqqaamanngilara.
Kristian: Ajunngilaq. Biibilimi ersersinneqarpoq Nebukadnesari, ukiuni arfineq-marluugunartuni, silaaruttoq. Silaaruteqqanermini kunngitut naalakkersuisinnaanngilaq. Piffissarititalli arfineq-marluk naammata silaqqassutsi pigileqqippaa naalakkersuileqqillunilu. *
Jona: Aap, suli malinnaavunga. Tamakkorpassuilli Guutip naalagaaffianut ukiumullu 1914-imut qanoq attuumassuteqaramik?
Kristian: Naatsumik oqaatigalugu siulittuut tamanna marloriarluni eqquuppoq. Siullermik eqquuppoq kunngip Nebukadnesarip naalakkersuinera kipineqarmat. Aappassaanik eqquunnera Guutip naalakkersuinerata kipineqarneranut attuumassuteqarpoq. Tassa aappassaanik eqquunnera tamanna Guutip naalagaaffianut tunngassuteqarpoq.
Jona: Siulittuutip Guutip naalagaaffianut tunngassuteqartumik aappassaanik eqquunneqarnera qanoq nalunnginnakku?
Kristian: Taamaanneraanitsinnut pissutaanerpaavoq siulittuummit taamaannera ersermat. Danielimik allakkat 4:14 naapertorlugu siulittuut allanneqarpoq “inuusunut paaseqqullugu Qutsinnerussaartup kunngeqarfik nunarsuarmiittoq naalagaaffigigaa piumasaminullu tunniussinnaagaa”. Oqaatsit “kunngeqarfik nunarsuarmiittoq” malugivigit?
Jona: Aap, allassimavoq “Qutsinnerussaartup kunngeqarfik nunarsuarmiittoq naalagaaffigigaa”.
Kristian: Ilumoorputit. ‘Qutsinnerussaartoq’ kinaasoraajuk?
Jona: Guuti?
Kristian: Aap. Ersersinneqarpoq siulittuummi tamatumani Nebukadnesari kisimi pineqanngitsoq. Aamma pineqarpoq “kunngeqarfik nunarsuarmiittoq” — tassa Guutip inunnut naalagaanera. Danielimillu allakkani kapitalit ataqatigiinneri misissorutsigit tamanna uppernarsissavarput.
Jona: Qanoq?
DANIELIMIK ALLAKKANI SAMMISAQ PINGAARNEQ
Kristian: Biibilip atuagartaani Danielimik allakkani sammisaq aalajangersimasoq, tassa Guutip naalagaaffiata Guutip erneranik, Jiisusimik, aqutsisoqartup pilersinneqarnissaa, arlaleriarluni sammineqarpoq. Assersuutitut Danielimik allakkat 2:44 atuarsinnaavarput. Atuarusuppiuk?
Jona: Aap. Ima allassimavoq: “Kunngit taakkua inuutillugit qilaap Guutiata naalagaaffik qaqugumulluunniit atasussaq pilersikkumaarpaa, kingornalu inuiaat allat kunngiussutsimik pilersitsisinnaassanngillat. Guutip naalagaaffiata kunngeqarfiit allat tamaasa aserortissavai suujunnaarsillugillu, namminerli soraajuitsumik atassaaq.”
Kristian: Qujanaq. Versimi matumani naalagaaffik suna pineqarpa?
Jona: Guutip naalagaaffia.
Kristian: Aap, allassimavorlu ‘soraajuitsumik atassasoq’.
Jona: Tassa qanoq?
Kristian: Tassa Guutip naalagaaffia naassaanngitsumik piussaaq. Naalakkersuisulli inuit pilersitaat taarserneqartaramik naassaanngitsumik piunerarneqarsinnaanngillat, ilaa?
Jona: Aap, ilumoorputit.
Kristian: Danielimik allakkani Guutip naalagaaffia pillugu siulittuut alla Danielimik allakkat 7:13, 14-imi allassimavoq. Tassani naalakkersuilerumaartoq pillugu siulittuut atuariartigu: “Naalagaassusermik naalannaammillu kunngiussusermillu tunineqarpoq; inuiaqatigiit, naggueqatigiit immikkullu oqaasillit tamarmik kiffartorfigaat. Naalagaassusia naalagaassusiuvoq soraajuitsuusussaq, kunngeqarfialu suujunnaassanngilaq.” Siulittuut tamanna ilisarnartortaqarpa?
Jona: Aap, kunngeqarfik eqqaaneqarpoq.
Kristian: Ilumoorputit. Kunngeqarfik, tassa naalagaaffik, aalajangersimasoq pineqarpoq. Malugiuk allassimammat Naalagaaffimmit tamatumannga “inuiaqatigiit, naggueqatigiit immikkullu oqaasillit” oqartussaaffigineqassasut. Allatut oqaatigalugu naalagaaffik tamanna nunarsuarmut tamarmut naalakkersuissaaq.
Jona: Taamatut paasinngikkaluarpara, ilumoorputilli.
Kristian: Aamma malugiuk allamik qanoq siuliuttuuteqartoq: “Naalagaassusia naalagaassusiuvoq soraajuitsuusussaq, kunngeqarfialu suujunnaassanngilaq.” Danielimik allakkat 2:44-mi siulittuummut atuariikkatsinnut assinguvoq, ilaa?
Jona: Aap.
Kristian: Eqqartukkavut uteqqilaartigit. Danielimik allakkani kapitali 4-mi siulittuut allanneqarpoq inunnut paaseqqullugu “Qutsinnerussaartup kunngeqarfik nunarsuarmiittoq naalagaaffigigaa”. Tamatumannga erserpoq siulittuut Nebukadnesarimut tunngatillugu eqquunneranit pingaarnerungaartumik eqquunneqartoq. Guutillu naalagaaffiata Guutip erneranik aqutsisoqartup pilersinneqarnissaa pillugu Danielimik allakkani arlalinnik siulittuuteqarpoq. Taava isummersinnaavugut Danielimik allakkani kapitali 4-mi siulittuut tamanna Guutip naalagaaffianut attuumassuteqartoq?
Jona: Taamaappasippoq. 1914-imulli attuumassuteqarnera paasinngilara.
‘TAAMA IKKILI PIFFISSARITITANI ARFINEQ-MARLUNNI’
Kristian: Taavami kunngi Nebukadnesari eqqartoqqeriartigu. Siulittuutip eqquunnerani siullermi Nebukadnesari orpimmut assersuunneqarpoq. Taassuma naalakkersuinera kipineqarpoq orpik kipillugu uppiteriarlugu piffissarititani arfineq-marlunni imminiiginnarneqarmat — Nebukadnesari taama pineqarpoq piffissami killilimmi silaaruteqqammat. Nebukadnesarip silaqassutsi pigileqqimmagu naalakkersuileqqillunilu piffissarititat arfineq-marluk naapput. Siulittuutip aappassaanik eqquunnerani Guutip naalakkersuinera kipineqarpoq, naalakkersuissanngilarlu piffissami killilimmi — imaanngitsoq Guuti arlaatigut kukkussuteqarmat.
Jona: Suna piviuk?
Kristian: Biibilip nalaani Israelimi kunngit Jerusalemimi kunngiusut Jehovap ‘kunngimut issiavissaarsuarititaani’ issiasutut allaatigineqarput. * Taakku Guutip innuttaanik naalakkersuillutik Guutimut sinniisuupput. Tassa Guutip innuttaminik naalakkersuivoq kunngit taakku aqqutigalugit. Kunngilli taakkua amerlanersaat Guutimut naalanngittalerput, innuttaasullu amerlanersaat aamma naalanngittalerput. Taamaattumik Israelikkut ukiumi 607-imi Kr.in.si. Babylonimiunit tiguarneqarnissaat Guutip akueraa. Taamanimiit Jehova Jerusalemimi kunnginik sinniisoqarunnaarpoq. Tassa Guutip naalakkersuinera kipineqarpoq. Paasinarpa?
Jona: Aap.
Kristian: 607-imi Kr.in.si. piffissarititat arfineq-marluk aallartipput, tassa Guutip naalakkersuinera piffissami tamatumani kipineqarpoq. Piffissarititat arfineq-marluk naaneranni Guuti naalakkersuisumik nutaamik sinniisussaminik ivertitsisussaasimavoq — tamatumuuna qilammi. Aamma piffissami tamatumani siulittuutit allat Danielimik allakkani atuakkavut eqquupput. Taava una paaserusungaarparput: Qanga piffissarititat arfineq-marluk naappat? Apeqqut tamanna akisinnaagutsigu Guutip naalagaaffia qanga naalakkersuilersimasoq paasisimassavarput.
Jona: Eqqoriaassaanga — piffissarititat arfineq-marluk 1914-imi naappat?
Kristian: Aap! Paasisimavat.
Jona: Tamannali qanoq nalunnginnatsigu?
Kristian: Jiisusip nunarsuarmi kiffartornermini ersersippaa piffissarititat arfineq-marluk suli naanngitsut. * Tassa piffissarititat taakku sivisoorujussuusimassapput. Piffissarititat arfineq-marluk taakku aallartipput Jiisusip nunarsuarmukarnera ukiut hundredilikkuutaat sioqqullugu qilammullu uternerata kingorna suli naanatik. Aamma eqqaamajuk Danielip siulittuutai naggatissap nalaa nalliutserlugu paasineqassanngitsut. * Soqutiginarpoq 1800-kkut naggataatungaanni Biibilimik atuaqqissaartartut eqqortuliorusuttut siulittuutinik taakkuninnga allanillu peqqissaartumik misissuerusunnerat. Piffissarititat arfineq-marluk taakku ukiumi 1914-imi naasussaasut paasiartulerpaat. Taamanimiilli silarsuarmi pisut pingaarutillit uppernarsarpaat 1914 tassaasoq ukioq Guutip naalagaaffiata qilammi naalakkersuilerfia. Ukioq tamanna ukiuuvoq silarsuup matuma ulluisa kingulliit aallartiffiat, tassa naggatissap nalaata aallartiffia. Aatsaat tusakkatit amerlagunarput ...
Jona: Ilumut. Paasilluarumallugit atuaqqittariaqarpakka.
Kristian: Aamma uanga siulittuutit tamakku eqquunnerilu ingerlaannaq paasilluanngilakka. Neriuppungali oqaloqatigiinnitsinnit paasigit Jehovap Nalunaajaasuisa Guutip naalagaaffia pillugu upperisartik Biibilimik tunngaveqartikkaat.
Jona: Tupaallaatigiuaannarpara upperisarsi Biibilimik tunngaveqartittarassiuk.
Kristian: Aamma illit taamaaliorusunnerit tusaasinnaavara. Oqareernittut aatsaat tusakkatit amerlammata apeqqutissaqassagunarputit. Assersuutigalugu paasivarput piffissarititat arfineq-marluk Guutip naalagaaffianut attuumassuteqartut 607-imilu Kr.in.si. aallartittut. Qanorpiarli nalunngissinnaagatsigu piffissarititaasut arfineq-marluk taakku 1914-imi naasut? *
Jona: Aap, tamanna eqqarsaatigivara.
Kristian: Piffissarititaasut arfineq-marluk taakku qanorpiaq sivisutiginerat Biibilimi paasiniarsinnaavarput. Tullianik aggeruma tamanna eqqartussavarput? *
Jona: Aap, ajorinngilara.
Biibilimut tunngasumik aalajangersimasumik eqqarsaatiginnittarpit? Jehovap Nalunaajaasuisa upperisaat pillugu paasisaqarusuppit? Taamaappat Jehovap Nalunaajaasuisa ilaata aperinissaa tunuarsimaarutigeqinagu. Taassuma akissutissarsiorninni ikiorusuppaatit.
^ par. 5 Akeqanngitsumik Biibilimik atuaqqissaaqateqartarnikkut Jehovap Nalunaajaasuisa Biibili pillugu inuit oqaloqatigisarpaat.
^ par. 11 Ussatit 2:3-5.
^ par. 21 Atuakkami Biibilimi sorpiaat ajoqersuutigineqarpat?-mi kapitali 9 takuuk, Jehovap Nalunaajaasuinit saqqummersinneqartoq.
^ par. 27 Danieli 4:10-14.
^ par. 29 Danieli 4:17-33.
^ par. 59 1 Nalunaarsuutit 29:23.
^ par. 65 Jiisusip ullussat kingulliit pillugit ima siulittuivoq: ‘Jerusalemi [Guutip naalakkersuineranut ersiutaasoq] Guutimik nalusunit tullaanneqassaaq Guutimik nalusunut piffissarititaasut naatserlugit.’ (Lukasi 21:24) Tassa Guuti ulluni kingullerni aatsaat naalakkersuileqqittussaagami Jiisusip nalaani suli naalakkersuileqqissimanngilaq.
^ par. 65 Danieli 12:9.
^ par. 69 Atuakkami Biibilimi sorpiaat ajoqersuutigineqarpat?-mi tapiliussaq “1914 — ukioq Biibilimi siulittuutinut tunngatillugu pingaarutilik” takuuk.
^ par. 71 Biibilimi versit piffissarititat arfineq-marluk qanoq sivisutiginerannik paasinarsisitsisut allaaserisami “Eqqaamiumik oqaloqateqarneq”-mi tulliuttumi sammineqassapput.
Soqutigisinnaasatit allat
NAPASULIAQ ALAPERNAARSUIFFIK
Guutip naalagaaffia qanga naalakkersuilerpa? (Immikkoortoq 2)
Biibilimi siulittuut Babylonillu kunngiata sinnattua Guutimeersoq iluaqutigalugit ukiulerneqarsinnaavoq.
UAGUTSINNUT TUNNGASUT
Jehovap Nalunaajaasui pillugit apeqqutigineqartartut
Uagut pilluta apeqqutigisartakkatit akissutissarsikkit.
