ANGUTIP nuliani sutigut toqqissisimatissavaa? Inuppassuit peroriartornerminni isumaqalersimapput uiusup aningaasat tungaatigut ilaquttami toqqissisimanissaat pingaarnertut anguniagarissagaa. Nuliaasulli pigissaartut ilaat misigissutsikkut toqqissisimanngillat — allaat annilaangassuteqartarlutik. Assersuutigalugu Spaniamiu Rosamik atilik uini pillugu ima oqarpoq: “Allanut ilakkuminartuuvoq, uagutsinnili sorraatsuuvoq.” Joy Nigeriamiu ima oqaluttuarpoq: “Uiga isumaqatiginngikkaangakku ima oqartarnikuuvoq: ‘Oqaatsikka tamaasa naalassavatit nuliarigakkit.’”

Angutip uiusutut akisussaaffini asannittumik qanoq eqqortissinnaavaa? Angerlarsimaffinilu nuliaminut qanoq toqqissisimanartuutissinnaavaa? — Ruthi 1:9.

Uiusoq nuliaasorlu Guutip isaani naligiikkaluartut Biibilimi allassimavoq aappariit ilaqutariinni assigiinngitsunik inissisimaffeqartut. Efesosimiunut allakkat 5:22-mi allassimavoq arnaq uinittoq ‘uiminut naalatsigitissasoq’. Suliffeqarfiit soqutigisaminnik nakkutiginnittussamik pisortassamik toqqaasarnerattulli Guutip uiusoq nuliaminut ‘niaquusussatut’ toqqarsimavaa. (1 Korinthimiut 11:3) Uiusup inoqutini siulersortussaavai.

Uiusutut Guutimit oqartussaatitaanerit qanoq atussaviuk? Biibilimi ima allassimavoq: “Nuliasi asassavasi soorlu Kristusip ilagiit asagai.” (Efesosimiut 5:25) Aap, Jiisusi Kristusi aappaninngisaannaraluartoq taassuma maligassiaa uiulluarnissannut iluaqutigisinnaavat. Tamanna misissoriartigu.

Jiisusip allat nukissaqalersinniarlugillu oqilisaanniartarpai. Taassuma naqisimaneqartut ajornartorsiutiminnillu nanertisimasut tamaasa ima neriorsorpai: “Ornissinga, ... qasuertissavassi.” (Matthæusi 11:28, 29) Timikkut naalliuutaannut tunngatillugu oqilisaattarpai anersaakkullu nukissaqalersittarlugit. Tupinnanngilaq inuppassuit Jiisusimut qanillerusuttarmata oqilisaatissagaatik qularinagu!

Uiusup Jiisusi qanoq ilaarsinnaagaa. Nuliat illumi suliaanik oqilisaanniarlugu periarfissarsiortarit. Nuliaasut ilaat Rosatut misigipput, taanna ima naammagittaalliorpoq:   “Uinnut kiffaaginnarpunga.” Uiulluartorli Kwekumik atilik ima oqarpoq: “Akuttunngitsumik nuliara aperisarpara suliaanik qanoq ikiorsinnaaneriga. Asagakku illumi suliassaminik isumaginnittoq apereqqaarnagu ikiortarpara.”

Jiisusi isumassuisuullunilu misiginneqatiginnittarpoq. Arnap piitsup ukiuni aqqaneq-marlunni perulunnartumik nappaateqarsimasup Jiisusi tupinnartuliorsinnaasoq tusaramiuk ‘ima eqqarsarpoq: “Atisaaluunniit attuinnarukkit annaanneqassaanga.”’ Taamatorpiarlu pisoqarpoq. Jiisusi qanillattoriarlugu atisaata nivinngatai attoramigit ingerlaannaq ajorunnaarpoq. Isiginnittut isummersinnaagaluartut arnaq taanna ittuujuisaarluni iliuuseqartoq Jiisusip paasivaa saariarfissaaruteqqasoq. * Inussiarnersumik ima oqarfigaa: ‘Panik, ajoqutinnit ajorunnaarsitaagit.’ Arnap qanoq napparsimatigineranik paasinnittuuinnarani aamma peqqusiileqitinnagulu avoqqaarinngilaa. Taamaalilluni  ersersippaa tassaalluni angut misiginneqatiginnittartoq. — Markusi 5:25-34.

Uiusup Jiisusi qanoq ilaarsinnaagaa. Nuliat tujormigaangat isumassornerullugulu naammagittartuusarit. Misigissusii, eqqarsaatai qisuariarneralu paasiniartakkit. Ricardo ima oqarpoq: “Malugigaangakku nuliara paamitsaqqajaanerusoq misigissusiinik ajornerulersitsisinnaasumik oqaaseqarnaveersaartarpunga.”

Jiisusip ajoqersukkani oqaloqatigisarpai. Ikinngutini ammaffigalugit oqaloqatigisarpai, soorlu ilaanni ima oqartoq: ‘Ataatannit tusarsimasakka tamaasa ilissinnut ilisimalersissimavakka.’ (Johannesi 15:15) Ilumoorpoq Jiisusi eqqarsarnissamut qinunissamullu piffissaqarniarluni kisimiikkusuttartoq. Misigissutsinili ilorlerpaat ajoqersukkaminut oqaatigigajuppai. Pinerluttutut isigineqarluni aqagumut toqutaasussaalluni ‘aliasungaarnini’ ammasumik taakkununnga oqaatigaa. (Matthæusi 26:38) Allaat ikinngutimi iliuusii pakatsissutigigaluarlugit oqaluukkunnaartanngilai. — Matthæusi 26:40, 41.

Uiusup Jiisusi qanoq ilaarsinnaagaa. Eqqarsaatinnik misigissutsinnillu nuliat oqaluttuuttaruk. Arnat ilaasa naammagittaalliuutigisarpaat uimik allanut oqalunnissani ajornartorsiutiginagu angerlarsimaffimminni oqalukkusuttannginnera. Arnarli Anamik atilik uiminit ammaffigineqaraangami qanoq misigisartoq malugiuk: “Misigisarpunga ilumut asagaanga immitsinnullu qanittuararsuusugut.”

Nipangersimaneq pillaatitut nuliannut atornaveersaaruk. Arnaq ima oqarpoq: “Uima kamaakkaangaminga ullorpassuarni oqaluunneq ajorpaanga. Pisuusutut narrugisaasutullu misigitittarpaanga.” Edwinilli Jiisusip maligassiaa malinniartarpaa. “Kamaammeraangama ingerlaannaq oqaaseqarneq ajorpunga, ajornartorsiulli aaqqinniarlugu oqaloqatigiinnissamut piffissaqqinnerusorsiortarpunga.”

Joyp, allaaserisap matuma aallaqqaataani issuarneqartup, uini Jehovap Nalunaajaasuinit Biibilimik atuaqqissaaqatigineqaleramili allanngortoq malugisimavaa. Ima oqaluttuarpoq: “Pitsaanerulerpoq, Jiisusillu ilaarneratigut uiusutut asannittuuneruniarsarivoq.” Aappariit millionilikkuutaat Biibilimik ilinniartinneqarneq iluaqutigisimavaat. Aamma illit tamanna iluaqutigerusuppiuk? Akeqanngitsumik Jehovap Nalunaajaasuisa ilaannik Biibilimik atuaqqissaaqatigineqarumasinnaavutit.