Ataasiussuseqartumik pallorfiginninneq — qanoq ilinnut sunniuteqarpa?
Kapiteli 1
Ataasiussuseqartumik pallorfiginninneq — qanoq ilinnut sunniuteqarpa?
1, 2. (a) Suna tunngavigalugu pallorfiginninnikkut ataasiussuseq piviusoq ullumikkut anguneqarsinnaava? (b) Tamanna qanoq Bibelimi eqqartorneqarpa?
NUNARSUAQ tamakkerlugu asseqanngitsumik pisoqarpoq. Inuit inuiaqatigiinnit tamaneersut, naggueqatigiinnit tamaneersut assigiinngitsunillu oqaasillit peqatigiilerput ataasiussuseqartumillu pallorfiginnillutik. Ataasiussuseq tamanna ajoqersuutinik isumaqatigiinngissutaasunik isumaqatigiissutiginnikkallarnermik pissuteqanngilaq. Inooriaatsimik Guutip oqaasianut akerliusumik isornartorsiuiunnaarnikkut anguneqanngilaq. Sunaliuna ataasiussusiannut pissutaasoq? Aap, pissutaasoq tassaavoq inuit taakkua, qanorluunniit tunuliaqutaqaraluarlutik, Guutitut ilumoortutuatut Jehova ilisarilermassuk aammalu inuunertik taassuma najoqqutassiaanut naapertuilluartunut pitseriarlutik naapertuuttunngorsarmassuk. — Naleqqiuguk sarĸúmersitat 15:3, 4.
2 Siulittuutip, ukiunik 2700-nit amerlanerusunik manna sioqqullugu pruffiitimit Mikamit allanneqarsimasup, tamanna eqquunneraa. ’Ullussat kingulliit’ pillugit taanna ima allappoq: „Inuiappassuillu aggiajumaarput imalu oqarlutik: ’Qaagitsi, majuarta Jehovap qaqqaanut Jakobillu Guutiata illuanut; aqqutigeqqusaminik ajoqersorumaarpaatigut, aqqusernisigullu ingerlassaagut.’“ (Migga 4:1, 2, NV) * Ullumikkut tamanna pisoq takuiuk?
3, 4. (a) Qanoq paasisariaqarpa ’inuiaat’ Jehovamut saattut? (b) Immitsinnut qanoq aperisariaqarpugut?
Tuss. 143:10.
3 Inuiaat tamarmiusukkuutaarnatik Jehovap illuanut pallorfiginniffiusumut anersaakkut ittumut aggiapput. Tassa inuit ataasiakkaat inuiannit tamaneersut aggiapput, Jehova Guutillu asannittumik siunertarisaa aammalu kinaassusia kajungernartoq ilinniaraangamikkik uummatimikkut killinneqartarput. Maniguullutik paasiniarpaat Guutip qanoq piumaffigineraatik. Davidip uppertup oqarsimaneratut ima qinupput: „Ajoqersunnga illit piumasattut ilioqqullunga, guutigigakkimmi illit.“ —4 Katersaarsuarnut taakkununnga Jehovamik pallorfiginnittunut illit ilaavit? Ilikkakkannut qisuariarnivit takutippaa ilinniakkavit Jehovaminngaanneersuunerat akuerigit? Ilumoortuullutit taassuma ’aqqusernisigut’ ingerlavit?
Ataasiussuseq qanoq anguneqartoq
5. (a) Pallorfiginninnikkut ataasiussuseq tamanna naggataatigut qanoq annertutigilissava? (b) Sooq taama pisariaqartigaa Jehovamik pallorfiginninneq massakkut aallartissallugu, qanorlu ililluta inuit allat taamatut iliuuseqarnissaannut ikiorsinnaavavut?
5 Jehovap siunertaraa pinngortitami sianissusillit tamarmik ataatsimut isumaqatigiillutik pallorfiginnilernissaat — ajoqersuutinik kukkusunik tammartinneqarunnaarnissaat aammalu inuunerup siunertavianik ilisimaatsussusertik pissutigalugu taarmiujunnaarnissaat. Ulloq, inuusut tamarmik Guutimik ilumoortutuamik unnersiutiginnilerfissaat, ila erinigeqaarput! (Tuss. 103:19-22) Tamannali pitinnagu Jehovap pinngortitani saleqqaarallassavaa, naalagaassutsiminik asannittumik asissuillutik ajattuisut inuillu allat inuunerannik aseruiumasut piiarnerisigut. Naakkinnissutsi pissutigalugu qanoq iliuuseriumaagassaminik ilisimateqqaarallarpai. Inuit sumi tamaaniittut tamarmik inooriaatsiminnik allanngortitsinissaminnut periarfissaqarput. Ullumikkut silarsuaq tamakkerlugu ilungersortumik ima kajumissaarineqarpoq: ’Guuti mianerisiuk, taannalu naalannartissiuk, eqqartuussivissaa nalliummat; pallorfigisiullu qilammillu nunamillu immamillu ermillu puilasarfiinik pinngortitsisoq.’ (sarĸ. 14:6, 7) Qaaqqusissut tamanna ilassiviuk? Taamaappat taava maanna immikkut pisinnaatitaaffik angingaartoq atorpat Jehovap peqatigiissortai suleqatigalugit inunnik allanik ikiuiniarlutit, kajumissaarummik tamatuminnga ilassinnissinnaaqqullugit.
6. Bibelimi ajoqersuutigineqartut tunngaviusut ilinniareersimagutsigik siumukartuarsinnaaqqulluta maannakkut qanoq iliortariaqarpugut?
6 Inuit imminik upperinninneraraluarlutik aammalu Paratiisimi inoorusullutik oqaraluarlutik namminniinnaq soqutigisatik ingerlallugit inuusut peqatigiissortaminut ilanngunnissaat Guutip kissaatiginngilaa. Kissaatigaa inuit ’piumasani pillugu eqqorluartumik ilisimassuteqalissasut’ (NV), aammalu ilisimassut tamanna inooriaasianni malunnassasoq. (Kul. 1:9, 10) Bibelimi ajoqersuutigineqartunik tunngaviusunik ilinniarsimanerminnik qujamasuutiginnittut kristumiutut inersimasunngornissartik anguniarasuarumassavaat. Kissaatigilissavaat Jehovap ilisarisimanerulernissaa, taassuma oqaasianik annertunerusumik itinerusumillu paasinninnissartik, aammalu kissaatigilissallugu taassuma oqaasianik ulluinnarni inuunerminni tamakkiinerusumik maleruaanissartik. Pissusiinik malinninnermikkut aammalu pissutsinut sunulluunniit isiginnittaasianik issuaanermikkut Ataatartik qilammiusoq assiginerulissavaat. Tamatuma ullumikkut nunarsuarmi Guutip suliarititaanut sapinngisamik annertuumik peqataalersissavai. Illit taama-iliorpit? — Evf. 5:1; Epr. 5:12–6:3; 1 Tim. 4:15.
7. Ataasiussuseq piviusoq sutigut maannakkut angusinnaavarput, qanorlu ililluta?
7 Bibelimi ersersinneqarpoq Jehovamut kiffartortut tassaassasut inuiaat ataasiussuseqartut. (Evf. 4:1-3) Ataasiussuseq tamanna maanna atuutissaaq, naak silarsuarmi avissaartuuffiusumi inuugaluarluta aammalu suli naammalluinnanngissuserput akioraluarlutigu. Jesus ilungersorluni qinusimavoq ajoqersukkani ataasiussasut, aap, ataasiussuseq piviusoq nuannaarutigalugu atussagaat. Tamanna taakkununnga qanoq nassataqassava? Siullerpaamik pingaarnerusumillu Jehovamut taassumalu erneranut ajunngitsumik attaveqalissapput, taavalu ataasiussuseqassallutik. (Juán. 17:20, 21) Jehovap ’illuani’ ajoqersorneqarnerminnik maleruaanermikkut maanna ataasiussuseq tamanna angusimavaat.
Ataasiussutsimut suut allisaataappat?
8. (a) Apeqqutit uagutsinnut tunngassuteqartut akiniarneranni Bibeli atorutsigu inuttut suna angusarissavarput? (b) Kristumiut ataasiussusiannut pissutaasut taagorneqarsimasut apeqqutit ilanngunneqarsimasut akisaqattaarnerisigut misissoqqissaakkit.
8 Tulliuttuni eqqartorneqassapput ataasiussutsimut allisaataasut ilaat. Apeqqutit apeqqutigineqartut akigaangakkit eqqarsaatigisaruk tamakku Jehovamut kristumioqatinnullu attaveqarninnik qanoq attuinersut. Allassimaffiit ilanngunneqarsimasut ikiortigalugit eqqartorneqartussat isumaliutigeqqissaarnerisigut, tamatta pisariaqartitatsinnik, Guutimik ilisarsisutut eqqarsartaaseqaleriartuaarlutillu immikkoortitsisinnaassuseqaleriartuaassaatit. (úss. 5:1, 2; Fil. 1:9-11) Ataasiakkaarlugit isumaliutigeriakkit:
(1) Tamatta Jehova pallorfigaarput aammalu suna ajunngitsuunersoq sunalu ajortuunersoq najoqqutassiornermut pisussaanera akueralugu.
Uagut soqutaarpianngitsutut isigisatsinni Jehovap siunnersuinerigalua sumiginnarutsigu Jehovap tamanna qanoq isigissavaa? (Lúk. 16:10; naleqqiuguk Malakia 1:6-8.)
Jehovap inassutai tamatiguunngitsoq maleruartarutsigik inunnut allanut sunniuteqassava? (Naleqqiuguk Rûmamiunut agdlagkat 5:12; Jôrsua 7:20-26; kúnginik agdlagkat sujugdlît 14:16.)
(2) Silarsuarmi sumiikkaluaruttaluunniit Guutip oqaasianit siulersorneqarpugut.
Arlaannik aalajangigassaqartilluta nammineq ’eqqorsorisarput’ maliinnarutsigu taava tamatuma suna navianaatigissavaa? (Jer. 17:9; úss. 14:12)
Arlaannut aalajangersimasumut tunngatillugu Bibelimi qanoq unnersuussuteqarnersoq nalugutsigu taava qanoq iliortariaqarpugut? (úss. 2:3-5)
(3) Anersaakkut inuussutissat taakkuusut tamatta iluaqutigilluartarpavut.
Anersaakkut inuussutissanik Jehovap tunniuttagaanik pingaartitsinngitsut akornanni pissutsit qanoq ittut atuuppat? (Naleqqiuguk Isaia 1:3; 9:16; 65:14.)
(4) Jesus Kristus, inuit arlaat pinnagu, Siulersortigaarput taassumuunalu tamatta Jehova pallorfiginerani qanillivarput.
Arlarput inunnit allanit pitsaanerusorissalluni pissutissaqarpa? (Rûm. 3:23, 24; 12:3; Mat. 23:8-10)
(5) Sumiluunniit najugaqaraluarutta Guutip naalagaaffia inuiaat neriuutissatuaattut qilanaarutigaarput.
Avissaartuutsitsisinnaasunut tamatuma qanoq illersorpaatigut? (Mat. 6:9, 10; Migga 4:3)
(6) Anersaap iluartup pissutsit, kristumiut ataasiussusiannut pingaaruteqartut, Jehovamik pallorfiginnittuni ineriartortittarpai.
Qanoq ililluta Guutip anersaava uagutsinni inerititaqarnissaanut periarfissipparput? (Tuss. 1:2; úss. 22:4; sarĸ. 3:6; ap. sul. 5:32)
Anersaap piinik inerititaqarnerput qanoq ililluni Jehovamut attaveqarnitsinnut sunniuteqassava? Qatanngutitsinnut attaveqarnitsinnut? (Gal. 5:22, 23)
(7) Guutip naalagaaffia pillugu tusagassamik nuannersumik oqaluussissutiginninneq tamatta pisussaaffigaarput.
Aallussilluarluta oqaluussinitsinni kristumioqatitsinnik suleqatiginninnitta taakkununnga isummertarnerput qanoq ililluni sunniuteqarfigissavaa? (Naleqqiuguk Kulorsamiunut agdlagkat 4:7, 11.)
9. Ajoqersuutit ilumoortut tamakku najoqqutaralugit inuugaanni qanoq kinguneqartarpa?
9 Eqqartoriikkavut tamakku akuerissallugit ajornakusuunngilaq, maleruarlugilli inuulissagaanni piumasarisat annertunerupput. Maleruarlugit inuulerutta Jehovamut qanittumik attaveqalissaagut, kristumioqatitsinnillu ataatsimooqateqarneq uagutsinnut nakussatsissutaasassaaq. Tussiaat 133:1-imi allassimasutut ippoq: „Ata! Iluarlunilu nuannillaraasoq qatanngutigiit ataasioqatigiillutik najugaqatigiikkaangata!“ (NV) Illit nammineq misigisimassannguatsiarpat qanoq nutaannguallannarlunilu nukittuallannartigisartoq silarsuaq tamatumalu namminissarsiussusia nalunaaquttap-akunnialunnguani qimalaarlugit Jehovamik asannilluinnartut allat ilagalugit ataatsimiissimalluni.
Avissaartuussutaasinnaasut ingalassimakkit
10. Sooq allanit siulersorneqarumanngissutsip anersaava ingalassimaniaqqissaartariaqarparput?
10 Ataasiussuseq tamanna erlinnangaartoq aserorneqaqqunagu avissaartuussutaasinnaasut ingalassimasariaqarpavut. Avissaartuussutaasinnaasut sakkortunerpaat ilaat tassaavoq allanit siulersorneqarumanngissutsip anersaava. Tamatuma ingalassimanissaanut ikiorniarluta allanit siulersorneqarumanngissutsip aallaavia, Satan Diaavulu, Jehovap qulaarpaa. Taanna tassaavoq Evamik tammartitsilluni isumaqalersitsisoq Guutip peqqussutai sumiginnarunigit namminerlu aalajangiiguni iluanaarnerussasoq. Pikitsitsinermi tamatumani Adamip Eva peqatigilerpaa. Tamanna taakkununnga uagutsinnullu ajunaarnermik kinguneqarpoq. (1 Môrs. 2:16, 17; 3:1-6, 17-19) Silarsuarmi allanit siulersorneqarumanngissutsip anersaavanik tamatuminnga peqangaarfiusumi inuuvugut, taamaattumik tupaallaatigissanngilarput anersaamik taama ittumik akiortariaqakkatsinnik immitsinni nassaassagaluarutta. Akiuunnitsinni tamatumani ikiorniarluta Jehovap asannilluni peqatigiissortani aqqutigalugit unnersuuttarpaatigut.
11. Guutip aaqqissuussaani iluarsuseqarfiusussami inuunissamut ilumoorluta piareersarnersugut sukkut takuneqarsinnaava?
11 Peqatigiissortai taakku aqqutigalugit Jehovap siunertarisaa angingaartoq ilinniarsimavarput — tassa aaqqissuussaanermik ajortumik matuminnga taarsiinissaa qilassanik nutaanik nunassamillu nutaamik ’iluarsuseqarfiusunik’. (2 Pîtr. 3:13) Silarsuup ajortup ungasinngitsukkut peerneqarnissaa nunarsuullu paratiisinngortinneqarnissaa qilanaareqaarput. Kisianni inooriaatsitta ersersinnerpaa silarsuarmi iluarsuseqarfiusussami inuunissamut ilumut piareersarnersugut? Bibelimi toqqaannartumik ima oqarfigineqarpugut: ’Silarsuarluunniit silarsuulluunniit pii asaqinasigik. Silarsuarmik asannittoq Ataatap asanninneranik ilumiugisaqanngilaq.’ (1 Juán. 2:15) Ilumoorpoq silarsuarmi nuannarinngisavut amerlaqimmata. Kisianni ingammik inuunermik nuannarinninnitsinnut killilersuisut uumiginnginnerpavut? Imaluunniit aammattaaq silarsuup anersaava — allanit siulersorneqarumanngissuseq aammalu imminuinnaq eqqarsaatigivallaarneq — maajuginerparput? Naak immaqa timikkut pilerissutsitta allamut saasaraluaraatigut tamatigut Jehova tusarnaartarnerparput uummatitsinnillu naalallugu? Inooriaatsitta tamarmi — sumiikkaluarutta sulerigaluaruttaluunniit — ersersittariaqarpaa eqqarsaativut periaatsivullu Guutip piumasaanut naapertuuttuusut. — úss. 3:5, 6.
12. (a) Jehovap aqqutigeqqusaanik ilinniarnissamut inuunermilu taakkuninnga maleruaanissamut periarfissaq maannangaaq atorluarniassallugu sooq taama pingaaruteqartigaa? (b) Allassimaffiit immikkoortumi unnersuussutigineqartut tamatta immikkut qanoq attuumassuteqarfigaatigut?
12 Piffissaq, aaqqissuussaanermik ajortumik taassumalu aqqutigititaanik asannittunik tamanik piiaanissaminut aalajangersarsimasani, nallerpat Jehova mulunavianngilaq. Akuliunnissani kinguartinnavianngilaa, imaluunniit silarsuarmik ungaginnittut, Guutip piumasaanik ilinniarnissaminnut malinninnissaminnullu ilungersuussinngitsut, piinnarlugit najoqqutassiani sakkukillisinnavianngilai. Maannakkut iliuuseqartartoqartariaqarpoq! (Lúk. 13:23, 24; 17:32; 21:34-36) Taamaattumik ila ajunngissusia takullugit inuit amerlangaartut Jehovap ajoqersuineranik, peqatigiissortamigut asannittukkut tunniuttagaanik, ilungersorlutik atorluaaniarnermikkut taamaalillutillu ataasiussuseqarlutik taassuma aqqusernisigut ingerlanermikkut, periarfissamik angingaartumik tamatuminnga atorluaasut!
[Quppernerup ataani ilanngussaq]
^ imm. 2 Allat taaneqanngikkaangata allassimaffiit atuakkami uani issuagaasut bibeli kalaallisuunngortitaq atortussaatitaasoq tunngaviginerullugu issuagaasarput. Tussiaatinit issuakkat Tussiaatit-mit 1978-imi naqitikkamit, Det danske Bibelselskabip saqqummersitaanit, issuagaasarput. Naalisagaq NV isumaqarpoq Ny Verden-oversættelsen af De hellige Skrifter, qallunaatut 1985-imi naqitigaq.
Uteqqiineq
● Pallorfiginninneq pillugu Jehovap suna siunertaraa?
● Bibelimi ajoqersuutigineqartut tunngaviusut ilinniareersimagutsigik taava siumukartuarumalluta qanoq iliortariaqarpugut?
● Ataasiussuseqarnartut assigiinngitsut eqqartoreerlutigik, tamakku inuunitsinnut sunniuteqarsinnaaqqullugit tamatta immikkut qanoq iliuuseqarsinnaavugut?
[Atuaqqissaarnermi apeqqutit]
[Qupperneq 4-mi tamakkerlugu asseq]