Immikkoortoq 5

Piumasamik iliorsinnaassutsimik tunissut nuanningaartoq

1, 2. Tunis­sum­mik nuan­ningaar­tumik sumik pilersugaavugut?

PAASISIN­NAAS­SAGUTSIGU sooq Guutip naal­liun­nar­tut akuerisimagai qanorlu iliuuseqarfiginiarai, taava qanoq ilil­luni pin­ngor­tis­simagaatigut paasiniaq­qaar­tariaqar­par­put. Guutip timiliin­narsimanatalu qarasaliin­narsiman­ngilaatigut. Aam­mat­taaq sianis­susilerlutalu misigis­susilersimavaatigut.

² Sianis­sutsit­ta misigis­sutsit­talu ilaat pingaar­toq tas­saavoq piumasamik iliorsinnaassuseq. Aap, Guutip nam­mineq aalajangiisin­naas­susilersimavaatigut; tunis­sut nuan­ningaar­toq!

Qanoq pinngortitaasugut

3-5. Sooq piumasamik iliorsin­naas­suseq pingaar­tip­par­put?

³ Misis­soriar­tigu piumasamik iliorsin­naas­suseq Guutip naal­liun­nar­tunik akuerin­nin­neranut qanoq at­tuumas­suteqar­toq. Man­na eq­qarsaatigeq­qaariaruk: Iliuusis­satit, oqaasis­satit, nerisas­satit, atisas­satit, sulif­fis­sat, sumilu qanorlu najugaqar­nis­sat nam­mineq aalajangersin­naagak­kit nuan­naarutigaajuk? Imaluun­niit kis­saatigaajuk inuup al­lap inuunerit naavil­lugu qanoq oqaasis­san­nik iliuusis­san­nil­lu tamanik naalak­kersus­sagaatit?

⁴ Kialuun­niit sianis­sutsik­kut peq­qis­sup al­lanit aalajangiif­figineqar­tuar­nis­sani kis­saatigin­ngilaa. Sooq? Guutip taama pin­ngor­tis­siman­ngim­matigut. Bibeli naaper­torlugu Guutip inuit ‘im­minik as­silil­luni im­misut it­tun­ngorlugit’ pin­ngor­tis­simavai, Guutilu nam­mineq piumasamik iliorsin­naas­suseqar­poq. (1 Moses 1:26; 5 Moses 7:6) Inuit pin­ngor­tik­kamigit nuan­ningaar­tumik tamatumin­nga pigin­naas­susiler­pai — tunis­sum­mik, piumasamik iliorsin­naas­sutsimik. Taamaat­tumit­taaq kisermaas­sisunik qunutitsisunil­lu naalak­kersuisoqar­nis­sar­put kis­saatigineq ajor­par­put.

⁵ Kif­faan­ngis­suseqarusus­suseq nalaatsor­nerin­naan­ngilaq, Guutimi kif­faan­ngis­sutsip Guutigaa. Bibelimi ima al­las­simavoq: ‘Sumiit­taraangat [Jehovap] anersaa tas­saniip­poq kif­faajun­naar­neq.’ (2 Korintumiut 3:17) Taamaat­tumik Guutip piumasamik iliorsin­naas­susilersimavaatigut. Nalun­ngin­namiuk isumar­put misigis­sutsivul­lu qanoq ingerlasut, nalun­ngilaa piumasamik iliorsin­naas­suseqarut­ta nuan­naar­nerus­sasugut.

6. Guutip qanoq ilil­luni qarasaq piumasamik iliorsin­naas­sutsimut tul­luar­tun­ngorlugu pin­ngor­tis­simavaa?

⁶ Piumasamik iliorsin­naas­sutsip saniatigut Guutip eq­qarsarsin­naas­sutsimik, naliliisin­naas­sutsimik,  aalajangersin­naas­sutsimik ajun­ngitsumil­lu ajor­tumil­lu im­mik­koor­titsisin­naas­sutsimik tunisimavaatigut. (Eprîarit 5:14) Taamaam­mat piumasamik iliorsin­naas­suseq silalit­tut qinersisin­naanermik tun­ngaveqar­poq. Inuusaliatut nam­minerisamik qarasaqan­ngitsutut nam­minerlu aalajangiisin­naas­suseqan­ngitsutut pin­ngor­titaan­ngilagut. Aam­malu uumasutut misigis­sutsinit eq­qarsaatigeq­qaar­nagu iliuuseqar­titsisar­tunit aqun­neqar­tutut pin­ngor­titaan­ngilagut. Qarasar­put tupin­naqisoq piumasamik iliorsin­naas­sutsimik suleqateqar­tus­satut pin­ngor­titaavoq.

Aallartiffik pitsaanerpaaq

7, 8. Siuaasavut siul­liit Guutip qanoq pitsaaner­paamik aal­lar­tif­feqar­tis­simavai?

⁷ Guutip isumas­suil­luin­nar­nera takuneqarsin­naavoq piumasamik iliorsin­naas­sutsip saniatigut siuaasavut siul­liit, Adam Evalu, sunik tamanik kis­saatigisin­naasaan­nik tunisimam­magit. Paratiisimi, naatsiiviliarsuarmi angisuumi, inis­sin­neqar­put. Timip piinik amigaateqan­ngeqaat. Isumak­kut timik­kul­lu naam­mal­luin­nar­tuugamik utoq­qaliar­tor­navian­ngil­lat toqunaviaratil­lu — naas­saan­ngitsumil­li inuusin­naas­sap­put. Qitor­nas­saat naam­mal­luin­nar­tuus­sap­put naas­saan­ngitsumil­lu nuan­naarlutik inuusin­naas­sal­lutik. Taamaalil­lutil­lu inuiaat amerliar­tuin­nar­tut nunarsuaq tamak­kerlugu paratiisin­ngor­tin­niarlugu nalerisimaar­nar­tumik sulias­saqas­sap­put. — 1 Moses 1:26-30; 2:15.

⁸ Pin­ngor­titat pil­lugit Bibelimi ima al­las­simavoq: „Guutip pin­ngor­titani tamaasa isigai, ilumul­lu ajunngingaarput.“ (1 Moses 1:31) Guutilu pil­lugu ima al­las­simavoq: „Assuarnaatsuupput suliai.“ (5 Moses 32:4) Aap, Pin­ngor­titsisup inuiaat naam­mal­luin­nar­tumik aal­lar­tif­filersimavai. Pitsaanerusin­naasiman­ngilaq. Ilumut, Guutiuvoq isumas­suingaar­toq!

Kiffaanngissuseq killilik

9, 10. Sooq piumasamik iliorsin­naas­suseq eq­qor­tumik kil­lilersugaasariaqar­pa?

⁹ Kisian­ni Guutip siuner­tariner­paa inuup piumasamik iliorsin­naas­susia kil­leqan­ngitsuus­sasoq? Takorlooriaruk il­loqarfis­suaq ulapif­fiusoq aq­qusinik­kut angal­lat­tunut malit­tarisas­saqan­ngitsoq; sumul­luun­niit qanorluun­niit suk­katigaluni biiler­toqarsin­naasoq. Tamaani biilerusus­sagaluar­pit? Naamik, angal­lat­tum­mi uiver­torsuus­sagaluar­put qular­nan­ngivis­sumil­lu ajunaar­ner­pas­suaqas­sagaluarluni.

¹⁰ Guutip piumasamik iliorsin­naas­sutsimik tunis­sutaa aam­ma taamaap­poq. Kif­faan­ngis­suseq kil­leqan­ngitsoq inuiaqatigiin­ni uiver­nersuarmik kinguneqas­saaq. Inuit suliaat inatsisitigut aqun­neqar­tariaqar­put. Guutip oqaasiani ima al­lasimavoq: ‘Kif­faan­ngitsutut kif­faan­ngis­susersilu iluaatsulior­nermut patsisiginagu.’ (1 Pîtruse 2:16) Piumasamik iliorsin­naas­sutsip kik­kut tamarmik iluaqutis­saan­nut aqun­neqar­nis­saa Guutip kis­saatigaa. Kiffaanngissuseq killeqanngitsoq siuner­tarinagu kif­faan­ngis­suserli killilik, tas­sa inatsisinit aqun­neqar­toq, siuner­taraa.

Kia inatsisaanit?

11. Kia inatsisaanik maleruaasus­satut pin­ngor­titaavugut?

¹¹ Kia inatsisai naalat­tus­saavavut? Pîtrusip agdlagai sujugdlît 2:16-p naggataani ima  nas­suiar­neqar­poq: ‘Guutip kif­faraasi.’ Qunutitaal­luni inus­siaataaneq pineqan­ngilaq, Guutil­li inatsisaanik maleruaagaangat­ta ingerlal­luar­nerusar­tus­satut pin­ngor­titaasugut. (Matîuse 22:35-40) Taas­suma inatsisai inuit inatsisiliaan­nit tamanit un­nersuus­sil­luar­ner­paap­put. „Uanga tas­sa [Jehova], Guutit, iluaqutaasunik ilin­nik ajoqersuisoq, ingerlavigisas­sak­kut ingerlatitsisoq.“ — Jesaja 48:17.

12. Guutip inatsisaasa iluan­ni qanoq kif­faan­ngis­suseqar­pugut?

¹² Guutil­li inatsisaasa iluan­ni nam­mineq qinersisin­naanis­samut kif­faan­ngis­suseqaqaaq. Tamatuma kingunerai suut tamarmik avaan­ngunar­tumik as­sigiiaan­ngin­nerat inuiaal­lu as­sigiin­ngitsut alutor­naquter­pas­suaqar­nerat. Eq­qarsaatigeriak­kit nunarsuaq tamak­kerlugu nerisas­sat, atisat, nipilersoriaatsit, eq­qumiitsuliat angerlarsimaf­fiil­lu as­sigiin­ngitsor­pas­suit. Tamak­kunuunatigut nam­mineq qinersisin­naas­suseqar­ner­put nuan­naarutigaar­put, al­lanit aalajangersaaf­figineqar­nis­sar­put kis­saatiginagu.

13. Pin­ngor­titarsuarmi inatsisit suut nam­mineq iluaqutis­satsin­nut ataq­qisariaqar­pavut?

¹³ Guutip ileq­qus­satigut inatsisaanut naalak­kut­ta aatsaat ingerlal­luar­ner­paasus­satut pin­ngor­titaavugut. Aam­ma pin­ngor­titarsuarmi inatsisit Guutip pilersitai eq­qarsaatigalugit taamaap­poq. As­sersuutigalugu, oqimaas­sutsip inatsisai sumigin­narutsigik in­naarsum­miil­lu pis­sil­luta, ajor­tumeerujus­suas­saagut toqus­sal­lutaluun­niit. Timit­ta inatsisai ilorliit sumigin­narutsigik nerisarun­naarluta, imer­tarun­naarluta anersaar­torun­naarlutalu, toqus­saagut.

14. Qanoq ilil­luta nalun­ngilar­put inuit Guutimit oqar­tus­saaf­figineqar­tus­satut pin­ngor­titaasut?

¹⁴ Soorlu Guutip pin­ngor­titarsuarmi inatsisaanut maleruaanis­samut pisariaqar­titsisus­satut pin­ngor­titaasugut, Guutip ileq­qus­satigut inooqatigiin­nik­kul­lu inatsisaanit­taaq pisariaqar­titsisus­satut pin­ngor­titaavugut. (Matîuse 4:4) Pin­ngor­titsisumin­nit oqar­tus­saaf­figineqar­tus­satut inuit pin­ngor­titaap­put. Pruf­fiiti Jeremias ima al­las­simavoq: ‘Angutip aalajangigas­sarin­ngilai qanoq ingerlanis­sani al­loriar­tar­nis­sanilu. [Perorsaatis­sit­tan­nga, Jehova, NV].’ (Jeremia 10:23, 24) Aap, inuit sutigut tamatigut Guutimit oqar­tus­saaf­figineqar­tus­satut pin­ngor­titaap­put.

15. Guutip inatsisaanik maleruaajuaan­nar­nis­saq Adamik­kun­nut ar­tor­narsimas­sagaluar­pa?

¹⁵ Guutip inatsisaanut naalat­tuaan­nar­nis­saq siuaasatsin­nut siul­ler­nut ar­tor­nar­naviarsiman­ngik­kaluar­poq, taak­kunun­ngali inuian­nul­lu tamanut iluaqutaasimas­sagaluarluni. Aap­pariit siul­liit Guutip inatsisaasa kil­lis­sarititaan­nik ataq­qin­nis­simasuup­pata suut tamarmik ajun­ngitsumik ingerlasimas­sagaluar­put. Maan­nak­kum­mi inuiaat asaqatigiil­lutik ataasius­suseqarlutik paratiisimi nuan­naarfiusumi inuus­sagaluar­put! Ajus­suseq, naal­liun­nar­tut toqulu atuutis­san­ngik­kaluar­put.

[Atuaqqissaarnermi apeqqutit]

[Qupp. 11-mi assiliartaq]

Pin­ngor­titsisup inuit naam­mal­luin­nar­tumik aal­lar­tif­feqar­tis­simavai

[Qupp. 12-mi assiliartaq]

Angal­lan­nermut inatsiseqan­ngil­luin­naraluar­pat biilerusus­sagaluar­pit?