Guutip kiffai minguitsuusussaapput
Ilinniagassaq 9
Guutip kiffai minguitsuusussaapput
Sooq sutigut tamatigut minguitsuusariaqarpugut? (1)
Qanoq paasisariaqarpa: anersaakkut minguitsuuneq? (2) ileqqussatigut minguitsuuneq? (3) isumakkut minguitsuuneq? (4) timikkut minguitsuuneq? (5)
Oqaatsit minguttuut suut ingalassimasariaqarpavut? (6)
1. Jehova Guuti minguitsuuvoq illernartuullunilu. Naatsorsuutigaa imminut pallorfiginnittut minguitsuussasut, anersaakkut, ileqqussatigut, isumakkut timikkullu. (1 Pîtruse 1:16) Guutip isaani minguitsuujuaannassagaanni iliuuseqartariaqarpoq. Silarsuarmi minguttuumi inuuvugut. Aamma eqqunngitsumik ilioriartarnivut akiugassaraavut. Nakkaannanngisaannartali.
2. Anersaakkut minguitsuuneq: Jehova kiffartuukkusukkutsigu upperisarsiornerup ilumuunngitsup ajoqersuutai ileqquilu malikkunnaartariaqarpavut. Upperisarsiorneq ilumuunngitsoq qimattariaqarparput sukkulluunniillu tapersersorunnaartariaqarlugu. (2 Korintumiut 6:14-18; sarĸúmersitat 18:4) Guuti pillugu sallusuissut ilikkareerutsigu inunnit eqqunngitsunik ajoqersuutilinnit tammartinneqarnaveersaartariaqarpugut. — 2 Juánase 10, 11.
3. Ileqqussatigut minguitsuuneq: Jehovap kissaatigaa imminut pallorfiginnittut tamatigut kristumiutut ilumoortutut pissuseqassasut. (1 Pîtruse 2:12) Iliuutsivut tamaasa, allaat isertortumi iliuutsivut, takusinnaavai. (Eprîarit 4:13) Kinguaassiuutitigut kanngunartuliorneq silarsuarmilu maani iliuutsit minguttuut allat ingalassimasariaqarpavut. — 1 Korintumiut 6:9-11.
4. Isumakkut minguitsuuneq: Isumarput eqqarsaatinik minguitsunik ajunngitsunillu immertarutsigu aamma iliuutsivut minguitsuussapput. (Filípimiut 4:8) Minguttuulli eqqarsaatitsigut uteqqiaffigiuarutsigik iliuutsinik ajortunik kinguneqassapput. (Matîuse 15:18-20) Aliikkutassiat isumatsigut minguttuunnguutigisinnaasavut ingalassimasariaqarpavut. Guutip oqaasianik atuaqqissaartarnitsigut isumarput eqqarsaatinik minguitsunik immertarsinnaavarput.
5. Timikkut minguitsuuneq: Kristumiut Guutimit aallartitaapput, taamaattumillu timimikkut atisamikkullu ipiitsuusariaqarput. Anartarfimmeereeraangatta errortortariaqarpugut, aammalu nerinnginnitsinni nerisassanillu suliaqannginnitsinni errortoqqaartariaqarpugut. Anartarfeqanngitsumiikkaanni anareeraanni quereeraanniluunniit nunamut matooruttariaqarput. (5 Moses 23:12, 13) Timikkut ipeersaarneq peqqissutsimut iluaqutaasarpoq. Kristumiup angerlarsimaffia silataalu torersuullutillu ipiitsuusariaqarput. Tamakkunatigut kristumiu allanut maligassaasariaqarpoq.
6. Minguitsumik oqalunneq: Guutip kiffai tamatigut ilumoortumik oqaluttariaqarput. Sallusartut Guutip naalagaaffianut isernavianngillat. (Evfisumiut 4:25; sarĸúmersitat 21:8) Kristumiut oqaasipilunneq ajorput. Quiasaarnipalaanut oqaluttuanulluunniit kanngunartunut tusarnaarumaneq ajorput. Minguitsumik oqaluttarnertik pissutigalugu suliffimminni, atuarfimmi najugaqarfimminnilu inunnit allanit allaanerupput. — Evfisumiut 4:29, 31; 5:3.
[Qupp. 18, 19-mi assiliartat]
Guutip kiffai sutigut tamatigut minguitsuusussaapput