Upperisaq ilumoortoq qanoq ililluni nanineqarsinnaava?
Ilinniagassaq 13
Upperisaq ilumoortoq qanoq ililluni nanineqarsinnaava?
Upperisarsiornerit tamaasa Guutip iluarai, imaluunniit ataasiinnaq iluaraa? (1)
Sooq upperisarsioqatigiit kristumiuunerartut taama amerlatigippat? (2)
Qanoq ililluni paasineqarsinnaava kikkut kristumiuusut ilumoortut? (3-7)
1. Jesus ilagiinnik kristumiunik ilumoortunik ataasiinnarnik pilersitsisimavoq. Taamaattumik ullumikkut ilagiit imaluunniit immikkooqatigiit Jehova Guutimik pallorfiginnittunik ilumoortunik ilaasortallit ataasiinnaapput. (Juánase 4:23, 24; Evfisumiut 4:4, 5) Biibilimi oqaatigineqarpoq inuit ikittuinnaat aqqummik amitsumik inuunermut sammisumik nanisiumaartut. — Matîuse 7:13, 14.
2. Biibilimi siulittuutigineqarsimavoq apustilit toqunerata kingorna ajoqersuutit ilumuunngitsut kristumiuunngitsullu ileqqui ilagiinnut kristumiunut eqqukkiartuaarneqarumaartut; uppertut Kristus pinnagu inunnik malinninnissaannut sunnerneqarumaartut. (Matîuse 7:15, 21-23; apustilit suliait 20:29, 30) Taamaattuminguna ullumikkut upperisarsiortut kristumiuunerartut assigiinngitsut taama amerlatigisut. Taavami qanoq ililluta paasisinnaavarput kikkut kristumiuusut ilumoortut?
3. Kristumiut ilumoortut ilisarnaataat malunnarnerpaaq tassaavoq piviusumik asaqatigiinnerat. (Juánase 13:34, 35) Ilinniartinneqanngillat inunnit allamik nagguilinnit imaluunniit qalipaatilinnit pitsaanerullutik. Aammattaaq inunnik nunani allamiunik uumissuinissaminnik ilinniartinneqanngillat. (apustilit suliait 10:34, 35) Taamaattumik sorsoqataaneq ajorput. Kristumiut ilumoortut imminnut qatanngutigiittut pisarput. — 1 Juánase 4:20, 21.
4. Ilumoortumik upperisarsiortut ilisarnaataat alla tassaavoq Biibilimik ataqqinnilluinnarnerat. Biibili Guutip oqaasiatut akueraat tassanilu allassimasut upperalugit. (Juánase 17:17; 2 Timûtiuse 3:16, 17) Guutip oqaasia inuit isumassarsiaannit ileqquinillu pingaarnerusutut isigaat. (Matîuse 15:1-3, 7-9) Ulluinnarni inuunerminni Biibili malinniarsaraat. Taamaalillutik oqaluussissutigisatik naapertorlugit iliortarput. — Títuse 1:15, 16.
5. Ilumoortumik upperisarsiortut aamma Guutip aqqa ataqqisussaavaat. (Matîuse 6:9) Guutip aqqa, Jehova, Jesusip allanut ilisimaneqalersissimavaa. Kristumiuttaaq ilumoortut taamaaliortariaqarput. (Juánase 17:6, 26; Rûmamiut 10:13, 14) Inuiaqatigiinni illit ilaaffigisanni kikkut Guutip aqqanik allanut oqaluttuarinnittarpat?
6. Kristumiut ilumoortut aamma Guutip naalagaaffia oqaluussissutigisussaavaat. Jesus taamaaliortarsimavoq. Guutip naalagaaffia oqaluussissutigiuaannarsimavaa. (Lúkarse 8:1) Ajoqersukkanilu peqqusimavai nunarsuaq tamakkerlugu tusarliussaq tamanna oqaluussissutigissagaat. (Matîuse 24:14; 28:19, 20) Kristumiut ilumoortut upperaat Guutip naalagaaffia kisimi eqqissinermik isumannaassutsimillu piviusunik nunarsuarmi maani pilersitsisinnaasoq. — Tussiaat 146:3-5.
7. Jesusip ajoqersugai silarsuarmut ajortumut matumunnga ilaasinnaanngillat. (Juánase 17:16) Silarsuarmi naalakkersuinermut inuillu akerleriissuteqarnerinut akuliunneq ajorput. Iliuutsit isummallu ajoqutaasut silarsuarmi maani nalinginnaasut ingalassimaniartarpaat. (Jâko 1:27; 4:4) Upperisarsioqatigiinnik, kristumiut ilumoortut ilisarnaataannik tamakkuninnga ersersitsisunik, inuiaqatigiinni illit ilaaffigisanni takusaqarsinnaavit?
[Qupp. 26, 27-mi assiliartat]
Kristumiut ilumoortut asaqatigiipput, Biibilimik ataqqinnittuullutik Guutillu naalagaaffia oqaluussissutigisarlugu