Kapiteli 8

Angajoqqaatut isumagisassasi

1-3. (a) Meeq­qap inun­ngor­nerata angajoq­qaat qanoq sun­niuteqarfigisin­naavai? (b) Ataataasup anaanaasul­lu tamarmik im­mik­kut angajoq­qaatut isumagisas­samin­nik paasin­nin­nis­saat sooq pisariaqarluin­nar­pa?

INUUNERMI pisimasor­pas­suit an­nikitsuin­narmik sun­ner­tar­paatigut. Pisimasul­li ilaat an­ner­tuumik katat­tus­saan­ngitsumil­lu sun­niuteqar­tar­put. Taak­kua ilagaat meeq­qap inun­ngor­nera. Aap­pariit inuunerat al­lan­ngorluin­nas­saaq. Naak mikisuaran­nguugaluarluni inoorlaaq nipimigut najuun­nermigul­lu sumigin­nagas­saan­ngitsumik malugitis­saaq.

² Angajoq­qaat inuunerat pisuunerulis­saaq pil­luar­nar­nerulis­sal­lunilu. Tamaviaar­nar­porli, kinguneqarluas­sap­pal­lu angajoq­qaat tamarmik marluul­lutik tamaviaar­tuar­tariaqas­sap­put. Marluul­lusi suleqatigiil­lusi meeraq inun­ngor­tip­parsi, marluul­lusilu meeras­si inun­ngor­neraniit siumut ineriar­tor­nerani pingaar­tumik sulias­saqaler­pusi. Ilungersor­tumik, aaq­qiagiis­sumik — maniguut­tumil­lu — suleqatigiin­nis­saq aatsaat taama pisariaqar­tigiler­poq.

³ Tamas­si im­mik­kut angajoq­qaatut isumagisas­sasi nalun­ngik­kus­sigik isumagisas­sas­silu qanoq ataqatigiis­sin­niar­nis­saat paasigus­siuk, meerarsi paaril­luarsin­naas­savarsi aam­malu pil­luar­nar­tumik inuunis­sarsi qulak­kiis­savarsi. Oqimaaqatigiis­saarisariaqar­pusi. Naak silatusaar­tumik iliuuseqarumagaluarluta ilaatigut iluatsin­ngitsoor­tar­pugut misigis­sutsit akor­nusiisarmata. Ingasat­tulior­tar­pugut, ilaatigut an­nikip­pal­laar­tumik ilior­tarluta, taavalu ingas­saas­sisumik ilior­tarluta, taavalu suli  an­nikin­nerusumik ilior­tarluta. As­sersuutigalugu: Kis­saatiginaraluar­poq ataataasup qul­lersaanini atus­sagaa, ingasaas­sigunili naqisiman­nit­tun­ngulis­saaq. Aam­mat­taaq ajun­ngilaq anaanaasoq meeq­qanik perorsaaqataaguni, ataatarli tunuar­til­lugu perorsaaneq kisermaatileruniuk, ilaqutariit aaq­qis­suus­saaneran­nut ajoqutaasin­naas­saaq. Ajun­ngitsoq ajun­ngitsuuvoq, ajun­ngitsorli ingasaan­neqaruni ajor­tun­ngorsin­naas­saaq. — Filípimiut 4:5.

ANAANAASUP ISUMAGISASSAI PINGAARUTEQAQISUT

4. Naalungiarsuup pisariaqar­titaanik sunik anaanaasup tunisin­naavaa?

⁴ Mas­sak­kor­piaq meeq­qap inoorlaap pisariaqar­titai eq­qarsaatigalugit anaanani pin­ngitsoorsin­naan­ngivip­paa. Pisariaqar­titai asan­nit­tumik tun­niut­tar­pagit naalungiarsuk toq­qis­sisimal­luin­nas­saaq. (Tus­siaat 22:10, 11) Nerisas­sat, eq­qiluitsuutitaaneq uun­nas­simaar­titaanerlu pisariaqar­tip­pai; timik­kul­li pisariaqar­titaan­naanik tunis­sal­lugu naam­man­ngilaq. Misigis­sutsik­kut pisariaqar­titai taamatut­taaq pingaar­tigaat. Naalungiarsuk asaneqan­ngik­kuni toq­qis­sisimajun­naas­saaq. Anaanaasup ilik­karasuas­savaa meeraq qiagaangat takusar­neqar­nis­saa pisariaqarluin­nar­nersoq. Qianerali sumigin­nar­tuaan­nar­pagu meeq­qap peq­qiil­lis­sutigisin­naavaa. Pif­fis­sami sivisungaatsiar­tumi meeq­qap misigis­sutsik­kut pisariaqar­titai sumigin­nar­neqar­pata, taava inuunermi sin­nera tamaat misigis­sutsimigut ajoqutigis­savaa.

5-7. Misis­suinerit nutaanerusut naaper­tus­sagaan­ni, anaanaasup asan­nin­nerata soqutigin­nin­neratalu naalungiarsuk qanoq sun­ner­tar­paat?

⁵ Nunani as­sigiin­ngitsuni up­per­narsar­neqarsimavoq naalungiarsuit asaneqar­neq oqaluf­figineqar­nik­kut, at­tor­neqar­nik­kut, eqin­neqar­nik­kut inequn­neqar­nik­kul­lu ersersin­neqar­tar­toq amigaatigigunik­ku nap­parsimas­sutigilersin­naagaat al­laal­lu toqus­sutigisin­naal­lugu. (Naleq­qiuk­kit Isaia 66:12; Tásalûníkamiunut agdlagkat sujugdlît 2:7.) Naak inuit al­lat naalungiarsuk asan­nin­nermik taama it­tumik ersersitsivigisin­naagaluaraat, taamaat­toq  anaanaasoq, meeq­qap qaam­matini siul­ler­ni inuuf­figisaani tigum­min­nis­simasoq inuus­suteqar­titsisimasorlu, qular­nan­ngivis­sumik taamaalior­nis­samut piuk­kun­narluar­ner­paavoq. Anaanaq qitor­naalu pis­susis­samisoor­tumik sun­niivigeqatigiit­tar­put. Anaanaasup inoorlaamik im­minut at­tuumatil­lugu tigumiarusus­susiata naligaa naalungiarsuup anaanami iviangiinik milun­niarusus­susia.

⁶ Misis­suinik­kut paasineqarsimavoq naalungiarsuup qarasaa sulisupilus­suusar­toq aam­malu eq­qarsar­taatsik­kut ineriar­tor­nerata siuarsaatigisaraa meeq­qap malugisin­naas­susiata, tusaasin­naas­susiata, isigisin­naas­susiata naamasin­naas­susiatalu sun­ner­neqar­nerat. Meeraq miluk­kaangami anaanami amiata kis­sar­nera tik­kalu malugisar­pai. Milutsil­luni anaanami kiinaa isigiin­nangajavit­tar­paa. Aam­ma nipaa — oqaluf­figisaraangani erinarsorfigisaraanganilu — kisiat tusar­naar­neq ajor­paa, aam­mat­taarli uum­mataata til­ler­nera, nipi il­liaaniik­kal­larami tusarsimasani, tusar­tarlugu. Atuagas­siami Norgemi saq­qum­mersimasumi meeq­qat tar­naata pis­susiinik ilisimatooq An­ne-Marit Duve ima oqar­poq:

„Qaratsap sulinerata qanoq atsigis­susia isit aalanerisa erseq­qis­sumik takutim­mas­suk, pis­sutis­saqar­poq isumaqas­sal­luni am­mik­kut at­tuuaneqar­nerup — ingam­mik milutsitsinermut atatil­lugu — eq­qarsarsin­naas­suseq an­ner­tusisis­sin­naagaa, tamatumalu kingunerisin­naagaa inersimasun­ngor­nermi silas­soris­sutsik­kut pigin­naas­suseqar­neruneq.“

⁷ Anaanaasup qitor­nani at­tor­taraangagu, soorlu tigugaangagu, qujagalugu ilas­sioraangagu, uf­faraangagu al­lar­teraangagulu, meeraq sun­ner­neqar­tar­poq ineriar­tor­neranut pingaaruteqaqisumik kingor­natigul­lu qanoq it­tun­ngor­nis­saanut sun­niuteqar­tus­samik. Nuan­nersuin­naaneq ajoraluar­poq un­nuaan­nak­kut makit­tas­sal­luni naalungiarsuk qiasoq saam­marsar­niarlugu, naluneqan­ngim­mal­li meeq­qap taman­na iluaqutigiumaaraa, angajoq­qaap un­nuak­kut sinin­nermini akor­nuser­neqar­tar­nini ajorinavian­ngilaa.

 ASANEQARNIKKUT ASANNINNERMIK ILINNIARNEQ

8-10. (a) Naalungiarsuup anaanami asan­nin­nera sumik ilin­niutigisar­paa? (b) Suna pil­lugu taman­na pingaaruteqarluin­nar­pa?

⁸ Meeq­qap asaneqar­nera misigis­sutsik­kut ineriar­tor­nis­saanut pisariaqarluin­nar­poq. Asaneqar­nermigut avatangiisimilu asan­nin­nermik ersersitsinerisigut meeq­qap asan­nin­nermik nit­taaneq ilin­nias­savaa. Guutimik asan­nin­neq pil­lugu, Juánasip agdlagai sujugdlît 4:19-imi ima al­las­simavoq: ’Uagut asan­nip­pugut taas­suma asaq­qaarmatigut.’ Aal­laq­qaataani pingaar­nerusumik anaanaq asan­nin­nermik ilin­niar­titsisuus­saaq. Meeraq sinif­fin­nguaminiit­toq qulanger­tar­paa, as­sani sakiaanut tutsil­lugu qajas­suar­tumil­lu aalatit­tarlugu, kiin­nanilu naalungiarsum­mut qanil­literiarlugu oqarfigisarlugu: ’Susun­nguaruna? Susun­nguuit?’ Soorunami naalungiarsuup oqaatsit paasin­ngilai (isumaqar­pian­ngil­lal­lumi), taamaat­torli qiimatsangaar­nermit talini nis­sunilu aalatilersar­pai niperujuulersarlunilu, nalun­ngin­namiuk anaanami as­saa at­tualaarisoq nipaalu eq­qor­tumik oqaatigis­sagaan­ni isumaqar­tut: ’Asavak­kit! Asavak­kit!’ Naalungiarsuk eq­qis­sisimaler­poq toq­qis­sisimalerlunilu.

⁹ Meeran­nguit asaneqar­ner­tik nuan­naraat, asan­nit­tul­lu is­suar­tar­paat, soorlu anaanar­tik qungasiagut talin­nguamin­nik eqil­lugu qiim­matsal­lutil­lu kunit­tarlugu. Anaanamik kajunger­naqisumik akisil­luni kunis­sisar­nerat inequn­neral­lu nuan­naraat. Ilin­niagas­saq pingaaruteqar­toq ilik­kalersar­paat, tas­sa: asaneqar­neq piin­nar­nagu aam­mat­taarli nam­mineq asan­nin­nermik ersersitsineq pil­luar­nar­nerusoq, asan­nin­nermil­lu siaruar­terisoq asan­nin­nermit­taaq katersuiumaar­toq. (apustilit suliait 20:35; Lúkarse 6:38) Up­per­narsar­neqarsimavoq piaar­tumik anaanaasup qitor­naatalu akor­nan­ni qanit­tumik atas­suteqalin­ngip­pat, kingor­natigut meeq­qap inun­nut al­lanut atas­suteqaler­niar­nis­sani asan­nin­nis­saniluun­niit ajor­nakusoor­tis­sagaa ilimanarsis­sasoq.

¹⁰ Meeq­qat inun­ngoq­qam­miin­narlutik ilin­nialer­tarmata, ukiui siul­liit pingaar­ner­paap­put. Ukiut taak­kua ingerlaneran­ni anaanaasup asan­nin­nera pingaaruteqar­torujus­suuvoq.  Qitor­nani nukatsin­nagu asan­nin­nermil­li takutik­kuniuk ilin­niar­til­lugulu, qaqugumut iluaqutaasus­saasumik angusaqas­saaq; taamaaliun­ngitsoorunili qaqugumut ataavar­tus­samik ajoqusiisin­naavoq. Anaanaal­luar­neq ar­nap sulias­saasa ilungersor­nar­ner­paat pis­sarsif­fiunar­ner­paal­lu ilagaat. Ar­tor­nar­toqarsin­naagaluar­poq an­ner­toqisumil­lu piumaf­figineqar­narsin­naagaluarluni, kisian­ni silarsuarmi al­lamik angusas­saqar­ner­pa taama pingaarluin­nar­tigalunilu ataavar­tumik tul­luusimaar­nar­tigisumik?

ATAATAASUP ISUMAGISASSAA PINGAARUTILIK

11. (a) Ataataasup qanoq ilior­nermigut qitor­nani ataataas­sutsiminik paasitis­sin­naavaa? (b) Suna pil­lugu taman­na pingaaruteqaqaa?

¹¹ Meeq­qap naalungiarsuunerani anaanaasup sal­liul­luni isumagin­nin­nis­saa pis­susis­samisoor­poq. Kisian­ni ataataasor­taaq meeq­qap inun­ngor­neraniil­li isumagin­neqataasariaqar­poq. Naalungiarsuuneraniil­li ataataasup ilaatigut paarisar­tus­saavaa, pin­nguaqatigisar­tus­saavaa qiagaangal­lu saam­marsar­tar­tus­saal­lugu. Tas­suuna ataataas­susia meeq­qap paasiar­tus­savaa. Ukiut ingerlaneran­ni ataataq an­ner­tunerujar­tor­tumik meeq­qamut isumagin­neqataalersus­saavoq. Taman­na kinguarsar­pal­laar­pagu ajor­nar­torsiuteqalersin­naavoq ingam­mik meeq­qap inuusut­tun­nguler­nerani perorsar­neqar­nerata piuminaan­neruler­nerani malun­niut­tumik. Pingaar­tumik er­nerup inuusut­tun­ngulersup ataatami ikiuinis­saa atorfis­saqar­tit­tas­savaa. Ajun­ngitsumil­li im­min­nut atas­suteqalereersiman­ngip­pata, im­min­nut atas­suteqan­ngin­nerat taman­na ukiut arlal­lit ingerlaneran­ni sak­kor­tusiar­torsimasoq sapaatit akun­nerisa arlaqan­ngitsun­nguaan­naat ingerlaneran­ni aaq­qin­neqarsin­naanavian­ngilaq.

12, 13. (a) Ilaqutariin­ni ataataasup suut isumagisas­sarai? (b) Ataataasup akisus­saas­sutsiminik eq­qor­tumik atuinerata qitor­naasa oqar­tus­saasunut isigin­nin­nerat qanoq sun­nersin­naavaa?

¹² Meeraq nukap­piaraagaluar­pat niviarsiaraagaluar­pal­luun­niit,  ataataasup pis­susiisa anguter­palut­tut sun­niinerat pis­sutaaqataasin­naap­put pisariaqavis­sumik meeq­qap sutigul­luun­niit ingasaas­sin­ngitsumik oqimaaqatigiis­sumil­lu pis­susilersugaanis­saanut. Guutip oqaasiani takutin­neqar­poq ataataq ilaqutariin­nut qul­lersaasariaqar­toq. Taas­suma timip piinik pilersor­nis­sai pisus­saaf­figaa. (1 Korintumiut 11:3; 1 Timûtiuse 5:8) Imali al­las­simavoq: ’Neqis­saan­naq inuup inuutigin­ngilaa, tamaasali Jehovap qar­nanit anisut inuup inuutigisarai.’ Qitor­nat pil­lugit ataataq peq­quneqar­poq ’perorsar­tuaq­qul­lugit Jehovap ileq­qoreq­qusai oqaaq­qis­saarutaalu malil­lugit’. (5 Môrsase 8:3; Evfisumiut 6:4, NV) Sulias­sani Guutimeersoq taman­na sapin­ngisamik ajun­ngin­ner­paamik isumaginiar­tariaqar­paa, kinguaaminut pis­susis­samisoor­tumik asan­nin­nini pis­sutigiin­nar­nagu, aam­mat­taarli, pingaar­nerusumik, Pin­ngor­titsisiminut pisus­saas­sutsimik misigisimanini pis­sutigalugu.

¹³ Anaanaasup saamaneq, asan­ningaar­neq naak­kin­nis­suserlu ersersit­tar­pai, ataataasul­li nakuus­sutsi silatuumil­lu siun­nersuisar­nini atorlugu qitor­nani aalajaal­lisarlugit sun­nersin­naavai. Guutip im­minut suliareq­qusaanik eq­qor­titseriaasia sun­niuteqangaarsin­naavoq meeq­qat kingor­natigut inum­mik Guutimil­luun­niit oqar­tus­saasunik qanoq isumaqarfigin­nin­nis­saan­nut — ataq­qisin­naas­saneraat al­lanil­lu siulersor­neqarlutik sulisin­naas­sanersut naam­magit­taal­liorajun­natik oqaatseriin­natil­lu.

14. Ataataasup maligas­siuil­luar­nerata panini er­niniluun­niit qanoq sun­nersin­naavaa?

¹⁴ Ataataasup maligas­siaa qanorlu ilioriaasia an­ner­tuumik aalajangiisuusin­naap­put er­nera inersimasun­ngoruni san­ngiitsuus­sanersoq aalajangersin­naan­ngitsuus­sanersorluun­niit, imaluun­niit tutsuiginar­tuus­sanersoq angutivit­tul­lu pis­susilius­sanersoq, qularani isum­maminik aalajangius­sinis­saminut sapiut­tuun­ngitsoq akisus­saas­sutsiminil­lu eq­qor­titsinis­saminut piumas­suseqarluar­toq. Taman­na nukap­piaq­qap uitut ataatatul­lu qanoq it­tun­ngor­nis­saanut sun­niuteqarsin­naavoq  — sak­kor­tooq, sukan­nersoq ingat­tarser­torlu, imaluun­niit inus­siar­nersoq, paasin­nit­toq patajaatsorlu. Angerlarsimaf­fim­mi paneqar­pat ataataasup sun­niinerata panim­minul­lu pis­suseqar­nerata paniata angutinut tamanut isigin­nin­nis­saa sun­nersin­naavaa aap­pariin­nermilu pil­luar­nis­saa al­lisarluguluun­niit akor­nusersin­naavaa. Ataatap qitor­naminut sun­niinera meeran­nguuneran­niil­li aal­lar­tit­tar­poq.

15, 16. (a) Bibeli naaper­torlugu ajoqersuineq eq­qarsaatigalugu ataataasoq sumik akisus­saaf­feqar­pa? (b) Akisus­saaf­fik taman­na qanoq isumagisin­naavaa?

¹⁵ Ataatap qitor­naminik ajoqersuisus­saanerata an­ner­tus­susia Guutip un­nersuus­sutaanit Môrsasip agdlagaisa tatdlimait 6:6, 7-imi al­las­simasunit paasineqarsin­naavoq: ’Oqaatsil­lu mak­ku ul­lumi ilin­nut inas­sutigisak­ka uum­mam­miugis­savatit. Puiugaanaveersas­savatil­lu qitor­nan­nut oqaluuseris­sal­lugil­lu il­lun­ni is­siasaraangavil­luun­niit aq­qusinik­kul­luun­niit ingerlasaraangavit, in­naraangavil­lu makik­kaangavil­lu.’

¹⁶ Bibelip oqaaser­taan­narin­ngisai aam­mat­taarli tusarliussaa ul­lut tamaasa meeq­qamut puiuik­kiutsin­niar­tariaqas­sap­put. Taamaalior­nis­samul­lu periarfis­sat tak­kut­tuaan­nar­put. Naasut, sul­linerit silaan­narmiit­tut, tim­mis­sat tim­misut, qalerus­sat sis­samiit­tut, ul­loris­sat un­nuak­kut qilam­mi alutor­nangaar­tut — tupin­nar­tut taak­ku tamarmik Pin­ngor­titsisumik oqalut­tuar­put, sumil­lu oqalut­tuar­neran­nik qitor­nasi nas­suiaat­tariaqar­tar­pasi. Tus­siaasior­toq ima al­lap­poq: „Qilaap oqalut­tuaraa Guutip naalan­nas­susia, isuisimasup nalunaarutigaa as­saasa piliaat, ul­lup oqariar­torfigaa ul­loqan­ni, un­nuap ilisimatip­paa un­nuaqan­ni.“ (Tus­siaat 19:2, 3) Ataataasup periarfis­sat taama it­tut atorluar­niar­tarunigit, ingam­mil­lu ul­luin­nar­ni pisut ikior­tigalugit ileq­qoreq­qusat ajun­ngitsut nas­suiar­niar­tarunigit Guutil­lu un­nersuus­sutaasa silatus­susiat iluaqutaas­susial­lu ersersin­niar­tarunigit, taava qitor­nami siunis­saata tun­ngavis­saa pingaar­ner­paaq, tas­sa Guutip piuneranik aam­malu ’ujarlersini akilerumaarai’ qularuteqan­ngin­neq, isumaan­nut uum­mataan­nul­lu ilisin­naavai. — Eprîarit 11:6.

17, 18. (a) Ataataasup qitor­nani qanoq perorsar­tus­saavai? (b) Amerlasuunik malit­tarisas­sior­nermit suna kinguneqarluar­nerusin­naava?

 ¹⁷ Aam­mat­taaq perorsaaneq ataataasup isumagisas­saasa ilagaat. ’Kinami er­nerineqar­toq angutaata perorsar­tarin­ngin­ner­paa?’ Eprîarit 12:7-imi apeq­qutigineqar­poq. Taamaalior­tus­saavorli ingasaas­sin­ngitsumik. Imalu ingasaas­sitigis­san­ngilaq qitor­nani narratsit­tarlugit taamaalil­lunilu meeq­qaminut uuminar­tun­ngorluni. Ataataasunut Guutip oqaasiani ima al­las­simavoq: ’Qitor­nasi uumitsatseqinasigik anusin­ngoq­qunagit.’ (Kulorsamiut 3:21) Kil­liliinerit pisariaqar­tar­put, ilaatigul­li malit­tarisas­sat ima amerlitigisin­naap­put imalu an­ner­tusitigisin­naal­lutik meeq­qanut ar­tor­nar­pal­laalerlutik aam­malu nikal­luutaal­lutik.

¹⁸ Itsarsuaq farisiiarit malit­tarisas­sanik nuan­narisaqar­put; amerlasoorujus­suar­nik malit­tarisas­sior­tar­put inup­pas­suil­lu ilumoor­tuusaar­niar­tun­ngor­til­lugit. Inuit kuk­kul­lutik isumaqar­tar­put malit­tarisas­sat amerligaan­ni ajor­nar­torsiutit anigor­tin­neqarsin­naasut; misilit­tak­kal­li erseq­qis­sar­paat uum­matik­kut kil­liineq aaq­qiis­sutis­saal­luar­tuusoq. Taamaat­tumik malit­tarisas­sior­nermik ingasaas­siniaqinak; tun­ngaviusumil­li najoq­qutas­sanik puiutsaaliniak­kit, Guutisut anguniagaqarlutit: ’Inatsisik­ka isumaan­nut tun­niuk­kumaar­pak­ka, uum­mataan­nul­lu al­lal­lugit.’ — Eprîarit 8:10.

ATAATAASUP ANAANAASULLU SULEQATIGIINNERAT

19. Angerlarsimaf­fim­mi at­taveqatigiil­luar­nis­saq qulak­keer­niarlugu angajoq­qaat qanoq iliorsin­naap­pat?

¹⁹ Amerlaner­tigut ataataasoq sulisar­poq ilaqutariin­nut pilersuisuul­luni, angerlaraangamilu qasoq­qasin­naasar­poq taamaat­torli im­maqa suli al­lanik pisas­saqarsin­naasarluni. Aam­mat­taarli nuliani qitor­nanilu pif­fis­saqarfiginiar­tariaqar­pai. Oqaloqatigiin­nik­kut at­tavigiuaan­nar­tariaqar­pai; pif­fis­saq ator­tariaqar­tar­paa ilaqutariit oqaloqatigiis­suteqar­tar­nerinut suleqatigiis­suteqar­tar­nerinul­lu, ilorrisimaar­tar­nerinut nuan­naariar­tar­nerinul­lu. Tas­suuna ilaqutariit aaq­qiagiin­nerat ataqatigiin­neral­lu  an­ner­tusar­neqas­sap­put. Meeraqan­ngik­kal­laramik im­maqa aap­pariit il­loqarfiliakulasar­put angerlarsimanerlu ajungajal­lutik. Taamaalior­tuarunil­li, pulaar­taqat­taar­tarlutik nuan­naarsaqat­taar­tarlutil­lu, im­maqalu un­nuak­kut aatsaat angerlar­tarlutik, angajoq­qaatut akisus­saas­suser­tik eq­qor­tin­navian­ngilaat. Inooriaaseq taamaat­toq qitor­naan­nut eq­qun­ngitsulior­nerus­saaq. Aalajaatsuun­ngin­nermik akisus­saas­susermil­lu misigisaqan­ngin­nermik kingunipilui qaquguluun­niit atugariumaar­paat. Inersimasut as­sigalugit meeq­qat­taaq iluaqutigineruaat inuuner­tik aalajaatsumik akut­toqatigiin­nil­lu pisar­tunik pis­suseqar­pat; eq­qarsar­taatsik­kut, timik­kut misigis­sutsik­kul­lu taman­na iluaqutigis­savaat. Ilaqutariit inooqatigiin­neran­ni ul­luin­nar­ni as­sigiin­ngisitaar­tunik pisar­tut naam­maqim­mata angajoq­qaat pisariaqan­ngitsunik ilan­ngus­sisariaqan­ngil­lat. — Naleq­qiuk­kit Matîuse 6:34; Kulorsamiut 4:5.

20. Angajoq­qaat meeq­qamin­nik perorsaanermin­ni qanoq suleqatigiin­niarsin­naap­pat?

²⁰ Ataataasup anaanaasul­lu qitor­namin­nik perorsaaneq suleqatigiis­sutigisus­saavaat — meeq­qat ilin­niar­til­lugit, kil­liliif­figalugit, perorsarlugit asan­nin­nermil­lu nit­taavigalugit. ’Il­loqatigiit iligiik­kun­naarunik atasin­naan­ngil­lat.’ (Mákorse 3:25) Silatusaar­nerus­saaq angajoq­qaat qitor­natik qanoq perorsar­nis­saat oqaloqatigiis­sutigisarunik­ku, taamaalil­lutik meeq­qat tusaatil­lugit perorsaariaatsinik isumaqatigiin­ngis­suteqan­ngin­nias­sagamik. Meeq­qat paasigunik­ku angajoq­qaat isumaqatigiin­ngis­suteqar­tut im­maqa taman­na ator­nerlun­niarsin­naavaat. Soorunami ilaatigut angajoq­qaat arlaata isumaatsoor­nermigut imaluun­niit kamaam­mer­nermigut meeraq sualut­tumik pil­lar­toorsin­naasar­paa, imaluun­niit piviusut tamaasa eq­qarsaatigigaan­ni patsisis­saqan­ngitsumik pil­lar­toor­tarlugu. Taama pisoqar­til­lugu angajoq­qaat kisimiil­lutik taman­na oqaloqatigiis­sutigisin­naavaat, taavalu isumaal­liorluni ilior­tup meeraq saaf­figalugu pisimasoq pil­lugu oqaloqatiginiarsin­naavaa. Taavami kisimiil­lutik oqaloqatigiin­nis­samin­nut periarfis­saqan­ngip­pata,  aap­paalu isumaqar­pat meeq­qamut naaper­tuil­luan­ngitsulior­nerus­sasoq pisimasumik nipangius­siin­narlunilu akuersiin­naruni? Taava aap­pani isumaatsoorsimasoq saaf­figalugu oqarsin­naavoq: ’Paasil­luar­pak­kit kamak­kavit; uangat­taaq taman­na kamaatigisimas­sagaluar­para. Im­maqali una arajutsivat, . . .’ taavalu arajutsisaa nas­suiarlugu. Taamaalil­lutik meeq­qap tusaanerani isumaqatigiin­ngin­natik oq­qan­natil­lu angajoq­qaat aaq­qiisin­naap­put. Soorlu isumas­sarsiarititaasumik us­sateqar­toq: ’Soq­qusaatsuni kamaat­toqaan­naaraaq, iner­terseriar­tul­li ilisimas­sut najor­tigaat.’ — ús­satit 13:10; aam­ma takuuk akugdlîs­sup oĸausê 7:8.

21. Angajoq­qaat arlaan­naat perorsaasus­saava? Erseq­qin­nerusumik nas­suiaruk.

²¹ Al­lak­kani hebræerisuuni takutin­neqar­poq angajoq­qaat marluul­lutik perorsaaqataasus­saasut: ’Er­nin­nguara, ataatavit perorsaanerinut naalan­niarit, anaanavil­lu inatsisai tunul­liuteqinagit.’ Aam­mat­taaq Al­lak­kani grækerisuuni kristumiut al­lagaataan­ni taman­na takutin­neqar­poq: ’Ilis­si meeq­qat, angajoqqaasi naalas­sigik Naalak­kami, taama iluarmat.’ Ataataasut ilaat isumaqar­put perorsaaneq anaanaasup isumagisas­sarigaa. Nuliaasorli akerliusumik isumaqarsin­naavoq meerarlu naalan­ngitsoq sioorasaagin­narlugu oqarluni: ’Ataatat angerlar­pat pisas­sat pis­savat!’ Ilaqutariil­li pil­luas­sap­pata angajoq­qaal­lu tamarmik im­mik­kut qitor­namin­nit asaneqas­sagunik ataq­qineqas­sagunil­lu, perorsaaneq peqatigiit­tariaqar­paat. — ús­satit 1:8; Evfisumiut 6:1.

22. Meeraq arlaan­nik kis­saateqaraangat angajoq­qaat qanoq ilior­tas­san­ngil­lat, sunalu pis­sutigalugu?

²² Angajoq­qaat tamatumuuna aaq­qiagiil­lutik suleqatigiin­nerat tamarmil­lu im­mik­kut akisus­saas­sutsimin­nik eq­qor­titsiumas­susiat meeq­qat takusin­naasariaqar­paat. Meeraq qin­nuteqar­taraangami ataataminit akineqar­tuaan­naruni: ’Anaanat aperiar­tor­niaruk,’ imaluun­niit anaanaata ataataa aalajangeeq­qujuaan­nar­pagu, taava arlaat pin­ngitsoorani naaggaar­tariaqar­tar­toq iluarineqarun­naas­saaq. Soorunami ilaatigut ataataa oqar­tas­saaq:  ’Aap, aneersin­naavutit — anaanal­li apereq­qaariaruk qas­sinut neriar­tus­sanersutit.’ Imaluun­niit anaanaasoq ilaatigut isumaqar­tarsin­naavoq uimi isum­mani oqaatigisariaqaraa, naak nam­mineq qin­nuteqaat ajorin­ngik­kaluarlugu. Tamarmil­li mianersuutigis­savaat meeq­qap piumasani piniaan­narlugu akerleriis­sitsiniar­tan­ngin­nis­saa. Nuliarlu silatooq mianersus­saaq oqar­tus­saas­suseqar­nermik uini unam­mil­ler­naveersaarlugu — soorlu qitor­nani akueriin­nar­pal­laarlugu taamaalil­luni qitor­naminit asaneqar­nerulerumal­luni.

23. Ilaqutariin­ni ataataq kisimi aalajangiisus­saava?

²³ Aalajangigas­sat ilaqutariin­ni aalajangigas­saasut eq­qarsaatigalugit, ilaqutariin­ni ilaasor­tat tamarmik im­mik­kut aalajangersimasunik soqutigisaqar­tarsin­naap­put pingaar­nerutitamin­nik. Aalajangigas­sat ilaqutariit tamarmik pil­luar­nis­saan­nut sun­niuteqar­tus­sat ataataasup aalajanger­tus­saasar­pai, ilani oqaloqatigereerlugit taak­kualu kis­saataat piumanerusaal­lu eq­qarsaatigereersimal­lugit aatsaat aalajanger­tarlugit. Aalajangigas­sat igaf­fim­mut il­lumilu pis­sarsianik atuinermut nak­kutigin­nin­nermul­lu tun­nganerusut anaanaasup aalajanger­tas­savai. (ús­satit 31:11, 27) Al­liar­tor­til­lutik meeq­qat im­maqa inimin­ni aalajangiisin­naatitaas­sap­put, suut atisaris­sanerlugit al­lanil­luun­niit nam­minerisamin­nik. Angajoq­qaal­li nak­kutigin­nin­nerat ima an­ner­tutigis­saaq najoq­qutas­siat ajun­ngitsut najoq­qutarineqar­nis­saat qulak­keersimas­sal­lugu, meeq­qat toq­qis­sisimanerat ulorianar­torsiuleq­qunagu inuil­lu al­lat pisin­naatitaaf­fiinik unioq­qutitseq­qunagit. Taamaalil­lutik meeq­qat ilik­kariar­torsin­naas­sap­put nam­min­neq aalajangiinis­samin­nik.

ILISSI ANGAJOQQAATUT ATAQQIUMINARPISI?

24. Meeq­qat ataatar­tik anaanar­til­lu ataq­qisariaqarmatigik, angajoq­qaat pin­ngitsooratik qanoq ilior­tus­saap­pat?

²⁴ Meeq­qat ima peq­quneqar­put: ’Ataatat anaanal­lu ataq­qik­kit.’ (Evfisumiut 6:2; 2 Môrsase 20:12) Taamaalior­nerat aam­mat­taaq Guutip inas­sutaanik ataq­qin­nin­neruvoq. Taamaalior­nis­saat ajor­naal­lisar­pisiuk? Nuliaasutit, peq­quneqar­putit uiit ataq­qeq­qul­lugu mianereq­qul­lugulu.  Taamaalior­neq ar­tor­nan­ngin­ner­pa uiit ilungersuuteqar­pian­ngip­pat ilungersuuteqan­ngivil­luniluun­niit Guutip oqaasia naaper­torlugu im­minut piumasarineqar­toq maleruar­niarlugu? Uiusutit, nuliat ikior­tis­satut pingaar­titaasutut asasariaqar­pat ataq­qisariaqarlugulu. Ikiuiuman­ngivip­pat taamaalior­nis­sat ar­tor­nas­san­ngin­ner­pa? Taamaat­tumik qitor­nasi oqilisaas­sigik Guutip inas­sutaanik maleruaaniar­neran­ni ilis­si, angajoq­qaatik, ataq­qeq­qul­lusi. Taak­kunan­nga ataq­qineqar­tus­saas­saasi eq­qis­sisimasumik angerlarsimaf­feqar­tik­kus­sigik, ajun­ngitsunik najoq­qutas­sior­tarus­sigik, ileq­qus­sigut maligas­sil­luar­tarus­sigik, ilin­niar­til­luar­tarus­sigik ajoqersorluar­tarus­sigil­lu, pisariaqaraangal­lu asan­nit­tumik perorsar­tarus­sigik.

25. Angajoq­qaat meeq­qanik perorsaaneq isumaqatigiin­ngis­sutigip­pas­suk, sunik ajor­nar­torsiuteqalersin­naava?

²⁵ ’Aap­pariit kisimiit­tumit pitsaanerup­put,’ kun­ngi Salomon oqarsimavoq, ’sulior­nermin­nit ajun­ngitsumik pisaqar­taramik.’ (akugdlîs­sup oĸausê 4:9) Inuit marluk ingerlaqatigiik­kunik arlaat orlugaluar­pat aap­paata nikuitsis­sin­naavaa. Aam­mat­taaq ilaqutariin­ni, uiusoq nuliaasorlu tamarmik im­mik­kut isumagis­sas­samin­ni tapersersueqatigiis­sin­naal­lutil­lu ikioqatigiis­sin­naap­put. Angajoq­qaat isumagisas­saat ilaatigut as­sigiit­tar­put, taman­nalu ilaqutariit ataasius­susian­nut iluaqutaavoq. Angajoq­qaat qitor­natik im­min­nut qanil­linerus­sutigis­savaat, perorsaaqatigiin­neq aaq­qiagiis­sutigigamik­ku. Ilaatigul­li meeq­qap qanoq ilin­niar­tin­niar­neqar­nis­saa perorsar­neqar­nis­saalu angajoq­qaat an­ner­tuumik isumaqatigiin­ngis­sutigisin­naasar­paat. Nuliaasup qitor­nani ilaatigut ima pingaar­titsigilersin­naasar­paa al­laat uia misigilerluni sumigin­nagaal­luni narrunarsagaal­lunilu. Taamaalior­nerata ataatap meeq­qamut isigin­nin­nera sun­nersin­naavaa. Im­maqa qitor­naminut soqutigin­nik­kun­naas­saaq ilas­seraarun­naarlunilu. Im­maqaluun­niit qitor­nani an­nerusumik asalersin­naavaa nuliani sam­mival­laarun­naarlugu. Uiusoq nuliaasorluun­niit ingasaas­siler­pata kingunipiloqarsin­naas­saaq.

26. Anaanaasup pif­fis­saq sivisooq meerar­taaminut ator­tariaqarmagu, ataataq qanoq iliorsin­naava angajua, aleqaa anialuun­niit sin­ngaleq­qunagu?

 ²⁶ Ajor­nar­torsiut al­la tak­kus­sin­naavoq meeraqareerlutik meerar­taaq­qip­pata. Al­latut ajor­nar­tumik anaanaasup pif­fis­saq sivisooq inoorlaamut ator­tariaqar­paa. Angajua, aleqaa imaluun­niit ania sumigin­nagaal­luni misigileq­qunagu sin­ngaleq­qunagulu ataataata taan­na sam­minerusin­naavaa.

27. Aap­pariit arlaat up­per­tuun­ngip­pat, meeq­qat anersaak­kut qanoq ikior­neqarsin­naap­pat?

²⁷ Ilumut marluk ataatsimit pitsaanerup­put, ataaserli soqan­ngin­nermit pitsaaneruvoq. Im­maqa arlaan­nik pis­suteqarluni anaanaasup kisimiil­luni meeq­qat perorsar­tariaqar­pai. Im­maqaluun­niit ataataasup ajor­nar­torsiut taman­na pigaa. Ilaqutariit amerlasuut up­perisarsior­nik­kut avis­saarsimap­put, angajoq­qaat arlaat, Jehova Guutimut kif­faal­luni, Bibelimi un­nersuus­sutigineqar­tunik tatigin­nil­luin­narluni, aap­paali taamaan­nani. Kristumiu tun­niul­luin­narsimasoq uiuguni ilaqutariin­nut qul­lersaanini pis­sutigalugu meeq­qat perorsar­neqar­neran­ni najoq­qutas­sat suut najoq­qutarineqar­nis­saan­nut oqar­tus­saaneruvoq. Taamaak­kaluar­torli kamagin­ningaar­tuusariaqar­poq, im­minut naalak­kersorsin­naasariaqarluni naam­magit­tar­tuusariaqarlunilu. Tun­ngaviusumik najoq­qutas­sat pineqar­til­lugit aalajaat­tariaqar­poq, tamatigul­li ingasaas­siniar­nani inus­siar­nerlunilu, al­laat kamas­saar­neqar­nermini, ajor­nan­ngik­kaangal­lu aap­pani aap­parmilu isumaa eq­qarsaatigalugu iliuuseqar­tariaqar­tarluni. Up­per­toq nuliaaguni, soorunami uini naalagarisariaqar­paa, qanorlu iliuuseqar­nis­saanut uiata qanoq isumaqar­nera an­ner­tuumik apeq­qutaasas­saaq. Bibelimik soqutigisaqan­ngiin­nar­pa, imaluun­niit nuliami up­perisaminik suliaqar­nera qitor­naminil­lu up­perisaminik ajoqersuiniar­neri as­sor­tor­pai? Uiminit akerlilersor­neqaruni, taava apustilip iliuusereq­qusaanik iliuuseqar­tariaqas­saaq: Nuliaasoq maligas­siuil­luni sulias­saminik naam­mas­sin­nit­tariaqar­poq ataq­qin­nit­tumil­lu pis­suseqar­tariaqarluni, uiusoq ’oqaaseqan­ngitsuk­kut ilataarineqaq­qul­lugu’.  Aam­mat­taaq ajor­nan­ngik­kaangat qitor­nani perorsas­savai Bibelimi ileq­qoreq­qusat maleruaq­qul­lugit. — 1 Pîtruse 3:1-4.

ANGERLARSIMAFFIMMI PISSUTSIT QANOQ INNERAT

28, 29. Angerlarsimaf­fim­mi pis­sutsit qanoq it­tuusariaqar­pat, sunalu pil­lugu?

²⁸ Angajoq­qaat marluul­lutik angerlarsimaf­fim­mi asan­nin­neq pingaar­nerusumik malun­nar­tin­niar­tus­saavaat. Pis­suseq taman­na malugigunik­ku, meeq­qat nalor­ninitik kuk­kunitil­lu angajoq­qaamin­nut oqaatiginis­saat siooraginavian­ngilaat. Nalunavian­ngilaat siooranatik angajoq­qaamin­nut saaf­figin­nis­sin­naal­lutik, angajoq­qaamik paasis­sagaatik asan­nit­tumil­lu iliorfigineqas­sal­lutik. (Naleq­qiuk­kit Juánasip agdlagai sujugdlît 4:17-19; Eprîarit 4:15, 16.) Angerlarsimaf­fik nerisarfiin­naas­san­ngilaq sinit­tarfiin­naas­sananilu, aam­mat­taarli qimar­nguf­fis­saas­saaq najoruminar­tuus­sal­lunilu. Angajoq­qaat asan­ningaar­nerat meeq­qat anersaavata ineriar­torluaatigis­savaa qiim­maatigis­sal­lugulu.

²⁹ Svampi seer­nar­tumut misuk­kuk­ku ilimagisin­naan­ngilat imermik im­mersimas­sasoq. Avatiminiit­tut taamaal­laat mil­lugut­tar­pai. Meeq­qat svampeeq­qatut ip­put. Pis­sutsit al­lan­ngorar­neri avatimin­ni it­tut malugisar­paat eq­qamin­nilu qanoq pisoqar­nera maluginiar­tarlugu, tamak­kulu sun­ner­neqaatigisar­paat. Avatangiisitik an­nilaanganersut naalaaserlun­nersut aam­malu toq­qis­sisimanersut eq­qis­sisimanersul­luun­niit malugisar­paat. Naalungiarsuit al­laat angerlarsimaf­fim­mi pis­sutsit qanoq in­nerat sun­ner­neqaatigisar­paat; taamaat­tumik up­per­neq, asan­nin­neq, anersaap piinik soqutigisaqar­neq, aam­ma Jehova Guutimik tatigin­nin­neq malun­nar­nerup­pata tamanit iluaqutaaner­paas­saaq.

30. Angajoq­qaat apeq­qutit suut im­min­nut apeq­qutiginiarsin­naavaat paasiniarlugu qitor­natik eq­qor­tumik siulersor­neritik?

³⁰ Najoq­qutas­siat suut qitor­nas­si najoq­qutaris­sagaat piumaf­figaasigik? Ilis­si angajoq­qaajususi nam­mineq taak­ku najoq­qutaralugit inuuisi? Ilaqutariil­lusi sumut atavisi? Ilis­si qitor­nas­sin­nut qanoq it­tumik maligas­siuivisi?  Naam­magit­taal­lior­tuaan­nar­pisi, isor­nar­torsiuisar­pisi, eq­qarsaatit ajor­tut eq­qarsaatigiuaan­nar­pisigik? Qitor­nas­si taamatut it­tuuler­nis­saat kis­saatigaasiuk? Imaluun­niit ilaqutariil­lusi kusanar­tumik najoq­qutas­saqar­pisi, nam­minerlu maleruar­pisigik, qitor­nas­sin­nul­lu maleruaq­qul­lugit? Paasiner­paat ilaqutariin­nut ilis­sin­nut ilaasor­taas­sagunik pin­ngitsooratik piumasat aalajangersimasut maleruar­tariaqaritik, aalajangersimasunik ileq­qoqar­tariaqarlutik, aam­malu paasiner­paat iliuutsit isum­mal­lu aalajangersimasut atoq­qusaan­ngitsut? Meeq­qat toq­qis­sisimaneq misigerusup­paat, ilaqutariin­nut atal­lutik misigerusul­lutik. Taamaat­tumik ilaqutariit najoq­qutas­siaat najoq­qutaralugit iliuuseqaraangata iluarin­nin­nis­sin­nik akuerin­nin­nis­sin­nil­lu malugitin­niarsigik. Uagut inuit inoqatit­ta ilimagisaat naaper­torlugu iliuuseqarusut­tar­pugut. Ilimagiguk­ku qitor­navit pis­susis­saq uniorlugu inuunerlut­taler­nis­saa, ilimanarluin­nar­poq inuunerlut­tun­ngus­sasoq. Qitor­nat ajun­ngitsumik ilimasuf­figiguk­ku, tas­suuna kajumis­saas­savat ajun­ngitsoq maleruaq­qul­lugu.

31. Angajoq­qaat un­nersuus­sutitik qanoq ilil­lutik naleqarlualersit­tariaqar­paat?

³¹ Inuit oqaatsitik naaper­tor­nagit suliatil­li naaper­torlugit naliler­niar­neqar­tar­put. Meeq­qat­taaq oqaatsit maluginiar­nerunagit suliat maluginiar­nerusar­paat, ilumoor­tuusaar­niar­nerlu maluginasuar­tarlugu. Oqaatsit amerlaval­laar­tut meeq­qat paatsiveerus­sutigisar­paat. Oqaatsisit naleqarlualersit­tak­kit nam­mineq maleruar­nerisigut. — 1 Juánase 3:18.

32. Kia un­nersuus­sutai tamatigut maleruar­neqar­tariaqar­pat?

³² Ataataagaluaruit anaanaagaluaruil­luun­niit sulias­saqar­putit an­ner­tuumik akisus­saas­suseqarfigisan­nik. Tamaviaar­nin­nili angusaqarluarsin­naavutit Inuunermik Tunisisup un­nersuus­sutai maleruar­taruk­kit. Isumagisas­satit naam­mas­siniarlugit peq­qis­saarlutit sulis­sutigisak­kit soorlulusooq Naalak­kamut. (Kulorsamiut 3:17) Ingasat­tulior­naveerit, patajaatsuugit aam­ma „ingasaas­sinian­ngin­nersi inun­nut tamanut [qitor­nas­sin­nut­taaq] malun­narsili“. — Filípimiut 4:5, NV.

[Atuaqqissaarnermi apeqqutit]

 [Qupp. 102-mi assiliartaq]

Anaanami isigineranit, at­tuineranit nipaanil­lu meeq­qap nalun­ngilaa asagaani

 [Qupp. 106-mi assiliartaq]

Qitor­natil­lu aliik­kusersuutis­sas­sin­nik aaq­qis­suisar­pit?