Jesus Kristus — Guutimik ilisarsilernissamut ’matuersaat’
Kapitali 4
Jesus Kristus — Guutimik ilisarsilernissamut ’matuersaat’
1, 2. Silarsuarmi upperisarsiornerit qanoq ilillutik Guutimik ilisarsinermut ’matuersaat’ innarlersimavaat?
MATUIT silataani qeqarputit matuersaatitit passullugit. Taarpoq nillerlunilu, isipallakkusoqaatillu — matuli ammarneq ajulerpat. Matuersaat ammaaniutit eqqortuusorinaraluarpoq, ammaasinnaanngilarli. Ajja! Matuersaatitit misissoqqippatit. Matuersaat eqqortoq atoraluarpiuk? Innarlerneqarsimanersoruna?
2 Tamanna assersuutissaalluarpoq silarsuarmi maani upperisarsiornikkut paatsiveqannginnerup Guuti pillugu ilisimasassanut sunniuteqarsimaneranut. Tassami ’matuersaat’ ilisimasaqalissutissarput, Jesus Kristus, inuppassuit allatut isikkoqalersissimavaat — matuersaat innarlersimavaat. Upperisarsiornerit ilaasa ’matuersaat’ peersimavaat, Jesus sumiginnarluinnarlugu. Allat Jesusip inissisimaffia sangutissimavaat, Guutitut Ajugaqanngitsutut pallorfigalugu. Inulli pingaarnerpaaq, Jesus Kristus, eqqortumik ilisimasaqarfigilinngikkutsigu Guutimik ilisarsilersinnaanngilagut.
3. Sooq Jesus Guutimik ilisarsinermut ’matuersaatitut’ taaneqarsinnaava?
3 Immaqa Jesusip oqaasii uku eqqaamavatit: ’Tassaavorli inuuneq naassaanngitsoq: Illit ilisaralutit kisivit ilumut Guutiusutit, aallartitallu Jesus Kristus ilisaralugu.’ (Juánase 17:3) Jesus taama oqarami pingaarniakujunngilaq. Kristus pillugu eqqorluartumik ilisimasaqarnissaq Biibilimi erseqqissarneqartuartarpoq. (Evfisumiut 4:13; Kulorsamiut 2:2; 2 Pîtruse 1:8; 2:20) Jesus Kristus ’pruffiitit tamarmik nalunaajaassutigaat’, taama apustili Peter allassimavoq. (apustilit suliait 10:43) Aamma apustili Paulus allassimavoq: ’[Jesusimi] pequutit ilisimassutsip ilisarsissutsillu pii tamarmik isertugaasut.’ (Kulorsamiut 2:3) Paulus allaat oqarsimavoq Jehovap neriorsuutai tamarmik Jesus aqqutigalugu piviusunngussasut. (2 Korintumiut 1:20) Taamaattumik Jesus Kristus tassaavoq Guutimik ilisarsinermut ’matuersaat’. Jesus pillugu ilisimasavut taassuma pissusia Guutillu aaqqissuussaani inissisimaffia pillugit sangutitsinertaqanngitsuusariaqarput. Soorli ajoqersugaasa Jesus Guutip neriorsuutaani qitiusutut isigaat?
MESSIAS NERIORSUUTIGISAASOQ
4, 5. Messias qanoq neriuffigineqarsimava, Jesusillu ajoqersugaasa taanna qanoq isigisimavaat?
4 Angutip aalajaatsup Abelip nalaaniilli Guutip kiffaasa kinguaassaq Jehova Guutimit siulittuutigineqartoq ilumoorullugu qilanaarisimavaat. (1 Moses 3:15; 4:1-8; Eprîarit 11:4) Nalunaarutigineqarsimavoq kinguaassaq Messiasitut, ’tanitatut’, Guutip siunertaani atorneqassasoq. Aammagooq taassuma ’ajortuliorneq soraarsissavaa’, Naalagaaffiatalu naalannaatai tussiaatini siulittuutigineqarsimapput. (Daniel 9:24-26; Tussiaat 72:1-20) Kinami Messiasiussava?
5 Angut inuusuttoq juutiusoq Andreasimik atilik pissangalluni Jesusip Nazaretimiup oqaasiinik tusarnaartoq takorlooruk. Angornioqaluni qatanngutini Simon Peter ima oqarfigaa: ’Messias naapipparput.’ (Juánase 1:42) Jesusip ajoqersugaasa qularinngilluinnarpaat Jesus tassaasoq Messias neriorsuutigisaasoq. (Matîuse 16:16) Kristumiullu ilumoortut Jesusip siulittuutigineqartutut Messiasiuneranut, imaluunniit Kristusiuneranut, uppernertik pillugu inuunertik pilliutigeriaannaasarsimavaat. Messiasiuneranut sunik uppernarsaatissaqaramik? Uppernarsaatissat immikkoortut pingasut misissoriartigik.
JESUSIP MESSIASIUNERANUT UPPERNARSAATISSAT
6. (a) Kia kinguaavisigut Kinguaassaq takkuttussaasimava, qanorlu ililluta nalunngilarput Jesus taassuma kinguaarigaa? (b) Sooq ukiup 70-ip u.n.k. kingorna Messiasiunerartut uppernarsaatissaarussimappat?
6 Jesusip siuaasai Messiasitut neriorsuutigisaasutut kinaassusersinissaanut tunngavissaapput. Jehovap kiffani Abraham oqarfigisimavaa kinguaassaq taassuma kinguaavisigut takkukkumaartoq. Abrahamip ernera Isak, Isakip ernera Jakob Jakobillu ernera Juda aamma taamatut neriorsorneqarsimapput. (1 Moses 22:18; 26:2-5; 28:12-15; 49:10) Ukiut hundredelikkuutaat qaangiummata Messiasip siuaasai erseqqissarneruneqarput kunngi David paasitinneqarmat taassuma kinguaavisigoorumaartoq. (Tussiaat 132:11; Jesaja 11:1, 10) Mattæusikkut Lukasillu iivangkiiliulersaarutaanni uppernarsarneqarpoq Jesus Davidikkut kinguaarigaat. (Matîuse 1:1-16; Lúkarse 3:23-38) Inuppassuit Jesus akerlilersortarsimavaat, arlaannaataluunniilli siuaasai uppernarsaatissaqarluartut assortorsinnaasimanngilai. (Matîuse 21:9, 15) Tassa erseqqippoq siuaasaasa kikkuunerat apeqquserneqarsinnaanngitsoq. Juutilli kinguaariit allattorsimaffii ukiumi 70-imi u.n.k. Jerusalem Romamiunit piuneerunneqarmat aserorneqarsimapput. Tamatuma kingorna kinaluunniit Messiasiunerarnissaminut uppernarsaatissaarussimavoq.
7. (a) Jesusip Messiasiuneranut uppernarsaatissaq alla suua? (b) Mika 5:1 Jesusimut atatillugu qanoq eqquussimava?
7 Siulittuutit eqquussimasut uppernarsaatissat ilagaat. Siulittuuterpassuarni Allakkani Hebriiarisuuniittuni Messiasip inuuneranut tunngasut assigiinngitsut eqqartorneqarput. Ukiut hundredellit arfineq-pingajussaanni u.n.s. pruffiiti Mika siulittuisimavoq naalakkersuisussaq pingaartoq taanna illoqarfimmi pingaaruteqanngitsumi Betlehemimi inunngorumaartoq. Israelimi illoqarfiit marluk Betlehemimik taaguuteqarput, siulittuummili tamatumani sorleq pineqarnersoq erseqqissarneqarpoq: Betlehem Efrata, kunngip Davidip inunngorfia. (Mika 5:1) Jesusip angajoqqaavi, Josef Marialu, Nazaretimi, Betlehemimit avannamut kilometerisut 150-isut ungasitsigisumiittumi, najugaqarput. Mariali naartusoq Romamiut kaasariat Augustus peqqusivoq inuit tamarmik illoqarfimmut inunngorfimminnut naatsorsortikkiartussasut. * Taamaattumik Josefip nuliani naartusoq Betlehemimukaqatigisariaqarpaa, taamaalillunilu Jesus tassani inunngorpoq. — Lúkarse 2:1-7.
8. (a) Qanga pisumilu sumi „sabbatip akunneri“ 69-it aallartippat? (b) „Sabbatip akunneri“ 69-it qanoq sivisutigippat, qaangiummatalu qanoq pisoqarpa?
8 Ukiut hundredellit arfinilissaanni u.n.s. pruffiitip Danielip siulittuutigaa „tanitaq naalagaasoq“ saqqummerumaartoq Jerusalemip iluarsarneqarnissaata qarmaqqinneqarnissaatalu peqqussutigineqarneranit „sabbatit akunneri“ 69-it qaangiuppata. (Daniel 9:24, 25) „Sabbatit akunneri“ taakku tamarmik immikkut ukiunik arfineq-marlunnik sivisussuseqarput. * Biibili inuiaallu oqaluttuarisaanerat naapertorlugu Jerusalemip qarmaqqinneqarnissaanik peqqussuteqarneq tamanna 455-imi u.n.s. pisimavoq. (Nehemja 2:1-8) Tassa Messias 455-ip u.n.s. kingorna ukiut 483-it (7 x 69) qaangiunneranni saqqummertussaasimavoq, tassa ukiumi 29-mi u.n.k. Ukiumi tamatumanerpiaq Jehovap Jesus anersaamik illernartumik tanippaa. Taamaalilluni Jesus tassaalerpoq „Kristus“ (isumaa: „Tanitaq“), imaluunniit Messias. — Lúkarse 3:15, 16, 21, 22.
9. (a) Tussiaat 2:2 qanoq ililluni eqquussimava? (b) Siulittuutit allat suut Jesusikkut eqquuppat? (Ilanngussaq takuuk.)
9 Soorunami kikkut tamakkeratik upperaat Jesus tassaasoq Messias neriorsuutigisaasoq, tamannalu Biibilimi siulittuutigineqarsimavoq. Tussiaat 2:2-mi allassimasutut kunngi David Guutimit isumassarsisitaalluni ima siulittuisimavoq: „Nunami kunngit isumalioqatigiipilulerput, naalagaanerit pilersaarutipiloqarput [Jehovamut] taassumalu tanitaanut.“ Siulittuutip tamatuma ersersippaa nunami ataasiinnaanngitsumi siuttuusut kattukkumaartut Jehovap tanitaa, imaluunniit Messias, saassukkumallugu. Taamatullu pisoqarsimavoq. Juutit upperisarsiornikkut siuttui, kunngi juutiusoq Herodes Romamiullu nunamut naalagaatitaat Pontius Pilatus tamarmik Jesusip toqunneqarneranut pisooqataapput. Akerariissimagaluit, Herodes Pilatusilu, taamanimiilli ikinngutigiillualivissimapput. (Matîuse 27:1, 2; Lúkarse 23:10-12; apustilit suliait 4:25-28) Jesusip Messiasiunera uppernarsinerujumallugu takuuk ilanngussaq „Messias pillugu siulittuutit malugisariallit“.
10. Sutigut Jehovap nalunaajaatigaa Jesus tassaasoq Tanitani neriorsuutigisaq?
10 Jehova Guutip nammineq nalunaajaatissarititai Jesusip Messiasiuneranik uppernarsaaqataapput. Jehova inngilinik aallartitsisarsimavoq inuit paasitinniarlugit Jesus tassaasoq Messias neriorsuutigisaasoq. (Lúkarse 2:10-14) Jesusillu nunarsuarmi kiffartornerani Jehova allaat nammineq qilammit nalunaartarsimavoq Jesusimik iluarinninnini ersersillugu. (Matîuse 3:16, 17; 17:1-5) Jehovap Jesus tupinnartuliorsinnaassuseqartissimavaa. Tupinnartuliai tamarmik Jesusip Messiasiuneranut uppernarsaataapputtaaq, Guutimi salloqittaasumik tupinnartuliornissamut pissaaneqartitsinavianngilaq. Jehovap aamma anersaani illernartoq atorsimavaa iivangkiiliunik allattut isumassarsisillugit, taamaalilluni Jesusip Messiasiuneranut uppernarsaatissat Biibilimut, atuakkamut oqaluttuarisaanermi nutserneqarnerpaallunilu siammarsimanerpaamut, ilaalersillugit. — Juánase 4:25, 26.
11. Jesusip Messiasiuneranut qanoq uppernarsaatissaqartigaa?
11 Uppernarsaatissanut tamakkununnga ilaapput pisimasuiit hundredelikkuutaat uppernarsaataasut Jesus tassaasoq Messias neriorsuutigisaasoq. Taamaattumik kristumiut ilumoortut eqqortumik iliorlutik taanna ’pruffiitit tamarmik nalunaajaassutigisaattut’ Guutimillu ilisarsinissamut ’matuersaatitut’ isigaat. (apustilit suliait 10:43) Messiasiuneratali saniatigut Jesus Kristus pillugu allarpassuarnik ilikkagassaqarpoq. Suminngaanneerpa? Qanoq pissuseqarpa?
JESUSIP INUNNGUNNGIKKALLARAMI PIUSIMANERA
12, 13. (a) Qanoq ililluta nalunngilarput Jesus nunarsuarmi inunngunngikkallarami qilammi inuusimasoq? (b) ’Oqaaseq’ kinaava, inunngunngikkallaramilu sulerisimava?
12 Jesusip inuunera pingasunut avinneqarsinnaavoq. Inuunerata immikkoortua siulleq nunarsuarmi inuttut inunngornera sioqquterujussuarlugu aallartissimavoq. Miggap agdlagai 5:1-imi (nutsigaq pisoqaq) oqaatigineqarpoq Messias ’killinganit pilereersimasoq, ullormik ersitsoqanngikkallarmat’. Aamma Jesus erseqqissumik oqarsimavoq nammineq ’pavannga pilluni’, tassa qilammit. (Juánase 8:23; 16:28) Nunarsuarmut pinnginnermini qilammi qanoq sivisutigisumik piusimava?
13 Jesus Guutip ’ernituaanik’ taaneqarsimavoq Jehovamit toqqaannartumik pinngortinneqarsimagami. (Juánase 3:16) Taava ’pinngortitat tamarmik siornatigut erniusutut’ Jesus Guutip allanik tamanik pinngortitsinerani ikiuussimavoq. (Kulorsamiut 1:15; sarĸúmersitat 3:14) Juánase 1:1-imi oqaatigineqarpoq ’Oqaaseq’ (Jesus inuttut inunngunngikkallarami) ’pileqqaarneranni’ Guutimiissimasoq. Tassa Jehovap „qilak nunarsuarlu“ pinngortimmagit Oqaaseq najuussimavoq. Guutip Oqaaseq oqaluuppaa ima oqarami: „Inunnik pinngortitsisa immitsinnik assililluta.“ (1 Moses 1:1, 26) Taamaalilluni Oqaaseq ’suliortuusimavoq’ Guutip asasaa, aammalu ússatit 8:22-31-mi (nutsigaq pisoqaq) oqaatigineqarpoq ilisimassutip inuatut sunik tamanik pinngortitsinermi Jehovap saavani suleqataasimasoq. Jehovap pinngortereermani Oqaatsip nunarsuarmi inuttut inuulernissani tikillugu Guuti qilammi ukiorpassuarni amerlassusii ilisimaneqanngitsuni najorsimavaa.
14. Sooq Jesus taaneqarsimava ’Guutip takussaanngitsup assinga’-nik?
14 Tupinnanngilaq Kulorsamiut 1:15-imi Jesus taaneqarmat ’Guutip takussaanngitsup assinga’-nik. Ukiorpassuarni ernerup naalattup Ataatani, Jehova, najortillugu assigilluinnalersimavaa — angusisarluinnalersimavoq. Tamanna Jesusip Guutimik ilisarsinermut inuunermik kingunilimmut ’matuersaataaneranut’ pissutaasut ilagaat. Jesusip nunami inuutilluni iliuusii tamaasa aamma Jehovap iliuuserisimasinnaagaluarpai. Taamaattumik Jesusimik ilisarsinerujartorneq aamma Jehovamik ilisarsinerujartorneruvoq. (Juánase 8:28; 14:8-10) Tassa Jesus Kristus pillugu ilinniarnerunissarput inuuginnarnissamut pingaartorujussuuvoq.
JESUSIP NUNARSUARMI INUUNERA
15. Jesus qanoq ililluni naalungiarsuttut naammalluinnartutut inunngorsimava?
15 Jesusip inuunerata immikkoortuisa aappaat maani nunarsuarmi pisimavoq. Kajumilluni naalassimavoq Guutip qilammi inuunini niviarsiap juutiusup aalajaatsup Mariamik atillip illiaanut nuummagu. Jehovap anersaavata illernartup, pissaanerata sulisup, Maria ’ulissimavaa’, naartulersillugu naammalluinnartumillu meerartaartillugu. (Lúkarse 1:34, 35) Jesus naammalluinnanngissutsimik kingornussinngilaq, inuunera naammalluinnartumik pilerfeqarami. Angerlarsimaffimmi nikanartumi peroriartorpoq sanasumit Josefimit ernissarineqarluni meeqqanilu arlalinni angajullersaalluni. — Jesaja 7:14; Matîuse 1:22, 23; Mákorse 6:3.
16, 17. (a) Jesus sumit tupinnartuliorsinnaassuseqartitaasimava, ilaatigullu qanoq tupinnartuliortarsimava? (b) Jesus qanoq pissuseqarsimava?
16 Jesusip Jehova Guutimut tunniusimanera 12-inik ukioqartorli malunnarsereersimavoq. (Lúkarse 2:41-49) Aammattaaq inersimasunngorami 30-nillu ukioqarluni kiffartornini aallartikkamiuk Jesusip inoqatiminut asannilluinnarnini ersersittarsimavaa. Guutip anersaavanit tupinnartuliorsinnaalersinneqarami misiginneqataalluni napparsimasut, nukillaarsimasut, iloqiaat, tappiitsut, tusilartut pupissullu ajorunnaarsittarsimavai. (Matîuse 8:2-4; 15:30) Jesusip inuit tuusintilikkuutaat kaattut nerisissimavai. (Matîuse 15:35-38) Anorersuaq ikinngutiminik navianartorsiortitsisoq qatsortissimavaa. (Mákorse 4:37-39) Allaammi toqusut makitittarsimavai. (Juánase 11:43, 44) Tupinnartuliat tamakku pisimasuiupput oqaluttuarisaanikkut uppernarsaatissaqarluartut. Allaat Jesusimut akeraasut miserratigisimanngilaat Jesus ’amerlasuunik nalunaaqqutiliortoq’. — Juánase 11:47, 48.
Matîuse 4:17) Aamma naammagittassutsikkut ingasaassinianngissutsikkullu maligassiuilluarsimavoq. Allaat ajoqersukkami pakatsisimmanni paasinnilluni ima oqarsimavoq: ’Anersaaq kajumikkaluarpoq, uinilli sanngiippoq.’ (Mákorse 14:37, 38) Sallusuissummilli asissuisunut ikiortissaqanngitsunillu naqisimannittunut sapiitsumik kisiitsumillu pissuseqartarsimavoq. (Matîuse 23:27-33) Tamanilli pingaarnermik, Ataatami asanninnikkut maligassiaanik malinneqqissaarsimavoq. Jesus inuiaat naammalluinnanngitsut siunissami neriugisaqarsinnaaqqullugit allaat toqunissaminut kajumissuseqarsimavoq. Taamaattumik pissusissamisoorluinnarpoq Guutimik ilisarsinissamut Jesus ’matuersaataanerassallugu’! Aap, tassaavormi ’matuersaat’ uumasoq! Soorli oqarpugut ’matuersaat’ uumasoq? Taamaalilluta inuunerata immikkoortuisa pingajuat tikipparput.
17 Jesusip nunani angalaffigisarsimavaa, inuit Guutip naalagaaffianik ajoqersorlugit. (JESUS NALITSINNI
18. Jesus Kristus ullumikkut qanoq takorloortariaqarparput?
18 Jesusip toquneranik oqaluttuat Biibilimi atuarsimassavatit, taamaakkaluartorli ullumikkut uumavoq. Aap, ukiuni hundredelinni siullerni inuit hundredelikkuutaat Jesusip makititaaneranik takunnittuusimapput. (1 Korintumiut 15:3-8) Siulittuutigineqarsimasutut tamatuma kingorna Ataatami talerpiata tungaani issialersimavoq qilammi kunngitut pissaanermik tunineqarnissani utaqqillugu. (Tussiaat 110:1; Eprîarit 10:12, 13) Taava Jesus ullumikkut qanoq takorloortariaqarparput? Naalungiarsuttut nersutaatit nerrivianni innangasutut? Imaluunniit angutitut toqulerluni anniartutut? Naamik, massakkummi kunngersuuvoq pissaanilik! Ungasinngitsukkullu naalagaassutsi nunarsuatsinni erloqisitaasumi takutissavaa.
19. Siunissami qanittumi Jesus qanoq iliussava?
19 sarĸúmersitat 19:11-15-imi kunngi Jesus Kristus pissaanilissuartut ajortut piiariartorlugit takkuttussatut takorlooruminartumik allaatigineqarpoq. Kunngi qilammiusoq asannittoq taanna ullumikkut inuit millionilikkuutaat naalliuutaannik piiaanissaminut kajumissuseqarsimassaqaaq! Aamma nunamiikkallarami maligassiarisimasaminik naammalluinnartumik malinninniarlutik ilungersortut ikiornissaannut kajumissuseqaqaaq. (1 Pîtruse 2:21) Kissaatigaa ’Guutip Ajugaqanngitsup ullussarsuani sorsunnissami’ Harmagedonimik taaneqartumi qanilliartorasuartumi sernissornissaat, qilammi naalagaaffimminut innuttaasutut nunarsuarmi naassaanngitsumik inuusinnaaleqqullugit. — sarĸúmersitat 7:9, 14; 16:14, 16.
20. Jesus ukiuni tuusintini naalakkersuinermini inuiannut qanoq iliuuseqassava?
20 Ukiuni tuusintini naalakkersuinissamini eqqissineqartitsisumi siulittuutigineqartumi Jesus inuiaat iluaqutissaannut tupinnartuliortassaaq. (Jesaja 9:6, 7; 11:1-10; sarĸúmersitat 20:6) Nappaatit tamaasa piiassavai toqulu atorunnaarsillugu. Toqusimasut milliardilikkuutaat toqumit makitissavai nunarsuarmi naassaanngitsumik inuulernissaannik periarfissillugit. (Juánase 5:28, 29) Messiasitut naalakkersuinera pillugu kapitalimi kingusinnerusumiittumi paasissutissat amerlanerusut pissanganartissagunarpatit. Mannalu qularutigissanngilat: Guutip naalagaaffiata ataani inuulernissatta qanoq nuannertiginissaa takorloorsinnaanngilarpulluunniit. Jesus Kristus pillugu ilisimasaqarnerulernissaq pingaartorujussuuvoq. Aap, Jesusip, Guutimik ilisarsinermut inuunermut naassaanngitsumut sammisumut ’matuersaatip’ uumasup, puiunngisaannarnissaa pingaartorujussuuvoq.
[Quppernerup ataani ilanngussat]
^ imm. 7 Naatsorsuineq tamanna iluaqutigalugu Romamiut naalagaaffiata ajornannginnerusumik paasisinnaavaa qanoq annertutigisumik akileraartaqqusissanerluni. Taamaalilluni Augustus nalullugu naalakkersuisoq ’akileraarutinik katersuisussamik naalagaaffimmi angalaartillugu aallartitsisussaq’ pillugu siulittuummik eqquutitseqataavoq. Siulittuummi tassani aamma siulittuutigineqarpoq „angerutsimik paarsisoq“, imaluunniit Messias, naalakkersuisup taassuma kingoraartaata naalakkersuinerani toqutaajumaartoq. Augustusip kingoraartaata, Tiberiusip, naalakkersuinerata nalaani Jesus toqutaavoq. — Daniel 11:20-22.
^ imm. 8 Sapaatit-akunnerinik ukiunillu ataqatigiisitsineq itsaq juutinut nalinginnaasuuvoq. Assersuutigalugu, ullut arfineq-aappaat tassaasarpoq ulloq sabbat, ukiullu arfineq-aappaat tassaasarluni ukioq sabbat. — 2 Moses 20:8-11; 23:10, 11.
SUNA ILIKKARPIUK?
Jesusip siuaasai qanoq ilillutik Messiasiuneranut uppernarsaaqataappat?
Messias pillugu siulittuutit suut Jesusikkut eqquussimappat?
Guutip toqqaannartumik qanoq takutippaa Jesus tanitaralugu?
Sooq Jesus tassaava Guutimik ilisarsinermut ’matuersaat’ uumasoq?
[Atuaqqissaarnermi apeqqutit]
[Qupp. 37-mi nalunaarsukkat]
MESSIAS PILLUGU SILITTUUTIT MALUGISARIALLIT
SIULITTUUT PISIMASOQ EQQUUNNERA
INUUNERA SIULLEQ
Jesaja 7:14 Niviarsiamit erniuvoq Matîuse 1:18-23
Jeremia 31:15 Ernioreermat meeraaqqat toqorarneqarput Matîuse 2:16-18
KIFFARTORNERA
Jesaja 61:1, 2 Guutimit piginnaatinneqarpoq Lúkarse 4:18-21
Jesaja 9:1, 2 Kiffartorneratigut inuit Matîuse 4:13-16
qaamanersuaq takuaat
Tussiaat 69:10 Jehovap illuanik ilungersuutiginninnera Juánase 2:13-17
Jesaja 53:1 Upperineqanngilaq Juánase 12:37, 38
Sakarja 9:9; Siutituup piaraa qimusserfigalugu Matîuse 21:1-9
Tussiaat 118:26 Jerusalemimut iserpoq; kunngitut
Jehovap aqqani tikiuttutut
unnersiutigisaavoq
KILLUUTIGISAANERA TOQUTAANERALU
Tussiaat 41:10; 109:8 Apustilit ilaat ilumuunngitsuliorpoq; apustilit suliait 1:15-20
Jesus killuutigaa kingornalu
taarserneqarluni
Sakarja 11:12, 13 Siilvinut 30-nut Matîuse 26:14, 15
killuutigisaavoq
Tussiaat 27:12 Nalunaajaasut sallusut Matîuse 26:59-61
taassumunnga atorneqarput
Tussiaat 22:19 Qallersaataa immeraatigineqarpoq Juánase 19:23, 24
Jesaja 53:12 Ajortuliortunut ilaliussaavoq Matîuse 27:38
Tussiaat 22:8, 9 Toqulerluni mitaatigisaavoq Mákorse 15:29-32
Tussiaat 69:22 Seernartumik imerusuersarneqarpoq Mákorse 15:23, 36
Jesaja 53:5; Kapineqarpoq Juánase 19:34, 37
Sakarja 12:10
Jesaja 53:9 Pisuut akornannut iliverneqarpoq Matîuse 27:57-60
Tussiaat 16:8-11 Timaa asiulertinnagu makititaavoq apustilit suliait 2:25-32;
[Qupp. 35-mi assiliartaq]
Jesus napparsimasunik ajorunnaarsitsinissaanut Guutip pissaaneqartissimavaa