Kapitali 6

Sooq utoqqalisarlutalu toqusarpugut?

1. Inuup inuunera pil­lugu ilisimatuut suna nas­suiarsin­naan­ngilaat?

ILISIMATUUT naluaat sooq utoq­qalisarlutalu toqusar­tugut. Cel­livut nutaan­ngorsar­tuaan­nar­tus­satut isik­koqaraluar­put taamaalil­lutalu inuujuaan­nar­tus­saagaluarluta. Atuak­kami Hyojun Soshikigaku-mi (timip ipiutaasar­tai pil­lugit ilin­niutinut tun­ngasoq) ima al­las­simasoqar­poq: „Cel­lit pisoqaliar­tor­tar­nerat inuup utoq­qaliar­tor­tar­neranut qanoq atas­suteqar­nersoq paasiuminaal­luin­nar­tuuvoq.“ Ilisimatuut ilar­pas­sui isumaqar­put inuuneq ’pis­susis­samisoor­tumik, inun­nguusaasumik’ kil­lis­saqar­toq. Aam­ma il­lit taamatut isumaqar­pit?

2. Inuunerup sivikis­susia pis­sutigalugu inuit ilaat qanoq ilior­tarsimap­pat?

² Inuit sivisuumik inuunis­sar­tik kis­saatigiuaan­narsimavaat, al­laal­lu toqujuis­suseq anguniar­tarsimagaluarlugu. Ukiut hundredel­lit sisamas­saan­ni u.n.s. Kinamiut akimar­nit ilaat nakorsaasior­niar­talersimap­put ’inuuner­tusaam­mik’, toqujuitsun­ngorumagaluarlutik. Akuuk­kal­li kviksølvimik akoqarmata kaasarit ilaat misiliigaluar­tut toqusimap­put. Inuil­lu nunarsuarmi sumi tamaaniit­tut up­peraat neriuutigalugulu inuuneq toquk­kut naaneq ajor­toq arlaan­nilu ingerlaq­qit­tarluni. Buddhasior­tut ilar­pas­suisa ’kitaani paratiisimut’ pinis­sar­tik up­peraat, kristumiuunerar­tul­li toqup kingor­na qilam­mi pil­luarlutik inuulerumaar­nis­sar­tik takorloor­tar­paat.

3. (a) Sooq uagut inuit inuujuar­nis­sar­put kis­saatigisar­par­put? (b) Toqu pil­lugu apeq­qutit suut akis­sutis­sarsisariaqar­pavut?

 ³ Toqup kingor­na pil­luar­nis­samik takorluuk­kat naas­saan­ngitsumik inoorusus­sutsimut ersiutaap­put. ’It­tuin­nar­toqar­nera uum­mataanut tun­niup­paa,’ naas­saan­ngis­sutsimik eq­qarsaat Guutip uagutsin­nut pigiliutsis­simasaa eq­qarsaatigalugu Biibilimi taama al­las­simasoqar­poq. (akugdlîs­sup oqausê 3:11, nutsigaq pisoqaq.) Guutip inuit siul­liit pin­ngor­tis­simavai nunarsuarmi naas­saan­ngitsumik inuusus­san­ngorlugit. (1 Moses 2:16, 17) Soorli taava toqusar­pugut? Toqu qanoq ilil­luni silarsuarmut tikius­simava? Apeq­qutit taak­ku Guutimik ilisarsinik­kut akis­sutis­saqar­put. — Tus­siaat 119:105.

PEQQUSERSUSAAR­NIPALAAQ

4. Pinerlut­toq inuit toqusalersimaneran­nut pisuusoq kinaasoq Jesusip qulaar­paa?

⁴ Pinerlut­tup pasinaatigisin­naasani toq­qor­tor­niar­tar­pai. Aam­ma inuit mil­liardilik­kuutaat toquneran­nik kinguneqar­tumik pinerlus­simasoq taamaalior­poq. Inuit toqusar­neran­nut pis­sutaasoq toq­qor­tor­niarsaraa. Jesus Kristusip pinerlut­toq taan­na tik­kuarsimavaa im­minik toqutsiniat ima oqarfigigamigit: ’Ataataq nagguigisarsi tas­sa Diaavulu, ataatas­silu pilerigisai suliariniar­pasi. Taan­na pileq­qaar­nerminit inun­nik toqutsisuuvoq, sal­lusuis­sul­lu aalajangiutin­ngilaa ilumigut sal­lusuis­suteqan­ngin­nami.’ — Juánase 8:31, 40, 44.

5. (a) Satan Diaavulun­ngor­toq sumit pilerfeqar­pa? (b) Oqaatsit „Satan“ aam­ma „Diaavulu“ qanoq isumaqar­pat?

⁵ Aap, Diaavulu ’inun­nik toqutsisuuvoq’ ajor­torujus­suaq. Biibilimi ersersin­neqar­poq Diaavulu kinaas­susiliviusoq, tas­saanani ajus­suseq inuit uum­mataan­niit­toq. (Matîuse 4:1-11) In­ngilitut iluar­tutut pin­ngor­titaasimagaluar­poq, ’sal­lusuis­sul­li aalajangius­siman­ngilaa’. Naleq­qul­luaqaaq Satan Diaavulumik taaneqarsimagami! (sarĸúmersitat 12:9) „Satan“-imik, isumaqar­tumik „akerlilersuisoq“, taaneqar­poq Jehova akerlilersoramiuk. Pinerlut­toq taan­na aam­ma „Diaavulu“-mik, isumaqar­tumik „mamarliisoq“, taaneqar­poq mital­lerluni Guuti eq­qun­ngitsumik oqaluuseralugu mamarlersimagamiuk.

6. Sooq Satan Guutimut pikitsitsisimava?

 ⁶ Suna pis­sutigalugu Satan Guutimut pikitsitsiva? Piumatus­sutsini. Jehovap inun­nit pal­lorfigineqar­nera sin­ngal­luni pilerigilersimavaa. Pal­lorfigineqar­nis­samik, Pin­ngor­titsisup kisimi pisas­saanik, kis­saatini Diaavulup puior­niarsarin­ngilaa. (Naleq­qiuguk Hesekiel 28:12-19.) In­ngilip im­minut Satanin­ngor­tit­tup piumatuutut kis­saatini taman­na al­liar­tuin­nar­til­lugu naggataatigut ajor­tulior­poq. — Jâko 1:14, 15.

7. (a) Inuit toqusar­nerat sumik pis­suteqar­pa? (b) Ajor­ti suua?

⁷ Inuit toqusaler­neran­nik kinguneqar­tumik ajor­tulior­toq qulaareer­par­put. Sunar­piarli inuit toqusalersimaneran­nut pis­sutaava? Biibilimi ima al­las­simavoq: ’Toqup iguutaa tas­sa ajor­ti.’ (1 Korintumiut 15:56) Ajor­ti suugami? Oqaaseq taman­na paasiniarlugu oqaatsini Biibilip al­lan­neqaq­qaataani isumaa paasiniariar­tigu. Oqaluutit hebriiarisuut griikerisuul­lu „ajor­tulior­poq“-mik nutser­neqar­tut isumaqar­put „unior­paa“, tas­sa toraak­kamik imaluun­niit anguniak­kamik uniuivoq. Sunaana tamat­ta unior­tarip­put? Guutimut tamatigut naalal­luin­nar­neq. Ajor­tili qanoq ilil­luni pilersimava?

DIAAVULUP PEQQUSER­SUSAARUTINI QANOQ NAAMMASSIGAA

8. Satan inun­nit pal­lorfigineqarusul­luni qanoq iliorsimava?

⁸ Satan peq­qis­saar­tumik peq­qusersusaarusior­poq isumaqarluni tas­suunak­kut inun­nut tamanut naalagaas­suseqalersin­naas­sal­luni taamaalil­lunilu inun­nit pal­lorfigisaalis­sal­luni. Aalajanger­poq inuit aap­pariit siul­liit, Adam Evalu, Guutimut ajor­tulior­tin­niarlugit. Jehovap siuaasavut siul­liit ilisimasas­sereersimavai inuunermik naas­saan­ngitsumik kinguneqarsin­naasumik. Nalun­ngilaat Pin­ngor­titsiser­tik ajun­ngitsuusoq, naatsiivim­mum­mi alianaaqisumut Edenimut najugas­sis­simavaatik. Adamip ingam­mik Ataatami qilam­miusup ajun­ngis­susia misigaa pin­neqisumik ikiuiumatuumil­lu nulias­sim­mani. (1 Moses 1:26, 29; 2:7-9, 18-23) Inuujuaan­nas­sagunil­li inuit aap­pariit siul­liit Guutimut naalat­tariaqar­put.

9. Inuit siul­liit Guutip qanoq peq­quai, sooq peq­qus­sutaa ingasaas­sinerun­ngila?

 ⁹ Guutip Adam ima peq­quaa: „Naatsiiviup or­pii tamaasa nerif­figisin­naavatit, kisian­ni or­pik ajun­ngitsumil­lu ajor­tumil­lu nalujun­naarutaasoq nerif­figis­san­ngilat, nerif­figigaluaruk­kumi toqus­saatit.“ (1 Moses 2:16, 17) Jehova Guuti Pin­ngor­titsisutut pin­ngor­titaminut ileq­qus­satigut najoq­qutas­siuinis­samut sunalu ajun­ngitsuusoq sunalu ajor­tuusoq aalajangiinis­samut pisus­saavoq. Paar­naq pil­lugu peq­qus­sutaa ingasaas­sinerun­ngilaq, Adamim­mi Eval­lu naatsiivim­mi or­piit al­lat tamaasa nerif­figisin­naavaat. Inas­sutip tamatuma naalan­neratigut Jehovap naalagaaneranik naaper­tuil­luar­tumik pingaar­titsiner­tik ersersis­simasin­naagaluar­paat makital­lutik nam­min­neq ileq­qus­satigut najoq­qutas­sior­nis­samin­nut taarsiul­lugu.

10. (a) Inuit im­minut tapersersuilersin­niarlugit Satanip qanoq us­ser­pai? (b) Satanip Jehova sumik pis­suteqar­nerar­paa? (c) Satanip Guutimik saas­sus­sinera illit qanoq isumaqarfigaajuk?

¹⁰ Diaavulup peq­qusersusaarluni inuit siul­liit Guutimit qimagutsin­niar­pai, im­minul­lu ililiutsin­niarlugit sal­luliorfigalugit. Nas­samigut oqalut­tar­tup inuusamik oqalutsitsisuusaar­neratut iliorluni pulateriaarsuk atorlugu Diaavulup Eva ima aperaa: „Ilumununa Guutip naatsiiviup or­piisa arlaan­naal­luun­niit nerif­figeq­qun­ngik­kaa?“ Guutip peq­qus­sutaa Evap is­suarmagu Satan oqar­poq: „Naamik, toqus­san­ngivip­pusi.“ Taava Jehova ajor­tumik pis­suteqar­nerar­paa oqarluni: „Guutiuna taama oqar­toq nalun­ngin­namiuk nerif­figigaluarus­siuk isisi uisitaajumaar­tut Guutisul­lu ilerumaar­tusi ajun­ngitsoq ajor­torlu nalujun­naas­sal­lugit.“ (1 Moses 3:1-5) Diaavulu taamaalil­luni oqar­niar­porlusooq Guutip inuit sumik ajun­ngitsumik erliguuk­kai. Ataatamik qilam­miusumik ilumoorlunilu asan­nit­tumik, Jehovamik, mamarliineq ilumut ajorluin­nar­toq!

11. Adamip Eval­lu qanoq ilil­lutik Satan ajor­tulioqatigaat?

¹¹ Evap or­pik qiviaq­qip­paa, maan­nalu paar­nai ingal­lutik mamarunarsisimap­put. Taamaat­tumik paar­namik tigusivoq neril­lugulu. Kingor­na aam­ma uia piaaraluni as­singanik  Guutimut naalan­ngitsulior­poq. (1 Moses 3:6) Eva sal­loqit­tar­tip­poq, marluul­lutil­li Satanip inun­nut naalagan­ngor­niar­neranik tapersiip­put. Taamaalil­lutik taas­sumun­nga ajor­tulioqataaler­put. — Rûmamiut 6:16; 1 Timûtiuse 2:14.

12. Inuit Guutimut pikitsitsinerat qanoq kinguneqar­pa?

¹² Adamip Eval­lu iliuutsimik kinguneri ator­tariaqar­paat. Guutitut ilin­ngil­lat im­mik­kul­lu it­tumik ilisimasaqaler­natik. Kan­ngusup­pul­li toq­qorlutil­lu. Jehovap Adam nas­sueq­quaa imalu oqarfigalugu: „Kiak­kiul­lugu nerisas­sarsius­saatit is­sumut uterserlutit, tas­san­nga pigavit. Is­sumim­mi pivutit is­sun­ngus­saatil­lu.“ (1 Moses 3:19) Siuaasavut siul­liit ul­lormi or­piup ajun­ngitsumik ajor­tumil­lu nalujun­naarutaasup paar­naanik nerif­fim­min­ni Guutimit eq­qar­tuun­neqar­put taas­sumalu isaani toqul­lutik. Taava Paratiisimit anisitaap­put timik­kul­lu ajorsiar­tulerlutik, naggataatigul­lu toqul­lutik.

AJORTI TOQULU QANOQ ILILLUTIK PINNGORTUT

13. Ajor­ti inun­nut tamanut qanoq ilil­luni piva?

¹³ Satan inun­nit ataq­qinar­titaaler­nis­saminik anguniagaqar­nermini iluatsitsisorinaraluar­poq. Kisian­ni pal­lorfigin­nitsini inuugin­nar­tis­sin­naan­ngilai. Inuit siul­liit ajor­timit sun­ner­neqaleramik kinguaas­satik naam­mal­luin­nas­sutsimik kingor­nus­sitis­sin­naajun­naar­paat. Ujaq­qamut kigar­tuil­luni al­lan­nerit as­sigalugit ajor­tip siuaasat­ta siul­liit genii, timik­kut sananeqaataat, pulal­luin­nar­pai. Taamaalil­lutik naam­mal­luin­nan­ngitsuin­nar­nik kinguaas­siorsin­naaler­put. Meeraal­lu tamarmik Adamip Eval­lu ajor­tulior­nerata kingor­na inun­ngoramik ajor­timik toqumil­lu kingor­nus­sip­put. — Tus­siaat 51:5; Rûmamiut 5:12.

14. (a) Ajor­tiliunermin­nik miserratigin­nit­tut kimut as­sersuun­neqarsin­naap­pat? (b) Israelik­kut qanoq ilil­lutik paasisimavaat ajor­tiliul­lutik?

¹⁴ Ul­lumik­kul­li inuit ilar­pas­sui im­min­nut ajor­tilit­tut isigineq ajor­put. Ajor­ti kingor­nus­saasoq nunarsuup ilaani ilisimaneqan­ngilaq. Taman­nali ajor­tip piun­ngin­neranut up­per­narsaatis­saan­ngilaq. Nukap­piaraq ipikujut­toq ipikujun­ngin­nerarsin­naavoq,  aatsaal­lu tarrarsuutik­kut im­minut takuguni up­per­narsis­savaa ilumut ipikujul­luni. Itsaq Israelik­kut nukap­piaq­qatut taas­sumatut is­simap­put Guutip inatsisai pruf­fiiti Moses aq­qutigalugu pigamik­kik. Inatsisini taak­kunani erseq­qis­sisin­neqar­poq ajor­ti piviusuusoq. ’Inatsiseqarsiman­ngitsuup­pat ajor­ti piviusuusoq paasin­ngisaan­narsimas­sagaluar­para,’ apustili Paulus oqarsimavoq. (Rûmamiut 7:7-12) Nukap­piaraq tarrarsor­toq as­sigalugu Israelik­kut inatsisit misis­sor­nerisigut takusin­naasimavaat Jehovap isaani mingut­tuujul­lutik.

15. Guutip oqaasiinut ’tarrarsorut­ta’ suna paasis­savar­put?

¹⁵ Guutip oqaasiisa ’tarrarsorfiginerisigut’ najoq­qutas­siaasalu maluginiar­nerisigut takusin­naavar­put naam­mal­luin­nan­ngitsuul­luta. (Jâko 1:23-25) As­sersuutigalugu, Guutimik tul­lermil­lu asan­nin­neq pil­lugu Jesus Kristusip ajoqersuk­kaminut oqaasii Matîuse 22:37-40-mi al­lan­neqarsimasut eq­qarsaatigeriak­kit. Tamatumuunak­kut qas­sinim­mitaava uagut inuit uniuisimavugut! Inup­pas­suit Guutimut tul­lermin­nul­luun­niit asan­nin­nermik amigaateqar­ner­tik ilerasuutiginerluun­niit ajor­paat. — Lúkarse 10:29-37.

SATANIP PERIAASII SIANIGIKKIT

16. Satanip pilersaarutipiluinut pisaritik­kumanata qanoq iliorsin­naavugut, aam­ma sooq taman­na oqitsuun­ngila?

¹⁶ Satanip piaaraluta ajor­tulior­tin­niarsarisar­paatigut. (1 Juánase 3:8) Pilersaarutipiluinut pisaritin­ngitsoorsin­naavugut? Aap, tamatumanili pisariaqar­poq ajor­tilit­tut ilioriar­tar­nitsin­nut akiuun­nis­sar­put. Taman­na oqitsuun­ngilaq, ajor­tilip­pal­lariar­taatsivut inun­nguuserisavut sak­kor­toorujus­suum­mata. (Evfisumiut 2:3) Paulus as­sut ilungersor­tariaqarsimavoq. Sooq? Ajor­tiliugami. Aam­ma uagut Guutimit iluarisaajumagut­ta ajor­tilip­pal­lariar­taatsivut akior­tariaqar­pavut. — Rûmamiut 7:14-24; 2 Korintumiut 5:10.

17. Ajor­tilip­pal­lariar­tar­nitsin­nut akiuun­ner­put suup oqimaan­nerulersip­paa?

¹⁷ Satan Guutip inatsisaanik unioq­qutitsisin­niarluta periarfis­sarsior­tuar­poq, taamaat­tumik ajor­timut akiuun­ner­put oqitsuun­ngilaq. (1 Pîtruse 5:8) Kristumioqatimi ilaat isumaalugalugit  Paulus ima oqarsimavoq: ’Er­numavungali, soorlu pulateriaarsuup peq­qusersuul­luni Eva sal­loqit­taraa, taamat­taaq ilis­si eq­qarsaatisi aserus­sasoralugit Kristusimut peq­qusersuik­kun­naarsil­lusi.’ (2 Korintumiut 11:3) Satan aam­ma ul­lumik­kut taamatut periaaseqar­poq. Jehovap ajun­ngis­susia inatsisaanul­lu naalan­nerup iluaqutaas­susia pil­lugit qulalersitsiniaasar­poq. Ajor­tilip­pal­lariar­taatsivut kingor­nus­saasut ator­nerlun­niar­tar­pai pingaar­niar­tun­ngor­tin­niarluta, piumatuun­ngor­tin­niarluta, uumis­suisun­ngor­tin­niarluta paqumisut­tun­ngor­tin­niarlutalu.

18. Satanip ajor­ti siuarsar­niarlugu silarsuaq qanoq ator­paa?

¹⁸ Diaavulup nak­kar­titsiniaanermini aam­ma silarsuaq pis­saaneqarfini ator­tar­paa. (1 Juánase 5:19) Mianersun­ngik­kut­ta silarsuarmi avatangiisitsin­ni inuit un­neq­qaserlut­tut ileq­qorlut­tul­lu tatisin­naavaatigut ajor­tulior­til­luta Guutil­lu najoq­qutas­siaanik unioq­qutitsisumik ingerlalersil­luta. (1 Pîtruse 4:3-5) Inuit ilar­pas­suisa Guutip inatsisai sumigin­nar­tar­paat nalun­ngeqatigin­nis­suser­til­lu naqisimaniar­tarlugu naggataatigut misik­karlus­sitil­lugu. (Rûmamiut 2:14, 15; 1 Timûtiuse 4:1, 2) Ilaat al­laat sior­natigut nalun­ngeqatigin­nis­sutsimik­kut naam­mal­luin­nan­ngitsuk­kut akuerisin­naasiman­ngisaraluamin­nik ileq­qoqaleriar­tuaarsin­naasar­put. — Rûmamiut 1:24-32; Evfisumiut 4:17-19.

19. Minguitsumik inuuneq sooq naam­man­ngila?

¹⁹ Ileq­qus­satigut minguitsumik inuuniar­neq silarsuarmi maani imaan­naan­ngitsuuvoq. Pin­ngor­titsisit­tali iluarisaanik ilius­sagut­ta an­nerusoq pisariaqar­poq. Aam­ma Guutimut up­pis­suseqar­tariaqar­pugut taas­suman­ngalu pisus­saaf­feqar­titaasutut misigisariaqarluta. (Eprîarit 11:6) ’Ajun­ngitsulior­neq nalunagu ajun­ngitsuliun­ngitsup ajor­tulis­sutigaa,’ ajoqersugaq Jakob taama al­las­simavoq. (Jâko 4:17) Aap, Guutimik taas­sumalu peq­qus­sutaanik piaaraluni sumigin­naaneq im­mini ajor­tulior­neruvoq.

20. Eq­qor­tumik ilior­nis­sat akor­nuser­niarlugu Satan qanoq iliorsin­naava, tatisineril­li tamak­ku suna ikior­tigalugu akiorsin­naavigit?

²⁰ Satanip qular­nan­ngivis­sumik Biibilimik atuaq­qis­saar­nik­kut  Guutimik ilisarsiniar­nin­nut akerlilersuineq sak­kor­tusas­savaa. Neriup­pugut atuaq­qis­saarun­naarsin­niar­neqar­nitit eq­qor­tumik ilior­nis­san­nut akor­nutigis­san­ngik­kitit. (Juánase 16:2) Siut­tuusut ilar­pas­suisa Jesusimut nunami kif­far­tor­nerani up­peraluarlutik nas­suerutigiumasiman­ngilaat, inuiaqatimin­nit ajat­tugaanis­sar­tik ersis­sutigigamik­ku. (Juánase 12:42, 43) Satan naak­kit­taaqaluni Guutimik ilisarsiniar­tunik tamanik qunulersitsiniaasar­poq. Taamaak­kaluar­torli Jehovap iliuuserisimasai nuan­nersut eq­qaamajuarlugil­lu pingaar­tit­tuar­tariaqar­patit. Im­maqa al­laat akerlilersuisuugaluit tamak­kunin­nga pingaar­titsiler­nis­saan­nut ikiulersin­naavatit.

21. Silarsuaq ajor­tilip­pal­lariar­tar­nivul­lu qanoq ilil­luta ajugaaf­figisin­naavavut?

²¹ Naam­mal­luin­nan­ngitsuutil­luta ajor­tulior­toor­tuar­tas­saagut. (1 Juánase 1:8) Akiuun­nitsin­nili kisimiin­ngilagut. Aap, ajor­tumut, Satan Diaavulumut, akiuun­nitsin­ni ajugaasinnaavugut. (Rûmamiut 5:21) Nunarsuarmi kif­far­tor­nermi naaler­nerani Jesusip ajoqersuk­kani ima qiim­mas­sarsimavai: ’Silarsuarmi naal­lius­saasi; tup­pal­leritsili, silarsuarmut ajugaagama.’ (Juánase 16:33) Guutip ikiuineratigut al­laat inun­nut naam­mal­luin­nan­ngitsunut silarsuarmut ajugaanis­saq ajor­nan­ngilaq. Satanip im­minut as­sor­tuisut Guutimul­lu naalatsigitit­tut saper­pai. (Jâko 4:7; 1 Juánase 5:18) Soorlu sam­miumaarip­put Guuti ajor­timit toqumil­lu aniguinis­satsin­nut aq­qutis­siuisimavoq.

SUNA ILIKKARPIUK?

Satan Diaavulu kinaava?

Sooq inuit utoq­qalil­lutil­lu toqusar­pat?

Ajor­ti sunaava?

Satanip qanoq iliorluni inuit piaaralutik Guutimut ajor­tulior­tin­niar­tar­pai?

[Atuaqqissaarnermi apeqqutit]

 [Qupperneq 54-mi tamakkerlugu asseq]