Kapitali 33

Esajasip siulittuutaa eqquuppoq

JESUSIP paasigamiuk farisæerit Herodesil­lu par­tiianik tapersersuisut toqun­nialersaaraan­ni, ajoqersuk­kani ilagalugit Galilæap Tasersuanukar­poq. Tamaani inup­pas­suit Palæstinamit tamarmeersut, al­laam­mi Palæstinap kil­leqarfiata avataaneersut, us­sagarfigaat. Amerlasuut ajorun­naarsip­pai, an­ner­tuunil­lu an­niaateqar­tut qerler­toruul­lutik or­nigar­paat at­torumal­lugu.

Us­sagar­tut amerlaqim­mata Jesusip ajoqersuk­kani oqarfigai umiatsiaamik piareersimas­sut­tuaq­qul­luni. Umiatsiaami avalaq­qanermigut inup­pas­suit qerler­toruup­pal­laaler­nis­saat pinaveersimatis­sin­naavaa. Umiatsiaamit ajoqersorsin­naavai imaluun­niit umiatsiaamik tasersuaq sinersin­naavaa naapitanilu ikior­tarlugit.

Ajoqersuk­kap Mat­tæusip maluginiarsimavaa Jesusip suliamigut „pruf­fiitik­kut Esajasik­kut oqaaserisaq“ eq­quutik­kaa.

„Aajuna kif­fara qinigara, asasara tar­nima nuan­narisaa; Anersaara taas­sumun­nga tun­niuk­kumaar­para, [sunalu eq­qor­tuusoq, NV] inuiaqatigiin­nut oqaas­sutigis­savaa. Saqitsaas­sananilu nil­lias­san­ngilaq, nipaalu il­lut akor­nan­ni tusarsaas­san­ngilaq. Sul­lor­tooq naf­falik nal­loq­qis­san­ngilaa, iperarlu qamilersoq qamivis­san­ngilaa, eq­qar­tuus­sisis­saq naam­mas­sitserlugu ajugaanik­kut. Inuiaqatigiil­lu aq­qa neriuf­figis­savaat.“

Kif­faq asasaasoq Guutip nuan­narisaa tas­saavoq Jesus. Eq­qun­ngitsumik up­perisarsior­nermi ileq­qulersuutinit matuneqarsimasoq, eq­qor­toq, Jesusip qulaar­paa. Farisæerit Guutip inatsisaanik kuk­kusumik nas­suiaaner­tik pis­sutigalugu inuk nap­parsimasoq sabbatimi ikioruman­ngilaal­luun­niit! Guutip naaper­tuil­luas­susiata nas­suiar­neratigut ileq­qut naaper­tuil­luan­ngitsut nam­mak­kersuutaan­nit Jesusip inuit kif­faajun­naarsip­pai, tamatumalu kingunerisaanik up­perisarsior­nik­kut pisor­tanit toqun­niar­neqar­poq.

Qanoq paasisariaqar­pa al­las­simam­mat ’saqitsaas­sananilu nil­lias­san­ngitsoq, nipaalu il­lut akor­nan­ni tusarsaas­san­ngitsoq’? Aap, Jesusip inuit ajorun­naarsik­kaangamigit ’iner­tingaar­tar­pai nalunaarutigeq­qunani’. Nipilior­tunit il­lut akor­nan­ni us­sagarfigineqar­nis­sani kis­saatigin­ngilaa, tusak­kal­lu al­lan­ngorarlutik ingerlaar­nis­saat kis­saatiginagu.

Jesusil­lu tusarlius­sas­sani tup­pal­ler­nar­toq inun­nut sul­lor­tuutut naf­falit­tut it­tunut, inun­nut aliasut­tunut naner­tugaasunul­lu, tusarliut­tar­paa. Inuit tamak­ku ipaq­qatut qamilivis­sutut ip­put. Jesusip sul­lor­tooq naf­falik napivin­ngilaa iperarlu qamilerluni aamaagin­nalersimal­luni pujuuin­nalersimasoq qamivin­nagu. Asan­nil­lunili saamal­lunilu inun­nut maniguut­tunut qiim­maal­lan­nar­tumik pik­koril­luni oqalut­tar­poq. Jesus ilumut tas­saavoq inuiaqatigiit neriuf­figisin­naasaat! Mattæus 12:15-21; Markus 3:7-12; Jesaja 42:1-4.

▪ Qanoq ilil­luni Jesusip saqitsaas­sin­ngik­kaluarluni il­lul­lu akor­nan­ni nipituumik nil­lian­ngik­kaluarluni suup eq­qor­tuunera nas­suiar­paa?

▪ Kik­kut sul­lor­tuutut naf­falit­tut ipaq­qatul­lu qamilersutut ip­pat, taak­kulu Jesusip qanoq pivai?