Galilæamut oqaluussiartorluni angalaqqinneq
Kapitali 49
Galilæamut oqaluussiartorluni angalaqqinneq
JESUS ukiut marluk kipisuitsumik oqaluussisareerami maanna qasuersernialernerpa ulapippallaarunnaarnialerlunilu? Naamik, akerlianik sulinini annertusisippaa oqaluussiartorlunilu angalaqqilerluni, Galilæami pingajussaanik angalalluni. Taavani illoqarfiit nunaqarfiillu tamaasa angalaffigai, naalagiartarfinni ajoqersuisarluni Naalagaaffimmillu tusagassaq nuannersoq oqaluussissutigalugu. Angalanermi tamatumani misigisani pissutigalugit aatsaat taama qulakkeertigaa oqaluussineq annertusisinneqartariaqartoq.
Sumiluunniit tikitamini Jesusip inuppassuit anersaakkut tuppallersartariallit katsorsartariallillu naammattoortarpai. Savatut paarsisoqanngitsutut paarinerlugaallutillu isumakkiigaapput, nalligingaalerpaalu. „Katersugassat amerlaqaat, sulisussallu ikeqaat,“ ajoqersukkat oqarfigai. „Taamaattumik katersugassat inuat qinnuigisiuk sulisussanik katersuiffimmut aallartitseqqullugu.“
Jesus pilersaarutini naapertorlugit sulilluni aallartippoq. Apustilini aqqaneq-marluk ukioq ataaseq tamatuma siorna qinersimasani qaaqquai, arfinilinngorlugillu marlukkuutaarlugit oqaluussiartortussanngortillugit, imalu ilitsersuullugit: „Guutimik nalusut aqqutaannut pinnasi Samaritanerilli illoqarfiinut isernasi! Annerusumilli savat tammarsimasut Israelip inoqutaasa ilagisaat ornissigik! Oqaluussiartoritsili oqarlusi: ’Qilammiup Naalagaaffia qanillivoq!’“
Naalagaaffik oqaluussissutigisassaat tassaavoq qanoq qinusarnissaannik najoqqutassiuukkamigit qinnutigeqqusaa. Naalagaaffiullu qanillinera paasisariaqarpoq Jesus Kristus, Guutip naalagaaffimmi tamatumani kunngissatut toqqarsimasaa, akornanniittoq. Ajoqersukkat naalagaaffimmut ilumut sinniisaanerat uppernarsarniarlugu napparsimasunik ajorunnaarsitsinissaannut, aap allaat toqusunik makititsinissaannut, Jesusip pissaaneqartippai. Peqquaalu tupinnartuliat tamakku akilersinnatik suliarisassagaat.
Ajoqersukkat oqaluussillutik angalanissaminnut atortussatigut peqqumaasisassanngillat. „Kuultimilluunniit sølvimilluunniit kanngussammilluunniit qiterummioqarniassanngilasi; taquarfilisassanngilasi arlaasisarnasilu kamilisarnasilu ajaappialisarnasilu; sulisoq nerisassaminik pissarsisariaqarmat.“ Nerisassaannik inisimaffissaannillu tusagassamik pingaartitsisunit isumagineqassapput: „Sumulli illoqarfimmut nunaqarfimmulluunniit pigaangassi, siunersiuisaritsi, qinngaqqunnanngitsumik tassaniittoqarnersoq, taassumaniittuaritsilu aallarserlusi.“
Naalagaaffimmik tusagassamik oqaluttuussisarnissaannik ilitsersorpai: „Sumullu illumut iseraangassi ilassinnittaritsi, illullu taassuma inui qinngaqqunnanngippata, eqqisseqqussutissi pissavai. Qinngaqqunnarpatali, eqqisseqqussutissi uterfigissavaasi. Sumilu ilassiumanngippasi oqaatsisilu tusarumanagit, taava illumit nunaqarfimmilluunniit tassannga anigitsi, isikkasilu qasiiarsigik.“
Nunaqarfik tusagassamik ajattuisoq sukannernerpaamik eqqartuunneqarumaarpoq: „Sodomamiut Gomorramiullu nunaat eqqartuutiffissami atussaanerusumik pineqassaaq nunaqarfimmit taassumannga.“ Mattæus 9:35-10:15; Markus 6:6-12; Lukas 9:1-5.
▪ Galilæami oqaluussilluni angalanermi pingajuat qanga Jesusip aallartippaa, sunalu qulariunnaarpaa?
▪ Apustilit aqqaneq-marluk oqaluussiartortikkamigit Jesusip qanoq ilitsersorpai?
▪ Naalagaafiup qanillineranik ajoqersukkat oqaluussissutiginninnissaat sooq eqqortuua?