Guutip talerpiata tungaani
Kapitali 132
Guutip talerpiata tungaani
PIINSIP ulluani anersaamik illernartumik kuisineq Jesusip qilammut utersimaneranut takussutissaavoq. Tamatuma kinguninngua ajoqersukkap Stefanusip takorruuisitaalluni takusaa Jesusip sumiilersimaneranik ersersitsisuuvortaaq. Aalajaalluni oqaluussinini pissutigalugu toqussutigisaminik ujaqqanik milloorneqarnini sioqqutitsiarlugu Stefanus ima oqarpoq: „Qilaat isigaakka ammasut Inuullu Ernera Guutip talerpiata tungaani qeqartoq.“
Guutip talerpiata tungaaniilluni Ataataaminit ima peqquneqarnissani Jesusip utaqqilerpaa: ’Akeqqavit akornanni naalagaagit!’ Akeqqaminulli akuliutinnginnermini Jesus suleriva? Ajoqersukkani tanitaasut naalakkersorpai, imaluunniit naalagaaffigai, oqaluussineranni siulersorlugit Ataatamilu naalagaaffiani imminut kunngioqataassallutik makititaanissaannut piareersarlugit.
Assersuutigalugu, Jesusip Saulus (Romamiutut atimisut Paulusitut kingorna ilisimaneqalersoq) nunani allani ajoqersuganngortitsiortornermut siuttuusussatut toqqarpaa. Saulus Guutip inatsisaanik ilungersuutiginnittuuvoq, juutilli upperisarsiornikkut pisortaannit tammartinneqarsimalluni. Taamaattumik Stefanusip toqutaanera akuersuunnanngilaa, aammattaarli Damaskusiliarpoq palasiunerup Kajfasip peqqummani taavani angutit arnallu Jesusimik malinnittut tamaasa tigusarissagini Jerusalemiliaallugillu. Aqqutaanili tassanngaannaq qaamaqisumik qinngorfigineqarpoq, nunamullu aqullaarpoq.
„Saul! Saul! Sooq [malersorpinga,]?“ aperisoqarpoq. Oqaluttoq Saulusip takusinnaanngilaa. „Kinaavit, Naalagaq?“ aperaaq.
„Jesusiuvunga [malersukkat],“ akineqarpoq.
Saulus, tupinnartuliakkut qaamasumit tappingersitaasoq, Jesusimit oqarfigineqarpoq Damaskusimut isissasoq unnersuunneqarnerunissanilu utaqqissagaa. Taava Ananias, ajoqersukkami ilaat, Jesusip saqqummerfigaa. Saulus pillugu Jesusip taanna oqarfigaa: „Taanna sakkussatut qinikkatut pigissagakku atera Guutimik nalusunut kunnginullu Israelillu kinguaanut saqqummiuteqqullugu.“
Jesusimit ikiorneqarlutik Saulus (maanna Paulusitut ilisimaneqartoq) oqaluussisartullu allat oqaluuussinermik ajoqersuinermillu sulinerminni angusaqarluarput. Jesusip Damaskusimut aqqutaani Paulusimut saqqummerfiginninneranit ukiut 25-t missaanniittut qaangiummata, Paulus allappoq „tusagassaq nuannersoq“ ’pinngortitani tamani qilaap ataaniittuni oqaluussissutigineqarsimasoq’.
Ukiorpassuit qaangiummata Jesusip apustilini asasani Johannes takorruuisillugu arlalinnik takusaqartippaa. Iluamik oqaatigalugu, takusani tamakku, Bibelimi sarĸúmersitat-ni allaaserisani, ikiortigalugit Jesusip Nalagaaffiup pissaanerani uternera apustili Johannesip nalimini takoreerpaa. Johannes nassuiaavoq ’anersaamiulluni Naalakkap ulluanut’ pisitaasimalluni. ’Naalakkap ullua’ sunaana?
Bibelimik siulittuutinik, ilaatigut ullut kingulliit pillugit Jesusip nammineq siulittuutaanik, paasiniaaqqissaarnikkut ersersinneqarpoq ’Naalakkap ullua’ ukiumi ukiut nutaat aallarnerfianni, 1914-imi — aap, kinguaariit ullumikkut suli amiakkoqartut inuuffigisaanni — aallartissimasoq! 1914-imi Jesus tikiuteqqippoq, takussaanngitsumik malunnanngitsumillu; tikiuteqqinnera kiffaasa aalajaatsut kisimik eqqumaffigaat. Ukiumi tamatumani Jehovap Jesus peqquaa akeqqami akornanni naalagaalissasoq.
Ataatami peqqussutaa Jesusip naalappaa qilallu salillugu Satan inngilipiluilu nunamut igillugit. Tamanna Johannesip takorruuisitaalluni takoreermagu, qilammit nipi imaattoq tutsiuppoq: ’Maanna annaassut pissaanerlu naalagaaffillu Guutitta pigilerpai, piginnaanerlu tanitaata pigilerpaa.’ Aap, 1914-imi Messias kunngitut naalakkersuilerpoq!
Jehovamik pallorfiginnittunut qilammiittunut tamanna tusagassaavoq nuannersoq. Taakku ima oqarfigineqarput: ’Qilaat taakkunanilu ineqartusi ukorsii, tipaatsugitsi.’ Nunamulli ineqartunut qanoq malunniuppa? ’Eqqanaq nuna imarlu,’ nipi qilammit nangippoq, ’Diaavulu ilissinnut aqqarmat kamattorsuulluni, piffissakissutsi nalunnginnamiuk.’
Maanna uagut piffissami tamatumani sivikitsumiippugut. Guutip silarsuassaanut nutaamut isertussat nungutitaasussallu maanna avissaartiterneqarput. Guutip naalagaaffianik tusagassamut nuannersumut, Kristusip siulersuineratigut maanna nunarsuaq tamakkerlugu oqaluussissutigineqartumut, qanoq qisuariarnerput sorlernut ilaanissatsinnut aalajangiisuussaaq.
Avissaartiterineq tamanna naammassippat, Guutip sakkuatut Jesus Kristusip nunarsuarmi Satanip pissutsinik aaqqissuussaa tamaat tamatuminngalu tapersersuisut tamaasa, aap, ajussuseq tamaat, piiassavaa. Sorsunnermi Bibelimi Harmagedonimik taaneqartumi tamanna pissaaq. Taava Jesusip, qilammi nunamilu annerpaamut Jehova Guutimut tullersortaasutut, Satan inngilipiluilu qilersussavai ukiuni tuusintini ’itinersuarmiittussanngorlugit’, tassa toqungasutut pissuseqalersillugit. Apustilit suliaannik allakkat 7:55-60; 8:1-3; 9:1-19; 16:6-10; Tussiaat 110:1, 2; Eprîarit 10:12, 13; 1 Pîtruse 3:22; Lukas 22:28-30; Kulorsamiut 1:13, 23; sarĸúmersitat 1:1, 10; 12:7-12; 16:14-16; 20:1-3; Mattæus 24:14; 25:31-33.
▪ Jesus qilaliarami sumut inissinneqarpa, tassanilu suna utaqqivaa?
▪ Jesus qilaliarami kikkunnut naalagaalerpa, naalagaaneralu sumik kinguneqarpa?
▪ ’Naalakkap ullua’ qanga aallartippa, ullullu tamatuma aallartinnerani qanoq pisoqarpa?
▪ Ullumikkut avissaartiterineq suna tamatsinnik attuiva, sunalu tunngavigalugu avissaartiterineqarpa?
▪ Avissaartiterineqareerpat susoqassava?