Iffiat seernarsaallu
Kapitali 58
Iffiat seernarsaallu
DEKAPOLISIMI, juutiunngitsunik inoqarfiunerusumi, inuppassuit Jesus ussaffigisimavaat. Ilarpassui ungasissumit aggersimapput tusarnaarumallugu innarluutiminnillu ajorunnaarsinneqarumallutik. Juutit juutiunngitsut najugaqarfigisaanni angalagaangamik pisarnermissut nuiorakkanik angisuunik taquarfeqartiterput.
Taamaalluni Jesusip ajoqersukkani qaaqquai oqarfigalugillu: „Inuit uku nalligeqaakka, ullut pingasut najormannga nerisassaqarnatillu. Iisisinnagillu angerlartikkaluarukkit ingerlatillutik tumanngoqqajaqaat, ilaat ungasissumit pigamik.“
„Sumit naammattumik nerisassarsissaagut tamaani inoqanngitsumi inuppassuit ukua qaarsillaatissaannik?“ ajoqersukkat aperipput.
Jesus paasiniaavoq: „Qassinik iffiaateqarpisi?“
„Arfineq-marlunnik,“ akippput, „aalisagannguanillu qassinnguanik.“
Jesusip inuit nunami tamaani uninngaaqquai. Taava iffiat aalisakkallu tiguai Guutimullu qinulluni, aggorpaalu ajoqersukkaminullu tunniullugit. Ajoqersukkallu inunnut agguaappaat, taakkualu qaarsillarnissaminnut nerivaat. Sinneruttut katersorneqaramik nuiorakkat arfineq-marluk ulikkaarsimavaat, massa arnat meeqqallu saniatigut angutit 4000-it qaarsillarlutik nerisimagaluartut!
Jesusip inuppassuit aallartippai, ajoqersukkanilu ilagalugit umiatsiaamik Galilæap Tasersua napillugu kimmut ikaarluni. Tamaani farisæerit, tamatumuuna upperisarsioqatigiinnik saddukæerinik taagorneqartunik tapersersuisunik malitseqarlutik, Jesus usserniarsaraat qilammit nalunaaqqummik takuteqqullutik.
Jesusilli nalunngilaa usserniarsarigaanni. Akivoq: „Unnukkaangat oqararaasi: ’Aqagu silagississaaq, qilak aappilleqimmat,’ qaasaraangallu oqararaasi: ’Ullumi silarlussaaq qilak aappilleqimmat nuisserlunilu.’ Qilaap isikkuanit qanoq pisoqassasoq ilisimasaraarsi, ullulli makkua nalunaaqqutaat paasissutigisinnaanagit.“
Taava eqqarleriinnik, imaluunniit kinguaariinnik, ajortunik taavai farisæerinullu oqaasereriikkaminik oqarfigalugit: taamaallaat Jonasip nalunaaqqutiliaa nalunaaqqutigissagaat. Jesus ajoqersugaalu umiatsiaamut ikipput Galilæap Tasersuatalu avannaata kangianiittup, Betsajdap, tungaanut aallarlutik. Aqqutaani ajoqersukkat paasilerpaat iffianik amerlanerusunik nassarnissartik puiorsimallugu, ataasiinnarmillu peqalersimallutik.
Farisæerinik saddukæerinillu Herodesimik tapersersuisuusunik aatsaannguummat oqaloqatiginnissimanini eqqarsaatigalugu Jesusip ajoqersukkani maanna mianersoqquai: „Misissoritsi mianersorlusi farisiiarit seernarsaatissiaannut Herodesillu seernarsaatissiaanut!“ Jesusip seernarsaat eqqaagaa tusaramikku ajoqersukkat qularnanngitsumik iffiaq puiorsimasartik pisoraat, oqqassutigilerpaallu. Jesusilli paasivaa paatsooraanni oqarlunilu: „Sooq eqqarsarpisi iffiaateqanngitsusi?“
Ullummi marluk pingasulluunniit tamatuma siorna Jesusip tupinnartuliorluni inuit tuusintilikkuutaat iffiartugassissimavai. Paasisimasariaqaraluarpaat iffiavimmik amigaateqarneq pinngikkaa. „Eqqaanngilasi“, aperai, „iffiat tallimat aggorakkit 5000-inut, affakut katersorassigik nuiorakkat qassit immerpisigik?“
„Aqqaneq-marluk,“ akipput.
„Taakkulu arfineq-marluk aggorakkit 4000-inut, affakut katersorassigik nuiorakkat qassit immerpisigik?“
„Arfineq-marluk,“ akipput.
„Soormi taava suli paasisaqanngilasi?“ Jesus nangippoq. „Soormi-una paasinngilisiuk timiusaq pinngikkiga, oqarama farisiiarit saddukæerillu seernarsaatissiaannut mianersoqqullusi?“
Kiisami ajoqersukkat paasilerpaat. Seernarsaat, iffialiukkamut pullassaatitut atorneqartartoq, ajortunngorsimanermut assersuutigineqarpoq. Ajoqersukkat paasilerpaat Jesusip assersuusiorluni oqaluffigigaatik aammalu „farisiiarit saddukæerillu ajoqersuutaannut“ mianersoqqugaatik — ajortunngornarmat. Markus 8:1-21; Mattæus 15:32-16:12.
▪ Sooq inuppassuit nuiorakkanik angisuunik taquarfilisarrappat?
▪ Jesus umiatsiarluni Dekapolisimit sumunnarpa?
▪ Seernarsaat pillugu Jesusip oqaasii ajoqersukkat qanoq paatsoorpaat?
▪ ’Farisiiarit saddukæerillu seernarsaasiaannik’ oqarami Jesusip suna pivaa?