Jesus naalagaasorlu inuusuttoq pisooq
Kapitali 96
Jesus naalagaasorlu inuusuttoq pisooq
JESUS Peræakkoorluni Jerusalemiliartillugu angutip inuusuttup arpalluni ornippaa seeqqumiarfigalugulu. Angut taanna naalagaasutut eqqartorneqarpoq, qularnanngitsumik juutit naalagiartarfianni tassaniittumi nuimasumik atorfeqarmat, immaqaluunniit allaat Sanhedrinimut ilaasortaalluni. Aammattaaq pisoorsuuvoq. „Ajoqersuisoq ajunngitsoq-aa!“ Jesus aperaa, „qanoq iliussaanga inuuneq naassaanngitsoq kingornussariumallugu?“
„Sooq ajunngitsumik taavinga?“ Jesus akivoq. „Allamik ajunngitsoqanngilaq, Guuti kisimi ajunngitsuuvoq.“ Angutip inuusuttup oqaaseq „ajunngitsoq“ taaguutitut atunnguatsiarpaa, Jesusillu taamaattumik paasitippaa Guutip kisimi taaguut tamanna pisassarigaa.
„Inuunermut iserumaguit inatsisit maleruakkit!“ Jesus nangippoq.
„Suut?“ angut aperaaq.
Akilluni Jesusip inatsisit qulit ilaat tallimat oqaatigai: „Uku: inuassanngilatit; arnaaneqassanngilatit; tillissanngilatit; nalunaajaassanngilatit sallullutit; ataatat anaanallu ataqqikkit.“ Taavalu inatsit pingaarnerusoq ilannguppaa: „Tullit ilittut asassavat.“
„Tamakku tamaasa inuusunninnit malinniarpakka,“ angut ilumoorluni akivoq. „Suna suli pinngilara?“
Jesusip tusaasinnaagamiuk angut ilungersorluni ilumoorlunilu qinusoq, asalerpaa. Aammali malugaa inuusuttoq nunap piinik pingaartitseqisoq, taamaattumillu iliuuserisariaqagaanik innersuullugu: „Ataaseq pinngilat: aallarlutit pigisatit tamaasa tunikkit piitsunullu tunniullugit, taava qilammi pequuteqalerumaarputit, taava qaallutit malinnga!“
Jesusip qularnanngitsumik angut naakkigaa nikuilluni aliasoqaluni qimagummat. Pisoorsuunini pissutigalugu piviusumik nalillit takusinnaanngilai. „Pisuunut Guutip naalagaaffianut pineq ajornakusuussusia!“ Jesus anersaamivoq.
Oqaasii ajoqersukkat tupigusuutigaat. Uissuummineruppulli nangilluni ima tamanut tunngasumik oqarmat: „Qatigattuup meqqutip isaagut putoqqunnissaa ajornartoqannginneruvoq pisuup Guutip naalagaaffianut isernissaanit!“
„Kinami taava annassinnaava?“ ajoqersukkat aperipput.
Jesusip isigalugit akivai: „Inunnut tamanna ajornaqaaq, Guutimulli pinnani, Guutimut ajornartoqanngimmat.“
Peter qularpasigani oqarpoq naalagaasup inuusuttup pisuup aalajangerneranit allaanerusumik namminneq aalajangersimallutik: „Ata, tamaasa qimallugit malippatsigit?“ Nangillunilu: „Susissutigissavarput?“
Jesus neriorsuivoq: „Pinngoqqiffimmi Inuup Ernera issiavissaarsuarmini naalannassutsimi piani issiappat ilississaaq issiassaasi issiavissaarsuarni aqqaneq-marlunni Israelip naggueqatigiissortai aqqaneq-marluusut eqqartuullugit.“ Aap, Jesusip takutippaa nunami pissutsit nutaanngortinneqarumaartut, Edenip naatsiivianitut ileqqissillugit. Peterillu ajoqersukkallu allat akissarsiarissavaat Kristus ilagalugu nunarsuarmi tamarmi paratiisissamut tamatumunnga naalagaanissaq. Akissarsiaq taama ittoq pilliutinit sunilluunniit naleqarnerungaarpoq.
Maannangaarli akissarsiassaqarpoq, Jesusimi oqarpoq: „Inuup kialuunniit illuni qatanngutiniluunniit arnat arniluunniit angunniluunniit qitornaniluunniit nunaatiniluunniit qimakkaluarunigit uanga iivanngkiiliulu pilluta, 100-riarlugit maanna matumani pisaassaaq illussaminik qatanngutissaminillu arnassaminillu qitornassaminillu nunaatissaminillu, qinugineqaraluartilluni, [pissutsinillu aaqqissuussaanermi tikiuttussami] inuuneq naassaanngitsoq pissavaa.“
Jesusip neriorsuutaa ima paasisariaqarpoq ajoqersugai, silarsuarmi sumunnaraluarunilluunniit, kristumioqatiminnut attaveqarneq, timikkut ilaquttaminnut attaveqarnerminnit asaqatigiiffiunerullunilu naleqarnerusoq, nuannaarutigisinnaassagaat. Qularnanngitsumik naalagaasup pisuup akissarsiaq tamanna Guutillu naalagaaffiani inuunissaq naassanngitsoq annaavai.
Taava Jesus nangippoq: „Qasseersuilli siulliugaluartut kingullinngussapput kingulliugaluartullu siullinngorlutik.“ Qanoq paasisariaqarpa?
Tassa upperisarsiornikkut pisinnaatitaaffitsigut ’siulliusut’ ilarpassui, soorlu naalagaasoq pisooq inuusuttoq, Guutip naalagaafianut isissanngillat. „Kingullinngussapput“. Farisæerinilli imminnut iluartuutinniartunit nikanartutut ’kingulliusutut’ isigaasut — ‛am ha’aʹræts-inik, tassa ’asimiunik’ taasaasa — ilarpassui ’siullinngussapput’, ilaallu tassaapput Jesusip ajoqersugai maniguuttut. Taakkua ’siullinngornissaat’ isumaqarpoq Naalagaaffimmi Kristusimik naalakkersuisooqataanermik immikkut pisinnaatitaaffeqalissasut. Markus 10:17-31; Mattæus 19:16-30; Lukas 18:18-30.
▪ Angut inuusuttoq pisooq naalakkatut qanoq ittuunnguatsiarpa?
▪ Suna pillugu Jesus ’ajunngitsumik’ taaneqarumanngila?
▪ Naalagaasup inuusuttup pissusia qanoq ililluni pisuunerup navianaataanik takutitseqataava?
▪ Akissarsiaq suna Jesusip ajoqersukkaminut neriorsuutigaa?
▪ Siulliugaluartut qanoq kingullinngussappat, kingulliugaluartullu siullinngorlutik?