Kapitali 41

Jesus pillugu isummat akerleriit

JESUS Simonimut pulaareersimatsiaan­narluni Galilæami oqaluus­siar­tor­nermi aap­pa aal­lar­tip­paa. Tamaani angalanermini siul­lermi ajoqersuk­kat siul­liit, Peter, Andreas, Jakob Johan­nesilu ilagisimavai. Maan­nali apustilini aq­qaneq-marluk taak­kualu saniatigut ar­nar­paaluit, ilaatigut Maria Magdalene, Susan­na Johan­nalu, kun­ngi Herodesimi atorfik­kaamik ueqar­toq, ilagai.

Jesusip kif­far­tor­nera an­ner­tusiar­tor­til­lugu suliai pil­lugit isumaqatigiin­ngin­neq an­ner­tusiar­tor­poq. Angut anersaapilulik tap­piil­lunilu oqajuitsoq Jesusimukaan­neqar­poq, angul­lu taan­na takusin­naalersil­lugu oqalus­sin­naalersil­lugulu anersaapilum­mit aniguisim­magu inup­pas­suit tupigusuuteqaat. „Tas­saas­sanerluni taan­na Davidip kinguaava?“ oqar­put.

Inup­pas­suit il­lup Jesusip isersimaf­figisaata silataanut katersuut­tut amerlangaarmata ajoqersuk­kanilu nerisin­naan­ngil­lal­luun­niit. ’Davidimut kinguaajus­sangatitsisut’ saniatigut al­lak­kanik ilisimasut farisæeril­lu Jesusimik tusaamanerlugaalersitsiniarlutik Jerusalemimit aq­qus­sua tamaat atorlugu aggersimasut katersuut­tunut ilaap­put. Jesusip eq­qarliisa taan­na pil­lugu aalas­san­neq tusaramik­ku agger­put aal­lugu. Sooq?

Ilaatigut Jesusip qatan­ngutaasa nam­min­neq taas­suma Guutip er­niunera suli up­perilin­ngin­namik­ku. Aam­malu Nazaretimi nukap­piaraagal­laramik taama perul­lulior­titsigajutsigin­ngim­mat isumaqatigiin­ngisitsigajutsiginanilu. Taamaat­tumik Jesus eq­qarsar­taatsimigut ajulaalersimasoraat. „Im­minik sianigun­naar­poq,“ oqar­put, pin­ngitsaalil­lugulu qimagun­niarsaraat.

Tamanil­li ilisimaneqar­tutut Jesusip angut anersaapilulik ajorun­naarsip­paa. Al­lak­kanik ilisimasut farisæeril­lu nalun­ngilaat taman­na nas­suiarsin­naanagu. Jesus tusaamanerlugaalersin­niarlugu taamaat­tumik inun­nut oqar­put: „Anersaapiluit anisit­tar­pai, anersaapiluit naalagaat ikior­tigalugu.“

Eq­qarsaataal­li nalun­ngin­namigit al­lak­kanik ilisimasut farisæeril­lu Jesusip qaaq­quai oqarlunilu: „Naalagaaf­fiup suul­luun­niit inui iligiik­kun­naarunik nungun­ngis­san­ngil­lat; nunaqatigiil­luun­niit il­loqatigiil­luun­niit iligiik­kun­naarunik atas­san­ngil­lat. Satanil­li Satan anisik­kuniuk im­minik iligiun­naas­saaq; qanormi taava naalagaaf­fia atas­sava?“

Eq­qarsaatip tun­ngaveqarluas­susia! Farisæerit ilatik aam­ma anersaapilun­nik anisitsisimanerarmatigik Jesusip aperai: „Uanga anersaapiluit Beelzebul ikior­tigalugu anisik­kuk­kit, kinamitaava ikior­tigalugu malitsis­si anisit­tar­paat?“ Taamaat­tumik Jesusimut pasil­liutaat taak­kunun­nga pasil­liutaal­luarsin­naap­put. Taava mianersoq­quai: „Anersaapiluil­li Guutip Anersaa ikior­tigalugu anisik­kuk­kit, taava Guutip Naalagaaf­fiata tikis­simas­savaasi.“

Anersaapilun­nik anisitsinis­samut pis­saaneqar­nera Satanimut­taaq pis­saaneqar­neranut up­per­narsaataavoq. „Qanoq ilil­luni inuk Nakuarsuup il­luanut isersin­naava pequtaanik piiaaf­figalugu, kisian­ni aatsaat nakuarsuaq qilersoq­qaaruniuk? Taamaalioreeruni taava il­lua piiaaf­figisin­naavaa. Iligin­ngisama nungul­lutik akerar­toraraan­nga, katersueqatigin­ngisak­kalu nungul­lutik [siam­mar­taraat].“ Farisæerit Jesusimut akerar­tor­tuunerat ersarip­poq — taamaalil­lunilu erser­poq Satanimut kif­far­tor­tuusut. Taak­kua Israelik­kut Jesusimit qimaatin­nerisigut siam­mar­tip­paat.

Taamaat­tumik as­sor­tuisut diaavulor­palut­tut Jesusip mianersoq­quai ’Anersaamut mital­liinerit isumak­keerfigineqas­san­ngitsut’. Itisiler­paa: „Inuul­lu Er­neranut as­sor­tuil­luni oqalut­toq isumak­keerfigineqas­saaq; Anersaamul­li il­ler­nar­tumut as­sor­tuil­luni oqalut­toq silami matumaniluun­niit aap­paaniluun­niit isumak­keerfigineqas­san­ngilaq.“ Al­lak­kanik ilisimasut farisæeril­lu Guutip anersaavata il­ler­nar­tup tupin­nar­tulior­nik­kut sun­niutaanik ersaris­sunik ajus­sutsimik­kut Satanimut suliaaneraanermik­kut isumak­keerfigineqarsin­naan­ngitsumik ajor­tuliorsimap­put. Mattæus 12:22-32; Markus 3:19-30; Johannes 7:5.

▪ Jesusip Galilæami angalanerata aap­paa siul­lermit qanoq al­laanerua?

▪ Sooq Jesusip eq­qarliisa qimagun­niarsarigaluar­paat?

▪ Jesusip tupin­nar­tuliai farisæerit qanoq ilil­lutik qular­narsisin­niarsarigaluar­paat, Jesusil­lu qanoq akivai?

▪ Farisæerit taak­ku qanoq ajor­tulior­pat, sooq?