Kapitali 116

Jesusip qimagun­nissaanut apustilit piareersar­neqarput

EQ­QAANIAAL­LUNI nal­liut­torsior­neq maan­na naam­mas­sivoq, sulili Jesus apustiliilu qaliani inimiip­put. Naak er­niin­naq qimat­tus­saagaluarlugit Jesus suli oqaasis­saqaqaaq. „Uum­matisi an­nilaan­ngik­kilit!“ tup­pal­lersaavoq. „Guutimut up­peritsi.“ Oqaatsinili ilavai: „Uan­nul­lu up­peritsi.“

„Ataatama il­luani inis­sat amerlaqaat,“ Jesus nangip­poq. „Inis­sioriar­tor­pas­si . . . najuk­kan­neeq­qul­lusi. Or­nigas­saralu nalun­ngilarsi.“ Apustilit paasin­ngilaat Jesusip qilak eq­qar­toraa, taamaat­tumik Thomas aperaaq: „Naalagaq! or­nigas­sat naluar­put, qanormi taava aq­qut ilisimas­savar­put?“

„Uanga aq­qutaavunga sal­lusuis­sutaal­lungalu inuus­sutaal­lungalu,“ Jesus akivoq. Aap, aatsaat Jesus akueralugulu maligas­siaa malik­kaan­ni Ataatap qilam­mi il­luanut iser­toqarsin­naavoq, Jesusimi oqar­poq: „Al­lak­kut Ataatamut pisoqarsin­naan­ngilaq, uak­kut kisian­ni.“

„Naalagaq! Ataataq takular­put,“ Filip qinuvoq, „naam­magis­savar­put taava.“ Qular­nan­ngitsumik Filipip kis­saatigaa Guutip tak­kuanik Jesusip takusaqar­tis­sagaatik, soorlu itsaq Moses, Elias Esajasilu takusaqar­tin­neqarsimasut. Apustilil­li takusanit tamak­kunan­nga an­nerungaar­tumik pigisaqar­put, soorlumi Jesus oqar­toq: „Ima sivisutigisumik najoris­si suli ilisarin­ngilinga, Filip­piaa? Uan­nik takun­nit­tup Ataataq takuaa.“

Jesusip Ataatami pis­susia as­sigingaarmagu Jesus ilagigaan­ni qimerlooraan­nilu soorlumi tas­sa Ataataq takul­lugu. Jesusil­li miserratigin­ngilaa Ataataq Er­nermit an­nerum­mat: „Oqaatsit ilis­sin­nut oqaaserisak­ka isuman­nik oqaaserin­ngilak­ka.“ Naleq­qul­luar­tumik iliorluni Jesusip ajoqersuisin­naas­sutsiminut Ataatani qilam­miusoq pis­sutaanerar­paa.

Jesusip maan­na oqaatigisaa apustilit kajumis­sis­sutigisimas­saqaat: „Suliat suliarisak­ka uan­nut up­per­tut­taaq suliariumaar­pai; tamak­kunan­nga suli an­nerungaar­tut suliariumaar­pai.“ Jesus oqan­ngilaq ajoqersuk­kani tupin­nar­tuliorsin­naas­sutsimik nam­mineq pigisaminit an­nerusumik piumaar­tut. Pif­fis­samili sivisunerungaar­tumi, sumiif­fin­nilu amerlanerungaar­tuni, inun­nul­lu amerlanerungaar­tunut oqaluus­siumaar­nis­saat pivaa.

Jesusip qimagun­nermi kingor­na ajoqersuk­kani sumigin­nar­navian­ngilai. „Suna nalingin­naq atik­kut qin­nutigigus­siuk,“ neriorsuivoq, „taamaaliorumaar­punga.“ Taava oqar­poq: „Ataatarlu qin­nuigiumaar­para, taas­sumalu tunis­savaasi [ikiuisumik, NV] al­lamik, naas­saan­ngitsumik ilis­sin­niit­tuaq­qul­lugu.“ Kingusin­nerusuk­kut, qilaliareerluni, anersaaq il­ler­nar­toq, ikiuisoq al­la, Jesusip ajoqersuk­kaminut kuivaa.

Jesusip qimagun­nis­saa qanil­livoq. Taamaat­tumik oqar­poq: „[Er­niin­naq, NV] silamiut takus­saas­savaan­nga.“ Jesus anersaan­ngus­saaq inuit takusin­naan­ngisaat. Apustilinili aalajaatsut neriorsoq­qip­pai: „Ilis­sili takujumaar­pas­singa; uangami inuugama ilis­sis­saaq inuus­saasi.“ Aap, Jesus makititaanermi kingor­na inut­tut timilerluni apustiliminut takutiin­nas­san­ngilaq, aam­mat­taarli pif­fis­saq nal­ler­pat qilam­mi nam­mineq ilagaluni inuunermut makitik­kumaar­pai.

Maan­na Jesusip najoq­qutas­saq paasiuminar­toq saq­qum­miup­paa: „Inas­sutin­nik pigin­nit­toq maleruarlugil­lu tas­saavoq uan­nik asan­nit­toq; uan­nil­lu asan­nit­toq Ataatap asajumaar­paa, uangalu asajumaar­para saq­qum­merfigalugulu.“

Apustili Judasip, Taddæusimit­taaq taaneqar­tar­tup, kipitip­paa: „Naalagaq! Suna pis­sutigalugu uatsin­nut saq­qum­merumavit silamiunul­lu pin­natit?“

„Uan­nik asan­nit­tup,“ Jesus akivoq, „oqaatsik­ka maleruas­savai, Ataatamalu asas­savaa . . . Uan­nik asan­ngin­ngitsup oqaatsik­ka maleruar­tarin­ngilai.“ Kristusip ajoqersugaasa naalat­tut ilior­neran­nut akerliusumik, taas­suma ajoqersuinera silamiut sumigin­nar­paat. Taamaat­tumik taak­ku saq­qum­merfiginavian­ngilai.

Jesusip nunami kif­far­tor­nermini apustilini sor­pas­suar­nik ajoqersorsimavai. Pif­fis­sal­li taamaalereer­nerani al­laat Jesusip oqaasii taama paasiuminaatsitsigalugit, qanoq ilil­lutik tamak­ku tamaasa eq­qaamasin­naas­savaat? Qujanar­tumik Jesusip neriorsor­pai: „[Ikiuisup, NV] anersaap il­ler­nar­tup, Ataatap atik­kut aal­lar­titas­saata, [tamatuma, NV] tamanik ajoqersus­savaasi, eq­qaasik­kumaar­paasilu oqaaserisan­nik tamanik.“

Jesus tup­pal­lersaaq­qip­poq: „Eq­qis­sis­sum­mik qimatsivigaas­si. . . . Uum­matisi an­nilaan­ngik­kilit.“ Aap, Jesusip qimagun­nis­saa qanil­livoq, nas­suiaavorli: „Asagus­singa tipaatsoq­qajaqaasi Ataatamut pis­sagama; Ataatarmi uan­nit an­neruvoq.“

Jesusip taak­kunin­nga najuiun­naar­nis­saa qaneqaaq. „Kingor­na amerlasuunik oqaluf­figis­san­ngilas­si,“ oqar­poq, „silap matuma naalagaa aggilermat soqaranilu uan­ni [tigusinanilu uan­nik, NV].“ Satan Diaavulu, Judasimut pulasimasoq taamaalil­lunilu taas­sumin­nga tigusisimasoq, silap matuma naalagaraa. Jesusili ajor­tilip­palut­tunik, Guutimut kif­far­torun­naarsin­niarlugu Satanip ator­nerlus­sin­naasaanik, san­ngiis­suteqan­ngilaq.

Jesusip apustilinut qanimut attaveqarnera

Eq­qaaniaal­luni nereqatigiin­nerup kingor­na Jesusip apustilini persuarsiun­ngitsumik tatigin­nit­tumil­lu oqaloqatigalugit qiim­mas­sarsimavai. Maan­nak­kut im­maqa un­nuap-qeq­qa qaanger­paa. Taamaat­tumik Jesus oqar­poq: „Nikuil­lusi tas­san­nga aal­lar­ta!“ Anin­ngin­nermin­nili apustiliminut asan­nin­nerminit kil­lin­neqarluni Jesus kajumis­sinar­tumik as­sersuusior­poq.

„Uangaana viin­nequt piviusoq, Ataatagalu viin­nequtilerisuuvoq,“ aal­lar­tip­poq. Viin­nequtilerisorsuup, Jehova Guutip, or­pik viin­nequt as­sersuutaasoq taman­na ik­kup­paa ukiumi 29-mi Jesus kuisin­nerani anersaamik il­ler­nar­tumik tanik­kamiuk. Jesus nangip­poq ersersil­lugu viin­nequt im­minuin­naan­ngitsoq as­sersuutaasoq; oqar­poq: „Avalequtit uan­niit­tut inerititaqan­ngitsut nungul­lugit peerarai, inerititaqar­tul­lu tamaasa naanerlut­tuiararai amerlaner­nik inerititaqaq­qul­lugit. . . . Soorlu avalequt im­minit inerititaqarsin­naan­ngitsoq viin­nequm­miit­tuan­ngik­kuni, taamat­taaq ilis­si sapis­saasi uan­niit­tuan­ngik­kus­si. Uangaana viin­nequt, ilis­si avalequtaavusi.“

Piinsip ul­luani, ul­lut 51-it qaangiut­tut, apustilit al­lal­lu anersaamik il­ler­nar­tumik kuineqaramik viin­nequm­mut tamatumun­nga avalequtin­ngor­tin­neqar­put. Pif­fis­sap ingerlanerani 144.000-it viin­nequm­mut as­sersuutaasumut tamatumun­nga avalequtin­ngus­sap­put. Taak­kua or­piul­lu kanaar­taa, Jesus Kristus, tas­saap­put viin­nequt as­sersuutaasoq Guutip naalagaaf­fiata inerititaanik inerititaqar­toq.

Inerititaqas­sagaan­ni suna pisariaqar­toq Jesusip nas­suiar­paa: „Uan­niit­tuar­toq uangalu taas­sumaniit­tuaruma inerititaqangaas­saaq; uangami ilaginanga saperluin­nar­pusi.“ Inuk inerititaqan­ngik­kuni, Jesus oqar­poq, ’avalequtitut igitaas­saaq toqul­lunilu; taamaat­tul­lu katersoraraat in­nermul­lu qisugalugit ikik­karlugil­lu’. Aam­mali Jesus ima neriorsuivoq: „Uan­niit­tuarus­si oqaatsik­kalu ilis­sin­niit­tuar­pata taava sumik piumasas­sin­nik qinugus­si taama pineqas­saasi.“

Jesus nangil­luni apustiliminut oqar­poq: „Inerititaqangaarus­si Ataataga naalan­narsis­saaq [paasinarsis­saarlu uanga ajoqersugarigis­si, NV].“ Guutip avalequtinut inerititareq­qusaa tas­saavoq Kristusip pis­susiinut as­singusunik pis­suseqar­nis­saat, ingam­mik asan­nin­nermik. Kristusilu Guutip naalagaaf­fianik oqaluutigin­nit­tuusimam­mat, inerititap ilagis­savaat­taaq taas­suma iliorsimaneratut ajoqersugan­ngor­titsior­tor­neq.

„Asan­nis­sutsin­niit­tuaritsi,“ Jesus kajumis­saarivoq. Qanoq ilil­lutik apustilii taamaaliorsin­naap­pat? „Inas­sutik­ka maleruarus­sigik,“ oqar­poq, „asan­nis­sutsin­niit­tuas­saasi.“ Nangip­poq: „Inas­sutiga tas­sa asaqatigiis­sasusi, soorlu uanga asagis­si. Asan­nin­neq tamanit an­neq tas­sa ikin­ngutini pil­lugit inuunini iperaraan­ni.“

Nalunaaqut­tap-akun­nialun­ngui qaangiup­pata Jesusip nam­mineq asan­nin­neq taamaat­toq as­seqan­ngitsoq ersersis­savaa apustilini inuil­lu al­lat im­minut up­perumasut pil­lugit inuunini pil­liutigiguniuk. Ajoqersugai im­min­nut pil­liutigeriaan­naal­lutik taamatut asan­nin­nis­samin­nut taas­suma maligas­siaanit kil­lin­neqar­tariaqar­put. Asan­nin­neq taama it­toq ilisar­naatigis­savaat, soorlumi Jesus siusin­nerusuk­kut oqar­toq: „Matuman­nga tamarmik ilisaris­savaasi ajoqersugarigis­si: asaqatigiik­kus­si.“

Kik­kut ikin­ngutigigini Jesusip ersersip­paa ima oqarluni: „Inas­sutik­ka malik­kus­sigik ikin­ngutigis­savas­si. Kif­fanik taas­saar­pas­si, kif­fap naalak­kami suliai nalum­magit; kisian­ni ikin­ngutin­nik taavas­si, Ataatan­nit tusak­kan­nik tamanik nalunaarfigigas­si.“

Eq­qarsaatigeriaruk: Jesusimut qanimut ikin­ngutaasin­naavugut! Ikin­ngutigiin­nerli taman­na atajuas­sap­pat ajoqersugai ’inerititaqar­tuar­tariaqar­put’. Taamaalior­pata, Jesus oqar­poq, ’Ataatap tunis­savai sumil­luun­niit Jesusip aq­qagut qin­nuigip­pan­ni’. Taman­na Naalagaaf­fiup inerititaanik inerititaqar­nermut akis­sarsiaavoq an­ner­tooq! Ajoqersuk­kani ’asaqatigiin­nis­saan­nik’ kajumis­saaq­qereerlugit Jesusip nas­suiaal­luni oqaatigaa silamiunit uumis­sor­neqas­sasut. Imali tup­pal­lersaavoq: „Silamiut uumis­sor­pasi taava ilisimas­saasi ilis­sin­nit uumis­soq­qaaraan­nga.“ Taava sooq silamiut ajoqersuk­kaminik uumis­suinersut Jesusip ersersip­paa oqarluni: „Ilagin­ngin­namisi, uangali silamiunit qineras­si, taamaat­tumik silamiut uumis­sor­paasi.“

Silamiut uumis­suineran­nut pis­sutaasoq nas­suiar­nerujumal­lugu, Jesus nangil­luni oqar­poq: „Tamak­kunin­nga tamanik piumaar­paasi atera pil­lugu, aal­lar­titsiga [Jehova Guuti] ilisarin­ngin­namik­ku.“ Eq­qor­tumik oqaatigis­sagaan­ni Jesusip tupin­nar­tuliai taas­sumin­nga uumis­suisunik eq­qar­tuus­sisuup­put, oqar­pormi: „Suliat al­lap suliarin­ngisaan­nagai akor­nan­ni suliarisiman­ngik­kuk­kit ajor­tuliaqan­ngeq­qajaqaat; maan­nali takusimagaluarlugit taamaat­toq uangalu Ataatagalu uumis­sor­paatigut.“ Soorlu Jesus oqar­toq taamaalil­luni al­las­simaf­fik eq­quup­poq: „Pin­ngik­kitsik uumis­sor­paan­nga.“

Siusin­nerusuk­kut iliorsimanermisut ajoqersuk­kani tup­pal­lersaq­qip­pai neriorsorlugit ikior­timik, anersaamik il­ler­nar­tumik, Guutip pis­saanersuanik sulisumik, aal­lar­titsivigiumaarlugit. „Taas­suma nalunaajaas­sutigis­savaanga. Aam­mat­taaq ilis­si nalunaajaajumaar­pusi.“

Naggammik oqaassutit suli allat

Jesus apustiliilu qaliani inimit anisus­san­ngor­put. „Tamak­kunin­nga oqaluf­figaas­si mamiatsaq­qunasi,“ Jesus nangip­poq. Taava ilungersor­nar­tumik siulit­tuivoq: „Naalagiar­tarfim­min­nit peersik­kumaar­paasi; mas­samilu ul­lut nal­liuk­kumaar­put, taava ilis­sin­nik toqutsisut taamaalior­nermin­nik Guuti kif­far­torfigisoris­savaat.“

Oqaatsit tamak­ku malun­nar­tumik apustilit er­numatsaatigaat. Jesus sior­natigut oqareersimavoq silamiunit uumis­sor­neqas­sasut, imali toq­qaan­nar­tigisumik oqarsiman­ngisaan­nar­poq al­laat toqun­neqarumaar­tut. „Pileq­qaar­neranil­li tamatumin­nga oqaluf­figin­ngilas­si,“ Jesus nas­suiaavoq, „najoras­si.“ Ila pitsaas­susia qiman­ngin­neran­ni tamatumun­nga piareersimatin­niarmagit!

„Maan­nali,“ Jesus nangip­poq, „aal­lar­titsisin­nut aal­laler­punga, arlas­sin­nil­lu ima aperineqan­ngilanga: ’Sumun­nas­savit?’“ Un­nuup ingerlanerani siusin­nerusuk­kut apustilit Jesus aperisimavaat sumun­nas­sanersoq, maan­nali oqaasii uis­suum­mis­sutigingaaramik­kik apersorun­naar­paal­luun­niit. Soorlu Jesus oqar­toq: „Tamak­kunin­nga oqaluf­figigas­si uum­matisi aliasungaaler­put.“ Apustilit aliasuutigisaat tas­saagin­nan­ngilaq peq­qar­niitsumik malersor­neqar­nis­samin­nik tusar­ner­tik, aam­mat­taarli Naalak­kamik qimagun­nis­saa aliasuutigaat.

Jesus nas­suiaavoq: „Iluanaas­saasi aal­las­sagama. Aal­lan­ngik­kumami [ikior­tip] or­nis­san­ngilaasi; aal­larumali ilis­sin­nut aal­lar­tik­kumaar­para.“ Jesus inut­tut ataatsik­kut sumiif­fin­ni arlalin­niis­sin­naan­ngilaq, qilam­miilerunili ikior­ti, Guutip anersaava il­ler­nar­toq, ajoqersuk­kaminut nunarsuarmi sumiik­kaluar­tunul­luun­niit aal­lar­tis­sin­naas­savaa. Taamatut Jesusip qimagun­nera iluaqutaas­saaq.

Jesus oqar­poq anersaap il­ler­nar­tup ’silamiut ajor­timik iluar­nermil­lu eq­qar­tuus­sinermil­lu nalujun­naarsis­sagai’. Silamiut ajor­tuliaat, Guutip er­neranut up­peruman­ngin­nerat, qulaar­neqas­saaq. Aam­malu Jesus Ataataminukar­pat naaper­tuil­luar­tuuneranut up­per­nar­tunik takus­sutis­saqar­titsisoqas­saaq. Satanil­lu silarsuaatalu ajor­tup Jesusip as­suar­naas­susianik aserueriaraluar­nermin­ni iluatsitsin­ngitsoor­nerat silap matuma naalagaata iluarisaan­ngitsutut eq­qar­tuun­neqarsimaneranut takus­sutis­saavoq up­per­nar­toq.

„Ilis­sin­nut suli oqaasis­saqangaaraluar­punga,“ Jesus nangip­poq, „maan­nali ar­toral­lar­pasi.“ Taamaat­tumik nerisorsuivoq anersaamik il­ler­nar­tumik, Guutip nukianik sulisumik, kuigunigit paasin­nis­sin­naas­susiat naaper­torlugu tamak­kunun­nga tun­ngasunik paasin­nik­kiar­tuaar­nis­saan­nik anersaap il­ler­nar­tup ikiorumaarai.

Ingam­mik Jesusip toqunis­saa makin­nermilu kingor­na im­min­nut takutit­tar­nis­saa apustilit paasiuminaatsip­paat. Apereqat­taap­put: „Suna piner­paa oqarami: ’[Er­niin­naq] takus­saas­savas­singa, aam­malu [er­niin­naq] takoq­qik­kumaar­pas­singa,’ imalu oqarami: ’Ataatamut aal­las­sagama?’“

Jesusip nalun­ngilaa apustilimi aperis­sagaan­ni, taamaat­tumik nas­suiaavoq: „Ilumut, ilumut oqarfigaas­si: Ilis­si qial­lusilu nimaarumaar­pusi, silamiul­li tipaatsus­sap­put; ilis­si aliasuk­kumaar­pusi, aliasun­nersili tipaatsun­nin­ngus­saaq.“ Ul­lormi tamatumani kingusin­nerusuk­kut, ualik­kut Jesus toqun­neqar­pat, up­perisarsior­nik­kut pisor­tat nuan­naas­sap­put, ajoqersuk­kal­lu aliasus­sal­lutik. Jesusili makititaap­pat ajoqersuk­kat aliasun­nerat nuan­naar­nin­ngus­saaq! Nuan­naar­neral­lu ataavas­saaq Piinsip ul­luani Guutip anersaavanik il­ler­nar­tumik kuil­lutik nalunaajaasus­samisut nukis­samin­nik tunip­patik!

Pis­sutsit apustilimi atugaat ar­nap nal­lisitsineranut as­sersuup­pai, oqarluni: „Ar­naq er­nisuleraangami aliasut­tar­poq er­nivis­si nal­lium­mat.“ Aam­mali tik­kuar­paa meeraq er­niuniariar­toq ar­nap an­nikil­lior­nini puior­tarai, oqaatsinil­lu ukunin­nga apustilini qiim­mas­sar­pai: „Ilis­sis­saaq maan­na aliasuk­kaluar­pusi; takoq­qik­kumaar­pas­sili [makititaaguma], uum­matisili tipaatsus­sap­put, tipaatsus­sutsis­sin­nil­lu arsaar­neqas­san­ngilasi.“

Man­na tikil­lugu ajoqersuk­kat Jesusip aq­qani qinusarsiman­ngil­lat. Maan­nali Jesus oqar­poq: „Sumik Ataataq qin­nuigigus­siuk atik­kut tuniumaar­paasi. . . . Ataatam­mi nam­mineq asavaasi, asagas­singa up­peralungalu Guutimit pisunga. Ataatamit anil­lunga silarsuarmut pigama, kingumut silarsuaq qimal­lugu Ataatamut aal­larumaar­punga.“

Jesusip oqaasii apustilinut qiim­mas­saataaqaat. „Taamaat­tumik up­peraatsigit Guutimit pisutit,“ oqar­put. „Maan­na up­per­pusi!“ Jesus oqar­poq. „Ata, ul­lut nal­liuk­kumaar­put, maan­nak­kum­mi nal­lius­simap­put, taava nungul­lusi nam­minis­sin­nut siam­marumaar­pusi uangalu kiser­ngorul­lunga.“ Qanorluun­niit eq­qumiip­palutsigigaluar­pat, un­nuaq naatin­nagu taman­na pis­saaq!

„Tamak­kunin­nga oqaluf­figaas­si uak­kut eq­qis­seq­qul­lusi.“ Naggataagul­lu Jesus oqar­poq: „Silarsuarmi naal­lius­saasi. Tup­pal­leritsi[li], silarsuarmut ajugaagama.“ Naak Satanip silarsuaatalu as­suar­naas­sutsini aseror­niarsarigaluaraat, aalajaal­luni Guutip piumasaanik naam­mas­sin­nit­tuar­nermigut Jesusip silarsuaq ajugaaf­figisimavaa.

Qaliani inimi naggammik qinuneq

Apustilini asangaarlugit qimagun­nis­saminut Jesusip piareersimatin­niarsimavai. Maan­na oqaaq­qis­saarlugil­lu tup­pal­lersareeramigit isini qilam­mut aarlor­tip­pai Ataataminul­lu qinul­luni: „Er­nerit naalan­narsisiguk, il­lit­taaq Er­ner­nut naalan­narsiseq­qul­lutit. Uinilin­nut tamanut pigin­naas­susermik tunivat im­minut tun­nius­satit tamaasa inuunermik naas­saan­ngitsumik tuneq­qul­lugit.“

Eq­qarsaat kusangaarami — inuuneq naas­saan­ngitsoq! Jesus „uinilin­nut tamanut pigin­naas­susermik“ pisimagami, saam­maan­neqaatis­satut pil­liutimi nalinga inuian­nut toqujar­tor­tunut tamanut iluaqutis­satut atorsin­naavaa. Ataatamil­li iluarisaasut kisiisa „inuunermik naas­saan­ngitsumik“ tunis­savai. Jesusip qin­num­mini taman­na erseq­qin­nerusumik nas­suiar­paa:

„Tas­saavoq inuuneq naas­saan­ngitsoq: il­lit ilisaralutit kisivit ilumut Guutiusutit, aal­lar­tital­lu Jesus Kristus ilisaralugu.“ Aap, Guuti taas­sumalu er­nera ilisarilerutsigik aatsaat an­nas­sin­naavugut. Ilisimasaqar­nerin­narli naam­man­ngilaq.

Pisariaqar­poq Guuti Jesusilu ilisarisimal­lualis­sal­lugit, paasin­nin­nermil­lu tun­ngaveqar­tumik taak­kunun­nga ikin­ngutaalis­sal­luni. Taak­kua pis­sutsinut isigin­nit­taasiat­tut isigin­nit­taaseqaler­niar­nis­saq pisariaqar­poq. Tamanil­lu pingaar­nerutil­lugu, al­lanut pis­susilersuutigisar­tagaan­nut as­seqan­ngitsunut as­singusunik pis­suseqaler­niar­nis­saq pisariaqar­poq.

Taava Jesus qinuvoq: „Nunami naalan­narsisip­pak­kit; suliaq uan­nut suliareq­qusat naam­mas­sivara.“ Taman­na tikil­lugu Jesusip sulias­sani naam­mas­sisimagamiuk, nalun­ngin­namiul­lu aam­mat­taaq siunis­sami taamaaliorumaarluni, ima qinuvoq: „Maan­nalu, Ataataq! Ilin­ni naalan­narsisin­nga naalan­nas­sutsin­nik silarsuaqan­ngik­kal­larmat ilin­ni pigisan­nik.“ Aap, qilam­mi naalan­nas­sutsimi sior­natigut pigisimasami makititaanermigut pigileq­qin­nis­saa qin­nutigaa.

Taava Jesusip nunami sulias­sami pingaar­nersaat ataatsimut oqaatigaa: „Inuit uan­nut tun­nius­satit silamiunit qinik­katit ater­nik nalujun­naarsip­pak­ka; il­lit pigigaluarak­kit uan­nut tun­niup­patit, taak­kualu oqaatsisit aalajangiup­paat.“ Jesusip nunami kif­far­tor­nermini Guutip aq­qa, Jehova, ator­paa eq­qor­tumil­lu taasarlugu, taamaalior­nermiguin­naan­ngitsorli apustiliminut Guutip aq­qanik nalujun­naarsitsiniaavoq. Aam­mat­taaq Jehovamut tun­ngasunik, pis­susiinik siuner­taanil­lu, an­nerusumik ilisimasaqalersip­pai.

Jehovap im­minit an­nerunera Jesusip maniguul­luni nas­suerutigaa: „Oqaatsit uan­nut tun­nius­satit taak­kunun­nga tun­niup­pak­ka, taak­kualu pigiler­paat ilumut ilisaralunga ilin­nit pisunga up­peralungalu il­lit aal­lar­tik­kim­ma.“

Jesusip ajoqersuk­kani inuiaal­lu sin­neri im­mik­koor­tip­pai Ataataminut ima oqarluni: „Silarsuaq qin­nutin­ngilara, taak­kuli uan­nut tun­nius­satit qin­nup­pak­ka, . . . Najoral­larak­kit uan­nut tun­nius­satit ater­nut aalajangersip­pak­ka paaralugil­lu, tam­mar­toqan­ngil­lal­lu, tam­mar­nerup er­nera taan­na kisimi tam­mar­poq,“ tas­sa Judas Iskariot. Taamaalinerani Judasip Jesus kil­luutigiar­tor­paa, taamaalil­lunilu, ilisiman­ngik­kaluarlugu, Al­lak­kani siulit­tuutinik eq­quutitseqataal­luni.

„Silarsuup inuisa uumis­sor­paat,“ Jesus qin­num­mini nangil­luni oqar­poq. „Qin­nutin­ngilak­ka silarsuarmit peerseq­qul­lugit, kisian­ni ajor­tumut ser­nigeq­qul­lugit. Silarsuup inuisa ilagin­ngilaat, soorlu uangat­taaq silarsuup inuisa ilagin­ngik­kaan­nga.“ Jesusip ajoqersugai silarsuarmiip­put, tas­sa inuiaqatigiin­ni aaq­qis­suus­saasuni Satanimit naalagaaf­figineqar­tuni, tamatigul­li silarsuarmit tamatumalu ajus­susianit avin­ngarusimasariaqar­put.

„Sal­lusuis­sutsik­kut iluarsak­kit,“ Jesus nangip­poq, „oqaatsisit sal­lusuis­sutaap­put.“ Al­lak­kat Epriiarisuut isumas­sarsiarititaasut, is­suaaf­figeqat­taar­tak­kani, Jesusip tas­sani taavai „sal­lusuis­sut“-mik. Aam­mat­taarli ajoqersuk­kaminut ajoqersuutigisimasani taak­kualu kingor­na isumas­sarsisitaal­lutik al­lataat, Al­lak­kat Grækerisuut, „sal­lusuis­sutaap­put“. Sal­lusuis­sutip tamatuma inuit iluar­tun­ngor­tis­sin­naavai, inuunerat al­lan­ngorluin­nar­til­lugu silamiunil­lu avis­saar­til­lugit.

Jesusip ’taak­kuin­naan­ngitsut qin­nup­pai, oqaasiisigul­li im­minut up­perumaar­tut ilan­ngul­lugit qin­nup­pai’. Tas­sa im­minut ajoqersugan­ngorumaar­tut tanitat aam­malu siunis­sami ajoqersugan­ngorumaar­tus­sat ’savanut al­lanut’ katersor­neqarumaar­tus­sat Jesusip qin­nup­pai. Taak­ku tamaasa sumik qin­nup­pai?

„Tamaasa ataasioq­qul­lugit, soorlu il­lit, Ataataq, uan­niit­tutit uangalu ilin­niil­lunga, . . . ataasioq­qul­lugit soorlu uagut ataasiusugut.“ Jesus Ataatanilu kinaas­susil­lit marluup­put, tamatigul­li isumaqatigiit­tuup­put. Ajoqersuk­kami akor­nan­ni taamator­piaq ataasius­suseqar­toqar­nis­saa Jesusip qin­nutigaa, „silamiut nalujun­naaq­qul­lugit aal­lar­tik­kim­ma taak­kulu asagitit, soorlu uanga asagim­ma.“

Siunis­sami im­minut ajoqersugan­ngorumaar­tus­sat tanitat sin­nerlugit Jesusip Ataatani qilam­miusoq maan­na qin­nuigaa: „Uan­neeq­quak­ka najuk­kan­ni, uan­nut naalan­nas­suserititat taak­kunun­nga takoq­qul­lugu, silarsuaq tun­ngaviler­neqan­ngik­kal­larmat asagam­ma,“ tas­sa Adam Evalu kinguaas­siulin­ngik­kal­larmata. Taman­na sioq­quterujus­suarluguli Guutip er­nituani, kingor­na Jesus Kristusin­ngor­toq, asasimavaa.

Qin­num­minut naggasiutitut Jesusip man­na erseq­qis­saq­qip­paa: „Aq­qit taak­kunun­nga nalunaar­para nalunaaq­qik­kumaarlugulu, uan­nut asan­nis­sutsit taak­kunaneeq­qul­lugu, uangalu taak­kunaneeq­qul­lunga.“ Apustilit Guutip aq­qa ilisarilersimavaat ilaatigut nam­min­neq Guutip asan­nin­neranik misigisaqar­nermik­kut. Johannes 14:1–17:26; 13:27, 35, 36; 10:16; Lukas 22:3, 4; 2 Mosesimik allakkat 24:10; 1 Kunnginik allakkat 19:9-13; Jesaja 6:1-5; Galâsiamiut 6:16; Tussiaat 35:19; 69:4; Ussatit 8:22, 30.

▪ Jesus sumun­nas­sava, tas­sungalu aq­qut pil­lugu Thomas qanoq akineqar­pa?

▪ Jesusip qanoq ilior­nis­saa qular­nan­ngitsumik Filipip kis­saatigaa?

▪ Sooq Jesusimik takun­nit­tup aam­mat­taaq Ataataq takuvaa?

▪ Qanoq ilil­lutik Jesusip ajoqersugai taas­suma naam­mas­sisimasaanit an­nerusumik naam­mas­sisaqas­sap­pat?

▪ Qanoq ilil­luni Satan Jesusimi soqan­ngila?

▪ Viin­nequt as­sersuutaasoq Jehovap qanga ik­kup­paa? Qaqugu qanorlu ilil­lutik al­lat tamatumun­nga ilaasin­naas­sap­pat?

▪ Viin­nequt taman­na naggataatigut qanoq amerlatigisunik avalequteqalis­sava?

▪ Avalequtit sunik inerititaqar­nis­saat Guutip kis­saatigaa?

▪ Qanoq ilil­luta Jesusimut ikin­ngutaalersin­naavugut?

▪ Sooq Jesusip ajoqersugai silamiunit uumis­sor­neqar­pat?

▪ Siulit­tuut suna apustilit er­numatsaatigaat?

▪ Sooq apustilit aperin­ngil­lat Jesus sumun­nas­sanersoq?

▪ Ingam­mik suna apustilit paasiuminaatsip­paat?

▪ Suna as­sersuutigalugu Jesusip oqalut­tuaraa apustilit aliasun­nerat tipaatsun­nin­ngorumaar­toq?

▪ Jesusip apustilit er­niin­naq qanoq ilius­sanerar­pai?

▪ Qanoq ilil­luni Jesusip silarsuaq ajugaaf­figaa?

▪ Jesusip ’uinilin­nut tamanut pigin­naas­suseqar­titaanera’ qanoq paasisariaqar­pa?

▪ Guutimik er­neranil­lu ilisarin­nin­neq sumik ilaqar­pa?

▪ Guutip aq­qa Jesusip sutigut al­lanut nalujun­naarsit­tar­paa?

▪ „Sal­lusuis­sut“ suua, qanorlu ilil­luni kristumiumik ’iluarsisitsisin­naava’?

▪ Guuti, er­nera pal­lorfigin­nit­tul­lu ilumoor­tut tamarmik qanoq ilil­lutik ataasiup­pat?

▪ „Silarsuup tun­ngaviler­neqar­nera“ qanga piva?