Kapitali 98

Jesusip toqunissaa qanilliartortillugu ajoqersukkat oqallipput

JESUS ajoqersugaalu Jordanip eq­qaaniip­put, Peræamit Judæamukarlutik kuus­suaq ikaas­sagamik­ku. Ukiumi 33-mi poorski sapaatip-akun­nera ataasiin­naq qaangiup­pat pis­sam­mat, ingiaqater­pas­suaqar­put.

Ajoqersuk­kat Judæaliar­niarluni aalajangerluin­narsimanerminik tupaal­laatigin­neq­qaqisut sior­nan­ni Jesus ingerlavoq. Eq­qaamajuk sapaatit akun­nialun­nguanik taman­na sioq­qul­lugu, Lazarusip toqunera pis­sutigalugu Jesus Peræamit Judæaliar­nialermat, Thomasip ajoqersuk­kat al­lat oqarfigisimagai: „Uagut­taaq tas­sun­nar­ta toqoqatigiar­torlugu!“ Jesusip Lazarus makitim­magu Sanhedrinimut ilaasor­tat al­laat taas­suma toqutaanis­saanik pilersaarusiorsimap­put. Taamaat­tumik ajoqersuk­kat Judæamut pinis­samin­nut siooragamik pis­sutis­saqarluar­put.

Piumaar­tus­sanut piareersar­niarlugit, Jesusip aq­qaneq-marluk avin­ngarup­pai oqarfigalugil­lu: „Jerusalemimut majualer­pugut, Inuul­lu Er­nera palasiuner­nut al­lak­kanil­lu ilisimasunut pisitaas­saaq, taak­kualu toqutas­saatis­savaat, Guutimil­lu nalusunut pisis­savaat, mitaatigis­savaal­lu qitserarlugulu iperar­torlugulu toqul­lugulu, ul­lul­lu pingasun­ngor­pata makik­kumaar­poq.“

Maan­na qaam­matialun­nguit ingerlaneran­ni pingasoriarluni Jesusip ajoqersuk­kani toqunis­saminik makin­nis­saminil­lu oqalut­tuup­pai. Naal­li oqaasii tusaagaluarlugit, paasin­ngilaat. Im­maqa paasin­ngilaat isumaqaramik Israelik­kut naalagaaf­fiat maani nunami atulersin­neqaq­qis­sasoq, Kristusilu ilagalugu naalagaaf­fim­mi nunamiit­tumi ataq­qinaatis­sar­tik ilimagigamik­ku.

Angalasor­pas­suit ilagaat Jakobip Johan­nesil­lu anaanaat, Salome. Apustilit taak­ku ’Kal­lerup er­neri’-nik sior­natigut Jesusip taasimavai, qular­nan­ngitsumik kamajasuunerat pis­sutigalugu. Kristusip naalagaafis­saani nuimanerusumik inis­saqar­nis­sar­tik marluul­lutik anguniagaraat, anaanar­til­lu taman­na pil­lugu oqalut­tuus­simal­lugu. Maan­na taak­ku sin­nerlugit anaanaata Jesus saaf­figaa, pal­lorfigalugu ikioq­qul­lunilu.

„Sumik piumavit?“ Jesus aperaaq.

Akivoq: „Oqar­na er­nik­ka uku marluk naalagaaf­fin­ni is­siaq­qul­lugit arlaat taler­pip­pit tungaani aap­paalu saamip­pit tungaani.“

Tamatumin­nga kik­kut qin­nuteqar­titsisuusut nalun­ngin­namiuk, Jesusip Jakob Johan­nesilu oqarfigai: „Qin­nutigisarsi naluarsi. Ermutsip imaa imigas­sara imersin­naavisiuk?“

„Pisin­naavugut,“ akip­put. Naak Jesusip aatsaat ajungaar­tumik an­niar­titaanis­saminik kingor­nalu toqutaanis­saminik oqalut­tuuk­kaluaraatik, paasin­ngin­nguatsiar­paat tamak­ku pigai oqarami ’ermuseq imis­sagini’.

Taamaat­toq Jesusip oqarfigai: „Ermusigisama imaa imis­savarsimi, kisian­ni taler­pim­malu saamim­malu tungaani is­sianis­saq uanga peq­qus­sutis­sarin­ngilara, Ataatamali taamaaq­qusai taamaas­sap­put.“

Apustilit qulit al­lat paasileramik­ku Jakob Johan­nesilu sumik qin­nuteqar­tut, kamaler­put. Im­maqa taamani apustilit kik­kut an­nerunersut as­sor­tuus­sutigim­mas­suk Jakob Johan­nesilu sukataar­nersaasimap­put. Maan­na qin­nuteqar­nermik­kut ersersip­paat Jesusip tamatumun­nga atasumik un­nersuus­sinera maleruarsiman­ngik­kitsik. Ajoraluar­tumik nuimanerusumik inis­samin­nik suli kis­saateqaqaat.

Pisimasut taman­nalu pil­lugu akaareqatigiin­ngin­neq pis­sutigalugit, Jesusip aq­qaneq-marluk qaaq­quai. Asan­nil­luni un­nersuup­pai oqarluni: „Ilisimavusi inuiaqatigiit siulersor­taasa naalagaaf­figiniar­taraat, an­ner­taasalu naalak­kersor­taraat. Ilis­sin­nili taamaas­san­ngilaq; kisian­ni ilis­sin­ni angisuun­ngorumasup kif­far­tuul­lisi. Ilis­sin­nilu siul­liujumasoq ilaminut kif­faan­naagili.“

Maleruar­tariagaan­nik Jesusip maligas­siuus­simavai. Nas­suiaavoq: „Soorlumi Inuup Er­nera tikiutin­ngitsoq kif­far­torfigeq­qul­luni, kisian­ni kif­far­tus­sal­luni inuuninilu akis­satut tun­niutis­sal­lugu amerlasuut uter­tin­neqaatis­saan­nik.“ Jesus al­lat iluaqutis­saan­nik kif­far­tuus­siin­nar­nani, al­laat inuiaat tamaasa pil­lugit toqujumavoq! Ajoqersuk­kat taas­sumatut isumaqarfigin­nit­tariaqar­put. Kiffar­tuun­neqar­nis­sartik pin­nagu kiffar­tornis­sartik kis­saatiginerusariaqar­paat, nuimasumil­lu inis­sisimanis­sar­tik pin­nagu min­ner­tut in­nis­sar­tik. Mattæus 20:17-28; Markus 3:17; 9:33-37; 10:32-45; Lukas 18:31-34; Johannes 11:16.

▪ Suna pil­lugu ajoqersuk­kat sioorap­pat?

▪ Qanoq ilil­luni Jesusip ajoqersuk­kani piumaar­tus­sanut piareersar­pai?

▪ Jesus sumik qin­nuigineqar­pa, apustilil­lu al­lat qanoq qisuariar­pat?

▪ Jesusip ajoqersuk­kat qanoq un­nersuup­pai?