Kapitali 18

Johannes kinguariarpoq, Jesus siuariarpoq

UKIUMI 30-mi uper­naak­kut poorskereersoq Jesusip ajoqersugaasalu Jerusalem qimap­paat. Galilæamut angerlar­natik Judæami angalaaler­put inun­nik kuisisarlutik. Johan­nes Kuisisup suliaq taman­na ukiup ataatsip mis­saani ingerlatereersimavaa, sulilu ajoqersuk­kaminik najor­teqar­poq.

Tas­sa Jesus nam­mineq kuisisan­ngilaq, ajoqersugaali taas­suman­nga siulersor­neqarlutik kuisisar­put. Taak­kua kuis­sutaat Johan­nesip kuis­sutaatul­li isumaqar­poq, tas­sa juutit inatsisit tun­ngavigalugit angerusaan­nik Guutimit atulersin­neqarsimasumik unioq­qutitsisimanermi isumataar­nermut as­sersuutaal­luni. Makin­nermili kingor­na Jesusip ajoqersuk­kani kuis­sum­mik al­lamik isumalim­mik kuisin­nis­saan­nik ilitsersuup­pai. Ul­lumik­kut kristumiutut kuisin­neq inuup Jehova Guutimut kif­far­torumal­luni im­minut tun­niul­luin­nar­neranut as­sersuutaavoq.

Jesusip kif­far­tor­nerata aal­lar­tilaar­nerata nalaani tamaani, naak im­mik­koorlutik suligaluarlutik, Jesus Johan­nesilu isumataar­tunik ajoqersuil­lutil­lu kuisisar­put. Johan­nesil­li ajoqersugai sin­ngaler­put Jesusilu Johan­nesimut maalaarutigalugu, oqarlutik: „Rabbi! . . . [taan­na] kuisisar­poq, tamarmil­lu or­nip­paat.“

Johan­nes sin­ngan­ngilaq, Jesusil­li siuariar­tor­nera nuan­naarutigaa, kis­saatigaalu aam­ma ajoqersuk­kami nuan­naarutigis­sagaat. Oqarfigai: „Ilis­simi ilisiman­nit­tuuvusi oqarama: Kristusiun­ngilanga, sior­nagul­li aal­lar­titaavunga!“ Kusanar­tumil­lu as­sersuusior­poq: „Nulias­samik pigin­nit­toq uis­saavoq, uis­sal­li ikin­ngutaata taas­sumin­nga tusar­naar­tup uis­sap nipaa tipaatsuutigil­laaraa. Tipaatsuutiga taman­na maan­na naam­mas­sisimavoq.“

Taman­na ukiup af­faanik sioq­qul­lugu Johan­nesip, uis­sap ikin­ngutaatut, ajoqersuk­kani Jesusimut ilisaritik­kamigit nuan­naarsimavoq. Taak­kua ilaat Kristusip nulias­saanut qilam­miusumut ilaasor­taasus­san­ngor­put. Katersami tas­saniis­sap­put kristumiut anersaamik il­ler­nar­tumik tanitaasut. Johan­nesip kis­saatigaa ajoqersuk­kat suli im­miniit­tut Jesus malilis­sagaat, isumagisas­sani tas­saam­mat Jesusimut aq­qum­mik piareersaanis­saq, taas­sumalu kif­far­tor­nerata siuarsar­nis­saa. Soorlu Johan­nesip nas­suiaraa: „Taan­na al­liar­tus­saaq uangali mil­liar­tus­saanga.“

Jesusip ajoqersugaa Johan­nes, sior­natigut Johan­nes Kuisisup ajoqersugaanut ilaasimasoq, Jesusip pilerfia inuiaal­lu an­nan­nis­saan­nut pingaaruteqangaas­susia pil­lugit al­las­simavoq: „Qilam­mit pisoq tamanit an­neruvoq. . . . Ataatap er­neq asavaa, suul­lu tamaasa as­saanut tun­niup­pai. Er­nermut up­per­toq naas­saan­ngitsumik inuus­suteqar­poq, Er­nermul­li naalas­seriitsup inuus­sut takus­san­ngilaa, Guutil­li kaman­nerata qulangersimaavas­savaa.“

Suliami kinguariar­tor­neranik eq­qar­tuinermi kingunin­ngua Johan­nes kun­ngimit Herodesimit tigusarineqar­poq. Herodesip Herodias, qatan­ngum­mi Filipip nulia, katis­simavaa, Johan­nesil­lu tamanut oqaatigim­magu taama ilior­nera kuk­kusuusoq, Herodesip par­naarus­saatip­paa. Jesusip tusaramiuk Johan­nes tigusaasimasoq, ajoqersuk­kani ilagalugit Judæa qimap­paa Galilæaliarlunilu. Johannes 3:22-4:3 ilanngullugu; Apustilit suliaat 19:4; Mattæus 28:19; 2 Korintumiut 11:2; Markus 1:14; 6:17-20.

▪ Jesusip makititaanera sioq­qul­lugu kuis­sut taas­suma siulersuineragut suliarineqar­toq sumut as­sersuutaava? Aam­malu kingor­na kuis­sut sumut as­sersuutaava?

▪ Johan­nesip qanoq takutip­paa ajoqersuk­kani maalaar­nis­samut pis­sutis­saqan­ngitsut?

▪ Sooq Johan­nes par­naarus­saava?