Kapitali 118

Killuutigisaavoq tigusaallunilu

UN­NUAP qeq­qa qaangilaaraa inup­pas­suit, sak­kutuut, palasit, farisæerit al­lal­lu siulersorlugit Judasip Naatsiivik Getsemanemut eq­qup­pai. Palasit isumaqatigiis­sutigereersimavaat Judas Jesusimik kil­luutigin­nin­nis­saanut aningaasanik sølvinik 30-nik akilerumal­lugu.

Siusin­nerusuk­kut, poorskimi un­nuk­korsior­nerup nalaani aal­lar­tin­neqarami, Judas qular­nan­ngitsumik ingerlaan­naq palasiuner­nukarsimavoq. Taak­kua kif­fatik sak­kutooqatigiil­lu aggersapal­las­simavaat. Im­maqalu taak­ku Jesusip apustiliisalu poorskimi un­nuk­korsiorfian­nut Judasip ingerlateq­qaarsimagaluar­pai. Paasigamik­kulu anereersimasut inup­pas­suit ikumatitalisarlutik, qul­lilisarlutik sak­kulisarlutil­lu Judasimit siulersor­neqarlutik Jerusalemimit Kedronip qooruatigoorlutik ingerlaarsimap­put.

Ingerlaaqatigiit Uuliap Qaq­qaatigut siulersor­til­lugit Judasip qularin­ngilaa sumi Jesus nanisin­naas­sal­lugu. Sapaatip-akun­nerani kingul­lermi Jesus apustilinilu Betaniap Jerusalemil­lu akor­nan­ni uteqat­taar­nermin­ni Naatsiivik Getsemanemi qasuerser­niarlutik oqaloqatigiin­niarlutil­lu unik­kal­lar­tarsimap­put. Maan­nali im­maqa Jesus tarrup ataani uuliaqutit akor­nan­ni toq­qoq­qatil­lugu qanoq ilil­lutik sak­kutuut nanisin­naas­savaat? Im­maqa sior­natigut takusiman­ngisaan­nar­paat. Taamaat­tumik Judasip nalunaaq­qutis­sip­pai oqarluni: „Kunigas­sara taan­naajumaar­poq. Taan­na tigusiuk aal­larul­lugulu qimaatin­naveersaarlugulu.“

Judasip inup­pas­suit naatsiivim­mut iseqatigai, Jesusilu apustiliilu takugamigit ingerlaan­naq or­nip­pai. „Pil­luar­na, rabbi (ajoqersuisoq),“ oqar­poq asan­nip­palut­tuusaaqalunilu kunil­lugu.

„Ikin­ngut-aa, sul­lutit tamaan­nar­pit?“ Jesus sukan­nersumik akivoq. Taavalu apeq­qun­ni nam­mineerluni akivaa: „Judas, Inuup er­nera kunim­mik nalunaarlugu pisin­niar­piuk?“ Kil­luus­sisumil­li taas­sumin­nga eq­qar­tuiner­put naam­maleqaaq! Ikumatitat qul­liil­lu qaamar­nan­nut Jesus sas­sar­poq aperalunilu: „Kina ujar­pisiuk?“

„Jesus Nazaretimiu,“ akip­put.

„Uangaavunga,“ tamarmik saavan­ni nikorfal­luni qunusuil­luni Jesus oqar­poq. Nakiman­ngis­susia taman­na uis­suum­mis­sutigalugu, suneqas­sal­lutil­lu nalugamik­ku, tunuar­ter­put nunamul­lu up­pikaal­lutik.

„Uangaasunga oqarfigaas­si,“ Jesus eq­qis­sisimal­luni nangip­poq. „Uanga taava ujarus­singa uku aal­larlit!“ Tamatuma siunin­nguagut qaliani qinunermini Ataatani oqarfigaa apustilimi aalajaatsut aalajangerfigisimagaan­ni ataaserluun­niil­lu an­naasimanagu taamaal­laat „tam­mar­nerup er­nera“. Oqaatsini eq­quun­nias­sam­mata, ajoqersuk­kami tigusaan­ngin­nis­saat qin­nutigaa.

Sak­kutuut uip­pal­lerun­naarlutik nikuim­mata Jesusilu qilersulerlugu, susoqaler­nera apustiliisa paasiler­paat. „Naalagaq! Panas­saner­pavut?“ aperip­put. Jesus akerian­ngitsorluun­niit Peterip — panat marluk apustilit nas­sataasa aap­paanik tigumiar­tup — panani amusimal­lugu Malkus, palasiunerup inus­siaataa, panariariikatap­paa. Peterip niaqueriaraluak­kani uniusungarlugu siutaa taler­pil­leq panar­paa katatsil­lugu.

„Tamatumuuna al­laat ilagin­naagitsi,“ Jesus oqar­poq akuliul­lunilu. Malkusip siutaa at­tor­paa ajorun­naarsil­lugulu, pingaaruteqar­tumil­lu ajoqersorlugit. Peterimut oqar­poq: „Panat inaanut mangun­niaruk, pan­namik tigusisut nungul­lutik pan­namik toqun­neqas­sam­mata. Isumaqar­ner­pil­luun­niit maan­na Ataataga qin­nuigisin­naan­ngik­kiga in­ngilinik aq­qaneq-marlun­nik legionilin­nit amerlanerusunik aal­lar­titsivigeq­qul­lunga?“

Jesusil­li ikioq­qul­luni Ataatani qin­nuigin­ngilaa, tas­sami, soorlu oqar­toq: „Qanorli taava ilil­lutik al­lak­kat taamaas­saneraasut eq­quutis­sap­pat mas­sami taama ilis­sasoq?“ Oqaatsinilu ilavai: „Ermutsip Ataatama uan­nut tun­nius­saata imaa imis­san­ngin­ner­para?“ Guutip im­minut piumasaanik naam­mas­sin­nin­nis­sani aalajangiusimal­luin­nar­paa!

Taava inup­pas­suit Jesusip saaf­figai. „Soorlu piiaasoq an­nivigigis­si panalisarlusi unataasisarlusilu tiguniarlunga. Ul­lut tamaasa naalaf­fis­suarmi is­siasar­punga ajoqersuil­lunga, tigun­ngilas­singali. Tamak­kuli tamarmik taamaalip­put pruf­fiitit al­lagaat eq­quuteq­qul­lugit.“

Taava sak­kutuut, sak­kutuut naalagaata juutil­lu kif­faasa Jesus tiguaat qilersorlugulu. Apustilit taman­na takugamik­ku Jesus qimap­paat qimaal­lutil­lu. Angul­li inuusut­toq — im­maqa ajoqersugaq Markus — inup­pas­suit akor­nan­niigin­nar­poq. Taan­na im­maqa il­lumi Jesusip poorskisiorfigisaaniis­simavoq taavan­ngaan­niil­lu inup­pas­suar­nut ingerlaqataasimal­luni. Maan­na kinaasoq ilisaraat tigusarinialerlugulu. Taan­nali ilupaas­siani qimaan­narlugu qimaavoq. Mattæus 26:47-56; Markus 14:43-52; Lukas 22:47-53; Johannes 17:12; 18:3-12.

▪ Sooq Judasip qularutigin­ngilaa Naatsiivik Getsemanemi Jesus nanisin­naas­sal­lugu?

▪ Apustiliminut isumas­suinini Jesusip qanoq ilil­luni ersersip­paa?

▪ Jesus il­lersor­niarlugu Peter qanoq ilior­pa, taman­nali pil­lugu Jesusip qanoq oqarfigaa?

▪ Guutip im­minut piumasaanik naam­mas­sin­nin­nis­saminik aalajangiusiman­nil­luin­nar­nini Jesusip qanoq ersersip­paa?

▪ Apustilit Jesus qimam­mas­suk kina unin­ngaan­nar­paa, qanorlu piva?