Mattæus qaaqquneqarpoq
Kapitali 27
Mattæus qaaqquneqarpoq
TUMARTORSIMASUMIK ajorunnaarsitsinermi kingorna Jesus Kapernaumimit aallarpoq Galilæap tasersuata eqqaanukarluni. Aammattaaq tassani inuppassuarnit orniguffigineqarpoq, ajoqersulerpaalu. Ingerlaqqikkami takulerpaa Mattæus, Levimittaaq taaneqartartoq, akileraaruseriffimmi issiasoq. „Malinnga,“ Jesusip kajumissaarpaa.
Jesusip ajoqersuutaa qularnanngitsumik Mattæusip ilisimasaqarfigillualereersimavaa, soorluttaaq Peter, Andreas, Jakob aamma Johannes Jesusimik malinneqquneqarnerminni taama issimasut. Mattæusip qaaqquneqarnini ilassigasuarpaa, soorluttaaq allat taamatorluinnaq iliorsimasut. Nikuippoq akileraaruserisutullu pisussaaffini qimallugit Jesus malilerlugu.
Kingorna Mattæus katerisimaarnersuaqartitsivoq, immaqa Jesusimik qaaqquneqarnini malunnartinniarlugu. Jesusip ajoqersugaasalu saniatigut aammattaaq Mattæusip suleqatigisimasai najuupput. Angutit taakku juuteqatiminnit iluarisaanngigajuttuupput, Romamiut oqartussaatitaannut uumigineqaqisunut akileraarutaasussanik akileraartitsisartuugamik, peqquserlullutillu akileraarutissaviusumit annerusumik akileraartitsisaramik.
Katerisimaarnermi farisæerit takuleramikku Jesusip inuit taama ittut ilagigai, ajoqersugai aperaat: „Sooq ajoqersortissi [akileraaruserisut] ajortuliortullu nereqatigai?“ Apeqqutaat Jesusip tusaagamiuk akivoq: „Peqqissut nakorsamik pisariaqartitsinngillat, kisianni napparsimasut. Matumali isumaa ilinniariartorsiuk: ’Naakkinninneq iluaraara, pilliutilli pinnagit;’ iluartummi pinnagit ajortuliortut qaaqqujartorpakka.“
Mattæusip akileraaruserisut qaaqqusimavai qularnanngitsumik Jesusimut tusarnaarniassammata anersaakkullu katsorsarneqarniassammata. Maannalu Jesusip ilagai Guutimut ajunnginnerusumik attaveqalernissaannik ikiorniarlugit. Farisæerit iluartuuniartuusut iliornerattut pinnani Jesusip taakku narruginngilai. Naakkinnillunilu taakkununnga anersaakkut nakorsatut iliorpoq.
Jesusip ajortuliortut naakkinnittumik iliorfigimmagit imaanngilaq ajortuliai sianiginngitsuusaarai, timikkulli napparsimasunut misiginneqatiginninnermisulli taakkununnga misiginneqataavoq. Eqqaamajuk naakkinnilluni assani tumartorsimasumut isaakkaa attorlugulu oqaatigaluni: „Piumavunga. Pupeerugit.“ Uaguttaaq annikilliortut naakkinnittuliorfigalugillu ikiortariaqarpavut, ingammik anersaakkut. Mattæus 8:3; 9:9-13; Markus 2:13-17; Lukas 5:27-32.
▪ Sumi Jesusip Mattæus takulerpaa?
▪ Mattæus sulerisuua, aamma, sooq tamakkulerisut juuteqatiminnit iluarineqarneq ajorpat?
▪ Jesus qanoq pasillerneqarpa, qanorlu qisuariarpa?
▪ Sooq Jesusip ajortuliortut ilagai?