Kapitali 100

Miininik assersuusiaq

JESUS Jerusalemiliar­til­luni unil­latsiarfigisamini suli Zakæusip angerlarsimaf­fianiin­nguatsiar­poq. Ajoqersugaasa qularutigin­ngil­luin­nar­paat Jerusalemimut pigunik Jesusip Mes­siasiunini nalunaarutigiumaaraa naalagaaf­finilu pilersil­lugu. Tamatuma paasinerluinerunera Naalagaaf­fiul­lu tak­kun­nis­saanut suli ungasis­sorujus­suunera ersersin­niarlugu Jesus as­sersuusior­poq.

„Inuk pingaar­toq,“ oqalut­tuar­poq, „nunamut ungasis­sumut aal­lar­poq kun­ngius­suseq pigilis­sal­lugu utis­sal­lunilu.“ „Inuk pingaar­toq“ tas­saavoq Jesus, ’nunalu ungasis­soq’ tas­saavoq qilak. Jesus tap­pavunga pip­pat Ataataata kun­ngius­sutsimik tunis­savaa.

Angutip pingaar­tup aal­lan­ngin­nermini kif­fani qulit im­minut aggeq­quai tamaasalu miinimik sølviusumik tunil­lugit, ima oqarluni: „Niuer­niutigisigik tikitserlunga.“ Eq­quun­nerani siul­lermi kif­fat qulit Jesusip ajoqersugaanut as­sersuutaap­put. Eq­quun­nerani pingaar­nerusumi qilam­miup naalagaaf­fianik kingor­nus­seqatis­saanut tamanut as­sersuutaap­put.

Miinit sølviusut tas­saap­put aningaasat naleqaqisut nunalerisup qaam­matit pingasut mis­saan­ni aningaasarsiaatut naleqar­tigisut. Miinil­li sumut as­sersuutaap­pat? Qanorlu kif­fat niuer­niutigisus­saavaat?

Ajoqersuk­kat anersaak­kut kinguaas­siarititaasut pis­sarsiaan­nut, Jesusip naalagaaf­fim­mi neriorsuutigisaasumi kun­ngitut tikiutin­ngin­nerani qilam­miup naalagaaf­fianik kingor­nus­sisus­sanik amerlanerusunik pis­sarsis­sutigisin­naasaan­nut, miinit as­sersuutaap­put. Jesusip makin­nermi ajoqersuk­kaminul­lu takutin­nermi kingor­na ajoqersuk­kani miininik as­sersuutaasunik amerlanerusunik ajoqersugan­ngor­titsis­sutigisin­naasaan­nik taamaalil­lutil­lu naalagaaf­fim­mik kingor­nus­sisus­sanik amerlanerusunik pis­sarsis­sutigisin­naasaan­nik tunivai.

„Nunaq­qataasali,“ (NV) Jesus nangip­poq, „uumis­soramik­ku oqariar­tor­tus­sat aal­lar­tip­paat kingor­nagut oqaq­qusil­lutik: ’Taan­na [angut pingaar­toq] uatsin­nut kun­ngioq­qun­ngilar­put.’“ Nunaq­qatai tas­saap­put israelik­kut, imaluun­niit juutit, Jesusip ajoqersugarin­ngisai. Jesusip qilaliar­nerata kingor­na juutit taak­kua taas­suma ajoqersugaanik malersuinermik­k­kut ersersip­paat im­min­nut kun­ngiunis­saa kis­saatigin­ngik­kitsik. Taamaalil­lutik nunaq­qataasutut oqariar­tor­titsil­lutik aal­lar­titsisutut ilior­put.

Kif­fat qulit taak­kua qanoq miiniutitik ator­paat? Jesus nas­suiaavoq: ’Pivorli kun­ngius­suseq pigilersimal­lugu tikik­kami kif­fani taak­ku aningaasanik tunisani qaaq­qoq­quai niuer­niar­nermik­kut iluanaarutaat ilisimajumal­lugit. Taava siul­leq sas­sar­poq oqarluni: „Naalagaq, miiniutit miininik qulinik ilasimavoq.“ Oqarfigaa taava: „Qujanaq, kif­faasutit ajun­ngitsoq, min­nik­kut ilumooravit il­lor­palin­nut qulinut naalagaas­saatit.“ Aap­paalu agger­poq oqarluni: „Naalagaq, miiniutit miininik tal­limanik ilataar­poq.“ Taas­sumun­ngat­taaq oqar­poq: „Il­lil­lu il­lor­palin­nut tal­limanut iver­titaas­saatit.“’

Kif­faq qulinik miiniutilik ajoqersuk­kanut katersanut ukiumi 33-mi piinsip ul­luaniit ul­lumik­kumut ajoqersugaasunut, aam­malu apustilinut, as­sersuutaavoq. Kif­faq miininik tal­limanik iluanaaruteqarsimasoq ajoqersuk­kanut katersanut pif­fis­sami tamatumaneersunut­taaq periarfis­satil­lu pigin­naanitil­lu naaper­torlugit kun­ngimik maani nunami pigisaanik an­ner­tusaasunut as­sersuutaavoq. Katersat taak­ku tamarmik ilungersor­tuul­lutik tusagas­samik nuan­nersumik oqaluus­sis­sutigin­nip­put, tamatumalu kingunerisaanik inup­pas­suit peq­qusersuitsut kristumiun­ngorsimap­put. Kif­fat qulingiluat pis­sarsiatik niuis­sutigaat iluanaaruteqas­sutigalugil­lu.

Jesus nangip­poq: ’Al­lalu agger­poq oqarluni: „Naalagaq, takuat, aana miiniutit; taan­na kak­kis­saam­mut toq­qorsimavara. Siooragivak­kim­mi; angutaasersuuvutim­mi; ilin­ngisatit tigusar­patit, siaruar­terif­figin­ngisan­nilu katersuisarlutit.“ Taan­nali oqarfigaa: „Qar­nit najoq­qutaralugu eq­qar­tuus­savak­kit kif­faasutit ajor­toq uumaa! Ilisimagam­ma angutaasersuusunga, ilin­ngisak­ka tigusarik­ka siaruar­terif­figin­ngisan­nilu katersuisar­tunga! Sooq taava aningaasaatiga aningaaserivim­mut tun­niutin­ngiliuk, tikik­kuma taava piniaq­qajariga akiliutinik er­nialigaasimasoq?“ Taava najuisut oqarfigai: „Miinisiaanik arsaarsiuk qulinil­lu miiniutilim­mut tun­niul­lugu.“’

Kif­fap ajor­tup miiniutiminik as­sersuutaasumik an­naasaqar­nera isumaqar­poq qilam­miup naalagaaf­fiani inis­sani an­naagaa. Aap, al­latut oqaatigalugu il­lor­palin­nut qulinut tal­limanul­luun­niit naalagaanis­samik im­mik­kut pisin­naatitaaf­fik an­naavaa. Malugiut­taaq kif­faq kuk­kusumik iliorsimanini pis­sutiginagu ajor­tumik taaneqarmat, naalak­kamili naalagaaf­fiani pisuus­sutinik an­ner­tusaaniarluni sulisiman­ngin­nini pis­sutigalugu.

Kif­fap ajor­tup miiniutaa kif­famut qulinik miiniutilim­mut tun­niun­neqarmat ima akerliliisoqar­poq: ’Naalagaq! Qulinik miiniuteqareer­poq!’ Jesusili akivoq: „Peqar­toq tunineqas­saaq; peqan­ngitsorli arsaar­neqas­saaq piminik al­laat. Ik­kuli qin­ngarsor­tik­ka uan­nik im­min­nut kun­ngioq­qusin­ngitsut aggius­sigik isigitil­lungalu toqus­sigik!“ Lúkarse 19:11-27; Mattæus 28:19, 20.

▪ Suna pis­sutigalugu Jesus miininik as­sersuusior­pa?

▪ Inuk pingaar­toq kinaava, nunalu aal­larfigisaa suua?

▪ Kif­fat kik­kuup­pat, miinil­lu sumut as­sersuutaap­pat?

▪ Nunaq­qatai kik­kuup­pat, qanorlu ilil­lutik uumis­suiner­tik ersersip­paat?

▪ Sooq kif­faq ataaseq ajor­tumik taaneqar­pa, miinimil­lu an­naasaqar­nera sumik nas­sataqar­pa?