Naakkinninnermik ilinniagassaq
Kapitali 40
Naakkinninnermik ilinniagassaq
JESUS uillarnerup erneranik qanittukkut makititsiffimmini suli Naimiinnguatsiarpoq; illoqarfimmiluunniit eqqaaniittumiinnguatsiarpoq. Farisæerip Simonimik atillip taama tupinnartigisunik tupinnartuliorsinnaasoq ilisarisimalerusuppaa, taamaattumillu Jesus neriartoqquaa.
Jesusip tamanna najuuttunut allanut oqaluussinissamut periarfissatut isigaa taamaattumillu akuersilluni, soorlu siornatigut ilanngaaserisunit ajortuliortunillu neriartoqqusaanini akuerisarsimagini. Simonilli illuanut iserami pulaat inoroorsaarfigineqartarnerattut inoroorsaarfigineqartiginngilaq.
Aqqusinerni pujoralaqaqisuni angalaartarluni isikkat aloqutaannallit kissatsillutillu ipertuunngortarput, pulaallu isigaannik imermut nillataartumut asaaneq inoroorsaarnermut nalinginnaasumut ilaavoq. Jesusilli isigai isermat asanneqanngillat. Tikilluaqqussummillu kuninneqanngilaq, naak tamanna ileqqorissaarnissakkut piumasarineqaraluartoq. Ileqquusutulluunniit nutsamigut uuliarterneqanngilaq.
Pulaat neritillugit arnaq qaaqqusaanngitsoq sallaatsumik iserpoq. Kanngunartumik inooriaaseqartutut illoqarfimmi ilisimaneqarpoq. Qularnanngitsumik Jesus ajoqersuitillugu tusarsimavaa ilaatigut ’erloqisunik nanertugaasunillu qasuerserniassagamigit orneqqusoq’ tusarsimassallugu. Takusani tusakkanilu killitsissutigalugit Jesus ujarsimavaa.
Jesus tunoqquteriarlugu isigaasa eqqaannut seeqqummerpoq, qullinilu isigaanut nakkarmata nutsaminik allarterpai. Isigai kunippai puiaasannguaatinilu tarnutissamik tipigissumik imalik isigaanut kuillugu. Tamanna Simonip nuannarinngilaa. „Una pruffiitiuguni,“ eqqarsarpoq, „attortini arnaq una kinaasoq qanorlu ittoq ilisimaqqajaqaa ajortuliortuummat.“
Eqqarsaataali Jesusip takusinnaavai, oqarlunilu: „Simoniaa! Ilinnut oqaasissaqarpunga.“
„Oqarit ajoqersuisoq!“ akivoq.
„Aningaasanik attartortitsisartoq marlunnik pisassaqarfigisaqarpoq,“ Jesus aallartippoq. „Aappaa pisassaqarfigaa aningaasannguanik tallimanik untritilinnik, aappaali tallimanik qulilinnik. Akissaqanngimmatali tamaasa akileeqqujunnaarpai. Taakkua arlaata kia annermik asassavaa?“
„Isumaqarpunga amerlanernik akileeqqunngisaata,“ Simon oqarpoq, immaqa apeqqut soqutigivallaannginnamiuk soqutigisaqarpasigani.
„Eqqartuussilluarputit,“ Jesus akivoq. Arnamullu saalluni Simon oqarfigaa: „Arnaq una isigaajuk? Illunnut iserama imermik tuninngilarma isikkannut; uumali isikkakka qulliminik masatserpai nutsaminillu allarterlugit. Illit kuninngilarma; unali iserami soraanngilaq isikkakka kunissorlugit. Illit niaqora uuliamik taninngilat; uumali isikkakka tarnummik tanippai.“
Arnap taamaalilluni ersersippaa kanngunartuliortuunini peqqissimissutigalugu, Jesusilu naggasiivoq: „Tamanna pillugu oqarfigaakkit: ajortuliaminik amerlasuunik isumakkeerfigineqarpoq, angisuumimmi asannippoq; mikisumilli isumakkeerfigineqartoq mikisumik asannittarpoq.“
Kanngunartuliortut Jesusip pinngitsuutinngilai akuersaarnagilluunniit. Pisimasup tamatuma ersersippaa inunnut kukkuluttortunut ajortuliaminnilli peqqissimissutiginninnermik ersersitsisunut tuppallersartikkusullutillu imminukartunut Jesus qanoq naakkinnitsigalunilu paasinnittuutigisoq. Jesusip arnaq taanna nutaamik piviumillu nakussatsippaa oqarami: „Ajortinnik isumakkeerfigineqarputit! Uppernerpit annaappaatit, eqqissillutit aallarit!“ Lukas 7:36-50; Mattæus 11:28-30.
▪ Jesus qaaqqusisiminit Simonimit qanoq pineqarpa?
▪ Jesus kimit orninneqarpa, sumik pissuteqartumik?
▪ Jesus sumik assersuusiorpa, sumullu assersuutigaa?