Naalaffimmut uteqqippoq
Kapitali 103
Naalaffimmut uteqqippoq
JESUS ajoqersugaalu Jerikomit tikikkamilli Betaniami pingasoriarlutik unnuisimapput. Maanna ullaannguup seqernata ataani, ataasinngornermi nisanip 10-ani, Jerusalemilialereerput. Jesus kaappoq, fiigequssuarlu pilutalik takugamiuk ornippaa takuniarlugu fiigertaqarnersoq.
Aatsaat martsip naggataata tungaaniimmat aatsaallu junimi fiigeqalersarluni, fiigequt tamanna pilutaniaarpallaarsimavoq. Qularnanngitsumik orpik pilutaqalereersimammat Jesusip fiigeqassasoraa. Pakatsivorli. Pilutai pisuullutik orpik kajungernartunngorsimavoq. Taamaattumik Jesusip orpik perloqquaa oqarlunilu: „Kingorna inerititannik nerisoqanngilluinnassaaq.“ Jesusip fiigequssuarmik perloqqusinerata kinguneri assersuutaasumillu isumaa aqaguani paasinarsissapput.
Jesus ajoqersugaalu ingerlaqqipput, sivitsunngitsorlu Jerusalemimut apuupput. Tassani Jesus ippassaammat ualikkut qimerloorsimasaminut naalaffimmukarpoq. Ullumikkulli ukiunik pingasunik siusinnerusukkut, ukiumi 30-mi poorskimi, iliuuserisimasamisut pissutsit iliuuseqarfigai. Naalaffimmi tuniniaasut pisiniartullu tamaasa aniatippai, aningaasanillu taarsiisut ilisivii tuinillu nuisitsisut issiavii uppitillugit. Allaat atortumik sumilluunnit tigumiartut naalaffimmi ingerlaqqunngilai.
Naalaffimmi aningaasanik taarsiisartut uumasunillu tuniniaasut avoqqaaralugit oqarpoq: „Ima allassimanngila, illuga inuiaqatigiit tamarmik qinusarfissaannik taaneqassasoq? Ilissili ujajaaffinngortipparsi.“ ’Ujajaasuupput’ uumasut pilliutissat inuit ilaasa maani pisiarisariaqagaat akisunaarlugit akigisaramikkik. Taamaattumik niuerneq taamaattoq Jesusip peqquserluttuliornikkut aningaasanik akilersuisitsinertut imaluunniit tillinnertut isigaa.
Palasiunerit, allakkanik ilisimasut inuillu nuimasortaasa Jesusip qanoq iliorsimanera tusaramikku toqutaatinniaqqippaat. Taamaalillutik ersersippaat iluarsivissaqaratik. Naluaalli qanoq ilillutik toqunniassanerlugu, inuppassuimmi tusarnaarumallugu najortuarmassuk.
Uinikkut juutit saniatigut aammattaaq juutiunngitsut poorskisioriarlutik tikissimapput. Ilasiaapput, tassa juutiussutsimik upperisaqalersimasuupput. Grækerit ilaat, qularnanngitsumik ilasiaasuttaaq, Filipimut saaffiginnipput aperalutillu Jesus naapissinnaannginnerlugu. Filip Andreasimukarpoq, qularnanngitsumik aperiniarluni naapeqatigiinneq taama ittoq naleqquttuunersoq. Jesus suli naalaffimmiinnguatsiarpoq, tassanilu grækerit naapissinnaavaat.
Jesusip nalunngilaa ullut inuuffigisassani ikittuinnanngortut, tamannalu qajassuartumik eqqaavaa: „Inuup Ernerata naalannarsivissaa nalliuppoq. Ilumut, ilumut oqarfigaassi: naatsiiassaq qajuusiassaq issup iluanut tullunilu toqunngikkuni ataasiuinnassaaq.“
Naatsiiassaq qajuusiassaasoq nalikitsuinnaavoq. Qanorli pisoqassava issumut pippat ’toqullunilu’, imaluunniit naatsiiassaajunnaarpat? Taava puttuttarpoq piffissallu ingerlanerani iviganngortarpoq qajuusiassarpassuaqalersarlunilu. Jesus inuuvoq naammalluinnartoq ataasiinnaq. Guutimulli aalajaalluni toquguni, inunnut aalajaatsunut immisut imminnut pilliutigeriaannaasunut inuunermik naassaanngitsumik tunisisunngussaaq. Taamaattumik Jesus oqarpoq: „Inuunermik asannittup inuunini annaajumaarpaa; silamili matumani inuunerminik uumiginnittup inuunini pigittuinnarumaarpaa naassaanngitsumik inuussalluni.“
Qularnanngitsumik Jesus imminuinnaq eqqarsaatiginngilaq, imami nangippoq: „Uannut kiffartorumasup malillinga, kiffaralu najukkanniissaaq. Uannullu kiffartortoq Ataatap ataqqissavaa.“ Jesusip tumaanik malinnittunut taassumunngalu kiffartortunut akissarsiap angissusia! Kristus ilagalugu Naalagaaffimmiinnermikkut Ataatamit ataqqisaassapput.
Naalliungaarnissani anniangaarlunilu toqunissani eqqarsaatigalugit, Jesus nangippoq: „Maanna tarniga siooravoq; qanorlu oqassaanga? Ataataq, nalliuttumit matumannga annaannga!“ Jesusip atugassai pitsaalineqarsinnaassagaluaramik! Naaggali, soorlu oqartoq: „Tamannali pillugu nalliuttoq manna tikippara.“ Ataatami atoqqusai Jesusip akuerai, aammattaaq inuunerminik pilliutiginninnissani. Mattæus 21:12, 13, 18, 19; Markus 11:12-18; Lukas 19:45-48; Johannes 12:20-27.
▪ Sooq Jesusip fiiginik nassaarnissani ilimagigaluarpaa, naak fiigeqalerfissaa suli nalliutinngikkaluartoq?
▪ Sooq Jesusip naalaffimmi tuniniaasut ’ujajaasunik’ taavai?
▪ Qanoq ililluni Jesus naatsiiassamut qajuusiassaasumut assingua?
▪ Atugassani naalliunnartut toqunissanilu Jesusip qanoq isigai?