Naggammik naalaffimmi oqaluussivoq
Kapitali 110
Naggammik naalaffimmi oqaluussivoq
NAGGAMMIK Jesus naalaffimmut takkuppoq. Aap, tamanna maani nunami tamanut kiffartuussinerata naaneranut ersiutaavoq, ullut pingasut qaangiunneranni eqqartuunneqarnerani toqutaaneranilu pisussat eqqaassanngikkaanni. Nangilluni maanna allakkanik ilisimasut farisæerillu Jesusip naveerpai.
Suli pingasoriarluni ima nillerpoq: „Eqqanaq ilissi allakkanik ilisimasusi farisæerillu, ilumoortuusaarniartusi.“ Siullermik eqqanaarnartumik oqaluussiffigai ’ermutsit puuguttallu qaasigut salittarmatigik, ilumikkulli tillikkanik piumatuuvallaarnermillu imalissuullutik’. Oqaassivoq: „Ermuseq puugutarlu iluisigut saleqqaarallakkit, qaamikkuttaaq ipeeruteqqullugit.“
Allakkanik ilisimasut farisæerillu ilumikkut minguttuunertik toqqorniarlugu upperluartuusaarnerat pillugu Jesusip eqqarnaarnartumik oqaluussiffigai: „Ilerfit marrartikkat assigigassigik, taakku qaamikkut pinnersuusaaraluarput, ilumikkulli toqusut saarninik mingunnartunillu nalinginnarnik imalissuupput.“
Kiisalu ilumoortuusaarnerat, ajunngitsuliamikkut takuneqarumallutik pruffiitinut ilerfiorumanermikkut pinnersaajumanermikkullu ersersitaat, Jesusip qulaarpaa. Jesusilli oqarneratut ’pruffiitinik toqutsisunut qitornaapput’. Aap, ilumoortuusaarnerannik sapiiserluni qulaarisoq navianartorsiorluinnarpoq!
Aatsaat taama sakkortutigisumik avoqqaarlernini Jesusip nangippaa: „Taatuuku pulateriaarsuit, pulateriaarsuit piaraat! Qanoq ilillusi [Gehennamut] pisitaanissaq ingalassavisiuk?“ Gehenna qooruuvoq Jerusalemimi taamanikkut eqqaavissuusoq. Tassa Jesus oqarpoq allakkanik ilisimasut farisæerillu ajortumik inooriaaseqarnertik pissutigalugu naassaanngitsumik nungutitaajumaartut.
Atermigut oqaluussisussatut aallartitani pillugit Jesus oqarpoq: „Taakkua ilaat toqukkumaarpasi [qisummullu] kikiattorlugit, ilaallu iperartorumaarpasi naalagiartarfissinni malersorlugillu illoqarfimmit illoqarfimmut allamut; ilissinnut peqqullugit iluartut aavi nunamut kuisat tamaasa, Abelip iluartup aavanit Zakariasip Barakiasip ernerata aavanut [Israelikkut kinguaariit II-mi Barakias Jojadamik taaneqarpoq]; taanna toqupparsi naalaffiup tunisiviullu akornanni. Ilumut oqarfigaassi: tamakku tamarmik eqqarleriinnut ukununnga nalliutissapput.“
Zakariasip naveermatik Israelip pisortaasa, taanna „perlutsinnialerpaat, kunngillu Naalakkiineratigut [Jehovap] naalaffiata ungaluliugartaani ujaqqanik milloorlugu toquppaat“. Soorluli Jesusip siulittuutigigaa, iluartut aavi kuisat tamaasa pillugit Israel akiliisussanngorumaarpoq. Ukiut 37-t qaangiummata tamanna pivoq, ukiumi 70-imi, Romamiut sakkutuuisa Jerusalem aserormassuk juutillu millioninit amerlanerusut toqutaammata.
Pisimasoq tamanna Jesusip aliasuutigaa. „Jerusalem, Jerusalemiaa!“ nilleqqippoq, „Qassinimmi taava qitornatit katersorumagaluarikka, soorlu kukkukuup piaqqani sulummi ataanut katersortarai! Piumanngilasili. Ata illorsi ilissinnut qimagaassaaq inueruttoq!“
Jesusip oqaatsini ilavai: „Matuma kingornagut takussanngilassinga ima oqartinnasi: ’Pilluarli [Jehovap] aqqani tikiuttoq!’“ Tamanna pissaaq Kristusip najuunnerani, qilammi naalagaaffimmini kunnginngorpat inuillu uppernermikkut isiminnik takuppassuk.
Naalaffiup aningaasanik nakkaatitsiviinik tamakkununngalu nakkaatitsisunik qimerluuiffigisinnaasaminut maanna Jesus pivoq. Pisuut aningaasarpassuarnik nakkaatitsipput. Uillarnerulli piitsup aningaasannguit naleqarpianngitsut nakkartippai.
Jesusip ajoqersukkani qaaqquai oqarfigalugillu: „Ilumut oqarfigaassi: uillarneq una piitsoq aningaasanik ilioraaffimmut ilioraasunit tamanit amerlanerusunik ilisivoq.“ Qanoq isumaqarnersoq qularnanngitsumik ajoqersukkat tupigusuutigalugu eqqarsaatigaat. Taamaattumik Jesus nassuiaavoq: „Pisuut tamarmik sinnerutitamik ilaannik ilisipput, uumali ajorsartuulluni pini tamaasa ilivai inuutissarsiutissaraluani tamakkerlugit.“ Taamatut oqareerami Jesus naggataamik naalaffimmit anivoq.
Naalaffiup angissusia takorannissusialu ajoqersukkat tupigusuutigaat, ilaallu oqarpoq: „Ajoqersuisoq, ujaqqat alutornassusii illorsuup sanalluagaassusia!“ Oqartoqartarpoq ujaqqat naalaffiup sananeqaatai 11 meterisut takissuseqarlutik, 5 meterit sinnerlugit silissuseqarlutik 3 meterit sinnerlugit portussuseqartut! „Illorsuup sanalluagaassusia tamanna isigaajuk?“ Jesus akivoq. „Ujaqqat qaleriissuerullugit ingutserneqassapput.“
Taama oqareerami Jesus apustilini ilagalugit Kedronip qooruatigoorluni Uuliap qaqqaanukarpoq. Tamaanngaaniit naalaffik alutornangaartoq ammut isigisinnaavaat. Mattæus 23:25–24:3; Markus 12:41–13:3; Lukas 21:1-6; Israelikkut kinguaariit oqaluttuarisaanerat II 24:20-22.
▪ Naggammik naalaffimmiinnermini Jesus suleriva?
▪ Allakkanik ilisimasut farisæerillu ilumoortuusaassusiat qanoq ililluni erserpa?
▪ „Gehennamut pisitaanissaq“ qanoq isumaqarpa?
▪ Sooq Jesus oqarpa uillarnerup tunissutaa pisuut tunissutaannit annerusoq?