Narsaammik viinnequtilimmik assersuusiamit qulaarneqartut
Kapitali 106
Narsaammik viinnequtilimmik assersuusiamit qulaarneqartut
JESUS naalaffimmiippoq. Upperisarsiornikkut pisortat qanoq ittumik piginnaassuseqarnerminik aperimmanni oqaasissaarutsillugit akeqqammerpai. Akissutiminut suli tupigusuttut Jesusip aperai: „Qanoq isumaqarpisi?“ Assersuusiorlunilu ersersippaa inuttut qanoq ittorpiaasut.
„Inuk marlunnik erneqartoq,“ Jesus oqaluttuarpoq. „Taakkualu arlaat ornillugu oqarfigaa: ’Erneq-aa, ullumi naatsiivinnut viinnequtilimmut suliartorit.’ Akivaa oqarluni: ’Aap, naalagara.’ Taakunnaranili. Aappaali ornillugu taamatut oqarfigaa. Taassumalu akivaa: ’Naagga.’ Peqqissimileramili taakunnarpoq. Taakkua arlaata kia angummi peqqusaa malippaa?“ Jesus aperaaq.
„Kingulliup,“ akerlilersortai akipput.
Taava Jesus nassuiaavoq: „Ilumut oqarfigaassi, ilanngaaserisut uersartullu Guutip naalagaaffianut ingiassavaasi.“ Ilanngaaserisut (akileraaruserisut) uersartullu (arnat inuunerluttut) Guutimik kiffartuussiumanngeqqaarsimagaluarput. Ernerulli aappaatut peqqissimisimapput kiffartuutilerlugulu. Akerlianillu upperisarsiornikkut pisortat, erneq siulleq assigalugu, Guutimik kiffartuussisuusaartuupput. Jesusili erseqqissaavoq: „Johannesip [Kuisisup] iluarnermut aqqutaasumiilluni tikimmasi upperinngilarsi, ilanngaaserisulli uersartullu upperaat; ilissili taamaalisut takugaluarlugit kingornatigut peqqissiminngilasi upperilernagulu.“
Taava Jesusip erseqqissarpaa upperisarsiornikkut pisortat kukkuluttornerat tassaaginnanngitsoq Guutimik kiffartuussinngitsoornerat. Aap, iluamik oqaatigalugu inuupput ajortut. „Inuk illumi naalagaasoq,“ Jesus oqaluttuarpoq, „viinnequtilissanik naatsiiviliortitsivoq ungalulerlugulu tunguiaaffissarlu tassani assallugu qaqiffiliorlunilu, naasorissaasunullu attartortikkamiuk nunamut allamut aallarpoq. Taava inerititaqarfia qanillimmat kiffani naasorissaasunut aallartippai inerititai tigujartoqqullugit. Naasorissaasulli kiffai tiguaat, ilaat unatarlugit ilaallu toqullugit ilaallu ujaqqanik milloorlugit. Aamma kiffat allat siullernit amerlanerusut aallartimmagit taakkuttaaq taamaaliorfigaat.“
„Kiffat“ tassaapput pruffiitit ’illumi naalagaasup’, Jehova Guutip, ’naatsiivimmini viinnequtilimmi naasorissaasunut’ aallartitai. Naasorissaasut taakku tassaapput Israelip innuttai, Bibeli naapertorlugu Guutip ’naatsiivianut viinnequtilimmut’ sinniisuullutik pisortaasut.
„Naasorissaasut“ ’kiffanik’ persuttaallutillu toqutsimmata, Jesus nassuiaavoq: „Kiisalu [narsaammik viinnequtilimmik piginnittup] erni taakkununga aallartippaa oqarluni: ’Ernera innimigissavaat.’ Naasorissaasulli ernera takugamikku oqaloqatigiilerput: ’Tassa kingornussisussaq; qaa, toqoqisigu kingornussassaralui uagut pillugit!’ Tiguaallu, naatsiivimmillu anisillugu toquppaat.“
Upperisarsiornikkut pisortat Jesusip maanna aperai: „Naatsiiviup inuata tikikkuni naasorissaasut taakku qanoq pissavai?“
„Perluliortut taakku,“ upperisarsiornikkut pisortat akipput, „perlummik nungutillassavai, naatsiivinilu naasorissaasunut allanut inerititaanik ineriffiagut tunniussisartunut attartortissavaa.“
Upperisarsiornikkut pisortat taamaalillutik piaarinaatsoorlutik imminnut eqqartuussutissaq nalunaarutigaat, tassami Jehovap ’naatsiiviani viinnequtilimmi’, Israelip innuttaani „naasorissaasunut“ israelikkuusunut ilaapput. Naasorissaasut taama ittut inerititassaattut Jehovap naatsorsuutigisaa tassaavoq upperneq — ernerminut, Messiasimut ilumoortumut, upperneq. Taamatut inerititaqanngimmata, Jesusip mianersoqquai: „Allakkani [Tussiaat 118:22, 23-mi] imaattut atuanngisaannarpisigik? Ujarak illuliortut sussarinngisaat teqeqqussanngorluni ujaraalerpoq. [Jehovamit] taamaalivoq tupinnaqalunilu isitsinnut! Tamanna pillugu oqarfigaassi: Guutip naalagaaffia ilissinnit peerneqassaaq, inuiannullu allanut tunniunneqassaaq inerititaanik naammatsitsisunut. Ujaqqamullu taassumunnga orlusoq aqqunassaaq, nakkarfigisanilu sequmilluinnassavaa.“
Allakkanik ilisimasut palasiunerillu maanna paasilerpaat Jesusip namminneq pigaatik, taamaattumik ’kingornussisussavik’ toqukkusulerpaat. Taakku inuiattut isigalugit Guutip naalagaaffiani naalakkersueqataanissamik immikkut pisinnaatitaaffiannik arsaarneqassapput, ’naasorissaasullu’ inuiattut ittut nutaat saqqummissapput, eqqortunik inerititaqartussat.
Inuppassuit najuuttut, Jesusimik pruffiititut isiginnittut, qunugigamikkik upperisarsiornikkut pisortat Jesus tassani toqorianngilaat. Mattæus 21:28-46; Markus 12:1-12; Lukas 20:9-19; Jesaja 5:1-7.
▪ Jesusip assersuusiaani siullermi ernerit marluk kikkunnut assersuutaappat?
▪ Assersuusiap aappaani ’illumi naalagaasoq’, ’naasorissaasut’ ’kiffallu’ kikkuuppat?
▪ ’Naasorissaasut’ qanoq pineqassappat, kikkunnillu kingoraarneqassappat?