Pilluarnerup pilerfia
Kapitali 75
Pilluarnerup pilerfia
JESUS Galilæami oqaluussinermini tupinnartuliortarsimaqaaq, maannalu Judæami taamaaliortarpoq. Assersuutigalugu, anersaapiluk angummik oqajuitsuutitsisoq anisippaa. Inuppassuit tupigusupput, ilaalli Galilæamiut ilaattut Jesus ima isornartorsiorpaat: „Anersaapiluit anisittarpai Beelzebul anersaapiluit naalagaat ikiortigalugu.“ Allat kinaanerarneranut uppernarsaatissanik allanik piumapput, qilammillu nalunaaqqummik takutitseqqullugu usserniarpaat.
Jesusip eqqarsaataat ilisimagamigit Galilæami isornartorsiuisutut akivai. Oqaatigaa naalagaaffik imminik iligiunnaaruni atajunnaassasoq, aperalunilu: „Taavattaaq Satan imminik iligiunnaaruni qanoq ililluni naalagaaffia atassava?“ Assortuisuttaaq taakku qanoq ilungersornartigisumik inissisimanerat uparuarpaa: „Anersaapiluilli Guutip assaa ikiortigalugu anisikkukkit, taava Guutip naalagaaffiata [pakasarluinnarsimassavaasi, NV].“
Jesusip tupinnartuliaanik takunnittut ukiunik hundredelinnik arlalinnik tamanna sioqqullugu Mosesip tupinnartuliorneranik takunnittut qisuariarsimanerattut qisuariartariaqaraluarput, taakku oqarmata: „Tassa tamanna Guutip assaata suliaa.“ Aammattaaq allattarfissiani ujaraasuni inatsisinik qulinik allattoq tassaavoq ’Guutip assaa’. Aammalu ’Guutip assaa’ — anersaava illernartoq, imaluunniit pissaanera sulissutiginnittoq — ikiortigalugu Jesusip anersaapiluit anisittarpai napparsimasullu ajorunnaarsittarlugit. Ilumut Guutip naalagaaffiata assortuisut taakku pakasarsimavai, Jesusimi, Naalagaaffimmi kunnginngortussaq, taakkua akornanniippoq.
Jesusip anersaapiluit anisissinnaagamigit Satanimit pissaaneqarnerusimassaaq. Assigaa, Jesus oqarpoq, angut sakkulersorluarsimasoq illorsuarminik paarsisoq imminerminit nakuunerusumit sapersartinneqarpat. Jesusip aamma siornatigut Galilæami assersuusiarisimasani atoqqippaa, tassa inummik anersaamit minguttuumit minguiarneqartumik assersuusiaq. Inuup taassuma soqanngiffik ajunngitsunik imminngippagu, anersaaq uterumaarpoq anersaat arfineq-marluk ilagalugit, inullu taanna siornarnit ajornerusumik pissuseqalissaaq.
Arnap inuit akornanniittup ajoqersuineq tamanna tusaramiuk killitsilluni nipituumik nillerpoq: „Pilluarpoq ilinnik naartusoq ilinnillu milutsitsisoq.“ Taama qisuariarnera paasinarpoq, arnat juutiusut tamarmik pruffiitimik, ingammillu Messiasimik, qitornaqalernissartik kissaatigimmassuk. Arnaq isumaqannguatsiarpoq Mariap Jesus ernerigigamiuk immikkut pilluarsinnaasoq.
Jesusilli arnaq uparuukkasuarpaa suna pilluarnerup pilerfigigaa piviusoq. „Naamik,“ (NV) oqarpoq, „pilluarput Guutip oqaasianik tusartut toqqorlugulu!“ Jesusip anaanani, Maria, immikkut ataqqinartinneqartariaqarneranngisaannarpaa. Ersersippaa pilluarneq piviusoq nanineqarsinnaasoq Guuti aalajaatsumik kiffartorfigigaanni, eqqarleriissutsikkut imaluunniit aalajangersimasunik sapiitsuliornertigut pinnani.
Galilæami iliorsimanermisut Jesusip maani Judæami qilammit nalunaaqqummik takujumasut avoqqaarai. Oqarpoq taamaallaat Jonasip nalunaaqqutaanik tunineqassasut. Jonas nalunaaqqutaalersimavoq ullut pingasut aalisakkamiikkami Ninevimiullu isumataarnissamut killinneqaatigisaannik nakimaalluni oqaluussigami. „Atalu maaniippoq Jonasimit annerusoq,“ Jesus oqarpoq. Taava kujataata (imaluunniit Sabap) kunngiata arnap Salomonip ilisimassusianik tupigusunnera eqqaavaa, oqarlunilu: „Atalu maaniippoq Salomonimit annerusoq.“
Naneruut ikinneqaraangami naqqup nappartalluunniit ataannut inissinneqartanngilaq, Jesus oqarpoq. Naneruuserfimmut ilineqartarpoq qaamanera takuneqarsinnaaqqullugu. Immaqa taama oqarnermigut oqaatiginiarpaa inunnik naalasseriitsunik ukuninnga ajoqersuillunilu tupinnartuliorfiginneqattaartuaraluaruni assigiinnassagaluaraa naneruutip qaamarnanik isertuussigaanni. ’Peqqissumik’ iseqanngillat pissusiviit takusinnaanagit, taamaattumik Jesusip tupinnartuliorneri asuliinnarput.
Oqajuitsoq oqalulersillugu anersaapiluk aniseqqammerpaa. Inuit ’peqqissunik’ isillit sapiitsuliaq tamanna alutornangaartoq nersortariaqaraluarpaat tusagassarlu nuannersoq oqaluussissutigalugu! Isornartorsiuisulli taakku taamaaliunngillat. Taamaattumik Jesus erseqqissaavoq: „Taamaattumik misissorniarit, qaamasoq ilunniittoq taartooqqunagu. Taava timit taartumik sumik ilaqarnani qaamasormiulluinnaruni, tamarmi qaamasormiussaaq, soorlu qaamasup akisunnerminik qaammarsaraatit.“ Lukas 11:14-36; 2 Moses 8:18, 19; 31:18; Mattæus 12:22, 28.
▪ Jesusip angut ajorunnaarsimmagu tusarnaartut qanoq qisuariarpat?
▪ ’Guutip assaa’ sunaava, Guutillu naalagaaffiata qanoq ililluni Jesusip tusarnaartai pakasarsimavai?
▪ Pilluarnerup piviusup pilerfia sunaava?
▪ Isi qanoq ’peqqissinnaava’?