Qilammit tusarliussat
Kapitali 1
Qilammit tusarliussat
BIBELI tamarmi oqaatigineqarsinnaavoq tusarliussaq qilammeersoq, Ataatatta qilammiusup uagutsinnut tunniussimammagu ilinniutissatsitut. Ukiulli 2000-ingajaat matuma siornagut inngilit ilaata ’Guutip saaniittartup’ tusarliussat marluk immikkorluinnaq ittut nalunaarutigisimavai. Inngili Gabrielimik ateqarpoq. Nunarsuarmut tikeraarnerni marlunni pingaaruteqaqisuni taakkunani pisimasut misissoriartigik.
Tassaavoq ukioq 3 ukiunik naatsorsuisarnitta aallartinnerata siorna. Judæap qatsissortaani, qularnanngitsumik Jerusalemimit ungasinngitsumiittumi, Jehovamut palasiusoq Zakariasimik atilik najugaqarpoq. Nuliilu Elisabet utoqqaapput meeraqaratillu. Zakarias Guutip naalaffiani Jerusalemimiittumi palasitut sulinissaminut tullinnguuppoq. Tassaniitillugu tassangaannaq inngilip Gabrielip tipigissaatilliiffiup talerpiata-tungaanit saqqummerfigaa.
Zakarias ersisorujussuanngorpoq. Gabrielilli eqqissisarpaa, oqarluni: „Erseqinak, Zakarias, qinnutigisat tusarneqarmat; nuliavillu Elisabetip ernertaarutissavaatit; taanna Johannesimik atsissavat.“ Taava Gabrielip nalunaarutigaa Johannes ’angissasoq Jehovap saani’ aamma ’Israelip kinguaavi amerlasuut Jehovamut saatsikkumaarai’. Zakariasilli tamanna upperisinnaanngilaa! Namminermi Elisabetilu utoqqaaqigamik meerartaarnissartik qularilluinnarpaa. Taamaattumik Gabriel oqarpoq: „Atalu, oqajuitsunngorlutit oqassaarumaarputit ulloq tamatuma piffissaa nalliutserlugu, oqaatsikka nalliuffissamikkut eqquutissasut upperinnginnakkit.“
Taamaalinerani inuit silataaniitut tupigusulerput Zakariasip naalaffimmiinnera sivisugalugu. Kiisamili animmat oqalussinnaananilu ussersorfigiinnarmatik paasivaat tupinnartumik misigisaqarsimasoq.
Naalaffimmi kiffartuuteqarnini naammassimmat Zakarias angerlarpoq. Erininarsinngitsorlu Elisabet naartulerpoq! Naartunermini qaammatit siulliit tallimat angerlarsimaannarpoq inunnit allanit avinngarusimalluni.
Kingusinnerusukkut Gabriel saqqummeqqippoq. Tamatumuunali kimut saqqummerpa? Niviarsiamut inuusuttumut ueqanngitsumut Mariamik atilimmut illoqarfimmi Nazaretimi najugaqartumut. Sumik tusarliussassaqarpa? „Guutimut saammaannarsigavit,“ Gabrielip Maria oqarfigaa. ’Atalu, ilumilissaatit ernertaarumaarlutillu; taanna Jesusimik atsissavat. Taanna angissaaq, qutsinnerussaartullu erneranik taaneqassaaq; Guutillu Jehovap tuniumaarpaa siuaasaata Davidip illussaarsuanik; Jakobikkunnullu kunngiussaaq naassaanngitsumik, naalagaaffialu soraarfeqassanngilaq.’
Qularissanngilarput Gabrielip tusarliussanik taakkuninnga nalunaarutiginninnini immikkut pisinnaatitaaffissuartut isigisimassagaa. Aamma Johannes Jesusilu pillugit atuarnerugutta paasissavarput sooq tusarliussat qilammeersut tamakku taama pingaaruteqartigisut. Timûtiusimut agdlagkat áipait 3:16; Lukas 1:5-33.
▪ Qilammit tusarliussat marluk pingaaruteqartut suut nalunaarutigineqarpat?
▪ Kikkunnut tusarliunneqarpat, kialu tusarliuppai?
▪ Soorliuna tusarliussat taama upperiuminaatsigisut?