Kapitali 125

Qisummi toqulersup naalliunnera

PINERLUT­TUT marluk Jesusimut kikiat­tugaaqataajar­tor­tin­neqar­put. Il­loqarfim­mut ungasip­pal­laan­ngitsumi Golgatamik taaguutimilim­mi, tas­sa „Niaqor­talik“-mi, ingerlaaqatigiit unip­put.

Tigusat atisaajar­neqar­put. Taava viin­nimik myrramik akulim­mik, qular­nan­ngitsumik ar­nanit Jerusalemimiunit sananeqarsimasumik, imigas­sin­neqar­put. Kikiat­tor­neqar­tus­sat imigas­samik tamatumin­nga nipaal­lisaatitalim­mik tunineqar­nis­saat Romamiut itigar­titsis­sutigisan­ngilaat. Jesusil­li ooqat­taaraluaramiuk piuman­ngilaa. Sooq? Qular­nan­ngitsumik kis­saatigigamiuk up­per­nermigut sak­kor­tuumik misilin­neqar­nermini tamatumani ilisim­maarin­nis­sani.

Maan­na Jesus qisum­mut siaar­neqar­poq as­sai niaquata qulaanut pisil­lugit. Taava kikis­sat takisuut as­saanut isigaanul­lu sak­kutuunit kikiagun­neqar­put. Kikis­sat neqaa ujaluilu aq­qusaarlugit kikiagun­neqarmata an­niar­nermik timaa equsaar­poq. Qisuk nap­par­neqarmat suli an­niar­nerungaaler­poq, tas­sami timaa kikiaan­nar­nit nivingatin­neqar­poq. Romamiul­li sak­kutuui sioorasaar­nagit Jesusip qin­nup­pai: „Ataataq! Isumak­keerfigik­kit suliar­tik nalum­mas­suk.“

Pilatusip qisuk ima al­lagar­talersimavaa: „Jesus Nazaretimiu, juutit kun­ngiat.“ Taamaalior­poq qular­nan­ngitsumik Jesusimik ataq­qin­nin­nini pis­sutigiin­nar­nagu, aam­mat­taarli juutit palasii Jesusimik toqumut pil­laanis­saminut im­minik pin­ngitsaaliipajaarsimasut uumigingaaramigit. Al­lagar­taq kik­kun­nit tamanit atuar­neqarsin­naanias­sam­mat Pilatusip oqaatsit as­sigiin­ngitsut pingasut atorlugit al­las­simavaa — tas­sa hebræerisut, naalagaaf­fim­mi oqaatsisut pingaar­ner­tut latinerisut aam­malu silarsuaq tamak­kerlugu oqaatsisut grækerisut.

Palasiunerit, ilaatigut Kajfas An­nasilu, ajual­lat­torujus­suup­put, al­lagar­tam­mi oqaaser­taasa iluarin­nip­pasis­sut ajugaasimaar­nerat pik­kunaal­lisip­paa. Taamaat­tumik akerliliip­put: „Ima al­las­san­ngik­kaluar­putit: ’Juutit kun­ngiat’, imali: ’Oqar­poq: Juutit kun­ngigaan­nga’.“ Palasit suliapilum­min­ni ator­toris­saarutitul­lusooq atorsimam­man­ni kamaqaluni Pilatus asis­suer­palul­luni oqar­poq: „Al­lak­kak­ka al­lagaraak­ka.“

Palaser­pas­suit toqutsiviup eq­qaanut maan­na katersuup­put, al­lagar­tal­lu oqaaser­tai akerliuniarfigilerlugit. Sanhedrinimi eq­qar­tuus­sinermi nalunaajaatit ilumuun­ngitsut saq­qum­miun­neqarsimasut uteqat­taar­paat. Taamaat­tumil­lu tupin­nar­pal­laan­ngilaq sanioq­quasut Jesus mitaaligilermas­suk, asis­suer­pasil­lutik ileqimisaar­torlutik oqalul­lutil­lu: „Ul­lut pingasut naagin­narlugit naalaf­fim­mik ingutserisutit qarmaq­qil­lugulu, im­minik an­naan­niarit; Guutip er­nerip­patit [qisum­mit] aq­qarit!“

„Al­lat an­naat­taraluaramigit im­minik an­naan­neq sapiler­poq,“ palasiunerit up­perisarsior­nik­kul­lu peqatigisaat suaar­tar­put. „Israelik­kut kun­ngigip­pan­ni maan­na [qisum­mit] aq­qarli, taava up­periumaar­par­put. Guuti tatigaa; taas­suma an­naal­liuk maan­na nuan­nariguniuk, ’Guutip er­nerigaani’ oqarmat.“

Taak­kunan­nga sun­ner­neqarlutik aam­mat­taaq sak­kutuut Jesus mitaatigiler­paat. Viin­ni seer­nar­toq sigguinut paner­tunut at­tuutsingajan­nguatsiarlugu uumisaar­pasil­lutik imeq­qusaar­paat oqaluutigalutik: „Juutit kun­ngigip­patsit, im­minik an­naan­niarit!“ Al­laat pinerlut­tut marluk — Jesusip taler­piata saamiatalu tungaani kikiat­tugaasut — Jesus quias­suaatigaat! Eq­qarsaatigeriaruk, inuup inuit inuusimasut pingaar­ner­paar­taata, Jehova Guuti ilagalugu tamanik pin­ngor­titseqataasimasup, asis­sor­neqar­nini mitaatigineqar­ninilu taama it­tut naam­magalugit atorai!

Jesusip atisai sak­kutuut tiguaat sisaman­ngorlugil­lu agguarlugit. Im­meraatigaal­lu, suna kia pis­saneraa. An­noraava ilorleq, ilivitsukaan­ngorlugu sanaajusoq, pitsaal­luin­nar­tunik sanaajuvoq. Taamaat­tumik sak­kutuut im­min­nut oqaluup­put: „Taan­na aggor­nagu im­meraatigisigu kia pis­sagaa.“ Taamaalil­lutik nalugaluarlugu al­las­simaf­fik man­na eq­quutip­paat: „Atisak­ka im­min­nut agguar­paat, an­noraaralu im­meraatigaat.“

Pinerlut­tul­li aap­paata paasiler­paa Jesus ilumut kun­ngiusoq. Taas­suma pinerlut­toqatini naveer­paa: „Il­lil­luun­niit Guuti [mianerin­ngiliuk], eq­qar­tuus­sut taan­naasoq atorak­ku? Mas­sami uagut eq­qorsimasumik ator­par­put qanoq ilior­nit­ta naligisaan­nik pineqarat­ta; unali sumik as­suar­nar­tuliun­ngilaq.“ Taava Jesus qin­nuigaa: „Jesus! Naalagaal­lutit tikiuk­kuit eq­qaaginga!“

„Ilumut, ul­lumi oqarfigaak­kit: Paratiisimeeqatigiumaar­parma,“ (NV) Jesus akivoq. Neriorsuut taman­na eq­quutis­saaq Jesus qilam­mi kun­ngiul­luni pinerlut­toq peq­qis­simisoq taan­na nunami paratiisiusumi, Harmagedonip kingor­na aniguisut suleqataasalu im­mik­kut pisin­naatitaaf­figalugu suliariumaagas­saan­ni, makitip­pagu. Mattæus 27:33-44; Markus 15:22-32; Lukas 23:27, 32-43; Johannes 19:17-24.

▪ Viin­ni myrramik akusaq sooq Jesusip imeruman­ngilaa?

▪ Qisuup Jesusip kikiat­tugaaf­fiata al­lagar­taler­neqar­neranut suna pis­sutaan­nguatsiar­pa, aam­ma taman­na pil­lugu Pilatus palasiuneril­lu qanoq im­min­nut oqaluup­pat?

▪ Jesus kikiat­tugaaf­fim­mini qanoq mitaatigineqar­pa, aam­ma sooq?

▪ Jesusip atisai pil­lugit siulit­tuut suna eq­quutin­neqar­pa?

▪ Pinerlut­toq qanoq al­latut isumaqaler­pa, qin­nutaalu qanoq ilil­luni Jesusip naam­mas­sis­savaa?