Kapitali 101

Simonip illuani Betaniamiittumi

JESUS Jerikomit Betaniamukar­poq. Aq­qul­lut­tuum­mat kilometeril­lu 19-it mis­saan­nisut isorar­tutigaluni ul­lup an­nersaani angalavoq. Jeriko im­map qaanit meterit 250-it mis­saan­nisut qaf­fasitsigisumiip­poq, Betanialu im­map qaanit meterit 760-it mis­saan­nisut qaf­fasitsigisumiil­luni. Soorlu eq­qaamas­sagunarit Lazarus qatan­ngutinilu ar­nat Betaniami najugaqar­put. Nunaan­narmi il­loqarfeeraq taman­na Jerusalemip avataanit kilometerit pingasut mis­saan­nisut ungasitsigisumiip­poq, Uuliap qaq­qaata kangimut sivingar­naniil­luni.

Inup­pas­suit poorskisioriat Jerusalemimut tikerareersimap­put. Ileq­qulersuuteqar­nis­samin­nut minguiarumal­lutik siusinaarlutik aggersimap­put. Imaas­sin­naavoq timimik toqungasumik al­lamil­luun­niit im­min­nik mingut­tuun­ngor­titsisumik at­tugaqarsimasut. Taamaat­tumik minguiar­nis­samut maleruagas­sat maleruar­paat akuerineqarsin­naasumik poorski nal­liut­torsiutiginias­sagamik­ku. Tikiaarsimasut tamak­ku naalaf­fim­mi katersuutsil­lutik oqal­lisigaat Jesus poorskisioriar­tus­sanersoq.

Jerusalemimi Jesus aalas­saataasorujus­suuvoq. Tamarmik nalun­ngilaat up­perisarsior­nik­kut pisor­tat taan­na tigusarerusuk­kaat toqun­nias­sagamik­ku. Al­laat peq­qusisimap­put paasineqaruni sumiin­nersoq im­min­nut oqaatigineqas­sasoq. Taak­kua pisor­tat qaam­matini kingul­liunerusuni pingasoriarlutik — tupiusaliorfim­mik nal­lius­sivim­mi, naal­laf­fiup atoq­qeq­qaarfianik nal­lius­sinermi Lazarusimil­lu toqusunit makititsereer­nerata kingor­na — Jesus toqoriaraluar­tarsimavaat. Taamaat­tumik inuit isumaliutigaat Jesus tak­kuteq­qis­sanersoq. „Qanoq isumaqar­pisi?“ apereqat­taap­put.

Poorskili, juutit qaam­matisiutaat naaper­torlugit nisanip 14-iani pisoq, ul­lunik arfinilin­nik sioq­qul­lugu Jesus Betaniamut pivoq. Tal­liman­ngor­nermi un­nuk­kut, nisanip 8-ta aal­lar­tiler­nerani, Betaniamut tikip­poq. Sabbatimi — tal­liman­ngor­nermi seqer­nup tarrin­neraniit arfinin­ngor­nermi seqer­nup tarrin­neranut — angalanis­saq juutit inatsisaan­ni iner­teq­qutaam­mat arfinin­ngor­nermi Betaniamukarluni angalasin­naasiman­ngilaq. Qular­nan­ngitsumik sior­natigut iliorsimanermisut Jesus Lazarusip angerlarsimaf­fianukar­poq, tas­sanilu tal­liman­ngor­nermi un­nuil­luni.

Arfinin­ngor­nermi Jesus ikin­ngutinilu Betaniamiut ilaan­nit neriar­toq­qusaap­put. Qaaq­qusisoq tas­saavoq Simon, qular­nan­ngitsumik sior­natigut Jesusimit pupis­suujun­naarsitaasimasoq. Mar­ta aalaniarluar­tuusoq pisar­nermisut pulaar­tunut inoroorsaar­poq. Marial­li pisar­nermisut Jesus sam­mineruaa, tamatumuunak­kut aalas­saataangaatsiar­tumik.

Qum­muat­taq, imaluun­niit puiaasaq, uuliamik tipigis­sumik, „nardusimik tar­nusiamik akusiman­ngitsumik“, punditut ataatsitut atsigisumik imalik Mariap am­mar­paa. Akisoorujus­suuvoq. Aap, ukiumi ataatsimi aningaasarsiat mis­saan­nisut naleqar­tigaaq! Mariap uulia Jesusip niaquanut isigaanul­lu kuim­magu isigaalu nutsaminik al­lar­terlugit il­lup ilua tamarmi tipigis­sivoq.

Ajoqersuk­kat kamaler­put oqarlutil­lu: „Sooq taama kuilus­sin­nar­neqar­pa?“ Judas Iskariotilu oqar­poq: „Tar­nut man­na sooq aningaasarsiutigineqan­ngila 300 denarinik akilersil­lugu piitsunut tunis­sutis­sanik?“ Iluamil­li oqaatigalugu Judasip piitsut isumakuluutigin­ngilai, ajoqersuk­kam­mi aningaasivian­nit til­lit­tarami.

Jesusil­li Maria il­ler­paa. „As­suareqinagu,“ peq­qusivoq. „Sooq ar­naq una erloqisip­pisiuk? Ajun­ngitsumim­mi iliorfigaanga. Piitsunik najor­teqaan­nar­pusi, uangali najor­tigit­tuin­nas­san­ngilas­singa. Tar­nutis­sarli man­na timin­nut kuigamiuk, tas­sa ilivermut ilisaas­sagama taamaalior­poq. Ilumut oqarfigaas­si: sumiluun­niit silarsuarmi tamarmi [tusagas­saq nuan­nersoq] taman­na oqaluutigineqaraangat, taan­nat­taaq oqaatigis­savaat qanoq iliorsimasoq eq­qaal­lugu.“

Jesus ul­loq un­nuarlu sin­nerlugit Betaniameereersimavoq, tamaaniin­neralu sumi tamaani tusagaalereersimavoq. Amerlasuut Simonip il­luanukaap­put, Jesusiin­naan­ngitsoq aam­mat­taarli Lazarus tas­saniit­tor­taaq takuniarlugu. Taamaat­tumik palasiunerit isumalioqatigiip­put Jesus Lazarusilu toqun­niarlugit. Taamaalior­niar­neran­nut pis­sutaavoq inup­pas­suit Jesusip ajorun­naarsitaa nam­min­neq takugamik­ku taas­sumun­nga up­per­tun­ngor­nerat. Up­perisarsior­nik­kut pisor­tat taak­ku ila ajormata! Johannes 11:55–12:11; Mattæus 26:6-13; Markus 14:3-9; Apustilit suliaannik allakkat 1:12.

▪ Naalaf­fim­mi Jerusalemimiit­tumi suna oqal­lisigineqar­pa, sooq?

▪ Sooq Jesus tal­liman­ngor­nermi, arfinin­ngor­nermiun­ngitsoq, Betaniamut tikis­simas­sava?

▪ Betaniamut pereerami Jesus sumi sabbatisiorsimas­sagunar­pa?

▪ Aalas­saataasumik Maria qanoq ilior­pa, Jesusil­lu qanoq il­ler­paa?

▪ Palasiunerit ajus­susian­nut suna qulaareqataava?