Sooq Jesus nunamut pisoq
Kapitali 24
Sooq Jesus nunamut pisoq
JESUS Kapernaumimi ippassaq ulapaarsimaqaaq, unnummallu inuit Kapernaumimiut napparsimasortatik tamaasa ilagalugit tassunnakaasimapput ajorunnaarsinniassammagit. Jesus imminut piffissaqarfiginngivissimavoq.
Aqaguani ullaannguusoq Jesus anivoq kisimiikkusulluni. Inoqanngitsumukarpoq akornusersorneqarani Ataataminut qinusinnaajumalluni. Kisimiinnerali sivisuallaanngilaq, tassami Peterip ilaasalu paasileramikku peqanngitsoq anipput ujarniarlugu.
Jesus nanigamikku Peter ima oqarpoq: „Tamarmik ujarpaatsit.“ Kapernaumimiut kissaatigaat Jesusip najussagaatik. Jesusip imminnut iliuuserisimasai pingaartippaat! Kisianni tupinnartuliornikkut ajorunnaarsitsisarnissani pissutiginerullugu Jesus nunamut pisimava? Nammineq qanoq oqarpa?
Bibelimi oqaluttuat ilaat naapertorlugu Jesusip ajoqersukkani ima akivai: „Illorpannguaqarfinnut qaninnerusunut piartorta, tassanissaaq oqaluussissagama. Tamannami pillugu aallartitaavunga.“ Naak illoqarfiup inuisa uninngaqqulluni qinnuigigaluaraanni Jesusip ima oqarfigai: „Nunaqarfinnut allanuttaaq Guutip naalagaaffianik iivangkiiliu oqaluutigisassaraara; tamanna pillugu aallartitaagama.“
Aap, Guutip naalagaaffiata, Ataatami aqqanik qutsissisitsisussap aammalu inuit ajuutaannik tamanik qaqugumut nungutitsisussap, oqaluussissutiginissaa pinerullugu Jesus nunamut pisimavoq. Tupinnartuliornikkullu ajorunnaarsitsisarpoq Guutimit aallartitaanini ersersinniarlugu. Aammattaaq ukiut hundredellit arlaqartut tamatuma siorna Moses tupinnartuliortarsimavoq Guutimut kiffaanini nalorninaallisinniarlugu.
Maanna Jesus illoqarfinni allani oqaluussissalluni Kapernaumimit aallarmat ajoqersugaasa sisamat ilagaat. Tassaapput Peter qatanngutaalu Andreas, aammalu Johannes qatanngutaalu Jakob. Eqqaamassannguatsiarpat tamanna sapaatip-akunneranik sioqqullugu taakku siullerpaajullutik Jesusimit qaaqquneqarsimasut angalaqataallutik suleqataanissaminnut.
Jesus ajoqersugaalu sisamat Galilæami oqaluussinerminni angusaqarluarput. Syria tamakkerlugu Jesus tusaamaneqalerpoq. Inuppassuit Galilæameersut, Judæameersut Jordanillu kuussuata illua-tungaaneersut Jesusimik ajoqersugaanillu malinnilerput. Markus 1:35-39; Lukas 4:42, 43; Mattæus 4:23-25; Mosesimik allakkat aappaat 4:1-9, 30, 31.
▪ Kapernaumimi ullaakkut qanoq pisoqarpa?
▪ Jesusip nunamut pineranut suna pissutaava, aammalu tupinnartuliortarneranut suna siunertaava?
▪ Jesus Galilæami angalalluni oqaluussimmat kikkut ilagaat, suliaanullu inuit qanoq qisuariarpat?