Suut-uku inuk mingutsittaraat?
Kapitali 56
Suut-uku inuk mingutsittaraat?
JESUS assortorneqaraluttuinnarpoq. Ajoqersugaasa ilarpassuisa qimappaat, juutillu ukiumi 31-mi poorsikimi Jerusalemimi iliorsimanermissut Judæami allaat toqunniaraluarpaat.
Maanna ukiumi 32-mi poorskerpoq. Guutip inassutaanut naalalluni Jesus poorskisioriartorluni qularnanngitsumik Jerusalemimukaqqippoq — mianersorlunili, inuunerami navianartorsiorpoq. Nalliuttorsuaq naammat Galilæamut uterpoq.
Jerusalemimi farisæerit allakkanillu ilisimasut ujarmanni Jesus immaqa Kapernaumimiippoq. Upperisarsiornikkut inatsisiminnik unioqqutitsinerarnissaanut periarfissarsiorniarput. „Sooq ajoqersukkavit siuaasatsinnit maligassarsiat saneqquttarpaat?“ aperipput. „Assatimmi asattarinngilaat nerisaraangamik.“ Ikutsit tikillugit errortorluni ileqqulersuummik maleruaanngitsoorneq unioqqutitsinertut ingasattutut farisæerinit isigineqarpoq, naak tamanna Guutimit piumasaqaataanngikkaluartoq.
Unnerluussutaat akinagu namminneq ajortuullutik piaaralutillu Guutip inatsisaanik unioqqutitsinerat Jesusip tikkuarpaa. „Soormi taava ilissi Guutip inassutai saneqquttarpisigik maligassarsiasi pillugit?“ aperai. „Guutimi ima peqqusivoq: ’Ataatat anaanallu ataqqikkit’ imalu ’Ataataminulluunniit anaanaminulluunniit oqarnittoq toqussaaq.’ Ilissili oqararaasi: ’Angumminulluunnit arnaminulluunniit ima oqartoqarpat: ’Uannit pissarsiassaraluit naalaffimmut tunissutaavoq,’ ’Taassuma angunni arniluunniit ataqqisariaqanngilai.’“
Farisæerit ajoqersuutigigaluarpaat aningaasat, pigisat allallu Guutimut tunissutitut illernartitaasut naalaffiup pigisarigai taamaattumillu siunertanut allanut atorneqarsinnaanngitsut. Ileqquuvorli tunisisup nammineq tunissutiminik paaqqutarinnittarnera. Ajoqersuutigaat angut oqaannarluni aningaasaatini pigisaniluunniit „korban“-iusut — Guutimut naalaffimmulluunniit tunissutaasut — angajoqqaaminik, immaqa annikilliortunik, ikiuisussaassutsi uniortissinnaalluaraa.
Farisæerit ajorlutik Guutip inatsisaanik allanngortitsinerat eqqortumik pilluni Jesusip kamaatigaa. Oqarpoq: „Taamalu Guutip inassutaa atorunnaarsipparsi maligassarsiasi pillugit. Taatuuku ilumoortuusaarniartut! Esajasip eqqorluarsimasumik takorluukkersaarutigaasi oqarami: ’Inuit ukua qarluminnik ataqqisarpaannga, uummataasali ungasippaannga. Asuliinnaq kiffartuuttaraannga, ajoqersuutit inuinnaat intsisigisaat ajoqersuutigisaramikkik!’“
Inuppassuit illuartitersimannguatsiarput farisæerit sassarlutik Jesus apersorniassammassuk. Farisæerilli naqqereeramigit akissutissaarummatalu inuppassuit Jesusip qanilleqquai. „Tusarnaaritsi,“ oqarpoq, „paasiniarlugulu: Qanikkut isertut inuk mingutsittarinngilaat, qanikkulli anisut inuk mingutsittaraat!“
Kingorna illumiileramik ajoqersugaasa aperaat: „Ilisimavigit farisiiarit oqaaseq tamanna tusaramikku mamiatsattut?“
„Naasut Ataatama qilammiusup ikkussugarinngisai tamarmik mannguminnut allaat nutsunneqassapput,“ akivoq. „Alarsigik! tappiillutik tappiitsoqatitik tasiorpaat. Tappiitsulli tappiitsoqanni tasioruniuk itersamut nakkaqatigiissapput.“
Peterip ajoqersukkat sinnerlugit suup inuk mingutsittarneraa nassuiaqqummagu Jesus tupaallannguatsiarpoq: „Ilissiluunniit suli siunersisaqanngilasi? Suli paasinngilisiuk qanikkut isertut tamarmik nassanut pisarmata samuunalu anisarlutik? Qanikkulli anisut uummammit pisaraat, tamakkualu inuk mingutsittaraat. Uummammit pisarput isumapiluit, toqutsinerlu arnaaneqarnerlu uersaanerlu tillinnerlu nalunaajaatillu sallusut mitalliinerillu. Tamakkua inuk mingutsittaraat, assanili asassimanagit inuk nerigaluaruni tassannga mingutsissanngilaq.“
Eqqiluisaarneq nalinginnaasoq Jesusip pinngilaa. Oqanngilaq nerisassiulernermi nerilernermiluunniit errortortoqartassanngitsoq. Avoqqaarisaa tassaavoq upperisarsiornikkut siuttut siuaasaminnit maligassarsiaminnik Guutip oqaasianut akerliusunik aalajangiussinermikkut peqqusersiorlutik Guutip naapertuilluassusianik sanioqqutitsiniartartut ilumoortuusaarnerat. Tassa imaappoq: suliat ajortut inummik mingutsitsisarput, Jesusillu ersersippaa tamakku uummammit pisartut. Johannes 7:1; 5 Moses 16:16; Mattæus 15:1-20; Markus 7:1-23; 2 Moses 20:12; 21:17; Jesaja 29:13.
▪ Maanna Jesus qanoq assortorneqalerpa?
▪ Farisæerit qanoq unnerluppat, qanorli ililluni Jesusip ersersippaa piaaralutik Guutip intsisaanik unioqqutitsisuusut?
▪ Suut inuk mingutsittarpaat?