Tupinnartuliornikkut tuusintilikkuutaanut nerisassat
Kapitali 52
Tupinnartuliornikkut tuusintilikkuutaanut nerisassat
JESUSIP apustilii Galilæami oqaluussillutik pissanganartumik angalareersimapput. Maanna, Johannes Kuisisup toqutaariitsiarnerani, Jesusimut uterput misigisaminnillu tupinnartunik oqaluttuullugu. Jesusip takusinnaavai qasusut, inuppassuillu takkussuuttut qimagussuuttullu pissutigalugit nerinissaminnulluunniit piffissaqanngimmata oqarpoq: ’Qasuersaarfigisinnaasassinnut inoqanngitsumukarta.’
Umiatsiaminnut issoraapput, qularnanngitsumik Kapernaumip eqqaaniillutik, qularnanngitsumillu Betsajdap illuatungaaniittup Jordanip kuussuata kangiatungaanut inoqanngitsumukarlutik. Aallarmatali inuppassuarnit takuneqarput, sulilu amerlanerit tamanna tusarpaat. Inuppassuit tamakku kuuk sinerlugu arpallutik siuarput, umiatsiarlu tulammat niuffiorput.
Jesus umiatsiamit niuvoq inuppassuillu isigalugit. Nalligingaalerpai savatut paarsisoqanngitsutut immata, napparsimasortaallu ajorunnaarsippai sorpassuarnillu ajoqersorlugit.
Piffissaq ingerlavoq. Ajoqersugaasa ornippaat oqarfigalugulu: „Tamanna inoqanngilaq, ullorlu naalerpoq; inuit uku ilinnit aallartikkit, nunaqarfinnit nerisassarsiniariartoqqullugit.“
Jesusili akivoq: „Ilissi nerlersigik.“ Qanoq iliornissani nalornisiginngikkaluarlugu Filip misilinniarlugu aperaa: „Sumit timiusarsissaagut ukua nerisassaannik?“
Filip isumaqarpoq qanoq ilioriusissaqanngilluinnarlutik. Angutaannaat 5000-iupput, arnallu meeqqallu ilanngullugit qularnanngitsumik 10.000-it angumavaat! „Timiusat aningaasannguit marlunnik hundredellit naligisaat amigaqqajaqaat tamaasa pissillatsiaannassallugit,“ Filip akivoq.
Immaqa ersersinniarlugu inunnut taama amerlatigisunut nerisassarsinissaq ajornarluinnartoq Andreas oqarpoq: „Nukappiaraq tamaaniippoq suaasiassanit timiusanik tallimanik aalisagannguanillu marlunnik pilik,“ nangilunilu: „Tamakkuli inunnut taama amerlatigisunut amigarujussuaqaat.“
Upernaajummat, ukiumi 32-mi poorskingajalerluni, qorsooqqissunik ivigaqaqaaq. Jesusip ajoqersukkaminut inuit 50-ikkuutaarlugit 100-ikkuutaarlugillu issaateqquai. Timiusallu tallimat taakku aalisakkallu marluk tiguai, qilammut aarlorluni, pilluaqqussummillu oqaaseqarluni. Taava timiusat aalisakkallu aggorpai. Taakku ajoqersukkaminut tunniuppai, taakkualu inuppassuarnut agguaappaat. Tupinnartumillu pisoqarpoq — tamarmik neringaaramik qaarsillarput!
Taava Jesusip ajoqersukkani oqarfigai: „Affakut sinnerusut katersorsigik asiusoqaqqunagu.“ Taamaaliorput — affakunik sinneruttunik nuiorakkat aqqaneq-marluk ulikkaarlugit immerpaat! Mattæus 14:13-21; Markus 6:30-44; Lukas 9:10-17; Johannes 6:1-13.
▪ Sooq Jesusip ajoqersukkani inoqanngitsumukkaappai?
▪ Jesusip ajoqersukkani sumunnaappai, qasuersaarusunnerigaluartillu sooq pinngitsoorpaat?
▪ Ulloq naalermat ajoqersukkat Jesus qanoq kajumissaarpaat, qanorli ililluni inuppassuit isumagai?