Tupiusaliorfiup nalliussineqarnerani pisut
Kapitali 66
Tupiusaliorfiup nalliussineqarnerani pisut
KUISEREERNERMI kingorna ukiut pingasungajaat ingerlaneranni Jesus sumi tamaani ilisimaneqalersimavoq. Tupinnartuliai inunnit tuusintilikkuutaanit takuneqarsimapput, sulineranillu tusatsiakkat nunamut tamarmut anngussimapput. Tupiusaliorfik nalliussiniarlugu inuit maanna katersuummata Jesus ujarneqalerpoq. „Naak taanna?“ aperipput.
Jesus pillugu isummat assigiinngeqaat. Ilaat oqarput: „Ajunngitsuuvoq.“ Ilaalli oqarput: „Naaggali, inuit salloqqittaannarpai.“ Nalliussiviup ulluini siullerni taamatut nipikitsuliuutigineqaqaaq. Juutilli siuttuisa kamannissaat siooragigamikku kikkut tamarmik tutsaanni illersorusunngilaat.
Nalliussivik qiteraraa Jesus tikippoq. Naalaffiliarpoq, inuillu ajoqersuillaqqissutsiminik tupigusutsillugit. Jesus juutit ilinniarfiini ilinniartuusimanngimmat juutit tupigusupput: „Qanoq ililluni uuma ilinniartitaanani allakkat ilisimavai?“
„Ajoqersuutiga uanga piginngilara, aallartitsisimali pigaa,“ Jesus nassuiaavoq. „Kinaluunniit taassuma peqqusaanik iliorumasoq misigissaaq ajoqersuut tamanna Guutimit pisimanersorluunniit uannilluunniit oqalunnersunga.“ Jesusip ajoqersuutaa Guutip inatsisaanut naapertuulluinnartuuvoq. Taamaattumillu ersarilluinnassaaq nammineq ataqqinaatissani pinnagu Guuti ataqqinaatissinniaraa. „Mosesip inatsisinik tuninnginnerpaasi?“ aperaaq, avoqqaaralugillu: „Massalu inatsisinik malinnittoqanngilasi.“
Jesus apereqqippoq: „Sooq toqunniarpisinga?“
Toqunniarneqarnera katisimasorpassuit ilisimanngilaat; qularnanngitsumik amerlanersaat allamiuupput Jerusalemimullu nalliussiartorsimasuullutik, eqqarsaatigiuminaatsissavaallu taama ajoqersuillaqqitsigisup toqunniarneqarsinnaanera. Jesus taama eqqarsarami ajulaarsimassaaq. „Anersaapiloqarputit!“ akipput. „Kia toqunniarmatit?“
Juutit siuttuisa toqunniarpaat, katersuussimasulli tamanna immaqa naluaat. Tamanna ukiumik ataatsimik affarmillu sioqqullugu sabbatimi Jesus angummik ajorunnaarsitsigami juutit siuttuinit toqunniarneqarsimavoq. Inuit isumaat silaqassutsimut akerliusoq erseqqissarniarlugu Jesusip aperai: „Inuk sabbatimi Mosesip inatsisai uniorneqaqqunagit kipineqartarmat, sullusi ajoraasinga inuk tamaat sabbatimi ajorunnaarsikkakku? Ersitsorsiorlusi eqqartuusseqinasi, iluartumilli eqqartuussigitsi!“
Inuit ilaasa Jerusalemimeersut pissutsit qanoq innerat nalunngilaat, oqarlutillu: „Tassaanngilaa toqunniagaat? Atalu kisinnani oqaluppoq inerterneqaranilu. Siulersortitta una ilumut Kristusiusoq ilisimallualerneramikku?“ Nangillutillu nassuiarpaat sooq upperinngikitsik Jesus tassaasoq Messias neriorsuutigisaasoq: „Kisianni una sumit pisoq ilisimavarput, Kristusili tikiuppat sumit pisoq ilisimaneqassanngilaq.“
Jesus akivoq: „Ilisaraassingami, sumillu pisunga ilisimavassinga; isumannillu tikiutinngilanga, aallartitsisigali tassa ilumoortoq ilisarinngisarsi. Uangali ilisaraara, taassumannga pigama, taassumalu aallartippaanga.“ Taava tigusareriaraluarpaat, parnaarussaatinniannguatsiarlugu toqutaatinniannguatsiarluguluunniit. Iluatsitinngillalli, sulimi Jesusip toqunissaanut piffissanngunngilaq.
Amerlasuulli Jesusimut uppertunngorput, pissutissaqarluarlutik. Suliarisimasaami tupinnangaarput! Immakkummi pisussimavoq, anori qatsortissimallugu, imaq mallerunnaarsissimallugu, iffiaalunnguit aalisagaalunnguillu atorlugit inuit tuusintilikkuutaat nerisissimallugit, napparsimasut ajorunnaarsissimallugit, iloqiaat pisulersissimallugit, tappiitsut tappissisissimallugit, pupissut ajorunnaarsissimallugit toqusullu makitissimallugit. Taamaattumik aperipput: „Kristus tikiukkuni uuma nalunaaqqutiliaanit amerlanernik nalunaaqqutiliorumaarnerluni?“
Katersuussimasut taama nipikitsuliortut tusaramikkik farisæerit palasiunerillu kiffanik aallartitsipput Jesus tigusareqqullugu. Johannes 7:11-32.
▪ Tupiusaliorfimmik nalliussisunut qaqugukkut Jesus apuuppa, inunnillu qanoq oqaluuserineqarpa?
▪ Sooq ilaasa Jesus anersaapiloqarsoraat?
▪ Jerusalemimiunit Jesus qanoq isumaqarfigineqarpa?
▪ Sooq inuppassuit Jesusimut uppertunngorpat?