Inuk toqusuitsumik anersaaqarpa?

TOQUP kingor­na inuuneqar­pa? Inuit ukiuni tusindilin­ni taman­na eq­qarsaatigiuar­paat, pif­fis­sal­lu ingerlanerani isum­mat as­sigiin­ngitsor­pas­suit saq­qum­miun­neqarsimap­put.

Silarsuarmi tamarmi, soorlu qeqer­tani Maneras­suarmiit­tuni — Polynesiami, Melanesiami Mikronesiamilu — amerlasuut up­peraat inuk toqugaangat „anersaaq“ uumaan­nar­tar­toq. Ilumut inuup iluaniit­toqar­tar­pa inuk toqugaangat ingerlaq­qit­tar­tumik? Inuup anersaava sunaava? Toqugaangat­ta taan­na qanoq pisar­pa? Guutip oqaasiani Biibilimi ilumoor­tumik naam­magisimaar­nar­tumil­lu akineqar­poq.

Anersaaq sunaava?

Oqaatsit Biibilimi „anersaaq“-mik nutser­neqar­tut tun­ngaviusumik isumaat tas­saavoq „aner­neq“ imaluun­niit „anersaar­tor­neq“. Oqaatsil­li anersaar­tor­nermit isumaqar­nerup­put. As­sersuutigalugu Biibilimik al­lat­tut ilaat Jaaku al­lap­poq: „Timi anersaar­tun­ngitsoq toqungasoq.“ (Jaaku 2:26) Tas­sa anersaaq timimik uumas­suseqalersitsisuuvoq.

Uumas­suseqalersitsisoq taan­na silaan­naq ilum­mut silam­mul­lu anersaarut­tagar­put anersaar­tor­nerin­naasin­naan­ngilaq. Sooq taamaas­sin­naan­ngila? Pis­sutigalugu anersaar­tor­neq unik­kaangat timip sananeqaatai suli uumasarmata sivikitsumik — World Book Encyclopedia malil­lugu „minutsialun­ni“. Inuup uum­marsar­neqarsin­naaneranut timil­lu pisataasa ilaasa inum­mut al­lamut nuun­neqarsin­naaneran­nut taman­na pis­sutaavoq. Kisian­ni uumas­sut timip sananeqaataaniik­kun­naar­pat, uum­marsaagaluar­nerit tamarmik asuliin­nas­sap­put. Anersaar­tor­nerit tamarmiugaluarunik timip sananeqaataa ataaserluun­niit uumas­suseqalersis­sin­naas­san­ngilaat. Tas­sa anersaaq  tas­saavoq uumas­sut ersin­ngitsoq — uumas­suseqalaar­neq — timip sananeqaataanik uumaan­nar­titsisoq. Uumas­sut taan­na anersaar­tor­nik­kut atatin­neqar­toq. — Jobi 34:14, 15.

Anersaaq taan­na inun­niin­naq nas­saas­saava? Apeq­qut taan­na Biibilimi akineqar­poq. Kun­ngi silatooq Salomoni al­lap­poq: „Kia ilisimavaa inuit anersaavat qum­mukar­tar­nersoq qilam­mut, aam­ma nersutit anersaavat am­mukar­tar­nersoq nunap iluanut?“ (Nalunaajaasup oqaasii 3:21, Testamentitoqaq 1989-imeersoq) Tas­sa uumasut inuil­lu anersaaqar­put. Qanoq paasisariaqar­pa?

Anersaaq imaluun­niit uumas­sut in­naal­lagis­samut maskiinamik ator­toris­saarum­mil­luun­niit ingerlatitsisin­naasumut as­sersuun­neqarsin­naavoq. In­naal­lagiaq ersin­ngitsoq as­sigiin­ngitsunut ator­neqarsin­n­naavoq, sak­ku nukis­samik pilersugaa apeq­qutaal­luni. As­sersuutigalugu kis­sarsuut kis­samik pilersuivoq; computerip paasis­sutis­sat suliarisin­naavai naatsorsuisin­naal­lunilu, fjer­nsynil­lu as­silis­sat nipilu pilersit­tar­pai. In­naal­lagis­sal­li sarfaa pigisatut iluseqaler­nanilu pis­suseqaler­neq ajor­poq. Nukiuvoq taamaat­tuas­sal­lunilu. Taamatut­taaq uumas­sutip pin­ngor­titat isik­ku pigin­naas­sutsil­lu uumatitami ilisar­naatigisaat atuler­neq ajor­pai. Kinaas­susiliun­ngilaq eq­qarsarsin­naananilu. Inuit uumasul­lu ’as­sigiim­mik uumas­sutigisamin­nik anersaaqar­put’. (Nalunaajaasup oqaasii 3:19, Testamentitoqaq 1989-imeersoq) Taamaat­tumik inuk toqugaangat anersaaq anersaatut pis­suseqarluni silarsuarmi al­lami uumaan­nar­neq ajor­poq.

Taava toqusut qanoq pis­suseqar­pat? Inuk toqugaangat anersaaq qanoq pisar­pa?

„Issunngussaatit“

Angutip siul­liup Adamip piaaraluni Guutip inatsisai unioq­qutim­magit, Jehovap oqarfigaa: „Kiak­kiul­lugu nerisas­sarsius­saatit  is­sumut uterserlutit, tas­san­nga pigavit. Is­sumim­mi pivutit, is­sun­ngus­saatil­lu.“ (1 Mosesi 3:19) Jehovap is­sumit pin­ngor­tin­ngik­kal­larmani Adami sumiip­pa? Sumiin­ngilaq! Piun­ngivip­poq. Taamaat­tumik Jehova Guuti oqarami Adami ’is­sun­ngus­sasoq’, Adamip toqunis­saa pivaa. Adami anersaat silarsuaan­nukas­san­ngilaq. Toquguni uumas­suseeruteq­qis­saaq, inuujun­naarluni. Toqu — inuuneqan­ngis­suseq — pil­laatisiaraa, inuunini silarsuarmi al­lami ingerlateq­qis­san­ngilaa. — Romamiut 6:23.

Toqusum­mi al­lat? Toqusut qanoq is­susiat Oqaluus­sisar­tup oqaasii 9:5, 10-mi erseq­qil­luin­nar­tumik al­laatigineqar­poq: „Toqungasul­li sun­nguamil­luun­niit ilisimasaqan­ngil­lat! . . . sulias­saqan­ngim­mat ataqatigiin­neqaraniluun­niit ilisimasas­sanik ilisimas­susermil­luun­niit peqar­nani.“ Taamaat­tumik toqup as­sigaa piun­ngis­suseq. Tus­siaasior­tup inuup toqunera al­laaseraa: „Aner­ningerunik kingumut is­sun­ngus­sap­put, pilersaarutaal­lu ul­loq taan­na maangaan­nas­sap­put.“ — Tus­siaat 146:4.

Tas­sa toqusut ilisiman­ngil­lat. Susin­naan­ngil­lat. Ilisimasaqan­ngil­lat. Takun­nis­sin­naan­ngil­lat, tusaasin­naan­ngil­lat oqaloqatigin­nis­sin­naanatil­lu. Inuusunik ikiuisin­naanatil­luun­niit ajoqusiisin­naan­ngil­lat. Toqungasut qunugisariaqan­ngilavut. Qanorli paasisariaqar­pa inuk toqugaangat anersaaq „qimagut­toq“? (Takuuk Tus­siaat 146:4, NV)

„Anersaaq Guutimut ilumoortumut uterpoq“

Inuup toqunera pil­lugu Biibilimi al­las­simavoq: „Anersaar­tor­nerlu uumas­sutaasoq [Anersaaq, NV] Guutimut tun­nius­sisiminut uter­tin­nagu.“ (Oqaluus­sisar­tup oqaasii 12:7) Tas­sa imaap­pa anersaatut timilik iluamik oqaatigalugu silaan­narsuak­koorluni angalasoq Guutip najugaanukarluni? Naamik. Biibilip oqaatsimik ’uter­poq’-mik atuinera sumiif­fim­mit sumiif­fim­mut angalanermik pisariaqar­titsin­ngilaq. As­sersuutigalugu Jehova Israelik­kun­nut ilumuun­ngitsunut oqar­poq: „Uan­nut uter­niaritsi, taava uanga ilis­sin­nut utis­saanga.“ (Malaki 3:7, NV) Taman­na isumaqar­poq Israelik­kut suliatik ajor­tut  tunus­sagaat Guutil­lu maligas­siai ajun­ngitsut maleq­qilerlugit. Jehoval­lu Israelik­kun­nut ’uter­nis­saa’ isumaqar­poq in­nut­tani soqutigeq­qilerai iluaqutis­saan­nil­lu iliuuseqarluni. Pisimasuni taak­kunani marlun­ni isumak­kut al­lan­nguineq pineqar­poq, sumiif­fim­mit sumiif­fim­mut angalaneq pineqarani.

Toqunermis­saaq anersaaq Guutimut ’uterluni’ nunamit qilam­mut piviusumik angalaneq ajor­poq. Soorlu qulaani nas­suiar­neqar­toq anersaaq tas­saavoq uumas­sut. Nukiup taas­suma inuk qimak­kaangagu, Guutip kisimi inum­mut uter­til­lugu tun­nius­sin­naasar­paa. ’Anersaaq Guutimut ilumoor­tumut uter­poq’ imatut inuup taas­suma siunis­sami inuunermik neriuutaa maan­na Guutimut atal­luin­nar­toq.

As­sersuutigalugu Jiisusip toqunerani qanoq pisoqar­nersoq takus­savar­put. Taman­na Lukasip iivangkiiliumini oqalut­tuaraa: „Jiisusilu nipitoorsuarmik nil­ler­poq: ’Ataataq, anersaara as­san­nut tun­niup­para.’ Taama oqareerluni aner­ninger­poq.“ (Lukasi 23:46) Imaan­ngilaq anersaami qimam­mani Jiisusi qilaliar­toq. Aatsaat ul­lut pingajus­saan­ni toqusunit makititaavoq, aam­mat­taaq aatsaat ul­lut 40-it qaangium­mata qilaliar­poq. (Apustilit Suliaat 1:3, 9) Toqugamili Jiisusip tatigin­nil­luni anersaani Ataataminut paarisas­san­ngor­tip­paa qularin­ngin­namiuk Jehovap uum­mar­teq­qis­sin­naagaani.

Aap, Guutip kisimi inuk uum­mar­teq­qis­sin­naavaa. (Tus­siaat 104:30) Periarfis­sanik angingaar­tunik am­maap­paatigut.

Neriuut qularnaatsoq

Biibilimi al­las­simavoq: „Pif­fis­sarmi nal­liuk­kumaar­poq ilivermiit­tut tamarmik [Jiisusip] nipaanik tusarumaarfis­saat iliver­nil­lu aniumaarfis­saat.“ (Johan­nesi 5:28, 29) Aap, Jiisusi Kristusi neriorsuivoq Guutip eq­qaamasai tamarmik, Guutip puiun­ngisai eq­qaasaaluun­niit tamarmik makititaajumaar­tut, tas­sa uum­mar­teq­qin­neqarumaar­tut. Toqusoqar­neranik nalunaarutinut alianar­tunut taarsiul­lugu, taamanik­kus­samut makit­toqar­neranik nalunaarutinik nuan­nersunik tusagaqar­talis­saagut! Asasat toqusimasut iliver­nit makit­tut tikil­luaq­qusin­naal­lugit nuan­ningaas­susis­saa!

 Neriuum­mik Guutimeersumik paasisaqar­nerorusuk­kuit atuagas­siaaraq Toqusimasut anersaavi — ilinnik ikiuisinnaappat imaluunniit ajoqusiisinnaappat? piniarlugu Napasuliaq Alapernaarsuiffik, Postbox 248, 3900 Nuuk imaluun­niit adres­sit ataaniit­tut ilaat atorlugu al­laf­figisin­naavat.

Al­lat taaneqan­ngik­kaangata Bibelimit is­suak­kat tamarmik nutsigaq kalaal­lisuun­ngor­titaq ator­tus­saatitaasoq 2000-imeersoq tun­ngavigalugu is­suagaasar­put.