Atuagaq tatigineqarsinnaava?
Atuagaq tatigineqarsinnaava?
„Oqaluttuarisaanermik allaatigisanut allanut naleqqiullugu Biibilimi tutsuiginassutsimik takussutissat amerlanerit nanisimavakka.“ — Tuluk ilisimatooq sir Isaac Newton.1
BIIBILI tutsuiginarpa? Tassani inuit ilumut inuusimasut, sumiiffiit piviusuusimasut pisimasuiillu eqqartorneqarpat? Taamaappat takussutissaqartariaqarpoq allattunit peqqissaartunit unneqqarissunillu allanneqarsimaneranut. Tamatumunngalumi takussutissaqarpoq. Takussutissat ilaat nunap ataani nassaarineqarsimapput, allallu amerlanerusut Biibilip nammineq iluani.
Takussutissat nassaarineqarput
Atortut assigiinngitsut itsarli Biibilip nunaani matoorunneqarsimasut nassaarineqartut takutippaat Biibili oqaluttuarisaanermut nunalerinermullu tunngatillugu eqqortuusoq. Itsarnisarsiuut nassaarisimasaasa ilaat misissoriartigik.
David, savanik paarsisoq inuusuttoq Israelikkunnut kunnginngorsimasoq, Biibilimik atuartartunit tusaamasaalluarpoq. Atia Biibilimi 1138-riarluni taaneqarpoq, oqaaserlu „Daavikkormiut“ — kunngikkormiut kinguaariit pillugit atorneqartartoq — 25-riarluni eqqaaneqarluni. (1 Samuel 16:13; 20:16) Qanittorli tikillugu Biibilip saniatigut allamik Davidip ilumut inuusimaneranut uppernarsaatissaqarsimanngikkaluarpoq. David oqaluttualiaannaava?
1993-mi itsarnisarsiuut professori Avraham Biranimit siulersorneqartut tupinnartumik nassaarput, tamannalu Israel Exploration Journal-imi allaaserineqarpoq. Israelip avannaani illukuni qattunermi Tel Danimik taaneqartumiittuni ujarak basaltiusoq nassaarineqarpoq. Ujaqqami kigartorlugit allanneqarsimapput „Daavikkormiut“ aamma „Israelikkut kunngiat“.2 Allannerit ukiuni 800-kkunni u.n.s. allanneqarsimasorineqartut tassaanerarneqarput ajugaanermut eqqaassutissat Israelikkut akeraasa aramæerit kangianeersut sanasimasaat. Sooq allannerit pisoqqat taakku taama maluginiarnartigippat?
Professori Biranip suleqataatalu professori Joseph Navehp nalunaarusiaat tunngavigalugu atuagassiami Biblical Archaeology Review-imi ima allassimasoqarpoq: „Biibilip saniatigut aatsaat ateq David allannerni itsarnitsani nassaarineqarpoq.“3 * Allannerit tamakku aamma allatigut maluginiarnartuupput. Oqaaseq „Daavikkormiut“, eqqortumilluunniit „Davidip kinguaavi“, oqaatsitut ataatsitut allanneqarsimavoq. Oqaatsinik ilisimatooq professori Anson Rainey nassuiaavoq: „Oqaatsit akunneqarneq ajorput . . . ingammik tusaamasap taaguutigigaangagit. Ukiut 800-kkut qeqqata missaanni u.n.s. ateq ’Daavikkormiut’ naalakkersuinikkut sumiissutsimullu pingaaruteqartutut isigineqarsimavoq.“ Kunngi David kinguaavilu taamanikkut qularnanngitsumik tusaamasaaqaat.
Nineve — Assyriamiut illoqarfissuat Biibilimi eqqartorneqartoq — ilumut piusimava? Ukiut 1800-kkut aallartilernerat tikillugu Biibilimik isornartorsiuisut ilaasa tamanna upperiumanngilaat. 1849-mili sir Austen Henry Layardip Kujundjikimi, qattunermi illukuni Ninevep inigisimasaata ilaani, kunngip Sankeribip illussaarsuarisimasaa nassaaraa, isornartorsiuisut oqaasissaarutsillugit. Illukuni suli allanik nassaassaqarpoq. Init aserorneqarsimanngitsut ilaanni iikkami illoqarfiup
pallittaalisallip tiguarneqarnera tigusallu kunngimut ajugaasumut sassartitaanerat titartarneqarsimapput. Kunngip qulaani ima allassimasoqarpoq: „Sankerib, silarsuup kunngia, Assyriamiut kunngiat issiavissaarsuarmi nimedu-mik taaneqartumi issiavoq Lakisjimillu (La-ki-su) tiguakkat qimerloorlugit.“6Titartakkat allannerillu tamakku British Museumimi takuneqarsinnaasut Biibilimi Kunnginik allakkat aappaat 18:13, 14-imi allassimasunut uppernarsaataapput. Nassaat tamakku pingaaruteqarnerat pillugu Layard ima allassimavoq: „Tamakku nassaarineqanngikkallarmata kia upperisimassagaluarnerpaa issut qaleriiaat eqqakkallu Ninevep sumiissimaneranik nalunaartut ataanni [Judakkut kunngiata] Ezekiasip Sankeribillu sorsuunnerannik oqaluttuaq nassaarineqassasoq, pisut nalaanni Sankeribimit allanneqarsimasoq Biibilimilu oqaluttuarineqartunik annikitsualuit tamaasa ilanngullugit uppernarsaasoq?“7
Allarpassuittaaq itsarnisarsiuut nassaarisimavaat — marramernit, illukut, allattarfiit marraasut, aningaasat, assaannarmik allakkat, eqqaassutissiat kigartorlugillu allakkat — Biibilip tutsuiginassusianik uppernarsaasut. Kaldæamiut illoqarfitoqaat Ur, Abrahamip najugaqarfigisimasaa, kulturikkut upperisarsiornikkullu qitiusimasoq, assaaffigineqarsimavoq.8 (1 Moses 11:27-31) Nabonidip Nalunaarsuutai-ni 1800-kkunni nassaarineqarsimasumi Babylonip Kyros Angisuumit ajugaaffigineqarnera Danielimik allakkat kapitali 5-imi eqqartorneqartoq oqaluttuarineqarpoq.9 Kigartorlugit allakkat Thessalonikami qarmami nassaarineqartut (ilaat British Museumimi toqqortarineqartut) illoqarfiup siulersuisuisa aqqinik imaqarput, tassanilu ’politark’-inik taaneqarput. Oqaaseq tamanna griikeritoqqat allagaataanni atorneqanngilaq, Biibilimilli allattup Lukasip atorpaa.10 (apustilit suliait 17:6) Taamaalilluni takuneqarsinnaavoq Lukasip allagai eqqortuusut — tamannalu annikitsualunni allani takussaareerpoq. — Naleqqiuguk Lúkarse 1:3.
Itsarnisarsiuulli tamatigut isumaqatigiinneq ajorput, Biibililu isumaqatigiuaannanngilaat. Biibilili tutsuiginassutsiminut takussutissanik imaqarluarpoq.
Unneqqarissumik allagaavoq
Oqaluttuarisaanermik allattut unneqqarissuugunik ajugaanerinnaanngitsut (soorlu Sankeribip Lakisjimik tiguaanera) aammali ajorsarnerit allaatigiumassavaat. Atugarissaarneq atugarliornerlu tamaasa oqaluttuariumassavaat. Oqaluttuarisaanermik allattartut silamiorpaluttut ikinnersaat taamaaliortarsimapput.
Assyriamiut oqaluttuarisaanermik allattartui eqqarsaatigalugit Daniel D. Luckenbill ima nassuiaavoq: „Ersarippoq kunngikkormiut nersoqqutussusiat pissutigalugu eqqortumik oqaluttuarneq ajortut.“11 Kunngikkormiut nersoqqutussusiannut assersuutitut taaneqarsinnaavoq Assyriamiut kunngiata Assurbanipalip oqaluttuassartaani pingaakujuttumik allassimasoq: „Kunngiuvunga, ileqqorissuuvunga, naalannartitaavunga, pissaanilissuuvunga, ataqqineqarpunga, tusaamasaavunga, pikkorissuuvunga, pissaaneqangaarpunga, sapiitsuuvunga, løvisut qunusuitsuuvunga, aap, sapiitsorsuuvunga!“12 Oqaluttuani taamaattuni allassimasut tamaasa oqaluttuarisaanikkut ilumoortutut isigissavigit?
Tamatumunnga akerliusumik Biibilimik allattut unneqqarilluinnartuupput. Moses, Israelikkunnut siulersortaasoq, ammasumik oqaluttuarpoq qatanngutini, Aron Mirjamilu, jorngunilu, Nadab Abihulu, qanoq eqqunngitsuliorsimasut, aamma nammineq inuiaqatinilu qanoq kukkusimallutik. (2 Moses 14:11, 12; 32:1-6; 3 Moses 10:1, 2; 4 Moses 12:1-3; 20:9-12; 27:12-14) Kunngi Davidip sualuttumik ajortuliorneri aamma isertorneqarnatik allanneqarsimapput — allaat David suli kunngiutillugu. (2 Samuel, kapitalit 11 24-lu) Mattæusip, iivangkiiliumik allattup, eqqartorpaa kina arlartik pingaarnerpaanersoq apustilit (namminerlu) oqqassutigisimagaat, aamma unnuami Jesusip tigusaaffiani taanna qimaannarsimagaat. (Matîuse 20:20-24; 26:56) Allakkanillu Kristumiut Allagaataanni Griikerisuuniittunik allattut isertuaratik eqqartorsimavaat ukiuni hundredelinni siullerni kristumiut ilagiissaasa ilaanni ajornartorsiuteqartarsimanera, ilaatigut kinguaassiuutitigut kanngunartuliortoqartarsimanera avissaartuunneqartarsimaneralu. Ajornartorsiutit taamaattut matoornagit allaatigisimavaat. — 1 Korintumiut 1:10-13; 5:1-13.
Pissutsit taama ammatigisumik unneqqaritsigisumillu allaatigineqarnerata takutippaa allattut ilumoortoq oqaluttuarerusussimagaat. Biibilimik allattut ilaquttaminnut, inuiaqatiminnut imminnullu tunngasut pitsaanngitsut allaatiginissaannut piumassuseqarsimammata ersarinngila allataat tutsuiginartuusut?
Annikitsualutsigut allaat eqqortoq
Eqqartuussinermi ilisimannittut ilumoortumik oqalunnersut amerlanertigut paasineqarsinnaasarpoq annikitsualuit misissornerisigut. Ilisimannittup oqaasii annikitsualutsigut allaat pisimasunut naapertuulluarpata ilumoornera ilimanassaaq, assigiinngissuteqarpallaarpatali ilumoornera ilimanassanngilaq. Aammali oqaasii kusassagaavallaarpata — annikitsualuit tamarmik toreqqissaarlutik — imaassinnaavoq sallulluni oqaluttoq.
Biibilimik allattut ’ilisimannittutut oqaaserisaat’ qanoq ippat? Maluginiarnartorujussuuvoq taakkua oqaluttuaasa annikitsualutsiguttaaq imminnut naapertuulluassusiat. Kisianni naapertuunnerat tamanna peqqissaartumik aaqqissorneqarsimanngilaq isumaqatigiipilussimanissaannik pasitsatsitsisumik. Allagaat nalugaluarlugu imminnut naapertuuttarput. Assersuutit ilaat misissoriartigik.
Biibilimik allaqataasoq Mattæus ima allassimavoq: ’Jesusilu Peterip illuanut iserami sakia arnaq qanimanartumik napparsimalluni nalasoq takuaa.’ (Matîuse 8:14) Tassani Mattæus soqutiginartumik pingaaruteqanngitsumilli paasissutissiivoq: Peter nuliaqarpoq. Pingaaruteqarpallaanngitsoq tamanna Paulusip uppernarsarpaa ima allalluni: ’Qatanngummik arnamik nuliaqarluta angalasinnaannginnerpugut apustileqatitsitut . . . Kefasitullu?’ * (1 Korintumiut 9:5) Versit siulianiittut takutippaat pissutissaqanngitsumik isornartorsiorneqarnini pissutigalugu tassani Paulus imminik illersorniartoq. (1 Korintumiut 9:1-4) Ersarippoq paasissutissaq tamanna — Peterip nuliaqarnera — Paulusip eqqaanngikkaa Mattæusip allassimasaasa eqqortuunerat takutinniarlugu, nalaatsornerinnakkulli eqqaavaa.
Iivangkiiliunik allattut sisamat tamarmik — Mattæusip, Markusip, Lukasip Johannesillu — eqqaavaat unnuami Jesusip tigusaaffiani ajoqersugaasa ilaata panani amugaa palasiunerullu kiffaa panarlugu siutaarlugu. îvangkîlio Juánasip agdlagâ-ni paasissutissaq pisariaqarpasinngikkaluartoq atuarneqarsinnaavoq: ’Kiffarli taanna Malkusimik ateqarpoq.’ (Juánase 18:10, 26) Sooq Johannesip kisimi kiffap atia eqqaavaa? Versini tulliuttuni paasissutissaq allami atuarneqarsinnaanngitsoq nanissavarput: Johannes ’palasiunermut takornartaanngilaq’. Palasiunerup inoqutaasa, aamma kiffaasa, Johannes nalunngilaat, Johannesillu taakku nalunngilai. (Juánase 18:15, 16) Taamaattumik pissusissamisoorpoq Johannesip angutip ikilerneqartup atia eqqaammagu, iivangkiiliumik allattut allat nalugamikku eqqaanngikkaat.
Oqaluttuat ilaanni sukumiisumik nassuiaatigineqartoq oqaluttuani allani eqqaaneqalaaginnartarpoq. Assersuutigalugu Mattæus oqaluttuarpoq Jesus juutit eqqartuussisuunerinit killisiorneqartillugu ilaasa ’isakkaat oqarlutik: „Kristusi-aa, eqquiniarfigitigut, kia patippaatit?“’ (Matîuse 26:67, 68) Sooq oqarpat Jesus ’eqquiniaassasoq’ patitsisoq kinaanersoq, uffa patitsisoq siuninnguaniittoq? Tamanna Mattæusip eqqaanngilaa. Iivangkiiliumik allattut allat marluk ima paasissutissiipput: Malersuisut Jesusip kiinaa ulissimagaat isannginnerani. (Mákorse 14:65; Lúkarse 22:64) Mattæusip oqaluttuani allassimavaa annikitsualuit tamaasa ilanngutinngikkaluarlugit.
îvangkîlio Juánasip agdlagâ-ni oqaluttuarineqarpoq ilaanni inuppassuit katersuussimasut Jesusip ajoqersuinera tusarnaarniarlugu. Jesusinngooq inuppassuit takugamigit ’Filipimut oqarpoq: „Sumit timiusarsissaagut ukua nerisassaannik?“’ (Juánase 6:5) Sooq Filiperpiaq sumi timiusarsisinnaaneq pillugu aperaa uffa aamma ajoqersukkat allat tamaaniittut? Tamanna allattup eqqaanngilaa. Lukasilli oqaluttuaraa Betsajdap, illoqarfiup Galilæap tasersuata sineriaata avannaata tungaani tamanna pisimasoq, îvangkîlio Juánasip agdlagâ-nilu siusinnerusumi eqqaaneqareerluni ’Filip Betsajdamiuusoq’. (Juánase 1:44; Lúkarse 9:10) Taamaattumik Jesus pissutissaqarluarpoq inuk illoqarfimmit qanittumiittumeersoq aperissallugu. Ersarippoq annikitsualuit tamarmik imminnut naapertuuttut naak tamanna immini siunertaanngikkaluartoq.
Ilaanni annikitsualuit aalajangersimasut eqqaaneqannginnerat Biibilimik allattut tutsuiginassusiannut tapersiiginnartarpoq. Assersuutigalugu, Kunnginik allakkat siulliit-nik allattup Israelimi kaannersuaq eqqartorpaa. Ima sualutsigisimavoq kunngip hestiutini siutituujutinilu naammattumik ivigartugassarsissussinnaanagillu imissaqartissinnaanagit. (1 Kunngit 17:7; 18:5) Oqaluttuarineqarportaaq pilliinermut atatillugu pruffiitip Eliasip imermik Karmelip qaqqaanukaassisoqarnissaa peqqussutigigaa kussiaq nunamut 1000 kvadratmeterisut isorartutigisoq ulikkaaqqullugu. (1 Kunngit 18:33-35) Panernersuulli nalaani imeq sumit pissagamikku? Kunnginik allakkat siulliit-nik allattup tamanna eqqaanngilaa. Israelikkulli tamarmik nalunngilaat Karmelip qaqqaa Akullersuup sineriaaniittoq, soorlu oqaluttuami eqqaaneqartoq. (1 Kunngit 18:43) Taamaattumik imaq tarajuusoq pissarsiarineqarsinnaavoq. Atuagaq tamanna annikitsualunnik ulikkaartoq oqaluttualiaannaappat tamatuminnga allattup, salloqittaallaqqissuusimassagaluartup, sooq allakkamini nalunartoq tamanna nassuiarniarsimanngilaa?
Biibili tutsuigineqarsinnaava? Itsarnisarsiuut ima amerlatigisunik nassaarsimapput uppernarsarsinnaallugu inuit, sumiiffiit pisimasullu Biibilimi eqqartorneqartut ilumut piviusuusimasut. Nalunaajaatilli Biibilip imarisai tamakkunannga uppernarsaataanerupput. Allattut ilumoortoq oqaluttuaraat — imminnut allanilluunniit asattuussinatik. Allassimasut imminnut naapertuulluarnerat aamma paasissutissat nalaatsornikkut imminnut naapertuunnerat, Biibilip ilumoorneranut ersiutaalluarpoq. ’Tutsuiginassutsimut uppernarsaatissat’ taama amerlatigimmata Biibili ilumut tatigisinnaavat.
[Quppernerup ataani ilanngussat]
^ imm. 8 Nassaarnerup tamatuma kingorna professorip André Lemairep nalunaarutigaa Mesjap ujaraani 1868-imi nassaarineqartumi allannerit aserorsimasut iluarsaqqinneqarnerata takutikkaa „Daavikkormiut“ tassanissaaq eqqaaneqartut.4
^ imm. 21 ’Kefas’ tassaavoq Semikkut ’Peter’-imut taaguutaat. — Juánase 1:42.
[Qupp. 15-mi assiliartaq]
Ujarak Tel Danimeersoq
[Qupp. 16, 17-mi assiliartaq]
Assyriamiut iikkami assilialiaat Lakisjip ungusaanera, Kunnginik allakkat aappaat 18:13, 14-imi allaatigineqartoq, pillugu