Atuagaq uumassusilinnik oqaasilik
Atuagaq uumassusilinnik oqaasilik
Oqaatsit atuakkap atugai atorneqarunnaarpata atuagaq aamma ’toqussaaq’. Ullumikkut inuit ikittuinnaat oqaatsit Biibilip allassimaqqaataani atorneqartut atuarsinnaavaat. Taamaakkaluartorli Biibili suli uummaarippoq. Aniguisimavoq oqaatsit inuiaat atugaat ’ilikkarsimagamigit’. Nutserisut Biibilimik oqaatsinik allanik ’ilinniartitsisut’ ilaannikkut qaangeruminaatsorujussuarnik ajornartorsiuteqartarsimapput.
BIIBILIMIK — kapitalinik 1100-nit versinillu 31.000-nit amerlanerusunik — nutserineq suliarujussuuvoq. Ukiulli hundredelikkuutaat ingerlaneranni nutserisut tunniusimalluinnartut piumassuseqarluarlutik unamminiarnartoq tamanna suliarisimavaat. Ilarpassuisa suliartik pissutigalugu atugarliornissartik allaallu toqunissartik akuerisarsimavaat. Biibilip inuiaat oqaaserpassuinut nutserneqarsimaneranik oqaluttuaq nikallujuissutsimik isumassarsiullaqqissutsimillu maluginiarnartunik oqaluttuaavoq. Oqaluttuap tamatuma ilamininngua tiguartinnartoq misissoriartigu.
Unamminiarnartut nutserisut atortariaqarsimasaat
Qanoq ililluni atuagaq oqaatsinut allattaaseqanngitsunut nutserneqarsinnaava? Biibilimik nutserisut arlalippassuit unamminiarnartoq tamanna aporfissarisimavaat. Assersuutigalugu ukiuni 300-kkunni u.n.k. Ulfilasip Biibili goterit oqaasiinut — oqaatsinut taamani atorneqartunut allattaaseqanngitsunulli — nutserlugu aallartippaa. Ulfilasip naqinnerit griikerisuut latinerisuullu tunngavigalugit naqinnerit nutaat 27-t goterisuut pilersippai. Biibili tamangajaat goterit oqaasiinut nutserlugu ukioq 381 u.n.k. sioqqullugu naammassineqarpoq.
Ukiuni 800-kkunni qatanngutigiit marluk griikerisut oqaasillit, Kyrillosip (Konstantin) Methodiosillu, tamarmik oqaatsinik allanillu ilisimatuut, Biibili inuiaat slaaverit oqaasiinut nutserusulersimavaat. Taamanili inuiaat slaaverit oqaasii allattaaseqanngillat. Taamaattumik qatanngutigiit marluk taakkua naqinnernik nutaanik pilersitsipput Biibili nutsersinnaajumallugu. Taamaalilluni Biibilip inuit slaaveriusut ’oqaluffigisinnaalerpai’.
Ukiuni 1500-kkunni William Tyndalep Biibili oqaatsinit allassimaqqaataanit tuluit oqaasiinut nutsilerpaa, oqaluffeqarfimmit naalagaaffimmillu assortorneqaqaluni. Tyndale, Oxfordimi ilinniarsimasoq, ’allaat nukappiaqqap naasorissaasup kiffaata’ paasisinnaasaanik nutsererusuppoq.1 Taamaaliorsinnaajumallunili Tysklandimut qimaasariaqarpoq, tassanilu „Testamentitaaq“ tuluttuunngortitaa 1526-mi naqiterneqarpoq. Nutsikkat taakku Tuluit Nunaannut anngiortumik eqqunneqarmata oqartussaasut ima kamatsigisimapput allaat kikkut tamarmik takkuanni nutsikkanik ikuallaallutik. Tamatuma kingorna Tyndale killuutigineqarpoq. Qiminneqarluni toqutaanissani
ikuallagaanissanilu sioqqutitsiarlugu nipituumik ima suaarsimavoq: „Naalagaq, tuluit kunngiata isai uisikkit!“2Biibilimik nutserineq ingerlaannarpoq; nutserisut unitsinneqarsinnaasimanngillat. Ukiumi 1800-mi Biibilip atuagartaasa ilaasa oqaatsit 68-it assigiinngitsut ’ilikkarsimavaat’. Biibilinik naqiterisitsisarfiit pilersinneqartalermata — ingammik Tuluit Nunaanni Nunanilu Allani Biibilinik Naqiterisitsisarfik (The British and Foreign Bible Society, 1804-mi pilersinneqartoq) — erniinnaq Biibilip oqaatsit suli amerlanerusut ’ilikkarpai’. Angutit inuusuttut hundredelippassuit nunanut allanut ajoqersuiartortitatut aallagarput, amerlasuut Biibilip nutsernissaa pingaartumik siunertaralugu.
Biibili Afrikamiusut
Ukiumi 1800-mi Afrikami oqaatsit assigiinngitsut aqqaneq-marluk missaat kisimik allattaaseqarput. Oqaatsinik allanik hundredelippassuarnik allattaaseqanngitsunik oqaasillit naqinnernik nutaanik pilersitsisoqarnissaata tungaanut Biibili utaqqisariaqarpaat. Ajoqersuiartortitat tikittut atuakkanik ilinniutinik ordboginillu ikiorteqaratik oqaatsit ilinniartariaqartarpaat. Kingorna allattaatsinik ineriartortitsipput tamatumalu kingorna inuit tamatuminnga atuarnissaannik ilinniartillugit. Taamaaliorput inuit kingusinnerusukkut namminneq oqaatsitik atorlugit Biibilimik atuarsinnaaleqqullugit.3
Ajoqersuiartortitat taakkua ilagaat Skotlandimiu Robert Moffat. Taanna 1821-mi 25-nik ukioqarluni Afrikap kujataani inuit tswanatut oqaasillit akornanni ajoqersuiartortitaqarfimmik pilersitsivoq. Oqaasii allattaaseqanngitsut ilikkarniarlugit inunnut akuliuppoq, taakkua akornanni angalasarluni inuullunilu. Kingusinnerusukkut ima allappoq: „Inuit inussiarneqaat, oqaasiilu kukkullunga atoraangakkit illartaqaat. Oqaaseq oqaaseqatigiilluunniit kukkusakka aatsaat naqqinneqartarput kukkunera allanut illarsaatissatut ilaarneqareeraangat.“4 Moffatili nikallunngilaq, naggataatigullu oqaasii ilikkarpai allattaatsimillu ineriartortitsilluni.
1829-mi ukiut arfineq-pingasut tswanat akornanni sulereerluni Moffatip Lukasip iivangkiiliua nutserpaa. Naqitertikkiartorlugu qamutit ussinnik qimuttullit atorlugit 1000 kilometerit sinerissamut angalavoq, umiarsuarmullu ilaalluni Cape Towniliarluni. Tassani nunamut naalagaatitap naalagaaffiup naqiterivianik Moffatip atornissaa akueraa, Moffatili nammineq naqiterutinik ikkussuisariaqarpoq naqiterisariaqarlunilu. 1830-mi Lukasip iivangkiiliua saqqummersissinnaalerpaa. Kiisami tswanat namminneq oqaatsiminnik Biibilip ilaa atuarsinnaalerpaat. 1857-imi Moffatip Biibili tamaat tswanat oqaasiinut nutserlugu naammassivaa.
Kingusinnerusukkut Moffatip allaatigaa tswanat qanoq qisuariarsimasut Lukasip iivangkiiliua oqaatsiminni pissarsiarisinnaaleramikku. Ima allappoq: „Nalunngilara inuit ilaat kilometerit hundredellit arlallit angalasimasut Lukasip iivangkiiliua pissarsarisinnaajumallugu. . . . Takusimavakka Lukasip iivangkiiliuanik tunineqaramik qujamasunnermik qiallutik atuakkat pakkutaaraat. Arlallit oqarfigisariaqarsimavakka: ’Atuakkat qullissinnik aserussaqaasi!’“5
Nutserisut Moffatitut suliaminnut tunniusimalluartut Afrikamiut amerlasuut allakkatigut attaveqatigiissinnaalernissaat ajorunnaarsissimavaat — naak amerlasuut aallaqqaammut allattaaseqarnissartik pisariaqanngitsutut isigisimagaluaraat. Nutserisulli isumaqarput Afrikamiut tunissummik tamatumannga naleqarnerungaartumik tunisimallugit — tassa Biibilimik taakkua oqaasiinut nutsikkamik. Ullumikkut Biibili tamaat imaluunniit ilaa Afrikamiut oqaasiisa ilaannut 600-nit amerlanerusunut nutserneqarsimavoq.
Biibili Asiamiusut
Afrikami nutserisut oqaatsinut allattaaseqanngitsunut naqinnernik nutaanik ineriartortitsiniarlutik ilungersuuteqartillugit nunani
allani nutserisut allat allaanerulluinnartumik ajornartorsiuteqarput — oqaatsinut paasiuminaatsorujussuarmik allattaasilinnut nutseriniarnermik. Asiamiut oqaasiinut Biibilimik nutseriniartut unamminiarnartumik taama ittumik atugaqarsimapput.1800-kkut aallartinneranni William Carey aamma Joshua Marshman Indiamut tikipput tamaanimiullu oqaasiisa ilarpassui ilinnialerlugit ilikkarlugillu. Naqiterisartoq William Ward ikiortigalugu Biibili tamaat ilaaluunniit oqaatsinut 40-ngajannut nutseriarlugu naqitertippaat. Atuakkiortoq J. Herbert Kane William Carey pillugu ima allassimavoq: „[Begalisut oqaasillit] allattaasitoqaat taarserlugu allattaaseq nutaaq ulluinnarpaluttoq kusanartorlu ineriartortippaa, atuartunut paasiuminarnerulersillugu atuaruminarnerulersillugulu.“7
Adoniram Judson USA-meersoq Burmaliarpoq 1817-imilu Biibili Burmamiusut nutserlugu aallartillugu. Biibilimik nutserisinnaalernissamut naammattumik Asiamiut oqaasiinik ilinniarneq qanoq artornartigisoq ima allaatigaa: ’Oqaatsit inuit nunarsuup illua-tungaani inuusut oqaaserisaat ilikkassagaanni oqartariaqarpoq ilungersornartorujussuusoq — inuit uatsinnit allaanerulluinnartumik eqqarsariaaseqarlutillu oqariartaaseqarmata, oqaasii naqinnerilu oqaatsinit nalunngisatsinnit allaanerulluinnarmata, ordbogeqannginnatta, nutserisoqanngimmat tamaanimiumillu ilinniartitsisoqassagutta oqaatsit ilaat ilikkaqqaartariaqaratsigik!’8
Judson ukiuni 18-ini ilungersorluni tamaviaartariaqarsimavoq. Biibilip naggataa’tungaa Burmamiusooq 1835-mi naqiterneqarpoq. Burmamiinnerali taassumunnga akisoorujussuuvoq. Nutseritilluni kilitsissiatut unnerluutigineqarpoq ukiunilu marlunni parnaarussivimmi sullinernik ulikkaartumi parnaarussaalluni. Iperagaanerata kinguninngua nulia panialu qanimanartoqarlutik toqupput.
1807-imi Robert Morrisonip 25-nik ukiullip Kinamut tikikkami Biibili Kinamiusuunngortinniarlugu suliassaq annertooq suliarilerpaa — tassa oqaatsit paasiuminaannerpaamik allattaasillit ilaannut. Kinamiut oqaasiinik ilisimasaqarpallaanngilaq, aatsaammi ukiut marluk tamatuma siorna ilinnialeramigit. Morrisonip aamma Kinamiut inatsisaat sorsugassarai, inatsisit Kinap immikkoortuarnissaanik siunertallit. Kinamiut toqumik pillarneqartarput oqaatsiminnik nunami allamiunik ilinniartitsisimagunik, allamiullu Biibili Kinamiusut nutserniarunikku aamma toqumik pillarneqartussaapput.
Qunusuilluni mianersorlunili Morrison Kinamiusut ilinniartuarsinnarpoq, erniinnarlu ilikkarluni. Ukiut marluk ingerlaneranni Indiap Kangiani Niueqatigiit-ni nutserisutut atorfeqalerpoq. Ullukkut tassani sulisarpoq, isertortumilli aammalu paasineqariaannaalluni Biibili nutserpaa. 1814-imi, Kinamut tikinneranit ukiut arfineq-marluk qaangiuttut, Kristumiut Allagaataat Griikerisuut
naqiterneqarnissamut piareerpai.9 Ukiut tallimat tamatuma kingorna, William Milne ikiortigalugu, Allakkat Hebriiarisuut naammassivai.Naammassisaq annertoqaaq — maanna Biibili silarsuarmi oqaatsit inunnit amerlanerpaanit atorneqartut atorlugit ’oqalussinnaalerpoq’. Qujanartumik nutserisut pikkorissut sulilluarneratigut Asiamiut oqaasiinut allanut aamma nutserneqarpoq. Ullumikkut Biibilip ilaa Asiamiut oqaasiisa ilaannut 500-nit amerlanerusunut nutserneqarsimavoq.
Sooq angutit taakku, Tyndale, Moffat, Judson, Morrison allallu, ukiorpassuarni suleruloortarsimappat — allaat inuunertik navianartorsiortittarlugu — inuit ilisarisimanngisatik, ilaatigullu allaat inuit allattaaseqanngitsunik oqaasillit, atuakkamik nutserullugit? Ataqqineqarumallutik iluanaaruteqarumallutilluunniit taamaaliunngillat. Kisianni upperigamikku Biibili tassaasoq Guutip oqaasia, inuillu — inuit tamarmik — oqaasiinut nutserneqartariaqartoq.
Biibili Guutip oqaasiatut isigigaluarukku isiginngikkaluarukkuluunniit qularnanngilaq isumaqatigissavatsigut oqarutta Biibilimik nutserisut taakkua tunniusimassuseq ersersissimasaat ajoraluartumik ullumikkut qaqutigoorpallaartoq. Atuagaq namminissarsiunngissutsimik taama ittumik ersersitsinissamik kajumissisitsisoq misissussallugu pissutissaqannginnerpa?
[Qupp. 12-mi nalunaarsukkat]
(Allassimasut qanoq inissisimanersut naqitami takuneqarsinnaavoq)
Oqaatsit Biibilip ilaata 1800-miilli naqiterneqarfigisimasaasa amerlassusii
68 107 171 269 367 522 729 971 1199 1762 2123
1800 1900 1995
[Qupp. 10-mi assiliartaq]
Tyndale Biibilimik nutserisimasoq
[Qupp. 11-mi assiliartaq]
Robert Moffat
[Qupp. 12-mi assiliartaq]
Adoniram Judson
[Qupp. 13-mi assiliartaq
Robert Morrison