Inuuneq siunertaqarpa?
1
Inuuneq siunertaqarpa?
1. Inuunerup siunertaa pillugu apeqqut suna apeqqutigineqarajuppa, angullu inuusuttoq tamanna pillugu qanoq oqarsimava?
Inuunerup suna siunertarineraa inuit amerlanersaasa sukkulluunniit eqqarsaatigisimavaat. Inuunerup siunertaa tassaanerpa inuunermi atukkat pitsanngorsarniarlugit suleruloorneq, ilaquttanik pilersuineq, immaqa ukiut 70-80-inngoreerlugillu toquneq — taavalu naassaanngitsussamut puiugaaneq? Angut inuusuttoq taamatut isumalik oqarsimavoq inuunerup siunertatuaa tassaasoq „inuuneq, meeqqiorneq, pilluarneq taavalu toquneq“. Kisianni tamanna ilumoorpa? Toqu sunut tamanut naggatissaava?
2, 3. Oqaaseqaatit suut ersersippaat pisuussutinik katersuineq inuup inuuneranut siunertaqarlualersitsinissamut naammanngitsoq?
2 Nunani kangillerni killernilu tamani inuppassuit misigisarput inuunermi siunertaq pingaarnerpaaq tassaasoq pigisatigut pisuussutinik katersuineq. Isumaqarput tamanna pillualersitsisinnaallunilu inuunermik isumaqalersitsisinnaasoq. Pisuujoreersummi qanoq isumaqarpat? Atuakkiortoq Canadamiu Harry Bruce ima oqarsimavoq: „Inuit pigissaartut uissuumminartumik amerlasuut pilluarneranngillat.“ Oqaatsinilu ilavai: „Isumasiuinerit ersersippaat Amerika avannarleq isumalluannginnersuarmik eqqorneqarsimasoq . . . Pilluartoqarnerlunimi? Pilluartoqarunilu, sunamitaava isertugaatigaat?“
3 USA-p præsidenterisimasaa, Jimmy Carter, oqarsimavoq: „Paasisimavarput pigisaqarneq pigisanillu atuineq inuunerup siunertaanik maqaasisaqarnitsinnut matussutissiisanngitsoq. . . . Pigisanik katersineq inuunermi toqqissisimanngiffiusumi siunertaqanngitsumilu soqannginnersamik matusineq ajorpoq.“ Politikkikkullu siuttoq alla ima oqarsimavoq: „Maanna ukiuni arlaqalersuni uanga inuuneralu pillugit ilumoortunik sukumiisumik ujartuisimavunga; ilisarisimasamalu ilarpassui aamma taamaaliorsimapput. Ima aperisartut aatsaat taama amerlatigilersimapput: ’Kikkuuvugut? Inuunitta suna siunertaraa?’“
Pissutsit ajorsiartuinnartut
4. Sooq inuit ilaasa inuunerup siunertaqarnera qularaat?
4 Nunarsuarmi pissutsit ajorsiartuinnartut takugaangamikkik inuppassuit inuunerup siunertaqarnera qularutigilersarpaat. Inuit milliardinit amerlanerusut perulullutik napparsimapput nerisakilliorlutilluunniit, Afrikaannarmilu meeqqat ukiumut 10 millionit missingi tamakkuninnga pissuteqartumik toqusarput. Nunarsuup inuisa 6 milliardit angoqqajaavaat ukiumullu 90 millioninit amerlanerusunik amerlisarlutik, amerliartornerullu 90 procentia sinnerlugu nunani ineriartortinniakkani pivoq. Inuit amerliartupiloornerat tamanna pissutaalluni nerisassanik, inissanik nioqqutissianillu pisariaqartitsinerit annertusiartuinnarput, tamannalu nunarsuup, immap silaannaallu mingutsinneqarneranik nassataqartarpoq.
5. Nunarsuup orpippassui qanoq pineqarpat?
5 Naqitami World Military and Social Expenditures 1991 (Silarsuarmi sakkutooqarnermut inuillu atugarisaannut aningaasartuutit 1991) allassimasoqarpoq: „Ukiut tamaasa orpippassuaqarfiit ataatsimut [Tuluit Nunaattut] tamarmisut atsigisut aserorneqartarput. Ullumikkutut orpiiaaneq ingerlatiinnarutsigu ukiumi 2000-imi nunani kiattuni isugutasuni orpippassuit 65 procentii peereersimassavavut.“ FN-ip ataani suliniaqatigiiffiit ilaat naapertussagaanni sumiiffinni tamakkunani orpik ikkunneqartoq ataasiuppat qulit uppitinneqartarput, Afrikamilu ikkussaq ataasiuppat 20-t uppitinneqartarput. Taamaattumik inoqajuitsut annertusiartuinnarput, ukiullu tamaasa nuna Belgiatut atsigisoq nunaatitut atorunnaarsinneqartarpoq.
6, 7. Ajornartorsiutit suut silarsuup siuttuisa aaqqissinnaasimanngilaat, taamaattumillu apeqqutit suut akineqartariaqarpat?
6 1900-kkunnilu sorsunnerni ukiuni siuliini 400-ni toqutaasimasut sisamariaataat toqutaasimapput. Pinerlunniarneq sumi tamaani annertusiartuinnarpoq — ingammik peqqarniisernerit ingasatsikkiartuinnarlutik. Ilaqutariit avissaartuunnerat, ikiaroornartunik atornerluineq, AIDS, nappaatit kinguaassiuutitigut tunillaattartut pissutsillu nuanniitsut allat aamma inuunermik oqimaallisaaqataapput. Silarsuarmilu siuttut ajornartorsiuterpassuarnik inuiaat naalliuutigisaannik aaqqiisinnaasimanngillat. Taamaattumik tupinnarpallaanngilaq inuppassuit ima aperisarmata: Inuunerup suna siunertaraa?
7 Apeqqut tamanna, inuit ukiuni hundredelikkuutaani isumaliutigisarsimasaat, ilinniagartuut upperisarsiornikkullu siuttut qanoq akisimavaat? Naammaginartumik akisinnaasimavaat?
Qanoq oqartartut
8, 9. (a) Kinamiu ilinniagartooq inuunerup siunertaa pillugu qanoq oqarsimava? (b) Angut tigusanut inissiarsuarmit aniguisimasoq qanoq oqarsimava?
8 Kungfutsisiortoq ilisimatooq, Tu Wei-Ming, ima oqarsimavoq: „Itinerusumik oqaatigissagaanni inuunerup siunertaa inuttut ulluinnarni inuunitsinni nassaassaavoq.“ Taassuma isumaa naapertussagaanni inuit erniusarnerat, inuuniarlutik sorsuttarnerat toqusarnerallu ingerlajuassaaq. Eqqarsaat tamanna neriuutissaqarnarpallaanngilaq. Ilumulli taamaappa?
9 Elie Wiesel, sorsunnersuarmi kingullermi nazistit toqutassanut inissiarsuinit aniguisimasoq, ima oqarsimavoq: „’Sooq inuuvugut?’ Apeqqut tamanna inuup isummerfigisinnaasaasa pingaarnersaraat. . . . Upperaara inuuneq siunertaqartoq, naak asuliinnaq toqoraanersuaq takusimagaluarlugu.“ Inuunerulli siunertaanik apeqqut akisinnaasimanngilaa.
10, 11. (a) Inuup akissutissanik ilisimasaqannginnera pillugu aaqqissuisoq qanoq oqaaseqarsimava? (b) Pinngoriartuaarsimaneraasut isumaat sooq naammaginanngila?
10 Aaqqissuisoq Vermont Royster ima allassimavoq: „Inuup nammineq . . . silarsuarmi avataaniittunilu inissisimanera qimerlooraanni, aallartinnitsinniilli nikingaarsimanngilagut. Kikkuunitsinnik, sooq piunitsinnik sumunnarnitsinnillu apeqqutit suli akissutissarsisimanngilavut.“
11 Pinngoriartuaarsimaneraanermik tapersersuisoq Stephen Jay Gould ima oqarsimavoq: „Immaqa siunertamik itinerusumik maqaasisaqaraluarpugut — soqanngilarli.“ Taassumatummi pinngoriartuaarsimaneraanermik tapersersuisumut inuuneq tassaannaavoq akiuunneq sapinnginnerpaat kisimik aniguisarfiat, toqulu suut tamarmik naggataat. Aamma isuma tamanna neriuummik nassaassaqarfiunngilaq. Ima apereqqissinnaavugut: Ilumut taamaappa?
12, 13. Upperisarsiornikkut siuttut qanoq isumaqarpat, isumaallu silamiut paasisimasalittaasa isumaannit naammagisimaarnarnerua?
12 Upperisarsiornikkut siuttut ilarpassui oqartarput inuunerup siunertaa tassaasoq inuttut ajunngitsuunissaq, taamaattummigooq toqugunik tarningi qilammut pissammata, tassanilugooq naassaanngitsussamut inuussallutik. Ajortunngooq anniarfiup ikualanerani naassaanngitsumik anniartitaassapput. Paasinnittaaserli tamanna naapertussagaanni tamanna ilutigalugu inuit naammaginnanngitsumik piunerat nunarsuarmi taamatut ingerlajuaannassaaq. Guutilli inuit qilammi inngilisut inuulernissaat siunertariguniuk sooq ingerlaannaq inngilinngortiinnarsimanianngilai?
13 Allaat palasit apeqqutit tamakku nassuiaruminaatsippaat. Dr. theol. W. R. Inge, St. Paulip Oqaluffissaarsuani Londonimiittumi provstiunerusimasoq,
ima oqarsimavoq: „Inuunerup siunertaa ujarlugu inuunera tamaat ilungersorsimavunga. Apeqqutit pingasut tunngaviusutut isigiuaannarsimasama makku akissutissaannik ujaasisimavunga: Naassaanngissutsip nalunartua, inuup isumaata siunersissaanngissusia ajussutsimillu ajornartorsiut. Iluatsitsinangali. Arlaannaalluunniit nassuiaatissarsisimanngilara.“Inernera
14, 15. Isummat imminnut akerleriittut kingunerisaannik inuppassuit qanoq qisuariartarpat?
14 Angutit ilinniagartuut upperisarsiornikkullu siuttut inuunerup siunertaa pillugu taama isumaqatigiinngitsiginerat qanoq kinguneqarsimava? Angutitut utoqqasaatut imatut akisutut inuppassuit qisuariartarput: „Sooq piunera inuunerma annersaani isumaliutigaara. Kiisa maannakkut inuuneq siunertaqarnersoq siunertaqannginnersorluunniit soqutigerujussuarunnaarpara.“
15 Silarsuarmi upperisarsiornerit iluanni isummat assigiinngitsut qanoq amerlatiginerannik maluginnittut ilaat ikinngitsut isummertarput suna upperigaluaraanni soqutaanngitsoq. Isumaqarput upperisarsiorneq tassaaginnartoq isumakkut eqqissiallaataalaarsinnaasoq tuppallersaataalaarsinnaasorlu, inuunermi ajornartorsiutinik oqilisitsilaarsinnaasoq. Ilaat allat isumaqarput upperisarsiornerit suulluunniit upperisapalaaginnaasut. Oqartarput ukiuni hundredelippassuarni upperisarsiornikkut isumaliutersornerit inuunerup sumik siunertaqarneranik paasisitsisimanngitsut imaluunniit inuuniarnermik pitsaanerulersitsisimanngitsut. Aammami oqaluttuarisaanerup ersersippaa silarsuarmi matumani upperisarsiornerit siumukarnissamut kigaalaqutaasimasut aammalu uumissuinermut sorsunnernullu pissutaasarsimallutik.
16. Inuunerup siunertaanik paasinninnissaq qanoq pingaartigaa?
16 Taamaammat inuunerup sumik siunertaqarneranik paasiniaassalluni pissutissaqarpa? Psykologi Viktor Frankl ima akivoq: „Inuup siunertamik ujaasinera inuunermini nakuussutaasa pingaarnerpaartaraat. . . . Sapiiserlunga oqassaanga pissutsini allaat ajornerpaani aniguinissamut ikiuummik silarsuarmi matumani allamik taama pitsaatigisoqanngitsoq inuunerup siunertaanik ilisimasaqarnerminngarnit.“
17. Maannakkut qanoq aperisariaqarpugut?
17 Filosoffit upperisarsiornikkullu siuttut akissutissarsisinnaanngimmatigut taava inuunerup siunertaa pillugu sumi naammaginartumik akissutissarsisinnaassaagut? Ilisimassummik qutsinnerusumik tamatuminnga paasissutissiisinnaasoqarpa?
[Atuaqqissaarnermi apeqqutit]
[Qupp. 4-mi assiliartaq]
„Ukiut tamaasa orpippassuaqarfiit ataatsimut [Tuluit Nunaattut] tamarmisut atsigisut aserorneqartarput.“
[Qupp. 5-mi assiliartaq]
„Sooq piunera inuunerma annersaani isumaliutigaara.“