Ilagiit asanninnikkut ataasiussutsikullu ineriartortitsisut
Ilagiit asanninnikkut ataasiussutsikullu ineriartortitsisut
JEHOVAP NALUNAAJAASUISA ilagiissaasa ataatsimiinnerinut immaqa najuussimavutit. Inuit assigiinngitsut tamarmik tassaniittarput — ilaqutariit, aappaqanngitsut, utoqqaat inuusuttullu. Tamarmik guutisiornermikkut ataasiussuseqarput tamarmillu ikiuukkusullutik.
Sutigulluunniit inuit amerlasuut ataasiussuseqarlutik suleqatigiikkumagaangata nakkutilliisoqartariaqartarpoq. Guuti aaqqissuussaatitsisuuvoq; taamaattumik aaqqissuussaaneq innuttaasa ilagiissaanni takuneqarsinnaasariaqarpoq. Soorlu ukiuni 100-linni siullerni issimasoq, ullumikkuttaaq angutit kristumiuusut piukkunnartut, inersimalluartut misilittagaqarluartullu utoqqaanertanngortitaapput, tassa nakkutilliisunngortitaallutik. Taakkua ilagiit nakkutigisarpaat anersaakkullu pisariaqartitaat isumagisarlugit. Taakkua ikiortigaat angutit ilumoortut taaneqartut ilagiinni kiffartortut. Angutit taakku akissarsiaqaratik allatigulluunniit aningaasatigut iluanaaruteqaratik kajuminnerminnilli kiffartortarput, nalinginnarmilli suliffeqarnermikkut pilersuillutik. — 1 Korintumiut 14:33, 40; Filípimiut 1:1; 1 Timûtiuse 3:8, 9.
Utoqqaanertat ilagiinnilu kiffartortut taakku qanoq toqqarneqartarpat? Tassaasariaqarput Guutip kiffai ilumoortut piukkunnaatinik Bibelimi saqqummersitaasunik eqqortitsisinnaasut. Piukkunnaatit uku ilagaat: ileqqutigut ingasaassinaveersaassasut, isummamikkut peqqissasut, torissasut, inoroorsaartuussasut, ajoqersuineq sapissanngitsut, ingasaassiniartuussanngitsut, aningaaserituujussanngitsut, inoqutiminnik paarsilluartuussasut, uppilerlaannguussanngitsut, ilagiit avataanniittunit nersornartumik oqaatigineqartartuussasut, oqaaserlu ilumoortoq ajoqersuummut missiliuutoq aalajangiussagaat. — 1 Timûtiuse 3:1-15; Títuse 1:7-9.
Angutit taakku ilagiit, ilarpassui immaqa kristumiunngorlaat, taasineratigut qinigassanngorneq ajorput. Kisiannili angutit inersimalluartut misilittagaqarluartullu utoqqaanertaasut, piukkunnaatinik Bibelimi piumasarineqartunik eqqortitsisinnaassusiatigut misiliisinnaassuseqarluartut toqqarneqartussanngortittarpaat. Taava Jehovap Nalunaajaasuisa siulersuisoqatigiivisa nakkutilliineratigut utoqqaanertat ilagiinnilu kiffartortut toqqarneqartarput, taamaalillutik kristumiut
ilagiissaasa ukiuni 100-linni siullerni maligassiaat malillugu.Utoqqaanertat, tassa nakkutilliisut, palaseqatigiiunngillat; allanut naalagaanngillat. Soorlu Jesus oqarsimasoq, siulersortaajumasut tamanut kiffaasariaqarput. Jehovap Nalunaajaasuisa ilagiissaanni utoqqaanertat Guutip naalagaaffia sulissutigalugu ilumut suleqatigiipput. — Matîuse 20:26, 27; 23:8-11; Rûmamiut 12:8; 1 Korintumiut 3:5; 4:1, 2; Kulorsamiut 4:11; 1 Tásalûníkamiut 5:12-14.
Nakkutilliisuugamik ataatsimiinnerni ajoqersuineq nakkutigisarpaat oqaluussinermilu siulersortaallutik. Ilagiit suliassaasa pingaarnerpaartaraat oqaluussiffigisassaminni tamani Naalagaaffimmik tusagassamik nuannersumik oqaluussissutiginninnissaq. Nakkutilliisut aammattaaq paarsisuupput, ilagiinnut ilaasortaasut pulaartarlugit pisariaqarneratigut kajumissaarlugit. — Matîuse 24:14; apustilit suliait 1:8; 1 Tásalûníkamiut 2:11, 12; 5:14, 15; 2 Timûtiuse 2:24-26; Eprîarit 13:17; Jâko 5:13-16; 1 Pîtruse 5:1-4.
Utoqqaanertat pisussaaffigaattaaq assuarnartumik iliuuseqartut ilagiillu anersaakkut ileqqussatigullu minguissusiannik ataasiussusiannillu aarlerinartorsiortitsisinnaasut iluarsassallugit pillatsiassallugillu. — 1 Korintumiut 5:4, 5, 7, 11-13; Títuse 1:9; 2:15; 3:10, 11.
Ilagiit naapeqatigisarukkit peqatigiinneq nuannerluinnartoq nuannaarutigissavat anersaakkullu amerlasuunik iluaqutigissallugu. — tugsiaut 35:18; 84:11.
• Kikkut ilagiinnut ataasiakkaanut attuumassuteqartut isumagisarpaat?
• Suut tunngavigalugit nakkutilliisut toqqarneqartarpat?
• Suut pisussaaffigaat?
[Qupp. 13-mi assiliartat]
Nakkutilliisut ilagiit ajoqersortarpaat, illumit illumut angalaarlutik oqaluussisarnermi siulersortaallutik, paarsisutut pulaarnermikkut kajumissaarisarlutik, pisariaqaraangat unnersuussisarlutik iluarsaasarlutillu