„Silarsuup matuma pissusia nikittarpoq“

„Imali oqarpunga, qatanngutit: Piffissaq sivikilleqaaq.“ —  1 KORINTHIMIUT 7:29.

1, 2. Inuunerpit nalaani allannguutit suut takuigit?

 SILARSUARMI pissutsit inuunerpit nalaani sutigut allannguuteqarpat? Ilaat taagorsinnaavigit? Soorlu nakorsaanermik ilisimatusarnermi siuariaataasimasut eqqarsaatigeriakkit. 1900-kkut aallartinneranni nunat ilaanni ukiut inuuffiit agguaqatigiissillugit 50-it inorsimavaat, ilisimatusartoqarsimagallartilluguli maanna ukiut 70-it qaangingaatsiarpaat! Puigortariaqanngilavuttaaq atuartitsinerup, angallassinerup inuillu pisinnaatitaaffiisa tungaasigut siuariaataasimasut — tamakku tamarmik inuit millionilikkuutaat atugarisaannik pitsanngorsaasimapput.

² Soorunami imaanngilaq allannguutit tamarmik pitsanngorsaataasartut. Pinerlunniarnerup siaruaraluttuinnarnerata, ileqqussatigut najoqqutassat aseroriartuinnarnerisa, ikiaroornartunik atornerluinerup alliartornerata, aappariit avittarnerisa amerlipiloorsimanerisa, aningaasat naleerukkiartornerisa qunutitsiniallu pinerliiniaraluttuinnarnerisa sunniutipilui isiginngitsuusaaginnarneqarsinnaanngillat. Pissutsit qanoq ikkaluarpataluunniit apustilip Paulusip qanga oqaaserisimasai isumaqatigissajunnarsivatit: „Silarsuup matuma pissusia nikittarpoq.“ — 1 Korinthimiut 7:31, NV.

3. Paulusip suna pivaa allakkami „silarsuup matuma pissusia nikittartoq“?

³ Paulusip taamatut oqarnermini isiginnaartitsivik assersuutigaa — taamaattumillu allassimaffik toqqaannartumik kalaallisuunngortissagaanni imaassagaluarpoq: „Silarsuup matuma isiginnaartitsivia nikittarpoq.“ Isiginnaartitsisartut – tassa naalakkersuinermi, upperisarsiornermi kulturimilu tusaamasat – tassani saqqummertaraat, inuttaaffigisatik takutittarlugit taavalu isiginnaartitsivimmi tassani allanit taarserneqartarlutik. Tassa taamaassimavoq ukiuni hundredelikkuutaani. Itsaq kunngit kaasarilluunniit kinguaariit ukiorpassuarni — allaammi ukiuni hundredelinni — pissaaneqartarput, pissutsillu arriitsuinnarmik allanngoriartortarlutik. Ullumikkulli taamaanngilaq. Oqaluttuarisaaneq toqutsisup qoorortuuata aqerluatulli sukkatigisumik allanngorsinnaavoq! Ulluni eqqissiviitsuni makkunani aqagussaq qanoq pisoqarfiussanersoq nalunartaqaaq.

4. (a) Kristumiut silarsuarmi pisartunut oqimaaqatigiissumik qanoq isiginnittaaseqartariaqarpat? (b) Nalunaajaatit qularunnaarsitsisut suut marluk misissussavavut?

⁴ Silarsuaq isiginnaartitsiviuppat silarsuarmilu qullersaasut isiginnaartitsisartuullutik, taava isiginnaartut tassaassapput kristumiut. a Kisiannili kristumiut ‘silarsuarmit pisuunnginnamik’ isiginnaartitsineq isiginnaartitsisartullu kikkuuneri ingasaallugit nakkutiginngilaat. (Johannesi 17:16) Isiginnaartitsinerulli pissanganarsinerpaaffissaanut — naggatissaanut ajunaarfiusussamut — nalunaaqqutaasinnaasunik alaatsinaaqqissaarput, nalunnginnamikkumi aaqqissuussineq maanna atuuttoq piuneerunneqaqqaarumaartoq aaqqissuussinerup nutaap naapertuilluartup erinigisaasullu Jehovamit atulersitaanissaa sioqqullugu. b Taamaattumik naggatissap nalaani inuunitsinnik silarsuassallu nutaap qanillineranik nalunaajaatit marluk misissoriartigik. Tassa 1) biibilimi ukiulersuineq (kronologii) aamma 2)  silarsuarmi pissutsit ajorseriarnerat. — Matthæusi 24:21; 2 Petrusi 3:13.

Paasiuminaatsoq kiisami paasineqartoq!

5. „Guutimik nalusunut piffissarititaasut“ suuppat, aamma sooq uatsinnut soqutiginaateqarpat?

⁵ Kronologii tassaavoq piffissanik naatsorsuineq, piffissalersuineq imaluunniit pisimasunik eqqortumik tulleriiaarineq. Jiisusi eqqartuivoq piffissamik silarsuarmi qullersaasut Guutip naalagaaffianit akornuserneqaratik isiginnaartitsisarfimmilusooq pingaarnertut inuttaallutik isiginnaartitsiffigisassaannik. Piffissaq taanna taavaa ‘Guutimik nalusunut piffissarititaasunik’. (Lukasi 21:24) „Piffissarititaasut“ taakkua naaneranni Guutip naalagaaffia qilammiittoq pissaanermik tigusiumaarpoq Jiisusi pisussaviusutut naalagaaffimmi qullersaralugu. Siullermik Jiisusi ‘akeqqami akornanni’ naalagaajumaarpoq. (Tussiaat 110:2) Kingorna Naalagaaffiup taassuma Danieli 2:44 naapertorlugu nunarsuarmi naalagaaffiit tamaasa „aserortissavai suujunnaarsillugillu“, namminerli soraajuitsumik atassalluni.

6. “Guutimik nalusunut piffissarititaasut” qanga aallartippat, qanoq sivisutigippat, qangalu naappat?

⁶ „Guutimik nalusunut piffissarititaasut“ qanga naasussaasimappat Guutillu naalagaaffia qanga aallartittussaasimava? Tamatumunnga akissut ‘isertuussatut naggatissaq nalliutserlugu naqissuserneqarsimasoq’ Biibilimi ukiulersuinermut tunngassuteqarpoq. (Danieli 12:9) Piffissaq pineqartoq qanillimmat akissut Jehovap biibilimik atuaqqissaaqatigiinnut maniguuttunut saqqummersippaa. Guutip anersaavata ikiuineratigut paasivaat „Guutimik nalusunut piffissarititaasut“ Jerusalemip ukiumi 607-mi u.n.s. aserugaaneraniit aallartittut, „piffissarititaasullu“ taakku ukiunik 2520-nik sivisussuseqassasut. Taakku tunngavigalugit naatsorsorpaat ukioq 1914 „Guutimik nalusunut piffissarititaasut“ naggatigisimassagaat. Aamma paasivaat ukioq 1914 aaqqissuussinerup maanna atuuttup naggatissaata aallartiffigigaa. Biibilimik atuaqqissaarnikkut nassuiarsinnaaviuk ukiumut 1914-imut qanoq naatsorsuisarnersut? c

7. Allassimaffiit suut ikiorsiullugit piffissarititat arfineq-marluk Danielip allagaani taaneqartut aallartiffiat naatsorsorsinnaavarput, piffissarititat qanoq sivisutigippat, qangalu naappat?

⁷ Danielip allagai tikkuussipput qanoq naatsorsuisoqassaneranik. Jehovap Babylonip kunngia Nebukadnezar „piffissarititaasut“ aallartinneranni ukiumi 607-imi u.n.s. Jerusalemimik aseruisikkamiuk naalagarsuaq taanna aqqutigalugu saqqummersitsivoq nunarsuarmi naalagaaffiit Guutimit akuleruffigineqaratik ingerlatsiumaartut piffissarititani assersuutaasuni arfineq-marlunni. (Ezekieli 21:26, 27; Danieli 4:16, 23-25) Piffissarititat arfineq-marluk qanoq sivisutigigamik? Saqqummersitani 11:2, 3 aamma 12:6, 14 naapertorlugit piffissarititat pingasut affarlu ullunik 1260-inik sivisussuseqarput. Taava tassa piffissarititat arfineq-marluk marloriaammik sivisussuseqassapput, imaappoq ullunik 2520-nik. Taanna naatsorsuinerup inerneraa? Naamik, tassami Danielip nalaani inuusut ilaat pruffiiti Ezekieli Jehovap ilisimatippaa kisitsit assersuutaasoq qanoq paasineqassanersoq: „Taakkuninngattaaq ukioq nungullugit ullormik naleqartittarpara.“ ( Ezekieli 4:6 (1900/1961)) Ukioq 607 u.n.s. aallaavigalugu ukiunik 2520-nik siumut naatsorsuigutta paasinarsissaaq piffissarititaasut 1914-imi naasimassasut.

Silarsuarmi pissutsit uppernarsarpaat „naggatissap nalaani“ inuusugut

8. 1914-ip kingorna silarsuarmi pissutsit ajornerulersimanerannut suut nalunaajaatigisinnaavigit?

⁸ 1914-miit silarsuarmi pisimasut uppernarsarpaat paasinninneq matuma siuliani eqqartorneqartoq Biibilimilu piffissanik naatsorsuinermik tunngaveqartoq eqqortuusoq. Jiisusi nammineq oqarpoq „silarsuup naggatissaa“ ilisarnaateqarumaartoq sorsunnernik, kaannernik nappaassuarnillu. (Matthæusi 24:3-8; Saqqummersitat 6:2-8) Ilumullumi taamaassimavoq 1914-ip kingorna. Apustili Paulusi aamma allanik paasissutissiivoq, oqarami inuit imminnut pissuserisaat erseqqissumik allannguuteqarumaartut. Allannguutaajumaartunik tamatta malugisimasatsinnik eqqartuinera eqqorluartorujussuuvoq. — 2 Timotheusi 3:1-5.

9. Alaatsinaattut 1914-ip kingorna silarsuarmi pissutsit pillugit qanoq oqarpat?

⁹ „Silarsuup matuma pissusia“ ilumut 1914-ip kingorna taama nikitsigisimava? Professori Robert Wohl atuakkiamini The Generation of 1914-imi ima allappoq: „Sorsunnermik tamatuminnga misiginnittut isumaqartuaannalersimapput 1914-imi aggusti silarsuup pisoqqap killigigaa silarsuullu allap aallartiffigalugu.“ WHO-mi mentalhygiejne-mut (sianissutsikkut nappaatinik pinaveersaartitsinermut) direktøriusoq dr. Jorge A. Costa e Silva ima allappoq: „Nalitsinni suut tamarmik tupinnaannartumik sukkasuumik allanngorarput, tamatumalu kingunerisaanik inuit aatsaat taama ernumatigalutillu stressertigilersimapput.“ Tamanna aamma illit misigiviuk?

10. 1914-ip kingorna silarsuarmi pissutsit ajorsisimanerannut suup pissutaaneranik Biibilimi qanoq paasitinneqarpugut?

 ¹⁰ Silarsuarmi pissutsit ajorseriarnerannut kina pisuua? Tamanna Saqqummersitat 12:7-9-mi qulaarneqarpoq: „Qilammi sorsunneqalerpoq. Mikaelip [Jiisusi-Kristusip] inngiliisalu uumasorujuk [Saatani Diaavulu] saassuppaat, uumasorujullu inngiliilu akiuupput kisianni artorsartitaallutik, qilammilu najugassaarutitaapput. Igitaavoq uumasorujussuaq taanna, pulateriaarsutoqaq . . . silarsuarmik tamarmik tammartitsiniartoq nunamut igitaavoq.“ Tassa Saatani Diaavulu ajornartorsiutinut pissutaavoq, 1914-imilu qilammit igitaanera ‘nunami immamilu’ eqqanaartortitsisimavoq. Biibilimimi allassimavoq: „Diaavulu ilissinnut aqqarmat kamattorsuulluni, piffissakissutsi nalunnginnamiuk.“ — Saqqummersitat 12:10, 12.

Isiginnaagassiap immikkoortua kingulleq

11. (a) Saatanip „silarsuarmik tamarmik“ tammartitsiniarnermini periaatsit suut atorpai? (b) Saatanip iliuuserisassaa immikkut ittoq suna apustilip Paulusip ilisimatitsissutigaa?

¹¹ Saatanip nalunngilaa naggatissani qanilliartortoq, taamaattumillu 1914-ip kingorna“silarsuarmik tamarmik” tammartitsiniarluni ilungersortorujussuuvoq. Peqqusersusaallaqqissorsuugami isiginnaartitsiviup tunulequtaata tunuani sulisarpoq silarsuarmi qullersaasut maligassiuisullu isiginnaartitsivimmut isertittarlugit isiginnaartitsisittarlugillusooq. (2 Timotheusi 3:13; 1 Johannesi 5:19) Siunertaasa ilagaat inuit ussiataarlugit isumaqalersinnissaat naalakkersueriaatsimi eqqissinivimmik pilersitsisinnaassasut. Sunniiniarnera iluatsissimasutut oqaatigisariaqarpoq, tassami inuit neriulluartuaannarput naak pissutsit ajorsiartuinnarnerannik nalunaajaatit amerliartuinnaraluartut. Apustilip Paulusip siulittuutigaa Saatanip isumaqatissarsiornera pissutsit aaqqissuussaanerata aserorneqanngitsiarnerani arajutsisassaanani malunniukkumaartoq. Allappoq: „Inuit oqarpata: „Sumilluunniit aarlerinartoqanngilaq!“ taava perlussap tassanngaannaq tikikkumaarpai ernilersup nallisitsisarneratut.“ — 1 Thessalonikamiut 5:3; Saqqummersitat 16:13.

12. Nalitsinni eqqissineqarnissaa pillugu qanoq iliuuseqartoqarsimava?

¹² Ukiuni kingullerni politikerit „eqqissineqarnissaa aarlerinartuerunnissaalu“ taannarisarpaat anguniakkatik assigiinngitsut eqqartorniaraangamikkit. Allaat 1986 nunarsuarmi eqqissinerup ukiuanik taavaat, ukiorli taaguutiminut inorsarpoq. Silarsuarmi qullersaasut „eqqissineqarnissaanik aarlerinartuerunnissaanillu“ suliniutigereersimasaat 1 Thessalonikamiut 5:3-p tamakkiisumik eqquunnerinerlugit imaluunniit Paulusi tikkuussinerluni pisussamut aalajangersimasumut ima pissanganartigiumaartumut allaat nunarsuarmi tamarmi malugineqanngitsoortussaanngitsumut?

13. Paulusip „sumilluunniit aarlerinartuerunnissaata“ nalunaarutigineqarnissaa siulittuutigigamiuk aseruinissaq tamatuma kingorna pisussaq sumut assersuuppaa, tamannalu sumik ilinniarfigisinnaavarput?

¹³ Biibilimi siulittuutit eqquutsinnagit imaluunniit eqquutilersinnagit paasivinneqarajunngimmata alaatsinaalluta utaqqisariaqarpugut. Soqutiginarporli Paulusip tassanngaannaq aseruinissaq „aarlerinartuerunneranik“ nalunaaruteqarnerup kingornatigut pisussaq arnap ernisuttup nallisitsisarnerinut assersuummagu. Qaammatit qulingiluat ingerlaneranni arnap naartusup meeqqap naarmiorisami ineriartornera malugiartuinnartarpaa. Immaqa meeqqap illiamiittup uummataata tillerpalunnera tusaaleraraa, ilaannilu meeraq aalarpaluleraraaq. Naartup inuunerata malunniutai erseqqarissigaluttuinnartarput, ullullu ilaanni tassanngaannaq annernartumik malugisaqartarpoq, tassa nallisitsilersarpoq sivisuumik utaqqisap — meeqqap inunngornissaata — erniinnaq pinissaanik nalunarunnaarsitsisumik. Tassa „aarlerinartuerunneranik“ nalunaaruteqarnissaq siulittuutigisaasoq qanorluunniit pissagaluaruni tassanngaannaq annernartumillu, kisiannili naggataatigut aamma nuannersumik, pisoqarneranik malitseqarumaarpoq — ajortut tamarmik aserugaanerannik aaqqissuussinerullu nutaap aallartinneranik.

14. Siunissami pisussat qanoq tulleriinneqassappat, qanorlu inerneqarumaarpat?

¹⁴ Aseruinissamut isiginnaartuunissaq kristumiunut aalajaatsunut misigisapalaajujumaarpoq. Siullermik nunarsuarmi kunngit (Saatanip aaqqissuussinerata politikkimut tunngasortaa) Babylon Angisooq (aaqqissuussinerup upperisarsiornermut tunngasortaa) saassukkumaarpaat aserorlugulu. (Saqqummersitat 17:1, 15-18) Taamaalillutik pissutsit ilimaginngisamik piumaarput. Saatanip naalagaaffianiittut imminnut saassutissapput, tamannalu Saatanip pinngitsoortissinnaassanngilaa. (Matthæusi 12:25, 26) Jehovap nunarsuarmi kunngit uummataasigut sunnerumaarpai ‘nammineq piumasani taakkununnga naammassitillugu’, tassa  nunarsuaq upperisarsiornikkut akerlilersortiminit aniguisillugu. Upperisarsiorneq eqqunngitsoq piuneerunneqareerpat Jiisusi-Kristusip qilammi sakkutoorpassuani siulersorumaarpai Saatanip aaqqissuussinerata nunngutai — niuernikkut politikkikkullu ingerlatsinerit — saassukkiartorlugit aserorluinnarumallugillu. Naggataatigut Saatani susinnaajunnaarsinneqassaaq. Taava isiginnaartitsivik saaguneqassaaq, isiginnaartitsinerlu sivisooq naassalluni. — Saqqummersitat 16:14-16; 19:11-21; 20:1-3.

15, 16. „Piffissap sivikilleqineranik“ eqqaasinneqarnerput uatsinnut qanoq sunniisariaqarpa?

¹⁵ Qaqugu tamakku tamarmik piumaarpat? Ulloq nalunaaqquttap-akunneraluunniit naluarput. (Matthæusi 24:36) Nalunngilarpulli „piffissaq sivikilleqisoq“. (1 Korinthimiut 7:29) Taamaattumik piffissap sinneruttup silatusaartumik atornissaa pingaaruteqarpoq. Qanoq taamaaliorsinnaavugut? Soorlu apustilip Paulusip oqaatigigaa ‘piffissaqqissoq atortariaqarparput’ inuunermi pingaarnerusunut, pingaannginnerusut tunulliutillugit, ullullu tamaasa isumatuumik atorlugit. Sooq? Tassa „ullut ajortuummata.“ ‘Guutip uagutsinnut piumasaa’ suunersoq paasivarput, taamaattumillu piffissap sinnera sivikitsoq naleqaqisorlu asiutikkusunngilarput. — Efesosimiut 5:15-17; 1 Petrusi 4:1-4.

¹⁶ Silarsuarmi aaqqissuussinerup atuuttup matuma tamarmi aserornissaanik ilisimanninnitta inuttut qanoq sunnertariaqarpaatigut? Apustili Petrusi iluaqutissatsinnik ima allappoq: „Tamakku tamarmik suujunnaartussaammata taava tamatigut illernartuullusilu Guutimillu mianerinnillusi inuusariaqarpusi.“ (2 Petrusi 3:11) Aap, taamatut inuusariaqarpugut! Petrusip siunnersuinera naapertorlugu 1) pissuserput eqqumaffigisariaqarparput illernartooqqullugu, aammalu 2) Jehovamut kiffartuussinermik aallussinerput taassumunnga asanningaarnitsinnut takussutissaatittariaqarparput.

17. Kristumiut aalajaatsut nakkarfissianut sunut mianersortariaqarpat?

¹⁷ Guutimik asanninnerup silarsuarmut matumunnga ussernartuinullu kajungilersinnaveersaassavaatigut. Aaqqissuussinerup matuma qanoq piumaarnissaa eqqarsaatigigaanni silarsuarmit inuulluarniutinut puussimasumit pisaritinnissaq navianarpoq. Silarsuarmi inuullutalu suligaluarluta tamatuma killilimmik atornissaanik siunnersorneqarluarnerput malittariaqarparput. (1 Korinthimiut 7:31) Tassa silarsuup sunniiniarneranit tammartitaannginnissarput pillugu mianersorluinnartariaqarpugut. Silarsuup matuma ajornartorsiutini iluarsisinnaanavianngilai, naassaanngitsumullu atasinnaanavianngilaq. Sooq taama qulanngitsigaluta taama oqarsinnaavugut? Oqaatsit Guutimit isumassarsiarititaasut imaammata: „Silarsuarlu piumatussusialu nungussapput, Guutilli piumasaanik iliortoq naassaanngitsumik atassaaq.“ — 1 Johannesi 2:17.

Pitsaanerpaanik qilanaarutissaqarpugut!

18, 19. Silarsuassami nutaami allannguutissat suut qilanaaraagit, aamma sooq utaqqerusunnarpat?

¹⁸ Saatanip tapersersuisuisalu isiginnaartitsinerallusooq Jehovap erniinnaq naammassitissavaa. Tamatuma kingorna Guutip kiffai aalajaatsut silarsuup matuma aaqqissuussaanerata naanerani annattut Guutip pilluaqqusineratigut „isiginnaartitsivimmik nikisitsissapput“. Sorsunnerit silarsuarmi pissutsinik aserorteriunnaassapput, Guutip „nunarsuarmi tamarmi sorsunnerit soraarsikkumaarmagit.“ (Tussiaat 46:10) Inuussutissaaleqisoqarunnaarluni ‘karrit naammangaartut nunami naajumaarput, qaqqat qaanni aalataarumaarput.’ (Tussiaat 72:16) Parnaarussiviit, politeeqarfiit, kinguaassiuutitigut nappaatit, ikiaroornartuerniarneq, avinniartunik eqqartuussiviit, akiliisinnaajunnaarnerit peqqarniissaarniallu qunutitsineri oqaluttuaannanngussapput. — Tussiaat 37:29; Esaja 33:24; Saqqummersitat 21:3-5.

¹⁹ Ilerrit imaarneqassapput, makissimasullu milliardilikkuutaat — „isiginnaartitsisut“ suli allat – takkussuutissapput. Kinguaariit ataatsimuuleqqippata aammalu ilaqutariit ikinngutigiillu sivisuumik imminnut takusimanatik takoqqippata qamanngalu pisumik eqitaarlutik qanoq nuannertigissava! Taava naggataatigut inuusut tamarmik Jehovamut pallorfiginnilissapput. (Saqqummersitat 5:13) Allannguutissat tamarmik naammassineqarpata isiginnaartitsivik saaguerneqaqqissaaq nunarsuarmilu paratiisi saqqummissalluni. Isiginnaartitsivimmiittut qimerloorukkit qanoq issavit? Qularnanngitsumik ima oqassaatit: „Qangali utaqqilerpara, utaqqilussinnanngilarali!“

[Quppernerup ataani ilanngussat]

Qanoq akissavit?

• Apustilip Paulusip ‘silarsuup matuma pissusiata nikittarneranik’ oqaasii nalitsinni qanoq eqquussimappat?

• Biibilimi piffissalersuineq qanoq iluaqutigissavarput „Guutimik nalusunut piffissarititat“ qaqugu naanissaata paasinissaanut?

• Silarsuarmi pissutsit allanngornerisa qanoq uppernarsarpaat 1914 „silarsuup naggatissaata“ aallartiffigigaa?

• „Piffissap sivikilleqinerata“ qanoq sunnertariaqarpaatigut?

[Atuaqqissaarnermi apeqqutit]

[Assiliartaq]

Paasiuminaatsoq kiisami paasineqarpoq!