Sooq Guutip anersaavanit siulersortissaagut?

‘Guutigaakkit illit. Anersaarpit ajunngitsup ingerlatillinga.’ — TUSSIAAT 143:10.

1. Nassuiaruk inuk nukimmit takussaanngitsumit qanoq siulersorneqarsinnaasoq.

 PUJORSIUT atornikuuiuk? Sukkuussanerluni aalajangerniaraanni taanna iluaqutaasinnaasarpoq. Tikkuutaa kajungersulik avannamut sammiuaannarpoq. Nukik takussaanngitsoq kajungersoq tikkuummik aalatitsisuuvoq. Ukiorpassuarni inuit nunakkut immakkullu angalagaangamik pujorsiut atortarsimavaat.

2, 3. (a) Qangarsuarujussuaq Jehovap nukik sakkortooq suna atorpaa? (b) Qanoq nalunngilarput ullumikkut Jehovap nukinganit sulisumit siulersorneqarsinnaalluta?

² Aammali takussaanngitsumik allamik nukeqarpoq siulersortinnissatsinnut suli pingaaruteqarnerusumik. Nukik taanna suugami? Biibilimi versini siullerni marlunni taanna allaatigineqarpoq. Mosesimik allakkani siullerni ima allassimavoq: “Pileqqaarneranni  Guutip qilak nunalu pinngortippai. . . . Guutillu anersaavata erngit qulangersimavai.” (1 Mosesi 1:1, 2) Erseqqippoq Guutip anersaani illernartoq — nukini sulisoq — pinngortitsinermini atoraa. Jehovap anersaani illernartoq atorlugu inuunermik tunisimammatigut allanillu tamanik pinngortitsisimammat qujamasuppugut. — Jobi 33:4; Tussiaat 104:30.

³ Taamani Jehovap nukini sulisoq atorpaa, ullumikkummi nukik taanna inuunitsinnut sunniuteqarsinnaava? Guutip ernerata ajoqersukkani oqarfigai taamaassinnaasoq. Oqarfigai anersaap illernartup ‘sallusuissummut tamarmut’ siulersorumaarai. (Johannesi 16:13) Anersaaq illernartoq suua? Aamma sooq taassumannga siulersortikkumassaagut?

Anersaaq illernartoq suua?

4, 5. (a) Ataasiullunilu pingasuussusermik upperinnittut anersaaq illernartoq pillugu qanoq kukkusumik isumaqarpat? (b) Anersaaq illernartoq sorpiaanersoq qanoq nassuiassaviuk?

⁴ Oqaluussinitsinni oqaloqatigisartakkatta ilaat anersaamut illernartumut tunngatillugu Biibilimut naapertuutinngitsumik upperisaqartarput. Ataasiullunilu pingasuussusermik upperinnittut kukkusumik isumaqarput anersaaq taanna kinaassusiliusoq — Guutip, Ataatap, naligigaa. (1 Korinthimiut 8:6) Taamaattuminguna Biibilimik nutsikkat ilaanni allassimasartoq “Anersaaq Illernartoq”, tassa naqinnerit siulliit angisuut atorlugit. Kisianni ataasiullunilu pingasuussusermik ajoqersuut Biibilimut naapertuutinngilluinnarpoq.

⁵ Anersaaq illernartoq suugami? Mosesimik allakkat siulliit 1:2-mut nassuiaammi quppernerup ataani ilanngussami Biibili-miittumi oqaaseq ‘anersaaq’ pillugu ima allassimavoq: “Hebræerit oqaasiat aamma isumaqarsinnaavoq: anorersuaq.” (Naleqqiuguk 1 Mosesi 8:1) Anori takusinnaanngikkaluarlutigu qanoq sunniuteqarsinnaanera takusinnaavarput. Taamatuttaaq anersaap illernartup takussaanngitsuugaluarluni sunniuteqarnera takuneqarsinnaasarpoq. Anersaaq illernartoq kinaassusiliunani nukiuvoq Guutimeersoq. Guutip anersaani arlaannut sunniuteqartittarpaa piumasani naammassiniarlugu. Nukik asseqanngilluinnartoq taanna Guutimeersuunersoq upperiuminaappa? Naamerluinnaq! — Atuakkit Esaja 40:12, 13.

6. Daavip Jehova sumik qinnuigaa?

⁶ Jehovap uagut siulersorumalluta anersaani atortuarumavaa? Daavi ima neriorsorpaa: “Ilinniartissavakkit ilitsersorlutillu ingerlavissannik.” (Tussiaat 32:8) Daavi Guutimit siulersortikkusuppa? Aap, Jehovami ima qinnuigaa: “Ajoqersunnga illit piumasattut ilioqqullunga, Guutigigakkimmi illit. Anersaarpit ajunngitsup ingerlatillinga.” (Tussiaat 143:10) Uaguttaaq Guutip anersaavanit siulersortikkumasariaqarpugut. Sooq? Pissutaasut sisamat sammilaariartigit.

Siulersorneqarnissarput pisariaqartipparput

7, 8. (a) Sooq siulersorneqartariaqarpugut? (b) Assersuuteqarlutit oqaluttuariuk sooq silarsuarmi matumani ajortumi Guutimit siulersorneqartariaqartugut.

⁷ Guutip anersaavanit siulersortikkumanissatsinnut pissutaasoq siulleq tassaavoq siulersorneqarnissamik pisariaqartitsinerput. Jehovap imminut siulersornissamut piginnaassuseqartinngilaatigut. Naammalluinnanngitsuugattalu nammineerniaraluaraangatta kukkussuterpassuaqartarpugut. Pruffiiti Jeremia ima allappoq: “Nalunngilara, Jehova, inuup ingerlavissi oqartussaaffiginngikkaa. Ingerlasup alloriartarnini aqussinnaanngilai.” (Jeremia 10:23, NV) Sooq taamaappa? Guutip Jeremia aqqutigalugu ima nassuiaappaatigut: “Tamanit annerusumik uummat tatigisassaanngitsuuvoq. . . .  Kiammi inuup uummammiugisai ilisimasinnaavai.” — Jeremia 17:9; Matthæusi 15:19.

⁸ Takorlooriaruk inuk orpippassuartigut navialinarsinnaasutigut inoqajuitsukkulluunniit nalusamigut pisuttuarniartoq. Silatusaassanngilaq pujorsiuteqarnanilu ilisimasortamit siulersorneqanngikkuni. Angalaffigisani angalaffiginikuunnginnamiuk tammarunilu qanoq ililluni annassanerluni naluguniuk inuunini navianartorsiortissavaa. Taamatuttaaq inuk silarsuarmi matumani ajortumi nammineersinnaalluni isumaqaruni Guutimillu siulersorneqarusunngikkuni inuunini navianartorsiortissavaa. Daavip qinuneratut Jehova ikioqqulluta ima qinnuigisariaqarparput: “Ingerlavigeqqusannik ilinniartinnga, [Jehova], aqqutigeqqusannik ajoqersuunnga!” (Tussiaat 25:4; 23:3) Jehovamit qanoq siulersorneqarsinnaagatta?

9. Qupp. 13-mi ersersinneqartutut anersaamit illernartumit qanoq siulersorneqarsinnaavugut?

⁹ Maniguulluta Jehova tatigigutsigu siulersorumalluta anersaaminik illernartumik tuniumavaatigut. Nukik sulisoq tamanna sumut iluaqutigisinnaavarput? Jiisusip ajoqersukkani ima nassuiaappai: “Anersaap Illernartup, Ataatap uanga atinni aallartitassaata tamanik ajoqersussavaasi ilissinnullu oqaaserisannik tamanik eqqaasikkumaarlusi.” (Johannesi 14:26) Guutip oqaasia, Kristusip ajoqersuutai ilanngullugit, qinunikkut atuaqqissaartarutsigu anersaaq illernartoq Jehovap ilisimassuseqangaarnerata paasinissaanut iluaqutigissavarput Jehova naalassinnaaniassagatsigu. (1 Korinthimiut 2:10) Inuunitsinni ilimaginngisatsinnik pisoqaraangat Guutip anersaava qanoq iliornissatsinnut iluaqutigisassavarput. Anersaavata najoqqutassianik Biibilimeersunik ilikkakkatsinnik eqqaasissavaatigut, najoqqutassiallu taakku tunngavigalugit ajunngitsumik aalajangiisinnaanissatsinnut paasitissavaatigut.

Jiisusi Guutip anersaavanit siulersorneqarpoq

10, 11. Anersaamut illernartumut tunngatillugu Jiisusip suna naatsorsuutigaa, anersaarlu illernartoq qanoq iluaqutigaa?

¹⁰ Guutip anersaavanit siulersortikkumanissatsinnut pissutaasut aappaat tassaavoq Guutip ernerata anersaamit siulersortinnera. Jiisusip naatsorsuutigaa nunarsuarmukaruni anersaamit illernartumit ikiorneqarnissani. Nammineq pilluni siulittuut una nalunngilaa: “Najussavaa [Jehovap] anersaavata, anersaap ilisimanartup paasisimasaqarnartullu, anersaap siunnersuisup pissaasullu, anersaap ilisimasaqalersitsisup Guutimillu mianerinnitsitsisup.” (Esaja 11:2) Takorlooriaruk Jiisusip nunarsuarmukaruni pissutsit atugassani imaannaanngitsuusussaammata Guutip anersaavanit ikiorneqarnissani qanoq kissaatigitigisimassagaa!

¹¹ Jehovap oqaasii eqquupput. Jiisusi kuisissimatsiaannartoq  qanoq pisoqarsimaneranik iivangkiiliu Lukasip allagaani ima allassimasoqarpoq: “Jiisusi Jordanimiit uterpoq Anersaamik Illernartumik ilumioqangaarluni; Anersaamillu ingerlanneqarluni [inoqajuitsumiippoq].” (Lukasi 4:1, 2) Tassaniitilluni Jiisusi iisinnginniarluni qinulluni eqqarsaatiginneqqissaarlunilu Jehovamit ilitsersorneqarunarpoq qanorlu pisoqarnissaanut piareersarneqarunarluni. Jiisusip isumaa uummataalu Guutip nukinganit sulisumit sunnerneqartarmata eqqarsartaasia aalajangiisarneralu taassumannga siulersorneqartarput. Taamaattumik Jiisusip Ataatami sumik piumaffigineraani naluneq ajorpaa, Ataatamilu piumasaa malillugu iliortuaannarpoq.

12. Sooq Guutip anersaavanit illernartumit siulersorneqarnissarput qinnutigisariaqarparput?

¹² Jiisusip inuunermini Guutip anersaava qanoq pingaaruteqartigisoq nalunnginnamiuk ajoqersukkani kajumissaarpai anersaaq illernartoq qinnutigisaqqullugu aamma anersaamit siulersorneqarteqqullugit. (Atuakkit Lukasi 11:9-13). Sooq Guutip anersaavanit illernartumit siulersorneqarnissarput qinnutigisariaqarparput? Anersaamit illernartumit siulersortikkutta eqqarsartaaserput allanngorsinnaammat ‘Kristusillu eqqarsaataasa’ pigilernissaanut iluaqutigisinnaagatsigu. (1 Korinthimiut 2:16; Romamiut 12:2) Inuunitsinni Guutip anersaavanit siulersortinnitsigut Kristusip maligassiaa malissinnaavarput. — 1 Petrusi 2:21.

Silarsuup anersaavanit tammartinneqarsinnaavugut

13. Silarsuup anersaava suua, inuillu qanoq iliortittarpai?

¹³ Guutip anersaavanit siulersortikkumanissatsinnut pissutaasut pingajuat tassaavoq Guutip anersaavanit siulersorneqanngikkutta silarsuup anersaavanit tammartinneqariaannaanerput. Ullumikkut inuit amerlanersaat silarsuup anersaavanit aqunneqarput. Nukiup sakkortuup tamatuma inuit anersaap illernartup siulersuineranut akerliusumik iliuuseqartittarpai. Silarsuup anersaavata inuit Kristusip eqqarsaataanik piginnilersinnagit silarsuup naalagaaneratut, Saatanitut, eqqarsartaaseqalersittarlugillu iliuuseqartittarpai. (Atuakkit Efesosimiut 2:1-3; Titusi 3:3). Inuk silarsuup anersaavanit siulersortillunilu ‘uinngup suliaanik’ iliuuseqartalerpat kingunipiloqassaaq. Taassuma ‘Guutip naalagaaffia kingornussarsiarissanngilaa’. — Galatiamiut 5:19-21.

14, 15. Silarsuup anersaava qanoq akiorsinnaavarput?

¹⁴ Silarsuup anersaavanik akiuisinnaaniassagatta Jehovap pisariaqartitatsinnik tunivaatigut. Apustili Paulusi allappoq “Naalakkami pissaanersuanilu” nakussatsinneqartuartariaqartugut ‘ullussami ajortumi akiuussinnaaqqulluta’. (Efesosimiut 6:10, 13) Saatanimit tammartinneqannginniassagatta  Jehovap anersaani atorlugu nakussatsittarpaatigut. (Saqqummersitat 12:9) Silarsuup anersaava sunniinertorujussuuvoq, tamatumanngalu sunnertinngilluinnarsinnaanngilagut. Akiorsinnaavarpulli. Anersaaq illernartoq sunniinertuneruvoq iluaqutigingaarsinnaavarpullu!

¹⁵ Ukiuni hundredelinni siullerni sallusuissummit qimaguttut pillugit apustili Petrusi ima allappoq: “Aqqut narlusooq qimakkamikku tammarput.” (2 Petrusi 2:15) Qujamasuutigisinnaavarput ‘silarsuup anersaava pinnagu Anersaaq Guutimit pisoq pissarsiarigatsigu’. (1 Korinthimiut 2:12) Anersaamit illernartumit siulersortinnitsigut Jehovallu imminut attaveqarlualissutaasunik tamanik uagutsinnut tunniuttagaanik iluaqutiginninnitsigut eqqortuliorsinnaallutalu silarsuup anersaava akiorsinnaavarput. — Galatiamiut 5:16.

Anersaaq illernartoq inerititaqarluartitsisarpoq

16. Anersaap illernartup suut uagutsinni ineriartortissinnaavai?

¹⁶ Guutip anersaavanit siulersortikkumanissatsinnut pissutaasut sisamaat tassaavoq uagutsinnik inerititaqarluartitsisinnaanera — tassa pisusserineqartussanik pitsaasunik ineriartortitsisarnera. (Atuakkit Galatiamiut 5:22, 23, NV). a Soorunami tamatta asanninnerunissarput, nuannaarnerunissarput eqqisseqatigiissitsinerunissarpullu kissaatigaarput. Aamma kamaginninnerunissarput, inussiarnisaarnerunissarput ajunngitsuliornerunissarpullu kissaatigaarput. Aamma tamatta iluaqutigisinnaavarput upperluarnerunissarput, saamanermik imminullu naalakkersinnaanermik ersersitsinerunissarput. Pissuserineqartussat nuannersut taakku uagutsinnut, ilaquttatsinnut ilagiinnullu iluaqutaangaarput. Taamatut inerititaqarumalluta ilungersortuartariaqarpugut. Anersaammi inerititaanik pisariaqartitsinerput taassumalu uagutsinni inerititaqartitsisinnaanera killeqanngillat.

17. Anersaap inerititaanik qanoq ersersitsilluarnerusinnaavugut?

¹⁷ Silatusaassaagut una eqqarsaatigeqqissaarutsigu: Oqaatsitsinnit iliuutsitsinnillu erserpa anersaamit illernartumit siulersortillutalu tamatuma inerititaanik inerititaqartugut? (2 Korinthimiut 13:5a; Galatiamiut 5:25) Taavami anersaap inerititaanut ilaasut pissuserineqartussat pissuseriumallugit ikiorneqartariaqarluta paasigutsigu? Taava anersaamit illernartumit siulersortinnissarput ilungersuutiginerusariaqarparput pissuserineqartussanik taakkuninnga inerititaqarumalluta. Taamaaliorsinnaavugut anersaap inerititaanut ilaasut tamaasa immikkut Biibili Biibililersaarutillu atorlugit misissoqqissaartarnerisigut. Eqqarsaatigisariaqarparput ulluinnarni anersaap inerititaanik qanoq ersersitsisinnaanerluta, taavalu ersersilluarnerunissaat sulissutigalugu. b Inuunitsinni qatanngutittalu inuuneranni anersaap illernartup siulersuinerata ajunngitsumik kinguneqarnera takugaangatsigu paasilertarparput anersaamit illernartumit siulersorneqartariaqarluta.

Anersaamit illernartumit siulersortikkumavit?

18. Guutip anersaavanit siulersorneqarnermut tunngatillugu Jiisusi qanoq ilinniarfigisinnaavarput?

¹⁸ Biibilimi allaatigineqarpoq Jiisusip nunarsuarmiikkallarami Guutip anersaava illernartoq  iluaqutigingaarsimagaa. Taassumannga siulersorneqarnissani kissaatigaa. Anersaamit kajumissisinneqaraangami siulersuinera kajumilluni akuerisarpaa. (Markusi 1:12, 13; Lukasi 4:14) Jiisusip pisimaneratut, illit Guutip anersaavanit siulersortikkumasarpit?

19. Anersaamit illernartumit siulersortikkumalluta susariaqarpugut?

¹⁹ Ullumikkut Guutip nukinganit sulisumit siulersortikkumasut suli siulersorneqartarput. Qanoq taassumannga siulersortissinnaavit? Jehova qinnuigiuaannaruk anersaaminik illernartumik tuneqqullutit taassumanngalu siulersortikkumanissannut ikioqqullutit. (Atuakkit Efesosimiut 3:14-16). Biibilimik atuaqqissaartarnikkut Guutip anersaavanit siulersortikkumanerit ersersiguk, anersaarmi illernartoq aqqutigalugu Guutimit isumassarsiarititaavoq. (2 Timotheusi 3:16, 17) Siunnersuutit iluaqutaasut Biibilimiittut maleruakkit anersaallu illernartup siulersuinera akueralugu. Taamaaliornikkut ersersissavat Jehovap silarsuarmi matumani ajortumi siulersuilluarsinnaaneranik tatiginninnerit.

[Quppernerup ataani ilanngussat]

Allaaserisami pingaarnerit eqqaamavigit?

• Anersaaq illernartoq uagutsinnut qanoq sunniisinnaava?

• Guutip anersaavanit siulersortikkumanissatsinnut pissutaasut sisamat suuppat?

• Illit qanoq anersaamit illernartumit siulersortissinnaavit?

[Atuaqqissaarnermi apeqqutit]

[Qupp. 11-mi assiliartaq]

Jiisusip inuunerani Guutip anersaava sunniuteqangaarpoq

[Qupp. 13-mi assiliartaq]

Guutip anersaava inuit taassumannga siulersortikkumasut isumaannik uummataannillu sunniisarpoq